Ewe Kiien Tumunu non Pekin Ngun

Ekkis chok a no, ua riri fengeni ruemon chon pupunu non ewe tempel. Ekkei ruemon ra tumunu ar repwe nimenimoch ne wareiti ewe ran mi amwarar nupwen emon at me emon nengin ra su seni imwer serafo me winiti chon pupunu.Non ei ran mi pin, ra wesen nimenimoch. Non eu fansoun mi och repwe poputa ne amarita pwisin nour kewe semirit, usun mi tipeu ngeni ewe tettenin Semach won Nang. Ar pwapwa, me pwapwan ekkewe pinon aramas non fansoun mwach, mi anongonong won ar manaueni ekkewe annukun ewe Chon Amanau mi nom non Noun kewe pukfel.

Ikenai sam me in ra ekieki ika mi wor eu nenien tumunu ne amarita semirit. Mi wor eu nenien tumunu. A nom non eu imw ikkewe ia nongonongen kapas allim mi afanafan ia. Sia aucheani ewe famini non ewe Mwichefen, me sia pesei sam me in won ekkis meinisin won fonufan ar repwe amarita nour kewe non wenechar.

Ewe Aposel Paul a oesini kapasen esinesin pwe “epwe fakkun weires ekkewe fansoun non ekkewe ranin soponon.

“Ekkewe aramas repwe tongei ir pwisin, mochenia, sikasini, namanam tekia, kapasengaw, anneasonap ngeni semer me iner, repwe kirikiringaw o ungeni namanam.

“Esap wor ar tong, esap wor ar umoumoch, repwe afitikoko me rochongaw, repwe oput mi murinno.

“Repwe chon afangema, chon tumungaw me chon namanam tekia, repwe sani pwapwan fonufan nap seni Kot;

“Repwe chok pwomeni pwomwen angangen namanam, nge repwe poutano pochokunen we mi ennet. Kopwe atowawokono seni ekkei sokkun aramas.”¹

Paul a pwan oesini, “Ekkewe aramas mi ngaw me chon nikotuputup repwe chok anapano ar foffir mi ngaw seni noom, repwe otupu ekkoch o repwe pwan pwisin otupur.” ²

Ekkei wokisin ra fis pwe kapasen esinesin, ra pwarano ekkewe foffor sipwe kunnu seni. Sipwe tiniken ne mamasa kich. Sia tongeni Anneasefanni eu me eu ekkei kapasen oesini me sipwe kuna pwe ekkei sokkun meinisin mi fifis non fonufan ikenai:

Fansoun mi fakkun weires—mi nom. Sia manau non fansoun mi fakkun efeingaw.

Mochenia, sikaseni, namanam tekia—meinisin mi nom neich.

Chon kapas mi ngaw, anneasonap ngeni semer me iner, kirikiringaw, ungeni namanam, ese wor tong—meinisin ekkei sokkun mi pwan nom.

Ekkewe mi ataieno ar pwon, chon afitikoko, me pwan ekkoch—mi wor chommong minen pwarata pwe meinisin ekkei sokkun mi pwan nom.

Moroni a pwan kapas usun ekkewe fofforungawen ach kei ran nupwen a esinesin pwe:

Nupwen sia kuna ekkei mettoch mi fifis me neich … sipwe esinna ukukkun ngawan nonnomuch.

Moroni a angei annuk an epwe makketiw ekkei mettoch pwe mi ngaw epwe morono, pwe ewe fansoun epwe eto nupwen esap wor an Setan manaman won netipach, nge netipach repwe fen mwokut ne fofforoch fansoun meinisin, pwe sipwe eto ren ewe popunapen wenechar meinisin me kuna manau. ³

Aramas rese tongeni amam an Paul me Moroni kapasen awewe usun ach kei ran pwe ra fakkun pung. Fisin ekkei mettoch epwe fakkun osukosuka, me anetipechoua chommong. Nge ina mwo, nupwen ua ekieki usun fansoun mwach, ua men uren memmefen apinukunukoch.

Non ewe pwarata an Paul, kapachenong ngeni ekkewe weires me osukosuk, a pwan ereni kich met sipwe fori ne tumunu kich:

“Nge en, kopwe chok sopweino non met ewe ka kaeo ngeni o nuku mi ennet. En ka sinei io kewe noum sense;

“O kopwe chechchemeni pwe seni chok kukkunum, ka fen sinei masowan ewe Pukepin, ewe a tongeni atipachemokono o amanaua aramas ren ar nuku Kraist Jises.” ⁴

Ekkewe pukfel ra ereni kich ifa usun sia tongeni angei tumunun ngunuch. Ra masoueni ekkewe nongonong me annuk me efeioch minne repwe emweni emon noun Kot ngeni eu kapasen pwarata usun Jises Kraist ewe Chon Amanau me Chon Angasano.

Ren chommong ierin ammonata, a men watte ewe achocho ne awora ekkewe pukfel non iteiten sokkun fos, fitifengen me ekkewe pisekin aninis. Sia mochen awora ngeni meinisin ir mi mochen kaeo. Ra aiti kich ia sipwe feino ia me met sipwe fori. Ra awora apinukunuk me mirit.

Chommong ier a no, Elter S. Dilworth Young seni ekkewe Fik a aitiei eu nesen usun annea pukfel. Eu steik a men osukosuk ren koum fengen me osukosuk nefinen chon mwichefen, iwe a namwot emon epwe fonour.

Ua eisini Preseten Young, “Met upwe apasa?”

A ponueni non mecheres, “Erenir pwe repwe anneani pukfel.”

Ua eis, “Menni kewe wokisin?”

A ponueni, “Ese fakkun nifinifin. Awewe chok, erenir ar repwe suki ewe Puken Mormon, me poputa ne annea. Ekiseno chok ewe memmefen kinamwe me pwarata epwe wareto, me eu ponu epwe pwarano.”

Oupwe pi pwe oua anneani pukfel iteiten ran, iwe feioch repwe feito. Mi wor eu mongungun esinesin non ekkewe pukfel, nge a pwan wor chommong kapasen apochokun.

Ika fosun ekkewe pukfel ese kon weweoch ngonuk me akkom, sopweno chok ne annea. Ekkisano chok kopwe esinna ningochun me manamanen ekkewe kapas won ekkana peich.

Paul a apasa, “Unusen ewe Pukepin a popu seni Ngunun Kot o a namwot ngeni ar aea ne afanafana minne mi ennet, fonou minne mi muan, apungano manauen aramas o afanafana usun manau mi pung.” ⁵

Ka tongeni pwisin sotuni ei pwon.

Sia manau non fansoun mi fakkun weires; nge ina mwo, sia tongeni kuna apinukunuk me kinamwe fanitach tori pwan chon ach kewe famini. Ekkewe ir mi manau non ar nonineniti ewe tuffich pwe emon senirit epwe niwin seni ikkewe ia ewe fonufan a uweir ia, resap fangeta. “Kosap nuokus, kopwe chok nuku.” ⁶ Wenechar a manaman seni mi ngaw.

Ekkewe semirit ra kaeo ne weweiti ekkewe pukfel nekukkunur repwe sinei ewe an repwe fetan won iwe epwe fen napeno ar mochen nomofoch won ena an. Ekkewe ir mi rikino repwe tongeni niwin me, ren aninis, repwe tongeni kuna sefanni ar anen niwinto.

Noun Mosaia kewe at ra ungeni ewe Mwichefen ren fitu fansoun, nge mwirin ra aier me a watte siwinin netiper. Non puken Alma sia annea pwe noun Mosaia kewe at … ra pochokuneno non ar sinei ewe ennet pokiten ra mwan mi weweoch me ra resin kutta masouan ekkewe pukfel, pwe repwe sinei ewe kapasen Kot.” ⁷

Preseten Joseph F. Smith a nimu ierin nupwen seman we, Hyrum, a niniino non Kanapusen Carthage. Mwirin Joseph fetanano won ekkewe masias ren inan mi mano punuan.

Nupwen a 15 ierin, a koko ne fori angangen misineri non Hawaii. A mefi pwe a mwanecheno me anaemon o a apasa: “Ua men noninen. … Ua mefi osupwang non ai woungaw, osupwangen tipachem me mirit, emon at chok, ukukkun use tongeni nenong non mesan [emon].”

Nupwen a nefareni nonnomun mi weires non eu pwinin, ewe anuon Joseph a tan pwe a nom won eu sai, a sasaa ukukkun an tongeni. A uwei eu kukkun tuk. Mwirin fitu fansoun, a wareiti eu imw watte, ikkewe a feino ia. Nupwen a arap ngeni ewe imw, a kuna eu esissin mi apasa, “Tutu.” Iwe a tonong o tutu. Nupwen a suki ewe tukutuk a kuna uf mi pwechepwch, o nimoch”och mettoch,” a apasa, “Use fen kuna ren fansoun nangatam.” A nounou ekkewe uf me a saa ren asamen ewe imw watte.

“Ua fichifich,” a apasa, “me ewe asam a suk, me ewe Soufos Joseph Smith a uta ikkewe. A neto non an fonouei, me akkaewin an kapas a [era]: ‘Joseph, ka mang.’ Nge ua apasa non nukunukoch:

“‘Ewer, nge ua nimenimoch—Ua fakkun nimenimoch!’ ”⁸

A pwan tongeni iei usun ren emon me emon kich.

Ika ka nom won eu anen nuku me fifiti mwokutokutun Mwichefen, nomofocheno won ena an me apwonueta om kewe pwon mi pin. Sopweifocheno tori fansoun nupwen feiochun ewe Samon epwe eto reom me ewe Ngun mi Fel ewe pwapwano non manauom.

Iei ika ka nom won eu an mi ugneni ewe an mi nom non ekkewe pukfel, upwe afata ngonuk pwe mi wor anen om kopwe niwinsefan.

Jises Kraist a awora eu napanapen aier mi fatafatoch ach sipwe kuna echikaren manauach. Ewe safein chommong ach mwannino a nom ren ach sipwe kutta omusomus non iotek. Nge, mi wor ekkoch semwenin ngun, akkaewin pupuungawen ewe annukun nimenimoch, mi wesen anamwota aninis me safein ngun seni emon souemwenin pristut.

Chommong ier ra no emon fopun me seman we mi chinnap ra eto ren ai we ofes. Ra feito seni fitupuku mail pwe seman epwe kuna safein an mengiringir. Neanuonun a fori eu tipis mi watte, iwe nupwen a chinnapeno achechemen ewe tipis a niwin ngeni i. Ese tongeni nikitano ewe memmefen mengiringir. Ese tongeni pwisin apungano ewe osukosukun neanuonun, nge a tongeni poputa seni ikkewe ia a nonnom ia me, ren aninis, totono ewe mengiringir a manau ren non ekkewe ier.

Ua kinisou pwe ren ai aiti i ekkoch nongonong seni ewe Puken Mormon, a usun eu watten chou a uweino seni afaran. Nupwen ir me noun we nengin ra niwiniti nenier fan chommong mail, ewe chinnap a ponuku mengiringirin an we tipisin noom.

Ika ka “esinna ngawenon nonnomum”⁹ me ka mochen niwiniti pochokunen ngunum, churi noum we pisop. A kamwoch ekkewe kii me a tongeni anisuk won ewe anen aier.

Sipwe pwisin aier, sipwe pwan pwisin angei omusomus. Ewe Samon a chok anamwota an emon epwe kunnu seni tipisir, me “[Epwe] omusano ar kewe tipis, me … esap chuwen chechchemeni ekkewe mettoch mi mwan ra fori.”¹⁰

Nupwen ewe angangen aier mi unus, kopwe weweiti wewen an Isaiah we pwon usun ewe Achasefan: “Sipwe ne kakkapas fengen ussun ekkei mettoch. En ka anueparapar ren tipis, nge upwe ne nimetuk pwe kopwe nimenimoch usun chok snow. Ina mo ika ka kon anueparapar, nge kopwe ne pwecheno usun chok pwechen unen siip.” ¹¹

Usun chok makken sook mi tongeni toton seni eu pap, ren ennetin aier niwinin ach kewe tipis mi tongeni toton ren ewe Achasefanin Jises Kraist. Ena pwon mi wewe ngeni tipis meinisin.

Ewe kapas allim a aiti kich ach sipwe pwapwa, anganga nuku nap seni nuokus, apinukunuk me pworacho netipechou, su seni kiroch me kunnu ngeni saramen ewe kapas allim ese much.

Paul me pwan ekkoch ra esinesin ngeni kich usun ekkewe weiresin ach kei ran me ekkewe ran repwap feito. Nge kinamwe a tongeni feito ren netipen ekkewe ra kunnu ngeni ekkewe pukfel me angei ekkewe pwonen tumunu me angasano mi nom non. Sia etiwa meinisin ar repwe kunnu ngeni ewe Chon Amanau Jises Kraist, ngeni An kewe kapas mi nom non ewe Testamen Noom, ewe Testamen Sofo, ewe Puken Mormon, ewe Doctrine and Covenants, me ewe Pearl of Great Price.

Ua pwarata pwe ekkewe pukfel mi namwot ngeni tumunun ngunuch. Ua pwan pwarata usun ewe manamanen echikar an ewe Achasefanin Jises Kraist, pwe me ren I aramas meinisn ra tongeni kuna manau.¹² Ewe Mwichefenin ewe Samon a nom won fonufan sefan. Ua pwarata usun ennetin ewe kapas allim. Ngang emon chon pwarata usun I. Fan iten Jises Kraist, amen.