Aoao Atu i le Mana ma le Pule a le Atua

E le mafai e upu ona faamatalaina lo matou agaga faafetai i faiaoga o le Ekalesia atoa. Matou te alolofa ia te outou ma e i ai lo matou talitonuga tele ia te outou. O outou o se tasi o vavega sili o le talalelei toefuataiina.

O loo i ai moni se mealilo i le avea ma se faiaoga faamanuiaina o le talelelei, ina ia mafai ona aoao atu i le mana ma le pule a le Atua. Ua ou faaaogaina le upu mealilo ona o mataupu faavae e faalagolago ai le faamanuiaina o se faiaoga, lea e na o i latou lava o loo i ai se molimau o le mea na tupu i lena taeao matagofie, manino, segisegi i le tautotogo o 1820, e mafai ona malamalama i ai.

I le tali mai i le tatalo faamaualalo a se alii e 14 tausaga, na matala ai le lagi. Na faaali ma fetalai mai le Atua le Tama Faavavau ma Lona Alo o Iesu Keriso, i le Perofeta o Iosefa Samita. Na amatalia ai le toefuataiga o mea uma lava lea ua leva ona tatalia, ma o le mataupu faavae o faaaliga sa faavaeina e faavavau i la tatou tisipenisione. O le savali a Iosefa, ma o la tatou savali i le lalolagi, e mafai ona aoteleina i upu e lima: “Ua fetalai mai le Atua.” Sa fetalai mai o Ia anamua, sa fetalai mai o Ia ia Iosefa, ma o le a fetalai mai o Ia ia te oe. O le mea lenei e tulaga ese ai oe mai isi faiaoga uma o le lalolagi. O le pogai lenei e le mafai ai ona e toilalo.

Ua valaauina oe e le agaga o valoaga ma faaaliga, ma ua vaetofiaina e le pule o le perisitua. O le a le uiga o lenei mea?

Muamua, o lona uiga o loo e i ai i le feau a le Alii. O oe o Lona sui, ma ua faatagaina ma tuuina atu ia te oe le tiutetauave e suitulaga ia te Ia ma galue e fai ma Ona sui. I le avea ai ma Ona sui, ua e agavaa ai i Lana fesoasoaniga. E tatau ona e fesili ifo ia te oe lava, “O le a se fetalaiga a le Faaola pe ana faapea Na te aoaoina la’u vasega i le asō, ma o le a le auala o le a Ia aoao atu ai?” E tatau la ona e faia faapena.

O lenei tiutetauave e ono mafua ai ona lagona e nisi le le agavaa po o sina fefe foi. E le faigata le ala. Ua saunia e le Alii le ala mo tagata agavaa uma o le Au Paia o Aso e Gata Ai ina ia aoao atu i le ala a le Faaola.

Lona lua, ua valaauina oe e talai atu le talalelei a Iesu Keriso. E le tatau ona e aoaoina atu ou oe lava manatu po o filosofia, e fefiloi ma tusitusiga paia. O le talalelei o “le mana lava lea o le Atua e ola ai i latou uma,”¹ ma ua na o le talalelei e faaolaina ai i tatou.

Lona tolu, ua poloaiina oe e aoao atu ia mataupu faavae o le talalelei e pei ona mauaina i tusitusiga faavae o le Ekalesia, ia aoao atu saunoaga a aposetolo ma perofeta o aso nei, ma ia aoao atu mea e aoaoina ai oe e le Agaga Paia.

O fea la tatou te amata atu ai?

O la tatou tiutetauave muamua lava ma le sili, o le ola lea ina ia tatou maua le Agaga Paia e fai ma o tatou taiala ma soa. Ina ua taumafai Ailama Samita ia auai i lenei galuega o aso e gata ai, na fetalai le Alii: “Faauta, o lau galuega lenei, e tausi i a’u poloaiga, ioe, ma lou manatu atoa, mafaufau ma lou malosi atoa.”² O le vaega lenei e amata ai. O le fautuaga, na tuuina mai e le Alii ia Ailama, o le fautuaga lava foi lea e tasi ua Ia tuuina mai i le Au Paia i augatupulaga uma.

I le saunoa atu ai i faiaoga i aso nei, na ta’ua ai e le Au Peresitene Sili e faapea: “O le vaega aupito taua o lau auaunaga, o lau oe lava tapenaga faaleagaga i aso taiasi, e aofia ai le tatalo, suesueina o tusitusiga paia, ma le usiusitai i poloaiga. Matou te uunaia oe ia tuuto atu oe lava ia ola i le talalelei ma se faamoemoega sili atu nai lo o se isi lava taimi muamua.”³

E taua e faapea e le’i saunoa mai le Au Peresitene Sili e faapea, o le vaega aupito taua o lau auaunaga o se faiaoga o le tapenaina lelei lea o au lesona po o le atamai i metotia eseese faafaiaoga. Ioe, e ao ona e saunia ma le filiga mo lesona taitasi ma taumafai ia iloa pe faapefea ona e aoao atu ina ia fesoasoani ai i au tagata o le vasega ia faaaoga o latou faitalia ma faataga le talalelei ia ulu atu i totonu o o latou loto, ae o le vaega muamua ma aupito taua o lau auaunaga, o lau tapenaga patino lea faaleagaga. A o e mulimuli i lenei fautuaga ua folafolaina mai e le Au Peresitene Sili: “O le a fesoasoani le Agaga Paia ia te oe ina ia e iloa le mea e fai. O le a tuputupu a’e lau oe lava molimau, o le a faalolotoina lou lava liua, ma o le a faamalosia oe e feagai ma luitau o le olaga.”⁴

O a nisi faamanuiaga sili atu e manao i ai se faiaoga?

O le isi, ua poloai mai le Alii, ae tatou te le’i saili e talai atu Lana upu, e tatau ona tatou saili ia maua [Lana] upu.⁵ E ao ona avea outou o ni alii ma ni tamaitai e matua malolosi i le malamalama e ala i le sailiili ma le filiga i tusitusiga paia, ma e ala i le teufatuina i o outou loto. Ma a o e ole atu mo le fesoasoani a le Alii, o le a Ia faamanuia oe i Lona Agaga ma Lana upu. O le a e maua le mana o le Atua seia oo i le faatalitonuina o tagata.

Ua ta’u mai e Paulo ia i tatou, e lua auala e oo mai ai le talalelei i tagata, i le upu ma i le mana.⁶ O le upu o le talalelei ua tusia i tusitusiga paia, ma e mafai ona tatou maua le upu e ala i le suesue ma le filiga. E oo mai le mana o le talalelei i olaga o i latou o e o loo ola e avea le Agaga Paia ma a latou soa ma ē e mulimuli i uunaiga latou te maua. O nisi e na o le mauaina o le upu e taulai atu i ai o latou mafaufau, ma avea ai i latou ma tagata atamamai i le momoliina atu o faamatalaga. O isi e le faia a latou tapenaga ae faamoemoe i le agalelei o le Alii, o le a Ia fesoasoani ai ia i latou i le taimi o le vasega. E le mafai ona e faamoemoe e fesoasoani le Agaga ia te oe ia manatua mau ma mataupu faavae e te le’i suesueina pe mafaufauina. Ina ia lelei le aoaoina atu o le talalelei, e ao ona i ai le upu ma le mana o le talalelei i lou olaga.

Na malamalama Alema i nei mataupu faavae ina ua ia maua le olioli i atalii o Mosaea ma le auala na latou aoao atu ai ma le mana ma le pule o le Atua. Tatou te faitauina:

“O i latou o ni alii mafaufau lelei ma sa latou suesue i tusitusiga paia ma le filiga, ina ia latou iloa le afioga a le Atua.

“Ae sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o … faaaliga.”⁷

O le isi, e tatau ona e aoao ia faalogo. Sa aoao mai e Elder Jeffrey R. Holland le mataupu faavae lenei i faifeautalai. O le a ou sii maia le saunoaga a Elder Holland, ae ua ou faia i se faatagaga e suitulaga ai ia upu faifeautalai ma tagata sailiili i upu faiaoga ma tagata aooga: “E lona lua atu i le tiutetauave ua i ai i [faiaoga] e faalogo i le Agaga, o le tiutetauave lea e ao ona latou faalogo i le [tagata aoga]. … Afai o le a tatou faalogo i ni taliga faaleagaga, … o le a ta’u mai e a [tatou tagata aooga] ia i tatou po o a lesona latou te manaomia ona faalogo i ai!”

Sa faaauau le saunoaga a Elder Holland: “O le mea moni, o loo soona taulai atu pea [faiaoga] i le momoliina atu o anotusi o lesona ua masani ai, ma fai soo, nai lo o le taulai atu i a latou [tagata aooga] o ni tagata taitoatasi.”⁸

A uma ona e sauniaina oe lava ma lau lesona i le mea sili e te gafatia, e tatau ona e loto loa e taatia atu [i le Agaga]. A oo mai ia uunaiga filemu a le Agaga Paia, e tatau ona e maua le lototele e taatiaese ai lau lesona fuafuaina ma au faamatalaga ae alu atu i le mea e ave i ai oe e na uunaiga. A tatou faia lenei mea, o le lesona e te momoliina atu e le toe avea ma au lesona, ae e avea ma lesona a le Faaola.

A o e tuuto atu oe lava ia ola i le talalelei ma faamoemoega e sili atu nai lo o se isi lava taimi muamua, ma suesue i tusitusiga paia, ma teufatu i lou loto, o lena lava Agaga Paia, o le na faaalia mai nei upu i aposetolo ma perofeta anamua, o le a molimau atu ia te oe i lo latou moni a’ia’i. O le mea moni, o le a toe faaali atu e le Agaga Paia ia te oe ia mea. A tupu lenei mea, o upu e te faitauina o le a le na o ni upu a Nifae po o Paulo po o Alema, ae o le a avea foi ma au upu. Ma, a o e aoao atu, o le a mafai e le Agaga Paia ona faamanatu atu ia te oe mea uma. Ioe, “o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai.”⁹ Pe a tupu lenei mea, o le a e tautala atu ai i se mea e te le’i fuafuaina e ta’u atu. Ma, afai o le a e gauai atu, o le a e aoaoina se mea mai mea e te tautala atu ai a o e aoao atu. Na saunoa Peresitene Marion G. Romney, “Ou te iloa i taimi uma pe a ou tautala i musumusuga a le Agaga Paia ona ou te aoaoina i taimi uma se mea mai se mea na ou tautala ai.”¹⁰ Ia manatua, o le faiaoga o se tamaitiiti aoga foi.

Ma le mea mulimuli, e tatau ona tu o se molimau tutoatasi o mea uma e te aoaoina atu, ae ia le na o se siuleo o upu i se tusi lesona po o manatu o isi. A e taumafa i afioga a Keriso ma tauivi e ola i le talalelei ma se faamoemoega sili atu nai lo o se isi lava taimi muamua, o le a faaali atu e le Agaga Paia ia te oe o mea o loo e aoaoina e moni. O le agaga lenei o faaaliga, ma o lenei lava agaga e tasi o le a momoliina atu lau savali i loto o i latou o e o loo naunau ia maua.

Sei o tatou faamaea i le mea sa tatou amata ai—i le Vao Paia. Ona o le mea na tupu i lena taeao matagofie o le tautotogo e lei leva tele atu, ua e agavaa ai e aoao atu i le mana ma le pule a le Atua. Ou te tuuina atu ai la’u molimau paia ma le tutoatasi i nei mea i le suafa o Iesu Keriso, amene.