O Le Malosiaga Amiotonu o Tamaitai

Mo se taimi umi lava, na faalagolago ai tagata i faatosinaga amiotonu o tamaitai. E ui e mautinoa lava e le na o le pau lea o faatosinaga amiotonu na faia i le lalolagi, o le faavae talafeagai sa tuuina atu e tamaitai ua faamaonia le tulaga ese o le aoga i le manuia o tagata uma. Masalo, ona o se tulaga aoao, e tele lava ina le talisapaiaina ai lenei sāo o tamaitai. Ou te fia faailoa atu le agaga faafetai mo faatosinaga a tamaitai lelei, faailoa atu nisi o filosofia ma faiga e tau faamata’uina ai le malosiaga ma le tulaga o tamaitai, ma faaleo atu se fanoga i tamaitai ia atiina ae le mana amiotonu o i totonu o i latou.

E aumaia e tamaitai faatasi ma i latou i le lalolagi se uiga auaumama faapitoa, se meaalofa faalelagi lea latou te atamamai ai i le faaosofia o na uiga e pei o le faatuatua, lototele, malamalama i lagona o isi, ma faaleleiga atili o mafutaga ma aganuu. Ina ua ia viia le “faatuatua faamaoni” na ia maua ia Timoteo, na ta’ua ai e Paulo o lenei faatuatua “sa muai i ai ia Loi o le tina o lou tina, atoa ma Eunike lou tina.”¹

I tausaga ua mavae a o [o’u] nofo ai i Mekisiko, sa ou mataua ai le uiga o le faamatalaga a Paulo. Ou te manatua se tina talavou faapitoa, o se tasi o le toatele o tamaitai o le Ekalesia i Mekisiko, o lona faatuatua i le Atua na iloagofie lelei ai lava o latou olaga, ae sa foliga mai sa latou tau le iloaina lava. O lenei tamaitai tamalii na faaalia se taitaiga amiotonu na afua mai i le amio mama lea na faapea ona faatosinaina ai mo le lelei i latou uma na siomia o ia. Faatasi ai ma lona toalua, sa ia ositaulagaina se vaega o mea e fiafia i ai ma meatotino mo mea e sili ona ave i ai lana faamuamua, na foliga mai e leai ma se faalotolotolua. O lona gafatia e faatino galuega o le fesiitai, punou, ma le faapaleniina o lana fanau, na latalata atu i se tagata e mamana le malosi. Sa tele naua ona tiutetauave, ma o ana galuega sa tele ina fai soo ma e fai i aso uma, ae sa i ai pea e le aunoa se toafilemu matagofie, se lagona o le faia o le galuega a le Atua. E pei foi o le Faaola, sa faamamaluina o ia e ala i le faamanuiaina o isi e ala i auaunaga ma osigataulaga. Sa avea o ia ma faataitaiga o le alofa.

Ua faamanuiaina tele a’u i faatosinaga amiotonu a tamaitai, ae maise lava o lo’u tina ma lo’u toalua. Faatasi ai ma isi tamaitai ou te vaavaai atu i ai ma le loto faafetai o Anna Daines. O Anna ma lana tane ia Henry, ma le la fanau e toafa o nisi ia o paionia o le Ekalesia i New Jersey i le Iunaite Setete. Sa amata mai i le vaitaimi o le 1930, a o aotau ai Henry mo lona faailoga o le fomai i le Iunivesite o Rutgers, sa galulue malosi ai i laua ma Anna i faalapotopotoga i le aoga ma le lotoifale i Metuchen, lea sa latou aumau ai, ina ia faatoilaloina le malosi o le taliaina o le faailoga tagata na faasaga i Mamona, ma sa ia faia ai lea nuu o se nofoaga sili atu ona lelei mo matua uma e tausia ai a latou fanau.

O Anna, mo se faataitaiga, sa avea ma se volenitia i le Metuchen YMCA ma avea ai o ia ma se tagata taua. I totonu o se tausaga na tofia ai o ia e avea ma peresitene o le Ausilali a Tina ona sosoo ai lea ma le talosagaina o ia e tauva mo le tasi o tulaga e tolu o tamaitai i le pulega o le fono faatonu a le YMCA. Sa manumalo o ia e aunoa ma se faalavelave, ma faapea ona auai ai i le aufono tonu lava lea sa na o ni nai tausaga na muamua atu, na latou teena ai le faatagaina o le Au Paia e potopoto i totonu o le latou fale!”²

Sa siitia atu lo matou aiga i le Uarota a New Brunswick a o ou talavou. Sa matauina au e Sister Daines ma faailoa soo mai lona talitonuga i ou tomai ma gafatia, lea sa musuia ai au e aapa maualuga—maualuga atu nai lo mea ou te oo i ai pe ana le seanoa lona faamalosiau. E faatasi, ona o se lapataiga atamai ma le talafeagai mai ia te ia, sa ou alofia ai se tulaga semanu e mautinoa lava ou te oo ai i se faanoanoaga. E ui e le o toe i ai o ia iinei, ae o faatosinaga a Anna Daines o loo faaauau pea ona lagonaina ma atagia i olaga o e ua tupuga mai ia te ia atoa ai ma le anoanoai o isi tagata, e aofia ai ma au.

Na aoaoina a’u e lo’u tinamatua o Adena Warnick Swenson ina ia ou magafagafa i auaunaga o le perisitua. Sa ia uunaia a’u e tauloto le faamanuiaina o le falaoa ma le vai o le faamanatuga, ma faamalamalama mai e faapea, o le faiga lenei e mafai ai ona ou faia ma se malamalamaaga ma se lagona e sili atu. I le matauina o le ala na ia lagolagoina ai lo’u tamamatua, o se peteriaka o le siteki, na faaosofia ai a’u i se faaaloalo mo mea paia. Sa lei iloa lava e Tinamatua Swenson ave se taavale, ae sa ia silafia le auala e fesoasoani ai i tamaiti e avea ai ma ni alii o le perisitua.

O faatosinaga amiotonu a se tamaitai e leai se isi mea e sili atu ona lagona ai le mamana pe sili atu ona lelei le faaaogaina ai, nai lo o totonu o le aiga. E leai se isi nofoaga e sili atu ona lelei mo le tausiga o le tupulaga faia’e nai lo o le aiga masani, lea e galulue faatasi ai se tamā ma se tina e tuuina atu mea e manaomia, aoao ma faafailele le la fanau. O nofoaga e le maua ai lenei faatulagaga amiotonu o le aiga, e taumafai ai tagata e faataitai ona aafiaga i le mea sili latou te mafaia i o latou tulaga faapitoa.

E tusa lava po o le a le tulaga, e mafai e se tina ona faaaoga se faatosinaga e le mafai ona faatusalia e se isi lava tagata i isi lava sootaga. E ala i le mana o ana faataitaiga ma aoaoga, na aoao ai lana fanau tama e faaaloalo i le tulaga faatamaitai ma ia faaaofia le amio pulea ma tulaga faatonuina maualuluga o amioga mama i o latou lava olaga. Ua aoao e lana fanau teine ia atiae lo latou lava mama ma ia tutu atu mo le mea sa’o, i taimi uma, po o le a lava le le lauiloa. O le alofa o se tina ma ona faamoemoega maualuluga e taitai atu ai lana fanau ia faatino ma le manatu tonu i ai e aunoa ma ni ‘alofaga, ia manatu mamafa i aoaoga ma atinaega patino, ma ia faia ni saofaga faifaipea i le manuia o tagata uma o siomiaina i latou. Na fesili Elder Neal A. Maxwell i se tasi o taimi: “Pe a faaalia atoa mai le talaaga moni o le tagata, mata o le a faaalia ai siuleo o le pāpā o fana, po o leo musuia o pese faamoe pepe? O taofiga maoae na faia e alii o le militeli po o le faatupuina o le filemu e tamaitai i aiga ma pitonuu? Mata o mea e tutupu i moega pepe ma umukuka e faamaonia ai le sili atu ona malolosi o aafiaga nai lo o mea e tutupu i faigamalo?”³

E sili atu le paia o le matafaioi a se tamaitai i le foafoaina o le ola. Ua tatou iloa o o tatou tino faaletino e i ai se afuaga paia⁴ ma e tatau ona tatou oo uma i se fanau mai faaletino ma se toe fanauina faaleagaga ina ia oo atu ai i malo aupito maualuluga i le malo selesitila o le Atua.⁵ O lea la, o tamaitai ua i ai se vaega taua (o nisi taimi e lamatia ai o latou lava soifua) i le galuega ma le mamalu o le Atua “ia aumaia le tino ola pea ma le ola faavavau o le tagata.”⁶ I le avea ai ma tinamatutua, tina, ma tagata e faataitai i ai, ua avea ai tamaitai ma i latou e puipuia le punavai o le ola, aoaoina o augatupulaga taitasi i le taua o le mamā i feusuaiga—o le legavia a o le’i faaipoipo ma le faamaoni a’ia’i i faaipoipoga. O le auala lenei, ua avea ai i latou ma faatosinaga amiotonu ma lelei i malo; ua latou aumaia ai i fafo uiga sili ona lelei o alii; ua latou faasaoina siosiomaga lelei lea e mafai ona tausia ai ni fanau malupuipuia ma maloloina.

Tuafafine, ou te le manao e soona vivii outou e pei ona matou faia i nisi o taimi i tautalaga i Aso o Tina ia tou te tau le toamalie ai. E le faapea e tatau ona outou atoatoa;⁷ Ou te le tautino atu tou te atoatoa (ae vagana ai se tasi o loo alala latalata mai i le taimi lenei). O le uiga o la’u faamatalaga e faapea, po o e nofofua pe faaipoipo, pe ua e fanau maia ni fanau pe leai, pe ua e matua pe talavou pe feololo, o lau taitaiga amiotonu e taua, ma atonu ua amata ona matou le amanaiaina le taua o outou ma a outou faatosinaga. E mautinoa lava ua i ai faiga ma ni malosiaga ua faagaoioia, o le a faavaivaia ai ma iu ai ina aveesea a outou faatosinaga, ae e matuai afaina ai tagata taitoatasi, aiga ma tagata lautele. Se’i o’u ta’ua ni vaega se tolu e avea ma se faaeteetega ma se lapataiga.

O se filosofia matautia e faavaivaia ai faatosinaga amiotonu a tamaitai o le ta’u faatauvaaina lea o le faaipoipoga ma le tulaga faaletina ma le faatausiaiga i le avea ma se matātā. Ua vaai atu nisi i le faatausiaiga ma le inoino tuusa’o, ma finau mai e faalumaina ai tamaitai, ma o manaoga faifaipea o le tausiga o fanau o se ituaiga o faiga le talafeagai.⁸ Latou te tauemu i le mea latou te ta’ua “o le auala i le faaletina” i le avea ai ma se matātā. E le fetaui pe sa’o lenei mea. Tatou te le faaitiitia le taua o mea e ausia e tamaitai po o alii, i soo se taumafaiga tauaogaina po o matātā—tatou te manuia uma mai na faamanuiaga—ae faailoa atu pea e leai se manuia e maualuga atu nai lo o le tulaga faaletina ma le faaletama i le faaipoipoga. E leai se matātā e maualuga atu, ma e leai se aofaiga o se tupe, pule, po o viiga mai tagata lautele e mafai ona sili atu i taui silisili o le aiga. Po o a lava isi mea e mafai ona ausia e se tamaitai, o ona faatosinaga amiotonu e leai se isi mea e sili atu ona faaaogaina lelei ai nai lo iinei.

O uiga faaalia e faatatau i tulaga o feusuaiga o tagata ua lamatia ai le taitaiga amiotonu a tamaitai i le tele o itu. O le faapa’u pepe ina ia talafeagai ma manaoga patino po o tulaga lautele ua osofaia ai le fatu o mana e sili ona paia o se tamaitai ma faatamaia ai lana taitaiga amiotonu. E faapena foi le moni e faatatau i feusuaiga le mama ma laei le talafeagai [fufusi, valavala, puupuu] lea e le gata e faalumaina ai tamaitai ae faamalosia ai foi le pepelo e faapea o le tulaga faalefeusuai o le tamaitai o le uiga atoa lea o lona taua.

Ua leva ona i ai se aga masani o tulaga faatonuina itu lua lea e faamoemoe ai e faasāsā feusuaiga a tamaitai ae faataga amioga le mama a alii. O le le fetaui o lea ituaiga o tulaga faatonuina itu lua ua iloa lelei lava, ma ua tatau lava le faitioina ma le teenaina. I lena teenaina, e faamoemoe ai se tagata o le a tula’i ae alii i le tulaga faatonuina maualuga atu e tasi, ae peitai ua alia’e ai le faafeagai—o le taimi nei ua uunaia tamaitai ma teine ia ola soonafai e pei lava o le “tulaga faatonuina itu lua” ua faamoemoeina alii e fai. O le mea sa avea muamua ai le manaomia e tulaga faatonuina maualuluga o tamaitai o le tautinoga ma le tiutetauave mai alii, ua avea nei ma sootaga feusuai e aunoa ma le mama pe talafeagai, aiga ua leai ni tamā, ma le faateleina o le mativa. O le avanoa tutusa i le ola soonafai ua na ona faoa ai mai tamaitai o o latou faatosinaga amiotonu ma faaleagaina ai tagata uma.⁹ I lenei fetuunaiga lē aoga, o alii ia ua “saoloto” lava i a latou mea e fai, ae o tamaitai ma fanau ua sili ona mafatia ai.

O le vaega lona tolu o popolega e sau mai ia i latou o e, ona o le upu faiga tutusa, ua mananao ai e tafiese uma eseesega i le va o alii ma tamaitai. E masani ona faaaoga e lenei tulaga le uunaia o tamaitai e faaaoga le tele o amioga a alii—ia atili sauā, maa’a, ma finauvale. Ua taatele i le taimi nei i tifaga ma taaloga vitio le vaaia o tamaitai i tiute e tele i sauaga, ma tuua ai tino oti ma faatamaiaga ona o a latou amioga. E faatamaia loto le vaaia o alii i matafaioi faapena, ma e mautinoa lava e le faaitiitia, pe afai o tamaitai o i latou ia e faatinoina ma mafatia i sauaga.

Na aoao mai le sa avea muamua ma peresitene aoao o Tamaitai Talavou o Margaret D. Nadauld: “Ua lava tamaitai o le lalolagi ua maaa; ua tatou manaomia ni tamaitai o e agavaivai. Ua lava tamaitai amio pa’aā; ua tatou manaomia ni tamaitai o e agalelei. Ua lava tamaitai amio le mafaufau; ua tatou manaomia ni tamaitai o e tauagafau. Ua lava tamaitai lauiloa ma mauoloa; ua tatou manaomia ni tamaitai se toatele e faatuatua. Ua lava le matape’ape’a; ua tatou manaomia le tele o le amio lelei. Ua lava le faamaualuga; ua tatou manaomia le amio mama atili. Ua lava le tautaua; ua tatou manaomia le tele o le mamā.”¹⁰ O le faanenefuina o eseesega o tamaitai ma alii, ua tatou le iloa ai meaalofa manino, ma tutusa lelei a tamaitai ma alii ia e fatuina faatasi ai se mea atoa maoae atu.

O la’u augani i tamaitai ma teineiti i le asō, ia puipui ma atiina ae le malosiaga amiotonu o loo i totonu ia te outou. Ia faasaosao lena uiga o le amio mama ma le meaalofa tulagaese ua outou aumaia faatasi ma outou i le lalolagi. O lou malamalama o le faia lea o mea lelei ma ia amio lelei, ma a o e mulimuli i le Agaga Paia, o le a tuputupu a’e lou gafatia ma faatosinaga mama. I tamaitai talavou ou te faapea atu, aua ne’i aveesea lena malosiaga amiotonu e tusa lava pe e te le’i atiaeina atoa. Ia tausisi lelei ia mama lau gagana, ae le masoā; o ou laei ia atagia ai le tauagafau, ae le o le faamaualuga; ma o lau amio ia faaalia ai le mama, ae le o le ola soonafai. E le mafai ona e siia lima tasi se isi i le mama, pe afai o loo e faafiafiaina le tiapolo i le isi.

Tuafafine, i au fegalegaleaiga uma lava, o lou sootaga ma le Atua, lou Tama Faalelagi, o le o le punavai o lou malosiaga amiotonu, e tatau ona e faamuamua i taimi uma o lou olaga. Ia manatua o le mana o Iesu na oo mai e ala i le tuuto atu o Lona loto i le finagalo o le Tama. Sa le’i tuua e Ia le mea na faafiafiaina ai Lona Tama.¹¹ Ia taumafai ia avea ma le ituaiga soo faapena o le Tama ma le Alo, ma o le a le mafai ai lava ona galo au faatosinaga.

Ma aua le fefe e faaaoga lena faatosinaga e aunoa ma le mata’u pe faatoese ai. “Ia saunia pea lava outou e tali atu i [alii, tamaitai, ma tamaiti] uma o e fesili mai ia te outou i le uiga o le faamoemoe o loo ia te outou.”¹² “Tala’i atu le upu; ia e faamalosi i ona aso e taugalemu ai, ma ona aso e le taugalemu ai; ia e faatonu atu, ia e aoai atu, ia e apoapoai atu ma le onosai uma atoa ma le aoao atu.”¹³ “Ia tausi a’e a outou fanau i le malamalama ma le upumoni.”¹⁴ “Aoaoina i [latou] ia tatalo, ma savavali tonu i luma o le Alii.”¹⁵

O nei apoapoaiga i tamaitai, ia aua ne’i i ai se tasi e malamalama sese ma le loto i ai. O le viia ma le uunaia o le malosiaga amiotonu i tamaitai, ou te le o faapea atu ai o alii ma tamaiti ua faamatuu ese mai o latou lava tiute ia tutu mo le upumoni ma le amiotonu, pe faapea o o latou tiutetauave e auauna atu, ositaulaga, ma taitai, ua itiiti ifo nai lo o tiutetauave o tamaitai, pe mafai foi ona lafoai atu i tamaitai. Uso e, ia tatou tutu faatasi ma tamaitai, tausoa a latou avega, ma atiae taitaiga amiotonu a o tatou lava soa.

Tuafafine pele, matou te faalagolago i le malosiaga amiotonu ua outou aumaia i le lalolagi, i faaipoipoga, i le aiga, ma i le Ekalesia. Matou te faalagolago i faamanuiaga tou te aumaia mai le lagi e ala i a outou tatalo ma le faatuatua. Matou te tatalo mo lo outou puipuiga, tulaga manuia ma le fiafia, atoa ai ma la outou uunaiga ia faatumauina. I le suafa o Iesu Keriso, amene.