Omeruul el mo Nguu a Chedaol el Ulekerreu

Ak dirk, mlo merek el merenged er a rengeasek el mo kaubuch er a templo. Tir lobekel a kiliei el klikiid el merma er tial klebokel el sils el ngalek el sechal me a redil a mechei a blirir er a le ngeasek e mo kaubuch. Tial cheledaol sils, e te mla obiich e beches. A lorael a taem el mong e te mo omuchel el oungalek, tiang a osisiu el teletael el bilskid a Demad er a Babeluades. A deuil a rengrir, me a deuil a rengrir a re merael mei el telecheroll, a ultuil er a otireklel a ikal olkael el milkedmokl er a Osobel e bleketakl er a chedaol llechukl er Ngii.

A roungalek er chelechang a melchedech el kirel a selbechakl el basio el sebechir lomekeroul ra rengelekir er ngii. Ngar ngii a uaisei el basio. Ng blai el ngarngii a osisecheklel a ebangkelio. A moktek er kid a telungalek er a chelsel a Ikelesia, me a ki mellach er a roungalek er a ngii di el ker el mo omekeroul er a rengelekir er a llemalt.

A Apostol el Paulus a ulemlaoch e mengelechel el kmo “a uriul el klebesei eng mo medbedubech aikel mor ngii a ringel er ngii.

“Ele re chad a di mo omdasu er a di tir, e di sorir udoud, e di oumead er tir, e ngarbab a rengrir, te mo mekngit a rengrir el mo er a rechad, e diak lorrenges a tekingir a re demerir ma re derrir, e diak loureng a saul, ma diak le sorir el melatk er a chelid,

“Ng mekngit omerellir el mo er a rechad, e diak lousubes a telemellier a rechad; toltuub er a rechad, e mekngit a blekerdelir, e bekeu el sorir el omekcharm er a rechad, e ouketui a ungil tekoi,

“Te cheblad, e meterkakl el diak lomekerreu, e belkuuk er a kldidairreng, e kuk sorir a tametereng el ngar uchei er a Dios;

“Te di oubail er a leko te chedal a chelid e diak er omerellir olchotel a klisichel a klemerang el lodengei. Mongeroid er kau er a re ua isei el chad.”¹

A Paulus a dirrek el ulemlaoch, “A re mekngit el chad ma re omerk a diak le meral osisechakl, a merael mengal mo mekngit, te mengblad er a rechad e di tir el mecheblad.”²

A ikal bades a uaia lomeklatk, e olecholt a teletael el kired el mo olechib. Meng kired el blecheol el klekar e blak a rengud. Ng sebeched el mo omes a ikal ulaoch e melecha tengetang er a ikel deues e bekikl eleng ngarngii er chelechal taem:

Meringel taem—chelecha el taem. Kid a kiei er a imis el kengaol el taem.

Ngibesereng, mead, kldidai el reng—ngii el rokui a ngarngii er a delongeled.

Ngibesereng, mead, kldidai el reng—ngii el rokui a ngarngii er a delongeled.

Diak lousubes a telemelli a rechad, oltuub er a rechad, me a lmuut el bebil—a ika el rokui e sebeched el locha tengetang er ngii el ngarngii el deues el meliuekl er kid.

A Moroni a dirrek el millekoi er a delngerenger el ngarngii er chelechal taem er sera lomeklatk el kmo:

Me sel de ues a ikal tekoi er a delongeled … e kede mokiis er a domelchesiu el kmal mekngit el teletael. …

A Moroni a mlodurch el mo melluches a ika el tekoi me bol sebechel a mekngit el mo diak, e a taem a mei el Satan a mo diak a klisichel er a rengud, me bol sebeched el morimel el mo blechoel el meruul a ungil, mel sebeched el mei er a omaoch el blil a melemalt el tekoi me bo desobel.”³

A omesodel a Paulus me a Moroni er a ikal sils er kid a meral uaisei meng diak el sebeched el di chemoit. A denguu er a rebebil e ng ua longesang, e melemall a rengud. Eng di, sel kumdasu er a ngarmedad, e ak iimis el melchesuar a mo ungil teletael.

Sel ocholt er a Paulus, el ngii a mo dechelel aikal ringel me a telemall, eng dirrek el ouchais er kid el kmo ng mekerang e sebeched el mo omekerreu er kid:

“Ng di kau, bo mesisiich el ngar a ikel bla msuub el msal oumerang, ele kungil medengei el kmo te rua techa ullisechakl er kau;

“Kau itia er a omodengei a chedaol llechukl er omkekerei el me klou, el ngii a sebechel el meklemesii a rengum e orolau el mo oumerang el ngii a ngara Jesus Kristo.”⁴

A chedaol llechukl a ouchais er kid a omeruul el mo nguu a chedaol ulekerreu. Ng ngarngii a osisechakl me a llach me a ruoll el ngoititerir a derta el ngelekel a Dios el mo nguu a klaumerang er a Jesus Kristo el Osobelir e Olsobel.

Meng betok el rak el longedmokl, eng kmal mle klou a blakelreng el mo oltobed a chedaol llechukl er a bek el omelekoi, el ngarngii a footnote me a cross-reference. A ki osiik rolel eng mo sebechel motobed el mora rokui el sorir el mesuub. A ikang a osisecheklid el mo er a ikel de borngii me a bo doruul. E meskid a urunguled me a klemedengei.

Sesei el rak ruchei, e a Elder S. Dilworth Young er a Rokeuid a ulsisecheklak er a omesubel omenguiu el chedaol llechukl. A ta er a stake a mla er a ringel el kirel a mekngit el reng er a delongelir a rechedal, me a omellach a kirel mekedmokl.

A kuleker er a President Young, “Ak mo kmu el mo ngerang?”

Ng di mle beot el kmo, “Mdu er tir me bo longuiu a chedaol llechukl.”

Me ak uleker, “Ngera er a ikal chedaol llechukl?”

Ng dilu el kmo, “Ngii di el tang. Mdu er tir me bol bekengii a Babier er a Mormon, tiaikid a tara teletelel, e lomuchel el menguiu. E kmal di mereched e a reng er a budech me a ulekrael a mei, e a nger a mo mocholt.

Mrelii a omengiuel a chedaol llechukl mel tebedechel a ikel bek el moruul, e a klengeltengak a mo er ngii. Ngarngii er a chedaol llechukl a ngor er a uleklatk, eng di ng dirrek el ngarngii a klou el ngesou er a omelisiich.

Alsekum me a tekoi er a chedaol llechukl a kora telkib el ngoded er a kot luchul, e molemolem el menguiu. E ng di mereched e ke momes a klebekelel me a klisiich el ngara llel.

A Paulus a dilung, “A rokui el chedaol llechukl a mlo er ngii lokiu a ulekrael er a Dios, el kirel el olab el olisechakl a klemerang, e mellach, e mesemechokl e olecholt a meral rolel a ungil klengar.”⁵

Ng sebechem el melasem er tial yaksok el mer kau.

Ke de kiei er a kengaol taem; eng di, ng sebeched el ngmai a a doureng me a budech el kired me a telungalek er kid. Tirkel kiei el ngara klengit el reng, el dikea urungulir er a techall el siiketerir a rengalek el mla mo oltirakl a omeruul er a beluulechad, a diak el kirel el tmoched. “Lak medakt, di moumerang.”⁶ A llemalt a lmuut el mesisiich er a chelbirukel.

A rengalek el mosisechakl el mo medengelii a chedaol llechukl sel le kekerei a mo medengelii a rael el kirel lokiu ngii e mo sebechel melemolem er ngar tial rael. Tirkel touchakl a ngarngii a techellir el obult, lokiu a ngesou, eng sebechir el metik er a rolir el lmuut el mei.

A rengelekel a Mosiah a uldechelakl er a Ikelesia el telkib el taem eng di a uriul e te mlo ouchel er a kngterir e siliseb er a mesisiich el bult. Me ngara Alma e kede menguiu el kmo a rengelekel a Mosiah …a mirrael el mo mesisiich a klemedengei er tir er a klemerang e le te mle mui er a klemedengei le te milsuub a chedaol llechukl el blak a rengrir, me bol sebechir el mo medengei a tekingel a Dios.”⁷

A President Joseph F. Smith a mle eim a rekil er sera demal el, Hyrum, le mad er a Carthage Jail. A uriul, e a Joseph a mirrael el oleong a ked ngii me a mla melakl el delal.

Sera le 15 a rekil eng mlokedong el mo er a mission el mo er a Hawaii. Ng ulemelchesiu er ngii el mla remiid e dingii el tang meng dilung: “Ak meral mla er a berraod … e ulemelchesiu el ngariou er a chelbulek, ng dimlak mui er a llomes me a klemedengei, a kuk di kekerei el buik, el meringel er ngak lomes er a medal a [ngii di] el chad.”

Meng ulemdasu er tial mering el teletael er a ta el kesus, e ngii el kekerei el Joseph a ulemerous el lekong ngar omerael, el kmal lorrechereched. Ng ulebang a kekerei el ulechull. E kol mochang, er tia el klebokel el klou el blai, el kirel me er ngii. Me a le mermang, eng milsa a olangch el llechukl el kmo, “Olechelubel.” Meng di mle mereched el soiseb e melechong. Ng milkengii tial ulechull e miltik a selilek, el becheleleu el bail. “tial klalo,” ng dilung, “A dirkak kisang el kmal meketeketa el taem.” Ng ulubail e mle mereched el mo er tial klou el blai.

“Ak millengod,” ng dilung, “e a chesimer a ulebok, e a chad el dilechor er a tuangel a mle Prophet Joseph Smith. Ng ulemes er ngak el telkib el diak lungil osengel, e a tekoi el dilung a [mle]: ‘Joseph, ke mla duob.’ Eng di ng mle klou a renguk e dilu:

“‘Oi, eng di ngak a beches—Ngak a beches!’”⁸

Me tia a sebechel mo uaisei el mei er a derta er kid.

Alsekum kau a merael er tial rael er a klaumerang me a omeruul el ngarngii er a Ikelesia, di mngar er ngii e moltirakl a telbilem. E molemolem el di merko sel taem el klengeltengat er a Rubak le mei er kau me a Chedaol Reng bol mocholt el mesisiich el ongetikaik er a klengar er kau.

Alsekum me kau a ngar a rael er chelechang el ngii a choridau er a mla medung er a chedaol llechukl, msall e kdu er kau el kmo ngarngii a rolel e ke lmuut el mei.

A Jesus Kristo a mla ochotii a kmal bleketakl el teletael el bo douchel a kngtid e mo omekungil er a klengar er kid. A kerul a oumesingd el chelbirukel a sebeched el metik sel dosiik a klausubes lokiu a nglunguched. Eng di, ngarngii a bebil er a secher er a reng, tokuni tirkel ngarngii a kngterir er a laokereng, el ngii a kirel usbechall a ungil el omkar el ngii a meduch el toktang er a reng.

Sesei el rak ruchei, e a ta er a ngeasek el redil me a uodel el demal a mlei er obis er ngak. Ng uleba el mei el betok el dart el mael el me osiik er a kerul a lomelchesiu el mekngit luruul. Sera le ngeasek el buik eng rirelii a kmal meringel el chelbirukel, e chelecha el udelang e tial omeruul a merma er a uldesuel. Ng diak el sebechel choitii tial lomelchesiu er ngii. Ng diak el sebechel lmuut el mor sel taem el kedmeklii el mo ungil tial telemellel er a le ngeasek el di ble le ngii, eng di mle sebechel lomuchel er a le ngarngii er chelechang e, ngokiu a ngesou, smuld a lomelchesiur el ngii a ulbengkel er a ikal betok el rak.

Ng mlo ungil a renguk er a kulisechakl er ngii a osisechakl er a Babier er a Mormon eng uaia le klou el berraod a mlekider er a ongelngelel. Me sera bocha lomekall el mo remei er a ikal betok el mael, eng kal uodel chad a mlo mechei a lomelchesiu el klengit el luruul er a ngaramong.

Alsekum meke mekiis el mocha melchesuar a mekngit el teletael omngarngii”⁹ e soam el lmuut el mo er a ungil chedaol klengar, bo mesa a bisop er kau. Ngii a oba kiis el sebechel ngosukau er a rael el mo er a ouchelreng.

A ouchelreng a di ngara chad, me a dirrek el klausubes. A Rubak a kmal di soal a chad a lobult el choridii er a kngterir, e “[Ngii] a mo ousubes a kngterir, e … dikea bo lolatk a kngterir.”¹⁰

A ouchelreng sel bocha le merek, eng mocha sebechem el mo medengelii a belkul a yaksok er a Isaiah el kirel a Tngakireng: “A Rubak a kmo, mada de dedesii tial tekoi: a kngtim a lesal mo bekerkard, e ak mo ngotechau el mo beches el ua yuki; ma lesal mo smiich el bekerkard, me kau a di mo becheleleu el ua bsechel a sib.”¹¹

El di ua chalk sel mesuld er a blackboard, e ngokiu a meral ouchelreng e a telemall el mengai er a kngtid a sebechel mengubet lokiu a Tngakireng er a Jesus Kristo. Tial yaksok a mo er a rokui el teletael.

A ebangkelio a osisecheklid el mo dmeu a rengud, el mo oba a klaumerang e diak el dakt, el mo metik a urunguled e mo mesisiich er a ringel, e mo choitii a ilkolk e mo chemau a llomes er a diak a ulebengelel ebangkelio.

A Paulus me a rebebil a ulemeklatk el kirel a ongarm er a temed me a sils el dirk merael mei. Eng di a A budech a sebechel medalm er a rengrir a derta el tir a mo chemau a chedaol llechukl el ngii a mo nguu a chesmerel a yaksok er a ulekerrreu me a mo suobel el ngii a mosisechakl er a chelsel. Aki mengemedaol er a rokui me lobult el mo er a Osobel el Jesus Kristo, me a osisecheklel el de betik er a Uodel Renged, Beches el Renged, Babier er a Mormon, Doctrine and Covenants, me a Pearl of Great Price.

A kuchotii a sioning er ngak er a chedaol llechukl el ngii a ocholt a omeruul el mo nguu a chedaol el ulekerreu. Ak dirrek lochotii a sioning er ngak er a omekungil el klisichel a Tngakireng er a Jesus Kristo, el dokiu ngii e a rokui el sebechir el mo suobel”¹² a mo suobel. A Ikelesia er a Rubak a mla lmuut el mechederoder er a beluulechad. Me a klemerang er a ebangkelio a kuchotii a sioning er ngak el kirel. Ngii ak sioning er ngii. El ngar a ngklel a Jesus Kristo, amen.