ຄຳສອນ ແລະ ຫລັກທຳທີ່ມີຢູ່ໃນຫລັກແຫ່ງຄວາມເຊື່ອ
ໂດຍ ແອວເດີ ແອວ ທອມ ແພຣີ
ແຫ່ງສະພາອັກຄະສາວົກສິບສອງ
ຫລັກແຫ່ງຄວາມເຊື່ອແຕ່ລະຂໍ້ຕື່ມຄຸນຄ່າທີ່ພິເສດໃຫ້ແກ່ຄວາມເຂົ້າໃຈຂອງເຮົາກ່ຽວກັບພຣະກິດຕິຄຸນຂອງພຣະເຢຊູຄຣິດ.
ຕອນຂ້າພະເຈົ້າໄດ້ຮັບມອບໝາຍໃຫ້ກ່າວໃນພາກຖານະປະໂລຫິດຂອງກອງປະຊຸມໃຫຍ່ສາມັນ, ຂ້າພະເຈົ້ານຶກເຖິງຄູສອນຫ້ອງຮຽນປະຖົມໄວທີ່ດີເລີດຄົນໜຶ່ງໄດ້ທັນທີ. ຄວາມປາດຖະໜາຂອງນາງແມ່ນເພື່ອຕຽມພວກເຮົາໃຫ້ມີຄ່າຄວນທີ່ຈະຮັບເອົາຖານະປະໂລຫິດ. ນາງໄດ້ສອນພວກເຮົາກ່ຽວກັບເງື່ອນໄຂສຳລັບການຮຽນຜ່ານຊັ້ນປະຖົມໄວ—ການທ່ອງຈຳຊື່ຂອງສະມາຊິກໃນສະພາອັກຄະສາວົກສິບສອງ ແລະ ຫລັກແຫ່ງຄວາມເຊື່ອ. ນາງຍັງໄດ້ໃຫ້ສັນຍາກັບພວກເຮົາອີກວ່າ—ຖ້າຫາກເຮົາທຸກຄົນສາມາດທ່ອງຈຳຫລັກແຫ່ງຄວາມເຊື່ອໄດ້ທັງໝົດສິບສາມຂໍ້, ແລ້ວພວກເຮົາຈະສາມາດເລືອກບ່ອນເຮັດກິດຈະກຳຕອນມື້ສຸດທ້າຍຂອງຫ້ອງຮຽນ.
ພວກເຮົາໄດ້ເລືອກເອົາບ່ອນພິເສດ ທີ່ພວກເຮົາມັກພາກັນໄປຍ່າງໃນຄ້ອຍພູ ໃກ້ເຄື່ອນບ່ອນທຳອິດ ຢູ່ປາກທາງເຂົ້າຫ່ອມພູໂລແກນ. ມັນມີເດີ່ນຮາບພຽງທີ່ມີເຕົາໄຟ ບ່ອນທີ່ພວກເຮົາສາມາດປີ້ງໃສ້ກອກ ແລະ ປີ້ງ ເຂົ້າໜົມຫວານ. ຕອນພວກເຮົາເລືອກສະຖານທີ່ນັ້ນ, ພວກເຮົາລືມຄິດກ່ຽວກັບຄູສອນຂອງພວກເຮົາ ຜູ້ມີອາຍຸສູງກວ່າພວກເຮົາ ແລະ ກໍບໍ່ເກັ່ງເລື່ອງການໄປຍ່າງໃນພູ. ຖ້າຫາກພວກເຮົາໄດ້ພິຈາລະນາໃຫ້ຖ້ວນຖີ່ກ່ອນ, ພວກເຮົາຄົງຮູ້ວ່າ ຄູຂອງພວກເຮົາຈະມີບັນຫາ. ນາງໄດ້ຮັກສາຄຳສັນຍາ ແລະ ໄດ້ເຮັດຕາມພວກເຮົາ.
ທຳອິດ, ພວກເຮົາໄດ້ປີນຂຶ້ນຄ້ອຍນ້ອຍ. ໃນຕອນນັ້ນ ບໍ່ມີສາຍໄຟຢູ່ແຖວນັ້ນເພື່ອຕັນທາງບໍ່ໃຫ້ຜ່ານ. ພວກເຮົາຈຶ່ງໄປຍ່າງຫລິ້ນໄດ້. ດ້ວຍຄວາມຊ່ອຍເຫລືອເລັກນ້ອຍ ຄູຂອງພວກເຮົາກໍໄດ້ຍ່າງຂຶ້ນຄ້ອຍພູໄປກັບພວກເຮົາ. ເມື່ອຂຶ້ນໄປເຖິງແລ້ວ ພວກເຮົາໄດ້ເຫັນວ່າ ມັນເປັນຜາຊັນ ບ່ອນທີ່ເອີ້ນວ່າ “ອອງເຕົ່າ.”
ຫລັງຈາກພວກເຮົາໄດ້ໄປເຖິງ, ຄູຂອງພວກເຮົາໄດ້ເຊົາເມື່ອຍຢູ່ດົນເຕີບ. ຈົນເຖິງເວລາຕຽມອາຫານ ແລະ ໄດ້ນັ່ງລົງກິນນຳກັນ, ນາງຈຶ່ງມີແຮງຂຶ້ນແດ່ເພື່ອສອນບົດຮຽນສຸດທ້າຍໃຫ້ພວກເຮົາ. ນາງໄດ້ບອກພວກເຮົາວ່າ ນາງດີໃຈຫລາຍທີ່ໄດ້ສອນພວກເຮົາໃນຊັ້ນປະຖົມໄວເປັນເວລາສອງປີ. ນາງໄດ້ເວົ້າຍ້ອງຍໍພວກເຮົາທີ່ສາມາດທ່ອງຈຳຫລັກແຫ່ງຄວາມເຊື່ອ. ນາງສາມາດຖາມຂໍ້ໃດຂໍ້ໜຶ່ງ, ແລະ ພວກເຮົາກໍສາມາດທ່ອງຈຳມັນໄດ້. ແລ້ວນາງໄດ້ເວົ້າວ່າ ການທ່ອງຈຳຫລັກແຫ່ງຄວາມເຊື່ອຈະບໍ່ມີຄວາມໝາຍແນວໃດ ຍົກເວັ້ນແຕ່ພວກເຮົາເຂົ້າໃຈຄຳສອນ ແລະ ຫລັກທຳທີ່ມີຢູ່ໃນນັ້ນ. ນາງໄດ້ຊຸກຍູ້ພວກເຮົາໃຫ້ສຶກສາຫລັກທຳພຣະກິດຕິຄຸນທີ່ມີຢູ່ໃນແຕ່ລະຂໍ້. ນາງໄດ້ອະທິບາຍວ່າ ຄຳສອນທີ່ພົບເຫັນຢູ່ໃນຫລັກແຫ່ງຄວາມເຊື່ອໄດ້ຖືກແຍກອອກເປັນຫລາຍພາກ.
I. ຝ່າຍພຣະເຈົ້າ ແລະ ຄຳສອນຂັ້ນພື້ນຖານຂອງພຣະຄຣິດ
ພວກເຮົາຮຽນຮູ້ຈາກຂໍ້ທຳອິດຂອງຫລັກແຫ່ງຄວາມເຊື່ອ ວ່າຝ່າຍພຣະເຈົ້າມີສາມພຣະອົງ: ພຣະເຈົ້າພຣະບິດາ, ພຣະເຢຊູຄຣິດ, ແລະ ພຣະວິນຍານບໍລິສຸດ.
ຂໍ້ທີສອງ ສອນວ່າ ເຮົາຮັບຜິດຊອບຕໍ່ການກະທຳຂອງເຮົາເອງຢູ່ໃນໂລກນີ້.
ຂໍ້ທີສາມ ບອກເຖິງພາລະກິດຂອງພຣະຜູ້ຊ່ອຍໃຫ້ລອດ ສຳລັບຄວາມລອດຂອງລູກໆຂອງພຣະບິດາຜູ້ສະຖິດຢູ່ໃນສະຫວັນ.
ຂໍ້ທີສີ່ ສອນເຖິງຄວາມສຳຄັນຂອງຫລັກທຳຂັ້ນພື້ນຖານ ແລະ ພິທີການຕ່າງໆ.
ພະລັງຂອງຖ້ອຍຄຳຂອງຄູສອນຂອງພວກເຮົາໄດ້ເປັນແຫລ່ງຂອງການດົນໃຈຕໍ່ຂ້າພະເຈົ້າ ເພາະນາງໄດ້ກ່າວເນັ້ນເຖິງຄຸນຄ່າຂອງການສຶກສາຫລັກທຳ. ພຣະຄຳພີຊີ້ນຳເຮົາໃຫ້ຮູ້ຄວາມຈິງ ຊຶ່ງໂດຍການນັ້ນ ເຮົາຈະສາມາດຕັດສິນຄວາມຮູ້ແຈ້ງທີ່ເຮົາໄດ້ຮັບ, ວ່າມັນຖືກຕ້ອງ ຫລື ຜິດ. ຄຳສອນທີ່ຖືກຕ້ອງແມ່ນມາຈາກພຣະເຈົ້າ, ເປັນແຫລ່ງ ແລະ ພື້ນຖານຂອງຄວາມຈິງທັງໝົດ. ຄວາມຮູ້ ແລະ ມະໂນພາບຂອງຄຳສອນແມ່ນພົບເຫັນຢູ່ໃນພຣະກິດຕິຄຸນຂອງພຣະຜູ້ເປັນເຈົ້າພຣະຜູ້ຊ່ອຍໃຫ້ລອດ. ຄຳສອນຜິດແມ່ນມາຈາກຊາຕານ, ບິດາແຫ່ງຄວາມຕົວະທັງໝົດ. ມັນຢາກໃຫ້ເຮົາບິດເບືອນ ແລະ ປ່ຽນຄວາມຈິງທີ່ຖືກເປີດເຜີຍແລ້ວ. ມັນຢາກລໍ້ລວງເຮົາ ເພື່ອວ່າບາງຄົນໃນພວກເຮົາຈະອອກໄປຈາກເສັ້ນທາງທີ່ພາກັບໄປບ້ານໃນສະຫວັນຂອງເຮົາ.
ພຣະຄຳພີສອນເຮົາເຖິງວິທີທີ່ຈະຫລີກລ້ຽງຄຳສອນທີ່ຜິດ. ຍົກຕົວຢ່າງ, ໃນສານຂອງໂປໂລເຖິງຕີໂມທຽວ, ເຮົາອ່ານວ່າ:
“ພຣະຄຳພີທຸກຕອນໄດ້ຮັບການດົນໃຈຈາກພຣະເຈົ້າ, ແລະ ເປັນປະໂຫຍດໃນການສອນ, ການກ່າວຕັກເຕືອນວ່າກ່າວ, ການປັບປຸງແກ້ໄຂຄົນໃຫ້ຖືກຕ້ອງ ແລະ ການອົບຮົມໃນທາງຊອບທຳ:
“ເພື່ອຄົນຂອງພຣະເຈົ້າຈະບັນລຸຜົນສຳເລັດ ແລະ ຈັດຕຽມໄວ້ພ້ອມສຳລັບການດີທຸກຢ່າງ” (2 ຕີໂມທຽວ 3:16–17).
ຄຳສອນນີ້ສຳຄັນຕໍ່ສາດສະໜາຈັກເທົ່າກັບຫີນໄຟສາກໂທລະສັບມືຖື. ເມື່ອທ່ານເອົາຫີນໄຟອອກໄປຈາກມືຖື, ໂທລະສັບກໍທຳງານບໍ່ໄດ້. ຖ້າຫາກສາດສະໜາຈັກຂາດຄຳສອນທີ່ແທ້ຈິງ ກໍໃຊ້ການບໍ່ໄດ້ຄືກັນ. ມັນບໍ່ສາມາດນຳພາເຮົາກັບຄືນໄປຫາພຣະບິດາເທິງສະຫວັນ ແລະ ບ້ານນິລັນດອນຂອງເຮົາ.
II. ການຈັດຕັ້ງ ແລະ ລະບຽບຂອງຖານະປະໂລຫິດ
ຫລັງຈາກເຮົາເລີ່ມເຂົ້າໃຈຫລັກທຳຂັ້ນພື້ນຖານຂອງພຣະຄຣິດ, ຫລັກແຫ່ງຄວາມເຊື່ອຂໍ້ ທີຫ້າ ແລະ ທີຫົກ ສອນເຮົາເຖິງການຈັດຕັ້ງ ແລະ ລະບຽບຂອງຖານະປະໂລຫິດ. ພາຍໃຕ້ການຊີ້ນຳຂອງພຣະຜູ້ເປັນເຈົ້າ, ໂຈເຊັບ ສະມິດ ໄດ້ຈັດຕັ້ງສາດສະໜາຈັກຂອງພຣະຜູ້ຊ່ອຍໃຫ້ລອດຂຶ້ນ ໂດຍການໃຊ້ສິດອຳນາດຂອງຖານະປະໂລຫິດ—ອຳນາດຂອງພຣະເຈົ້າ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເປັນການຈັດຕັ້ງອັນດຽວກັນກັບທີ່ພຣະຄຣິດໄດ້ຈັດຕັ້ງ ແລະ ໄດ້ຊີ້ນຳຕອນພຣະອົງຢູ່ໃນໂລກ.
ມັນເປັນເວລາທີ່ປະເສີດຫລາຍສຳລັບໂຈເຊັບ ສະມິດ ແລະ ອໍລີເວີ ຄາວເດີຣີ ໃນເດືອນພຶດສະພາ ປີ 1829 ຕອນພວກເພິ່ນໄດ້ເຂົ້າໄປໃນປ່າ ເພື່ອອະທິຖານກ່ຽວກັບຄຳສອນເລື່ອງບັບຕິສະມາເພື່ອການປົດບາບ ທີ່ພວກເພິ່ນໄດ້ອ່ານຕອນກຳລັງແປພຣະຄຳພີມໍມອນ. ມີການສອນໃນຫລາຍຮູບແບບເລື່ອງບັບຕິສະມາທີ່ສາດສະໜາຈັກຕ່າງໆປະຕິບັດໃນຊ່ວງໄລຍະປີ 1800, ແລະ ໂຈເຊັບ ແລະ ອໍລີເວີ ຮູ້ວ່າ ການສອນເຫລົ່ານັ້ນແມ່ນຖືກຕ້ອງທັງໝົດບໍ່ໄດ້. ເຂົາເຈົ້າຢາກຮູ້ກ່ຽວກັບແບບແຜນທີ່ຖືກຕ້ອງ ແລະ ຜູ້ໃດມີສິດອຳນາດທີ່ຈະໃຫ້ບັບຕິສະມາ.
ໃນການຕອບຄຳຖາມຂອງຄົນທັງສອງຕໍ່ພຣະຜູ້ເປັນເຈົ້າ, ທູດໄດ້ລົງມາຈາກສະຫວັນ, ໂຢຮັນບັບຕິດໄດ້ມາປະກົດ. ເພິ່ນໄດ້ວາງມືໃສ່ຫົວຂອງແຕ່ລະຄົນ ແລະ ມອບສິດອຳນາດເພື່ອໃຫ້ບັບຕິສະມາ ດ້ວຍຖ້ອຍຄຳ ທີ່ວ່າ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ, ໃນພຣະນາມຂອງພຣະເມຊີອາ ຂ້າພະເຈົ້າຂໍມອບຖານະປະໂລຫິດແຫ່ງອາໂຣນ (ເບິ່ງ D&C 13:1).
ມັນເປັນສະໄໝທີ່ອັດສະຈັນໃຈແທ້ໆໃນປະຫວັດສາດຂອງໂລກ! ຖານະປະໂລຫິດໄດ້ຖືກຟື້ນຟູຄືນມາໃໝ່ສູ່ໂລກ.
ຕອນເຮົາຮັບເອົາຖານະປະໂລຫິດ, ເຮົາຮັບເອົາສິດອຳນາດທີ່ຈະກະທຳໃນພຣະນາມຂອງພຣະເຈົ້າ ແລະ ນຳພາຜູ້ຄົນໄປໃນທາງແຫ່ງຄວາມຈິງ ແລະ ຄວາມຊອບທຳ. ສິດອຳນາດນີ້ເປັນແຫລ່ງທີ່ສຳຄັນຫລາຍຂອງອຳນາດແຫ່ງຄວາມຊອບທຳ ແລະ ເປັນຜົນປະໂຫຍດຕໍ່ລູກໆຂອງພຣະເຈົ້າຢູ່ເທິງແຜ່ນດິນໂລກ ແລະ ຈະດຳເນີນຕໍ່ໄປເຖິງໂລກວິນຍານນຳອີກ. ມັນຈຳເປັນທີ່ຈະຕ້ອງຟື້ນຟູຖານະປະໂລຫິດກ່ອນການຈັດຕັ້ງສາດສະໜາຈັກຂອງພຣະເຢຊູຄຣິດຂຶ້ນ. ນີ້ຄືບົດຮຽນຂັ້ນພື້ນຖານທີ່ເຮົາຮຽນຮູ້ຈາກຂໍ້ ທີຫ້າ ແລະ ທີຫົກ ໃນຫລັກແຫ່ງຄວາມເຊື່ອ.
III. ແຫລ່ງນິລັນດອນໃນເສັ້ນທາງມະຕະ
ສາມຂໍ້ຕໍ່ໄປຂອງຫລັກແຫ່ງຄວາມເຊື່ອ—ເຈັດ, ແປດ, ແລະ ເກົ້າ—ເປັນໂຄງຮ່າງຂອງແຫລ່ງຕ່າງໆທີ່ມີໄວ້ເພື່ອຊີ້ນຳເຮົາໃນເສັ້ນທາງມະຕະຂອງເຮົາ. ເຮົາໄດ້ຮັບຂອງປະທານທາງວິນຍານເພື່ອນຳພາເຮົາ ເມື່ອເຮົາເຮັດຕາມຄຳສອນຂອງພຣະຜູ້ເປັນເຈົ້າ ແລະ ປ້ອງກັນເຮົາຈາກຄວາມຊົ່ວຮ້າຍ. ພຣະຄຳພີກໍເປັນສິ່ງຊີ້ນຳຢ່າງໜຶ່ງ—ຖ້າຫາກເຮົາຍຶດໝັ້ນໃນພຣະຄຳຂອງພຣະເຈົ້າ ເຮົາຢູ່ໃນເສັ້ນທາງແຫ່ງຊີວິດນິລັນດອນຂອງເຮົາ.
ຫລັກແຫ່ງຄວາມເຊື່ອຂໍ້ທີເກົ້າ ສອນເຮົາວ່າ ພຣະເຈົ້າໄດ້ເປີດເຜີຍ, ກຳລັງເປີດເຜີຍ, ແລະ ຈະເປີດເຜີຍຄວາມຈິງຫລາຍຢ່າງທີ່ສຳຄັນຕໍ່ສາດສະດາ, ຜູ້ພະຍາກອນ, ແລະ ຜູ້ເປີດເຜີຍຂອງພຣະອົງ. ເຮົາຮຽນຮູ້ວ່າ ນອກເໜືອໄປຈາກການຟັງສຽງແຜ່ວເບົາ, ສຽງຄ່ອຍໆຂອງພຣະວິນຍານ ແລະ ການອ່ານພຣະຄຳພີແລ້ວ, ກໍຍັງມີແຫລ່ງອື່ນອີກຄື ຜູ້ນຳຂອງສາດສະໜາຈັກ ຜູ້ຖືກເລືອກ, ຖືກເອີ້ນ, ແລະ ຖືກແຕ່ງຕັ້ງເປັນທາງການ ເພື່ອໃຫ້ພອນແກ່ຊີວິດຂອງເຮົາຜ່ານທາງບົດຮຽນທີ່ພວກເພິ່ນສອນ.
IV. ສະມາຊິກທີ່ເປັນຜູ້ສອນສາດສະໜາ
ຫລັກແຫ່ງຄວາມເຊື່ອຂໍ້ ທີສິບ, ສິບເອັດ, ແລະ ສິບສອງ ແນະນຳເຮົາເຖິງວິທີເຮັດວຽກງານເຜີຍແຜ່ ແລະ ແບ່ງປັນພຣະກິດຕິຄຸນຢູ່ໃນຫລາຍປະເທດ ແລະ ຫລາຍໆກົດໝາຍຕະຫລອດທົ່ວໂລກ. ເຮົາຮຽນຮູ້ກ່ຽວກັບການທ້ອນໂຮມຊາວອິດສະຣາເອນ ໃນການຕຽມສຳລັບການສະເດັດມາຄັ້ງທີສອງຂອງພຣະຜູ້ຊ່ອຍໃຫ້ລອດ. ພວກເຮົາຖືກແນະນຳວ່າ ຊາຍ ແລະ ຍິງ ເປັນອິດສະລະທີ່ຈະເຮັດເພື່ອຕົວເອງ, ແລະ ເຂົາເຈົ້າສາມາດຮັບເອົາ ຫລື ປະຕິເສດພຣະຄຳຂອງພຣະເຈົ້າ ອີງຕາມຄວາມຮູ້ສຶກຂອງຕົນ. ຂໍ້ສຸດທ້າຍ ເຮົາຮຽນຮູ້ທີ່ຈະປ່າວປະກາດພຣະກິດຕິຄຸນຂອງພຣະເຢຊູຄຣິດໃນທຸກບ່ອນຂອງແຜ່ນດິນໂລກ, ວ່າເຮົາຕ້ອງນັບຖືຝ່າຍລັດຖະບານຂອງທຸກປະເທດທີ່ເຮົາເຂົ້າໄປຫາ. ແທ້ຈິງແລ້ວ, ພວກເຮົາເຊື່ອໃນການເຊື່ອຟັງ, ໃຫ້ກຽດ, ແລະ ນັບຖືກົດໝາຍຂອງທຸກປະເທດ.
V. ຄຸນສົມບັດທີ່ຢາກມີ
ຫລັກແຫ່ງຄວາມເຊື່ອຂໍ້ທີສິບສາມ ໃຫ້ຄວາມຮູ້ບາງຢ່າງພິເສດ ເຖິງວິທີທີ່ເຮົາຄວນດຳລົງຊີວິດ ແລະ ການປະພຶດຕົນ. ເຮົາອ່ານວ່າ: “ພວກເຮົາເຊື່ອໃນການເປັນຄົນສັດຊື່, ຈິງ, ບໍລິສຸດ, ມີເມດຕາ, ມີຄຸນນະທຳ, ແລະ ໃນການເຮັດຄວາມດີຕໍ່ມະນຸດທັງປວງ ໂດຍແທ້ແລ້ວ ພວກເຮົາຈະກ່າວວ່າ ພວກເຮົາດຳເນີນຕາມຄຳແນະນຳຂອງໂປໂລ—ນັ້ນຄື ພວກເຮົາເຊື່ອທຸກສິ່ງ, ພວກເຮົາຫວັງທຸກສິ່ງ, ພວກເຮົາອົດທົນມາແລ້ວຫລາຍສິ່ງ ແລະ ຫວັງທີ່ຈະສາມາດອົດທົນໄດ້ທຸກສິ່ງ ຫາກມີສິ່ງໃດທີ່ເປັນຄຸນນະທຳ, ງົດງາມ, ຫລື ຈາກການລາຍງານດີ ຫລື ຄວນສັນລະເສີນ, ພວກເຮົາສະແຫວງຫາສິ່ງເຫລົ່ານີ້.”
ເຮົາທຸກຄົນຄວນພະຍາຍາມໃຫ້ມີຄຸນສົມບັດເຊັ່ນນີ້ ແລະ ດຳລົງຊີວິດໃນທາງທີ່ຈະມີຄຸນສົມບັດເຊັ່ນນີ້ຫລາຍຂຶ້ນ. ຄວາມຈິງທີ່ສອນຢູ່ໃນຫລັກແຫ່ງຄວາມເຊື່ອ ໄດ້ສົ່ງເສີມກັນໃນແຕ່ລະຂໍ້ ຄືກັນກັບພາກສ່ວນຕ່າງໆຂອງໂທລະສັບມືຖື. ຄືກັນກັບຕອນທີ່ມືຖືຖືກປະກອບເຂົ້າກັນ, ຫລັກແຫ່ງຄວາມເຊື່ອກໍມີຄຳສອນທີ່ສຳຄັນເຖິງການຟື້ນຟູໄວ້ໃຫ້ເຮົາຄືກັນ. ແຕ່ລະຂໍ້ຕື່ມຄຸນຄ່າທີ່ພິເສດໃຫ້ແກ່ຄວາມເຂົ້າໃຈຂອງເຮົາກ່ຽວກັບພຣະກິດຕິຄຸນຂອງພຣະເຢຊູຄຣິດ.
ຄູສອນໃນຊັ້ນປະຖົມໄວຂອງຂ້າພະເຈົ້າ ໄດ້ຊ່ອຍໃຫ້ຂ້າພະເຈົ້າມີຄວາມເອົາໃຈໃສ່ກັບການສຶກສາຄຳສອນຂອງອານາຈັກ. ນາງໄດ້ສອນຂ້າພະເຈົ້າໃຫ້ສະແຫວງຫາຄວາມໝາຍທີ່ເລິກຊຶ້ງກວ່າ ທີ່ມີຢູ່ໃນຫລັກແຫ່ງຄວາມເຊື່ອ. ນາງໄດ້ສັນຍາກັບຂ້າພະເຈົ້າວ່າ ຖ້າຫາກຂ້າພະເຈົ້າຮຽນຮູ້ຄວາມຈິງທີ່ສັກສິດນີ້ ແລ້ວຄວາມຮູ້ທີ່ຂ້າພະເຈົ້າໄດ້ຮັບຈະປ່ຽນແປງຊີວິດຂອງຂ້າພະເຈົ້າໄປໃນທາງທີ່ດີກວ່າ, ແລະ ຂ້າພະເຈົ້າຂໍເປັນພະຍານວ່າ ນັ້ນເປັນຄວາມຈິງ.
ຫລັງຈາກບົດຮຽນທີ່ຍອດຍ້ຽມຂອງຄູສອນຂອງຂ້າພະເຈົ້າຢູ່ໃນຫ່ອມພູໂລແກນ, ພວກເຮົາໄດ້ສັງເກດເຫັນວ່າ ພວກເຮົາໄດ້ຫລິ້ນຢູ່ທີ່ນັ້ນດົນສົມຄວນ. ຕາເວັນໄດ້ຄ້ອຍຄ່ຳ, ແລະ ພວກເຮົາຮູ້ວ່າ ພວກເຮົາຈະມີບັນຫາ.
ຄູສອນຂອງພວກເຮົາໄດ້ພະຍາຍາມຈົນສຸດຄວາມສາມາດເພື່ອໃຫ້ມາເຖິງບ່ອນນັ້ນ, ແຕ່ການກັບລົງຫ່ອມພູໄປ ເປັນເລື່ອງທ້າທາຍຫລາຍສຳລັບພວກເຮົາ. ມັນເປັນການເລືອກທີ່ບໍ່ເໝາະສົມປານໃດ. ພວກເຮົາຜູ້ນ້ອຍກໍມີບັນຫາຫລາຍແລ້ວທີ່ຈະຍ່າງກັບລົງພູ, ແຕ່ສຳລັບຄູສອນທີ່ມີອາຍຸສູງຂອງພວກເຮົາຍິ່ງລຳບາກ.
ໃນຂະນະທີ່ພວກເຮົາພວມຊ່ອຍນາງລົງຄ້ອຍພູໄປ, ຕຳຫລວດສອງຄົນໄດ້ມາເຖິງ. ປະທານຊັ້ນປະຖົມໄວໄດ້ສົ່ງຕຳຫລວດໄປຊອກຫາພວກເຮົາ, ຄິດວ່າພວກເຮົາໄດ້ຫລົງທາງ. ຄວາມຫຍຸ້ງຍາກ ແລະ ເຫດການທີ່ໄດ້ເກີດຂຶ້ນ ໄດ້ເປັນບົດຮຽນທີ່ບໍ່ເຄີຍລືມໃນຊີວິດຂອງຂ້າພະເຈົ້າ.
ພວກເຈົ້າທີ່ເປັນຊາຍໜຸ່ມ—ຂ້າພະເຈົ້າຂໍໃຫ້ພວກເຈົ້າເອົາໃຈໃສ່ເພື່ອຮຽນຮູ້ຫລັກແຫ່ງຄວາມເຊື່ອ ແລະ ຄຳສອນທີ່ຫລັກທຳເຫລົ່ານີ້ສອນ. ມັນເປັນຖ້ອຍຄຳທີ່ສຳຄັນ ແລະ ແນ່ນອນທີ່ສຸດໃນຄຳສອນຂອງສາດສະໜາຈັກ. ຖ້າຫາກພວກເຈົ້າໃຊ້ມັນເປັນສິ່ງນຳພາການສຶກສາພຣະກິດຕິຄຸນຂອງພຣະເຢຊູຄຣິດ, ແລ້ວພວກເຈົ້າຈະພົບເຫັນຕົນເອງຕຽພ້ອມທີ່ຈະປະກາດເປັນພະຍານເຖິງຄວາມຈິງທີ່ໄດ້ຖືກຟື້ນຟູຄືນມາໃໝ່ສູ່ໂລກ. ພວກເຈົ້າຈະສາມາດປະກາດໃນວິທີທີ່ລຽບງ່າຍ, ແລະ ກົງໄປກົງມາ, ແລະ ເລິກຊຶ້ງ ກ່ຽວກັບຄວາມເຊື່ອຂອງພວກເຈົ້າໃນຖານະທີ່ເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ຂ້າພະເຈົ້າຂໍຕື່ມປະຈັກພະຍານຂອງຂ້າພະເຈົ້າເຖິງຄວາມແທ້ຈິງຂອງຫລັກແຫ່ງຄວາມເຊື່ອສິບສາມຂໍ້ເຫລົ່ານີ້ ໃນພຣະນາມຂອງພຣະຜູ້ເປັນເຈົ້າ ແລະ ພຣະຜູ້ຊ່ອຍໃຫ້ລອດ, ນັ້ນຄືພຣະເຢຊູຄຣິດ, ອາແມນ.