O Aoaoga Faavae ma Mataupu Faavae o Loo i Ai i Mataupu Faavae o le Faatuatua
Saunia e Elder L. Tom Perry
O Le Korama a Aposetolo e Toasefululua
O mataupu faavae taitasi o le faatuatua e faaopoopoina se taua tulaga ese i lo tatou malamalamaaga o le talalelei a Iesu Keriso.
Ina ua tuuina mai ia te a’u le tofiga e lauga i le sauniga perisitua o le konafesi aoao, sa vave ona ou mafaufau i se faiaoga lelei lava o le Peraimeri. O lona faanaunauga sili lava ia saunia i matou ia agavaa i le mauaina o le perisitua. Sa tele na ia suesueina i matou i tulaga e manaomia i lena taimi mo le faauu mai i le Peraimeri—o le taulotoina o suafa o le Korama a Aposetolo e Toasefululua ma Mataupu Faavae o le Faatuatua. Sa ia faia foi se folafolaga ia i matou—a mafai e i matou uma ona tauloto ia Mataupu Faavae o le Faatuatua e sefulutolu, e mafai ona matou filifilia se nofoaga ma alu i ai se matou tafaoga mo le matou vasega mulimuli.
Sa matou filifilia se nofoaga faapitoa matou te fiafia e savavali sopo ai i auala gaoa e i luga ae tonu lava o le punivai muamua i le amataga o le Logan Canyon, i matu o Iuta. Sa i ai se nofoaga laitiiti, e laugatasi i totonu o nei tofē papa na i ai se magalafu faanatura lea e mafai ona faavela ai sosisi ma lagilagi ai masimelo. Ae ina ua matou filifilia le nofoaga, sa matou le mafaufau i le matou faiaoga, o lē sa fai si matua ma mautinoa lava e le o se ituaiga tagata e aumalosi. Ana faapea matou te mafaufau totoa i ai, atonu matou te iloaina o se taimi faigata ia te ia ona savali sopo. Sa noatia o ia i lana folafolaga, peitai, sa mulimuli mai o ia ma le lototele ia i matou.
Muamua, sa matou fe’a’ei i luga o si mauga laitiiti. I o matou vaitaimi sa leai ni laina eletise e taofia ai le sopo iina. Faatasi ai ma se fesoasoani sa mafai ai ona oo atu le matou faiaoga i luga o le mauga. O le taimi lava na matou taunuu ai i le tumutumu sa matou toe faaifo i lalo i se itu gaoa i se nofoaga sa matou ta’ua o le “Patua Laumei.”
Ina ua matou taunuu, sa manaomia e le matou faiaoga se taimi teisi e to ai lona sela. E oo ane i le taimi e matou te saofafai ai i lalo ma aai, ua lava lona malosi e aoao mai ai le matou lesona mulimuli. Sa ia ta’u mai ia i matou lona fiafia e aoao i matou i le Peraimeri mo tausaga e lua mulimuli. Sa ia faamalo mai ia i matou i lo matou iloaina o Mataupu Faavae o le Faatuatua. Sa mafai ona ia valaau mai soo se numera o mataupu faavae, ae matou taulotoina atu ia te ia. Ona ia fai mai lea o le a leai se uiga tele o le taulotoina o Mataupu Faavae o le Faatuatua ma le mau upu vagana ua matou malamalama i aoaoga faavae ma mataupu faavae o loo i ai. Sa ia uunaia i matou e suesue i le aoaoga faavae o le talalelei o loo aoaoina mai i Mataupu Faavae taitasi o le Faatuatua. Sa ia faamalamalama mai o le aoaoga faavae o loo maua i Mataupu Faavae o le Faatuatua sa vaevaeina i ni vaega.
I. O Le Aiga Atua ma le Aoaoga Faavae Autu a Keriso
Tatou te aoao mai le mataupu faavae muamua o le faatuatua, o le Aiga Atua o ni tagata se toatolu: o le Atua le Tama, o Iesu le Keriso, ma le Agaga Paia.
O le mataupu faavae lona lua o loo aoao mai ai e nafa lava i tatou ma a tatou lava faatinoga i le lalolagi.
O le lona tolu o loo tuuina mai ai se faaaliga o le misiona a le Faaola mo le faaolataga o le fanau a le Tama oi le Lagi.
O le lona fa o loo aoao mai ai le taua o mataupu faavae autu ma sauniga.
O le mana o upu a le matou faiaoga na avea ma se punavai o musumusuga ia te a’u ona o le faamamafa sa ia tuuina i le suesueina o le talalelei. O tusitusiga paia e taitaiina i tatou i se tulaga o le upumoni lea e mafai ona tatou faamasinoina ai le malamalama o loo tatou maua, pe sa’o pe sese. O aoaoga faavae moni e sau mai i le Atua, o le puna ma le faavae o upumoni uma. O aoaoga ma manatu faavae o aoaoga faavae moni o loo maua i le talalelei a lo tatou Alii ma le Faaola. O aoaoga sese e sau mai ia Satani, o le tamā o pepelo uma. O lona manao ia faasese, sui, ma faapiopio upumoni ua faaalia mai. E manao o ia e faasese i tatou ina ia se ese nisi o i tatou i la tatou malaga toe foi atu i lo tatou aiga faalelagi.
Ua aoao mai tusitusiga paia i auala tatou te aloese ai mai aoaoga sese. Mo se faataitaiga, i le tusi a Paulo ia Timoteo, tatou te faitau ai:
“O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu:
“Ina ia atoatoa ona lelei ai o le tagata o le Atua, ia saunia lava ia i galuega lelei uma” (2 Timoteo 3:16–17).
O lenei aoaoga faavae i le Ekalesia e pei lava o se maa i se telefoni feaveai. A e aveesea le maa mai lau telefoni feaveai, o le a leai se aoga. O se ekalesia ua le toe aoaoina ai aoaoga faavae moni e tutusa lava le leai o se aogā. E le mafai ona toe taitaiina atu ai i tatou i lo tatou Tama Faalelagi ma lo tatou aiga e faavavau.
II. Faatulagaga ma le Faasologa o le Perisitua
A maea ona tatou amata malamalama i le aoaoga faavae autu a Keriso, o mataupu faavae o le faatuatua lona limama le onoua aoao mai ai ia i tatou e uiga i le faatulagaga ma le faasologa o le perisitua. I lalo o le taitaiga a le Alii, na faatulagaina ai e Iosefa Samita le Ekalesia a le Faaola e faaaoga ai le pule o le perisitua—le mana o le Atua. O le Ekalesia a Iesu Keriso o le Au Paia o Aso e Gata Ai, o le faatulagaga lava e tasi na faatulaga ma taitaia ai e Keriso a o i ai o Ia i le fogaeleele.
O se aso fiafia tele ia Iosefa Samita ma Oliva Kaotui ia Me 1829 ina ua laua o atu i le vao e tatalo ai e uiga i le papatisoga mo le faamagaloina o agasala lea sa laua faitau i ai a o faaliliuina le Tusi a Mamona. Sa tele aoaoga e uiga i le papatisoga sa aoaoina e lotu eseese i le amataga o le vaitau 1800, ma sa iloa e Iosefa ma Oliva e le mafai ona moni uma nei aoaoga. Sa la fia iloa le faiga sa’o o le papatisoga ma o ai foi na i ai le pule e papatiso ai.
O le tali i le la faatoga i le Alii, na faaali ifo ai se avefeau mai le lagi, o Ioane le Papatiso ia i la’ua. Sa Ia tuu atu ona aao i luga o o laua ulu ma faaee atu ia i la’ua le pule e papatiso ai i upu nei: “I luga o oulua o’u uso a auauna e, i le suafa o le Mesia, ou te faaee atu i ai le Perisitua o Arona” (MF&F 13:1).
O se aso ofoofogia i le talafaasolopito o le lalolagi! Na toefuatai mai ai le perisitua i le lalolagi.
A tatou maua le perisitua, tatou te maua le pule e galue ai i le suafa o le Atua, ma taitai ai i ala o le upumoni ma le amiotonu. O lenei pule o se punavai taua o le mana amiotonu ma le faatosinaga mo le manuia o le fanau a le Atua i le fogaeleele, ma o le a oo i tala atu o le veli. Sa alagatatau ona toefuataiina le perisitua a o le’i faatulagaina le Ekalesia a Iesu Keriso. O le lesona taua lenei tatou te aoao mai mataupu faavae o le faatuatua lona lima ma le ono.
III. Punaoa e Faavavau i se Malaga i le Olaga Faaletino
O isi mataupu faavae o le faatuatua e tolu e sosoo ai—o le fitu, valu, ma le iva—ua faailoa mai ai punaoa o loo maua e aoao ai i tatou i la tatou malaga i le olaga faaletino. Ua tuuina mai ia i tatou ni meaalofa faaleagaga e taiala ai i tatou a o tatou mulimuli i aoaoga a le Alii ma puipuia ai i tatou mai le tiapolo. O tusitusiga paia o le isi lea taiala—afai tatou te faitauina ma le faaeteete afioga a le Atua, o le a Ia faaali mai lo tatou ala e toe foi ai i le ola e faavavau.
O le mataupu faavae o le faatuatua lona iva ua aoao mai ia i tatou, ua faaali mai e le Atua, e faaali mai, ma o le a faaali mai i le lumanai, le tele o upumoni silisili ma le taua i Ana perofeta, tagatavaai, ma talifaaaliga. Ua tatou iloa e faaopoopo atu i le faalogo i le leo mālū ma itiiti o le Agaga ma le faitauina o tusitusiga paia, o le isi punavai o le taitaiga o o tatou taitai o le Ekalesia, o e ua filifilia, valaauina, ma vaetofia e faamanuia o tatou olaga e ala mai i lesona latou te aoao mai.
IV. Faifeautalai a le Au Paia
O mataupu faavae o le faatuatua lona sefulu, sefulutasi, ma le sefululua ua aoao mai ai i tatou i auala e faatino ai le galuega faafaifeautalai ma faasoa atu le talalelei i se lalolagi o malō e tele ma tulafono eseese. Tatou te aoao ai e uiga i le faapotopotoina o Isaraelu e sauniuni ai mo le Afio Mai Faalua o le Faaola. Ua aoaoina i tatou e faapea o alii ma tamaitai e pule ia i latou lava, ma e mafai ona latou talia pe teena le afioga a le Atua e tusa ai ma o latou lava lotofuatiaifo. Ma le mea mulimuli, tatou te aoao a o tatou faasalalau atu le talalelei a Iesu Keriso i tulimanu e fa o le lalolagi, e tatau ona tatou faaaloalo i faigamalo o atunuu taitasi tatou te ulufale i ai. E moni, tatou te talitonu i le usiusitai, faamamalu, ma lagolagoina o le tulafono o atunuu taitasi.
V. O Uiga e Taumafai ia Maua
O le mataupu faavae o le faatuatua lona sefulutolu ua tuuina mai ai se vaaiga faapitoa i auala e tatau ona tatou ola ai ma fegalegalea’i ai ma isi. E faitauina: “Matou te talitonu i le faamaoni, amiotonu, nofomama, agalelei, amiomama, ma le faia o mea lelei i tagata uma; e moni, e mafai ona matou faapea atu, ua matou mulimuli i le apoapoaiga a Paulo—Matou te talitonu i mea uma, matou te faamoemoe i mea uma, ua uma ona matou onosai i mea e tele, ma ua faamoemoe o le a mafai ona matou onosai i mea uma. Afai o i ai nisi mea mama, matagofie, pe logoleleia pe tauleleia, matou te saili atu i nei mea uma.”
E tatau ia i tatou uma ona saili ia maua nei uiga ma ola i olaga e fai ai tatou ma ni faataitaiga o ia uiga. O upumoni o loo aoaoina i Mataupu Faavae o le Faatuatua e atiina ae i luga o le tasi ma le isi e pei o le galulue faatasi o vaega eseese o se telefoni feaveai e lagolagoina le tasi. E pei o le faagasologa auiliili o le gaosiga lea e faaopoopo ai vaega i se telefoni feaveai, o Mataupu Faavae o le Faatuatua e tuuina mai ia i tatou aoaoga faavae autu o le Toefuataiga. O mataupu faavae taitasi o le faatuatua e faaopoopoina se taua tulaga ese i lo tatou malamalamaaga o le talalelei a Iesu Keriso.
Na totoina e lo’u faiaoga Peraimeri i totonu ia te a’u se naunautaiga e suesue i aoaoga faavae o le malo. Sa ia aoaoina a’u ia saili uiga loloto o loo i ai i nei Mataupu Faavae faigofie o le Faatuatua. Sa ia folafola mai ia te a’u, afai o le a ou faia se taumafaiga e aoao i nei upumoni paia, o le malamalama ou te maua o le a suia ai lo’u olaga mo le lelei sili atu, ma ou te molimau atu ia te outou ua tupu [lena mea].
Ina ua uma le lesona matagofie a lo’u faiaoga i luga o lena mauga i Logan Canyon, sa matou matauina na umi atu ona matou nonofo ai nai lo le mea na matou fuafuaina. Sa faasolo ina faaiu le afiafi, ma na matou iloa ai na i ai se faafitauli.
Sa tauivi lo matou faiaoga ina ia taunuu atu i le matou nofoaga faapitoa, ae o le toe foi i le fale na vaaia ai foi se isi luitau tele mo i matou. O lenei mea na atili faaopoopo ai le le lelei o le filifiliga o le nofoaga mo le matou tafaoga. Sa faigata ia i matou le toe fe’a’ei e toe foi i le fale, ae na sili atu ona faigata mo se tagata o lona matua.
A o matou tauivi e fesoasoani i lona toe foi atu i luga o le mauga, sa tutu mai ni alii leoleo se toalua. Sa auina mai i la’ua e le peresitene o le Peraimeri e su’e i matou, sa popole ‘ai ua matou leiloloa. O aafiaga faalelagona o le mea na tupu ma lesona na aoaoina ai, na avea ai ma se aafiaga e le mafaagaloina i lo’u olaga.
Outou alii talavou—ou te uunaia outou e faaaoga o outou mafaufau atamamai e suesue ma aoao ai Mataupu Faavae o le Faatuatua ma aoaoga faavae o loo aoao mai ai. O nisi ia o faamatalaga o aoaoga faavae e sili ona taua ma e mautinoa lava e sili ona pupuu i le Ekalesia. Afai o le a outou faaaogaina e fai ma taiala e taitai ai au suesuega o le talalelei a Iesu Keriso, o le a e iloa ai lou saunia e tautino atu lau molimau e uiga i le upumoni toefuataiina i le lalolagi. O le a mafai ona outou tautino atu i auala faigofie, tuusa’o, ma o’oo’o ia talitonuga autu e pele ia te oe, i le avea ai ma se tagata o Le Ekalesia a Iesu Keriso o le Au Paia o Aso e Gata Ai.
E faaopoopo atu la’u molimau i le moni a’ia’i o Mataupu Faavae o le Faatuatua e sefulutolu, i le suafa o lo tatou Alii ma le Faaola, o Iesu Keriso, amene.