2010–2019
Katak ko im Pedped ko Loi ilo Laajrak in Tōmak ko
Oktoba 2013


Katak ko im Pedped ko Loi ilo Laajrak in Tōmak ko

Kajjojo laajrak in tōmak ekobaik jerbal eo eaorōk n̄an meļeļe eo ad kōn ko̧jpeļ eo an Jisōs Kraist.

Ke iaar bōk ijjitōn̄ in n̄an kōnono ilo m̧wen̄an in an priesthood ilo kweilo̧k in eļap, eaar m̧ōkaj aō ļōmņak kōn juon aō rūkaki in Būraimere eo em̧m̧an. Kōņaan eo an eļap eaar n̄an kepooj kōm̧ n̄an erreeo n̄an bōk priesthood eo. Eaar teeje kōm̧ kōn men ko rekkar n̄an kadiwōjļo̧k jān Būraimere―kakilōklōk e etan ro uwaan Doulul eo an Jon̄oulruo ro im Laajrak in Tōmak ko. Eaar barāinwōt kōm̧m̧ane juon kallim̧ur n̄an kōm̧―eļan̄n̄e aolepām wōj naaj maron̄ in kar kōnono Laajrak in Tōmak ko jon̄ouljilu n̄an kakilōklōki, kōm maron̄ kālet jikin eo im ilo̧k ilo juon iien m̧akūtkūt n̄an kūlaj eo am āliktata.

Kōm kar kālete juon jikin em̧m̧an kōm kar kōņaan etal n̄an e ioon jikin ko rōdekāke itulōn̄ in dam̧ eo kein kajuon ilo deļo̧n̄ļo̧k eo ilo Longan Canyon, ilo tuiiōn̄ in Utah. Eaar wōr juon jikin edik ilo imejen dōkā kein me ewōr juon jikin kōmat ijo komaron̄ kōmat hotdog im m̧ajm̧alo̧. Ke kōm̧ij kālet jikin eo, kōm̧ ar jab ļōmņak kōn rūkaki eo am, eo eaar lelļap im eaar jab juon rikkure. Eļan̄n̄e kōm̧ en kar lukkuun kōļmenļo̧kjeņ kake, emaron̄ kar jelet kōm̧ bwe epen n̄an an tallōn̄. Eaar kajieon̄ in dāpij wōt kallim̧ur eo an, ijoke, eaar etal wōt im ļoor kōm̧.

M̧oktata, kōm̧ ar taļļōn̄e to̧l eo edik. Ilo tōre eo am, eaar ejjeļo̧k to̧o̧n jarom̧ ilo jikin eo me emaron̄ kar kōbōjrak am taļļōn̄ lōn̄ļo̧k. Kōn jipan̄ dik ko am rūkaki eo am eaar maron̄ tōbar lōn̄in toļ eo. Ālkin am tōbar lōn̄ in toļ eo, ko̧m̧ kar walaļļaļo̧k ilo juon jikin edōkāke ņaetan “Turtle Back.”

Ālkin am tōkeāk ļo̧k, rūkaki eo am eaar kōņaan kakije jidik. Ilo tōre kōm̧ ar kepooj m̧ōn̄ā ko kijōm̧ im m̧ōn̄ā, rūkaki eo am eaar katakin kōm̧ katak eo āliktata. Eaar jiron̄ kōm̧ ewi jon̄an an m̧ōņōņō in katakin kōm̧ ilo Būraimere ilo iiō ko ruo rem̧ootļo̧k. Eaar nōbar kōm̧ kōn wāween an em̧m̧an amwōj kilōke Laajrak in Tōmak ko. Emaron̄ kar ba jabdewōt iaan nōm̧ba in Laajrak in Tōmak ko im em̧ōkaj am kwaļo̧ki. Innām eaar ba kakilōklōk Laajrak in Tōmak ko emaron̄ ejjeļo̧k meļeļeier ijello̧kin jeļā elōn̄ ļo̧k naan ko ilo ad meļeļe katak ko im pedped ko loi ilo laajrakin tōmak ko. Eaar rōjan̄ kōm̧ n̄an ekkatak katak ko ilo ko̧jpeļ eo me jej ekkatak ilo kajjojo Laajrak in Tōmak ko. Eaar kwaļo̧k bwe katak eo loi ilo Laajrak in Tōmak ko eaar ajej ilo m̧wen̄an ko.

I. Doulul in Anij im Katak eo an Kraist

Jej katak jān laajrak in tōmak juon bwe Doulul in Anij ewōr jilu armej ro: Anij Jemed, Jisōs RiKraist eo, im Jetōb Kwojarjar.

Laajrak eo kein karuo ej katakin kōj bwe jej eddo kōn m̧akūtkūt ko ad ioon laļ in.

Eo kein kajilu ej letok juon visōn mijen eo an Rilo̧mo̧o̧r n̄an lo̧mo̧o̧ren ajri ro nejin Jemed Ilan̄.

Eo kein kemen ej katakin kōn aorōk in pedped ko im kain̄i ko m̧oktata.

Kajoor in naan ko an rūkaki ro ad raar juon kein jipan̄ an im̧we n̄an n̄an kōnke kōn aorōk eo eaar likūt ilo ekkatak ko̧jpeļ eo. Jeje ko rekwojarjar rej tōl kōj n̄an juon jon̄ak an m̧ool me jemaron̄ ekajet jeļāļo̧kjeņ eo jej bōke, men̄e em̧ool ak ebōd. Katak eo em̧ool ej itok jān Anij, kein jipan̄ eo im pedped eo an aolep m̧ool ko. Katak ko im ļōmņak ko an katak eo em̧oool rej loi ilo ko̧jpeļ eo an ad Irooj im Rilo̧mo̧o̧r. Katak ko rebōd rej itok jān Satan, jemān aolep riab ko. Ikrelel eo an ej n̄an kabōd, ukōt, im kajeer m̧ool ko kar kwaļo̧ki. Ekōņaan m̧oņe kōj kōn menin jet iaad renaaj jōbwābwe ilo iaļ eo ad ļo̧k n̄an kapijuknen eo ad ilan̄.

Jeje ko rekwojarjar rej katakin kōj ewi wāween joļo̧k katak ko rebōd. N̄an waanjon̄ok, ilo leta eo an Paul n̄an Timote, jej riit:

“Jeje ko otemjej em̧ōj letok kōn kakōrm̧ool an Anij, ej barāinwōt wor tokjāer kōn katakin, n̄an kauwe, im kajim̧we, im katakin ilo kwōjarjar:

“Bwe armej karijeran Anij en weeppān im em̧ōj kōkōm̧anm̧an e n̄an jerbal em̧m̧an otemjej” (2 Timote 3:16–17)

Katak in ej n̄an Kabun̄ eo āinwōt juon pātere n̄an juon cell phone. N̄e kom̧ij kōm̧akūt pātere eo jān cell phone eo nejūm̧, emej. Ejjeļo̧k oktak jān juon kabun̄ eo epād m̧ool eo ie im ejjab katakin enaaj barāinwōt mej. Ejjab maron̄ tōlļo̧k kōj n̄an Jemedwōj Ilan̄ im kapijuknen eo ad indeeo.

II. Doulul im Kōlaajrak eo an Priesthood

Ālkin ad jino meļeļe katak eo an Kraist, laajrak in tōmak ko ļalem im jiljino rej katakin kōj kōn doulul eo im kōlaajrak eo an priesthood. Ium̧win tōl eo an Irooj, Joseph Smith eaar kōjerbal mālim eo an priesthood―kajoor eo an Anij. Kabun̄ eo an Jisōs Kraist im Armej ro Rekwojarjar ilo Raan-ko Āliktata ejja doulul eo wōt me Kraist eaar ejaake im tōle ke Eaar pād ioon laļ in.

Eaar juon raan eaiboojoj n̄an Joseph Smith im Olivery Cowdery ilo Māe 1829 ke raar ilo̧k n̄an wōjke ko n̄an jar kōn katak eo an peptaij n̄an jeorļo̧k jerawiwi ko me raar riiti ke rej ukōt Bok in Mormon. Eaar lōn̄ katak ko kōn peptaij kar kwaļo̧ki jen kabun̄ ko reoktak jen doon ilo 1800 eo, im Joseph im Oliver raar jeļā bwe aolepeer raar jab m̧ool. Raar kōņaan jeļā kōn wāween peptaij eo ejim̧we im barāinwōt wōn ewōr mālim ippān n̄an peptaij.

N̄an uwaake kajjitōk ko aer n̄an Irooj, juon rikwoj meļan jān lan̄, Jon ri Peptaij, eaar waļo̧k ļo̧k n̄an er. Juon illok juon, Eaar likūt pein ioon bōraerro im leļo̧k n̄an er mālim eo n̄an peptaij, ba n̄an er bwe jen er, rikarejar ro an, ilo etan Messaia ej lewaj Priesthood eo an Aaron (lale D&C 13:1).

Juon raan ekabwilōn̄lōn̄ ilo bwebwenato an laļ in! Priesthood eo eaar bar jepļaaktok n̄an laļ in.

N̄e jej bōk priesthood eo, jej bōk mālim eo n̄an jerbal ilo etan Anij im tōl ilo wāween ko an m̧ool im jim̧we. Mālim in ej juon kein jipan̄ ekanooj aorōk an kajoor eo ekwojarjar im kareel eo n̄an kōjeram̧m̧an eo an ajri ro nejin Anij ioon laļ in im naaj pād wōt ippād ālkin ad mej. Eaar menin aikuj bwe priesthood in en jepļaaktok m̧okta jān an Kabun̄ eo em̧ool an Jisōs Kraist maron̄ in ejaak. En̄in ej pedped in katak eo jej katak jān laajrak in tōmak ko ļalem im jiljino.

III. Kein Jipan̄ ko Indeeo ilo juon Iaļ ilo Mour in

Laajrak in Tōmak ko tok jilu―jiljilimjuon, ralitok, im ratimjuon—rej kōllaajrak kein jipan̄ ko repād n̄an katakin kōj ilo iaļ eo ad mour in. Kar letok n̄an kōj menin letok ilo jetōb n̄an tōl kōj ilo ad ļoor katak ko Irooj im n̄an kōjparok kōj jān nana. Jeje ko rekwojarjar rej bar unin tōl; eļan̄n̄e jej kanooj riiti naan eo an Anij, Enaaj kwaļo̧k n̄an kōj iaļ eo ļo̧k n̄an mour indeeo.

Laajrak in tōmak ratimjuon ej katakin kōj bwe Anij eaar kwaļo̧k, ej kwaļo̧k, im naaj kwaļo̧k ilju im jeklaj ekanooj lōn̄ im m̧ool ko raorōk n̄an rikanaan ro An, rilolo ro, im ribōk m̧adenļo̧k ro. Jejeļā bwe n̄an ron̄jake ainikien, eo edik an Jetōb im n̄an riiti jeje ko rekwojarjar, rej jet kein jipan̄ ko n̄an tōl ritōl ro an ilo Kabun̄ in, ro kar kālet er, kar kūr er, im kōjeno̧ļo̧k er n̄an kōjeram̧m̧an mour ko ad kōn katak ko rej kwaļo̧ki.

IV. Membōr Rej Mijenede

Jon̄oul, jon̄ouljuon, im jon̄oulruo laajrak in tōmak ko rej katakin kōj kōn wāween kōm̧m̧ane jerbal in mijenede im kwaļo̧k ko̧jpeļ eo ilo juon laļ an elōn̄ laļ ko im elōn̄ kien ko. Jej katak kōn kuk eo anIsrael ilo kōppopo eo n̄an Itok eo an Rilo̧mo̧o̧r Kein Karuo. Kar katakin kōj bwe m̧aan ro im kōrā ro rej rijerbal n̄an er make, im bwe remaron̄ bōke ak kowan naan in Anij ekkar n̄an jeļā eo aer kōn ta eo ejim̧we. Āliktata, jej ekkatak ilo ad leto-letak kōjpeļ eo an Jisōs Kraist n̄an aolep kona ko emen an ilo laļ in me jeaikuj kautiej kien ko an kajjojo laļ me Kabun̄ in ej deļo̧n̄ ļo̧k. Ilo m̧ool, jej tōmak ilo pokake, kautiej, im ļoori kien ko an kajojo laļ.

V. Kije an M̧wil ko

Laajrak in tōmak jon̄ouljilu ej letok meļeļe kōn wāween ad aikuj tōl mour ko ad im iiaio ippān ro jet. Ej riit: “Kōm̧ij tōmak ilo jejjet, m̧ool, jouj, aenōm̧m̧an, meanwōr, ettā bōro, im kōm̧m̧an em̧m̧an n̄an aolep armej, ilo m̧ool, kōm̧ maron̄ ba bwe kōm̧ij anek wōt katak ko an Paul―Kōm̧ij tōmak ilo aolep men, kōm̧ij kōjatdikdik ilo aolep men, kōm̧ ar dipelo̧ki elōn̄ men ko, im kōm̧ij kōjatdikdik bwe kōm̧ naaj maron̄ depļo̧ki aolep men. Eļan̄n̄e rekam̧ōņōņō, rem̧m̧an ilo ba kaki, ak men ko rem̧m̧an, men kein kōm̧ij pukoti.”

Kōj aolep jej aikuj kajieon̄ n̄an bōk m̧weiļ kein im mour kaki ilo juon wāween me jemaron̄ kwaļo̧k waanjon̄ok ko rem̧m̧an jeni. M̧ool ko kwaļo̧ki ilo Laajrak in Tōmak ko raar ekkāl ioon bar jet m̧ottan ko reoktak ilowan juon cell phone n̄an aer jerbal ippān doon. Āinwōt an mijiin eo kōm̧m̧an likūt m̧ōttan ko ilo juon cell phone, Laajrak in Tōmak ko rej jipan̄ kōj kōn katak ko an Jepļaaktok in. Kajjojo laajrak in tōmak ekobaik jerbal eo eaorōk n̄an meļeļe eo ad kōn ko̧jpeļ eo an Jisōs Kraist.

Rūkaki in Būraimere eo aō eaar likit ippa juon kije n̄an ekkatak katak ko an aelōn̄ in kiin̄ eo. Liin eaar katakin eō n̄an pukot meļeļe eo aer em̧wilaļ lo̧k kōn Laajrak in Tōmak ko. Eaar kallim̧uri eō bwe eļan̄n̄e inaaj jolo̧k aō iien n̄an ekkatak m̧ool kein rekwojarjar, innām jeļāļo̧kjeņ eo ij bōke enaaj kōkōm̧anm̧anļo̧k mour eo aō, im Ij kam̧ool n̄an kom̧ bwe eaar.

Ālkin katak eo em̧m̧an an rūkaki eo aō ioon toļ eo ilo Logan Canyon, kōm kar kile bwe eaar toļo̧k am pād jen ke kōm ar karōke. Eaar jotaļo̧k, im kōm kar kile bwe ewōr jorrāān.

Rūkaki eo am eaar pen an tōpar tok jikin eo ejej uwaan, ak jepļaakļo̧k eaar barāinwōt pen n̄an kōm. Wāween in ekalikar an bōd kālet eo am kōn ijo kom̧ kar kālet ñan ilok ñane. Bar tallōn̄ eaar pen n̄an kōm, ak eaar penļo̧k n̄an e kōn an rūtto.

Ke kōm kar kakkōt n̄an jipan̄ e ļo̧k n̄an bat eo, ruo būļiijmāān raar jede. Būraimere būreejtōn eo eaar jilkintok er n̄an pukōt kōm, mijak kōm kar jōbwābwe. Jekjek eo an iien eo im katak ko kar kwaļo̧ki kar kōm̧m̧ane bwe juon en̄jake eo ban meļo̧kļo̧ke ilo mour eo aō.

Kom̧ likao ro―Ij rōjan̄ kom̧ n̄an kōjerbal jeļāļo̧kjeņ eo ami n̄an ekkatak im katak Laajrak in Tōmak ko im katak ko rej kwaļo̧ki. Rej jet iian men ko raorōk im rekadu ilo katak eo an Kabun̄ in. Eļan̄n̄e kom̧ naaj kōjerbali āinwōt juon kein tōl n̄an tōl ekkatak ko ami ilo ko̧jpeļ eo an Jisōs Kraist, kom̧ naaj lo make keppopo eo n̄an kwaļo̧k kam̧ool eo ami kōn m̧ool eo em̧ōj an bar jepļaaktok n̄an laļ in. Kwonaaj maron̄ in kwaļo̧k ilo juon wāween eo epidodo, kajju, im wāween pedped in tōmak ko rem̧wilaļ me kom̧ naaj kaorōki ilo jerbal eo ami āinwōt juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata.

Ij kobaik aō naan in kam̧ool kōn tarļep in m̧ool eo an Laajrak in Tōmak ko jon̄ouljilu ilo etan Irooj im Rilo̧mo̧o̧r, em̧ool Jisōs Kraist, amen.