Osisechakl me a Suobel el Ngara Tebechelel a Klaumerang
Mla er a Elder L. Tom Perry
Er a Chelechad er a Teruich me a Terung el Apostol
A derta er a ikal tebechelel a klaumerang a dochelir a kuk ngodech el teletelel a klaumedengei er kid er a ebangkelio er a Jesus Kristo.
Sera knguu a ngerachel el mo mengedecheduch er a ongdibel er a priesthood er a klou el ongdibel, e ak di mle merreched el mo omdasu er a sensei er ngak er a Primary. Sel mle kot el mle soal a mengedmokl er kemam el mo klikiid el mo melai er a priesthood. Ng mle betok el loker er kemam er a ikel kiram el meruul el kirel a graduation er a Primary—momedengei a ngklir a rengara Chelechad er a Terung me a Terung el Apostol me a Tebechelel a Klaumerang. Ng dirrek el mle yaksok er kemam—alsekum me kemam el rokui a mo sebecham el medengei e melekoi a Tebechelel a Klaumerang, eng sebechemam el ngiltii a basio el ki bo er ngii el imo el class.
Aki mle ngiltii a tokubets el basio el mle somam el merael el mo er ngii el delul a bad e kedidai el ngarbebul a kot el dam er a siseball el mora Logan Canyon, er a ngebard er a Utah. Ng mla er ngii a kekerei el oberberk er a delongelel a ikal risois el mla er ngii a ingukl er ngii el sebeched el melengoes a hotdog me a marshmellow. Sera ki mngiltii tial basio eng dimlak ki momdasu er a sensei er kemam el mle uodel, e dimlak el ua rechad er a klekool. Omkong mle blak a rengmam el omdasu el kirel, eng locha mlo sebechemam el medengei el kmo ng mo meringel er ngii el rolii. A yaksok er ngii a le rrengodel er ngii, meng uaisei, el mle blak a rengul el oltirakl er kemam.
A kot, e a ki mlo ngmasech er a kekerei el bukl. Sera le temam eng dimlak a seng er a dengki el merrob er a omerolam. A ki ngilsouir el telkib a sensei er kemam el rolii tial bukl. A ki bocha er a bebul e a ki uldengelengel el mo er a betok a bad er ngii el mo er a domekedong er ngii el “Turtle Back.”
A uriul er a ki bong, eng mle telkib el taem eng mochu sebechel a sensei er kemam lungil louteliil. A mo a dengchokl el omengur, eng mo a sebechel kung el lolsisechakl a ulebongl el subelam. Ng uluuchais er kemam el lekong kmal mle ungil a rengul lolsisechakl er kemam er a Primary er a ikal merko el eru el rak. Ng chilat er kemam er a dechemam el mla mo medengei a Tebechelel a Klaumerang. Ng mle sebechel el okedongii a ngii di el lambang e kemama a dulii el mo er ngii. Ng dilu el kmo a momedengei a Tebechelel a Klaumerang a diak a belkul el di dodengei a betok el tekoi dil merko ki bo medengei a osisechakl el ngara chelsel. Ng milisiich a rengmam el mo mesuub a osisecheklel a ebangkelio el ngara bek el Tebechelel a Klaumerang. Ng mileketeklii el kmo a osisechakl el ngara Tebechelel a Klaumerang a ngara kakerous el bliongel.
I. Kledios me a Ngara Uchelel Osisecheklel a Kristo
Kede subii el ngara kot el tebechelel a klaumerang el kmo a Kledios a kldei el bedengel. Dios el Chedam, Jesus Kristo, me a Chedaol Reng.
E a ongerung el klaumerang a olsisechakl el kmo kede nguu a ngerachel er a rokuii el omerelled el ngar tia el beluulechad.
A ongedei a chochotii moktek er a Osobel el kirel a osobelir a rengelekel a Chedam er a Babeluades.
A ongeuang a osisecheklii a klou el ultutelel a osisechakl me a chedaol ruoll.
A klisichel a tekingel a sensei er kemam a mlo uchul a ulekrael el mei er ngak ele ngii el mle melisiich a omesubel a ebangkelio. A chedaol llechukl a mekrolid el mo er a telkelel a klemerang el dokiu ngii eng sebeched el merritel a klemedengei el dolai, el kmo ngklemerang malechub eng diak. A meral osisechakl a mla er a Dios, el uchelel e dodai er a rokui el klemerang. A osisechakl me a blekerdelel a meral osisechakl a ngara ebangkelio er a Rubak el Osobeled. A diak el klemerang el osisechakl a ngara Diablong, el demal a rokui el telingaol. A soal a mo melemall, melodech, e mengeuid a ulecholt el klemerang. Ngii a soal el mengeblad er kid me a rebebil el mo choitii a roled er tial omerael el lmuut el mora blid er babeluades.
A chedaol llechukl a osisecheklid el mo olechib er kid er a diak el klemerang el osisechakl. A okesiu a, ngara babilengel a Paulus el mo er a Timothy, me kede menguiu:
“A rokui el chedaol llechukl a ulekrael el mla er a Dios el mei, el ngii a ungil el dolab el olisechak a klemerang, omellach, mesemechokl, e olecholt a meral rolel a ungil klengar:
“Me bol sebechel a chedal a Dios el ungil kldmokl e ulsemuul el kirel a bek el ungil ureor” (2 Timothy 3:16–17).
Tial osisechakl el mo er a Ikelesia a diua ultutelel a battery el mo er a cell phone. Sel mngebetii a battery er a cell phone er kau, eng mo diak a belkul. A ikelesia el klemerang el osisechakl a dikea el mosisechakl a diosisiu el diak a ultutelel. Ng diak el sebechel el mekrolid el mora Demad er a Babeluades me a diak a ulebengelel el blid.
II. Cheldebechel me a Beldeklel a Priesthood
Uriul er a bocha domuchel el ungil medengei a uchelel osisecheklel a Kristo, e sel ongeim me a ongelolem el tebechelel a klaumerang a olisechakl er kid el kirel a cheldebechel me a beldeklel a priesthood. Meng ngara dereder er a Rubak, e a Joseph Smith a mlo mengederoder er a Ikelesia er a Osobel el obang a ngerachel er a priesthood—el klisichel a Dios. A Ikelesia er a Jesus Kristo er a Uriul-klebesei el Santo a osisiu el chelechad el milchederoder er a Kristo e mlengedereder er ngii er a le ngara beluulechad.
Meral klebokel el sils el mlo er a Joseph Smith me a Oliver Cowdery er sera May 1829 er a le bora oreomel el mo meluluuch el kirel a osisecheklel a techolbechelid me a ngebetel a klengit el chiluiu er sera loleiuid er a Babier er a Mormon. Ng mla er ngii a betok el osisechaklel a techolbechelid el mlosisechakl er a kakerous el ikelesia er a uchelel a 1800s, me a Joseph me a Oliver a mle medengei el kmo ng diak el ngii el rokui el di klemerang. Ng mle sorir el mo medengelii a meral rolel a techolbechelid me a dirrek el techa obang a ngerachel el mo melecholb.
Me ngokiu a ongterir el mo er a Rubak, e a oderuchel el mla er a babeluades, el Johanes el Techolb, a mlo duum er tir: Ng ngila chimal locha er a bderrir e milsterir a ngerachel el mo melecholb, e millekoi er tir el kmo tir el chad er a omesiou el uai ngii, el ngokiu a ngklel a Messias, eng mesterir a priesthood er a Aaron (mesaD&C 13:1).
Ng meral klebokel el sils er a reksi er a beluulechad! El priesthood a mla moluut el mora beluulechad.
Sel denguu a priesthood, e kede nguu a ngerachel el mo meruul a tekoi el oba ngklel a Dios e omekrael el ngara klemerang me a llemalt. Tial ngerachel a klou a ultutelel e leng olab a melemalt el klisiich me a omengetikaik el kirel a mo klungiolir a rengelekel a Dios er tial beluulechad meng di ngarngii lengelakl er a kodall. Ng mle klou a ultutelel el priesthood a moluut er uchei er a meral Ikelesia er a Jesus Kristo bol mechederoder. Tiang a klou a ultutelel el suobel el de subii el ngara ongim me a ongeim el tebechelel a klaumerang.
III. Diak a Ulebengelel Ngesou el ngar er a Rael er a Klechad
A ongingil a ikang a kldei el tebechelel a klaumerang—ongeuid, ongeai, me a ongetiu—ngolecholt a betok el ngarngii el ngesou el mo osisecheklid er a omeroled er a klechad. Kede ngmai a chedaol el sengk el mo omekrael er kid sel doltirakl er a osisecheklel a Rubak el mo omekerreu er kid er a mekngit. A chedaol llechukl a ta er a omekrael; alsekum me kede blak a renguk el menguiu a tekingel a Dios, e Ngii a mo chotii a roled el mo er a diak a ulebenglel el klengar.
A ongetiu el tebechelel a klaumerang a osisecheklid aikel rokui el blal ocholt a Dios, ma ikel rokui el lolecholt er elechang, e dirk mo olecholt a betok el meklou e okedeldaoll klemerang el mo er a reprofet, romes, me a romlaoch. Ke de subii el kmo a lmuut el mo dechelel a oderngesed er a kekerei el ngor er a Chedaol Reng me a omengiuel a chedaol llechukl, el ta er a meskid a omekrael a roungerachel er a Ikelesia, el tir mlengilt, e mlokedong, e mloterkokl el mo omekngeltengak er a klengar er kid lokiu a suobel el lolsisechakl.
IV. Chad er a Ikelesia el Misionari
Ateruich , teruich me a tang , me a teruich me a erung el tebechelel a klaumerang a osisecheklid el mo meruul a urerel a klemisionari e omerk er a ebangkelio er a betok el beluu er a kakarous el teletael. Ke de subii a cheldellir a rechad er a Israel el kirel a omengedmeklel a Ongeru el lemei a Osobel. Ke de mosisechakl el sechal me a redil a mimokl el melilt el kirir, meng sebechir el nguu malechub e te choitii a tekingel a Dios lokiu a uldesuir. Sel mong me ngulebongel, e kede subii el sel domerk er a ebangkelio er a Jesus Kristo el mo er a ikal kleua el saus er a beluulechad e ng kired el mo melengmes er a kabelment er a bek el beluu el de bo er ngii. Ng merang, kede oumerang er a otireklel, omengull, me a odbechel a llechul a bek el beluu.
V. Blekeradel el Doureor el Kirel
A teruich me a edei el tebechelel a klaumerang a meskid a tokubets el ues er a kirel a mo teletelel a klengar er kid me a omerelled el mo er a rechad. A donguiu eng kmo: “A ki oumerang el kiram el meruul a llemalt, klemerang, ma kedung, ma blekokouii, ma klikiid, ma omeruul el klungiaol el mo er a rokui el chad; ng klemerang, ea ki sebecham el kmo aki oltirak er a omellach er a Paulus—Aki oumerang a rokui, aki mengiil a rokui, aki mla outkangel a betok el tekoi, e ourreng me bol sebecham el outekangel a rokui el tekoi. Alsekum ngarngii a kldung, ma klamiokel ma lechub eng ungil tekoi ma lechub eng odengesall, ea ikaikid el tekoi aki mosiik.”
Kid el rokui el kirel blak a rengud loureor el kirel aikal blekeradel e mo ungil okesiu el kirel. A klemerang el mosisechakl er a Tebechelel a Klaumerang a mokdubech er a ta me a tang el di ua a teletelel a cell phone el bek el tebedechel a olengeseu er a tial klalou. Meng kmal diua omengetmeklel a ikal klekedellel a cellphone ea Tebechelel a klaumerang a meskid a ngesou er a meklou a belkul el osisechakl er a Oluut. A derta er a ikal tebechelel a klaumerang a dochelir a kuk ngodech el teletelel a klaumedengei er kid er a ebangkelio er a Jesus Kristo.
A sensei er ngak er a Primary a dillemii a blakerreng el mo mesuub a osisechakl er a rengedel a Dios. Ng ulsisecheklak el mosiik a dmolech el belkul el ngii a ngara ikal beot el Tebechelel a Klaumerng. Ng mle yaksok er ngak sel sekum me ak mo chemoit a temek el mesuub a ikang el chedaol klemerang e a klemedengei el bo kngai a mo ngodechii a klengar er ngak el mo ungil. Me a ku chotii a klaumerang er ngak el kirel tiang.
A uriul er a kmal ungil osisecheklel a sensei er ngak er tial rois er a Logan Canyon, e a ki miltik er kemam el mla kiei el osekrii a taem. A klebesei a di merael mei, me kemam a mlo melchesuar er a el ngarngii a telemall.
A sensei er ngak a mle meringel er ngii el merael el mei er tial tokubets el basio er kemam, engdi a luut er kemam a chemolt el lmuut el kmal meringel. El meketeklii el ki mngileltii el basio a dimlak lungil luldasu. A omerollam er a luut er kemam a mle meringel er kemam, ebai mle liluut el kmal meringel er a chad el uaia rekil.
Me sera ki meringel el lolengeseu er ngii el mo ngmasech er tial bukl, ea teru el bulis a tiloech. A merredel er a Primary a uldercheterir el me osiik er kemam, leng mlo bekikl el kmo a ki mla remiid. A teletelel tial mla er ngii me a osisechakl a rirelii meng meringel el kubes er ngii el tekoi er a klengar er ngak.
Kemiu el ngeasek el sechal—a kmal oldubech er kemiu me bo mousbech a llemesiu el mo mesuub el mo medengei a Tebechelel a Klaumerang me a osisecheklel. Aikang a ta er a meklou a belkul e dirrek el kot el mekedeb el osisechakl er a Ikelesia. Alsekum meke olab el mengitikaik er kau er a omesubem er a ebangkelio er a Jesus Kristo, eng sebechem el mo kldmokl el mo olecholt er a sioning er kau er a mla moluut el klemerang el mo er a beluulechad. Ng mo sebechem el ouchais el bleketakl, e melemalt, a dmolech el moumerang el tekoi el chedal a Ikelesia er a Jesus Kristo er a Uriul-klebesei el Santo.
A kdochelir a klaumera er ngak el kirel aikal teruich me a kldei el Tebechelel a Klaumerang el ngara ngklel a Rubak e Osobeled, el Jesus Kristo, amen.