O Le Mana, Olioli, ma le Alofa e Maua i le Tausiga o Feagaiga

1. O le tausia o feagaiga e faamalosia ai, maua ai le mana, ma puipuia ai.

Na vaai Nifae e ala i se faaaliga i faamanuiaga maoae e tuuina mai e le Alii i e tausia feagaiga. “Ma sa oo ina ou, vaai au o Nifae, i le mana o le Tamai Mamoe a le Atua, ua alu ifo … i luga o tagata o le feagaiga a le Alii, … ma sa faaauupegaina i latou i le amiotonu ma le mana o le Atua i le mamalu tele.”⁵

Sa ou feiloai talu ai nei i se uo pele fou. Sa ia molimau mai ina ua uma ona maua ona faaeega paia, sa ia lagona le malosiaga ma le mana e tetee atu ai i faaosoosoga ia sa ia tauivi ai muamua.

Ao tatou tausia a tatou feagaiga, o le a tatou mauaina foi le lototoa ma le malosi e fesoasoani ia i tatou e tauave avega a le tasi. Sa i ai i se tamaitai loto nutimomoia se atalii sa aafia i se luitau faigata e ono maliu ai. O lona faatuatuaina o ona uso Aualofa i le avea ma tausi feagaiga, sa ia valaauliaina ai ma le lototoa i latou e anapopogi ma tatalo mo lana tama. Na faaalia e se isi uso lona moomoo maimau pe ana faapea sa ia talosagaina ia foi tatalo mai ona uso. I tausaga ua mavae, sa tauivi ai foi lana tama. Sa ia moomoo maimau pe ana ia valaauliaina i latou e fesoasoani i lona aiga e tauave lenei avega. Na fetalai mai le Faaola, “O le mea lea e iloa ai e tagata uma lava o ou soo outou, pe afai ua outou fealofani.”⁶

Uso e, e tofu uma lava i tatou ma avega o tauave ma tausoaina faatasi. O se valaaulia e tausoa faatasi le avega a le tasi ma le tasi o se valaaulia lea e tausia a tatou feagaiga. O le fautuaga a Lusi Maki Samita i le uluai usoga a le Aualofa ua sili atu le fitoitonu i lenei vaitaimi nai lo se isi lava taimi muamua: “E tatau ona tatou faapelepele le tasi i le isi, leoleo e le tasi le isi, faamafanafana e le tasi le isi ma ia maua aoaoga, ina ia mafai ai ona tatou nonofo uma faatasi i le lagi.”⁷ O le tausi feagaiga lenei faapea ai ma faiaoga asiasi i lona tulaga silisili!

Ua faamanatu mai ia i tatou e le Tusi a Mamona na oo lava i le perofeta o Alema na tauaveina se avega i le i ai o se atalii faalogogata. Ae na faamanuiaina Alema i le i ai o ni uso ma tuafafine tausi feagaiga i le talalelei o e na liua loloto i le Alii ma sa iloa le uiga o le tauave faatasi o le avega a le tasi ma le isi. Ua tatou masani i le mau o i le Mosaea o loo talanoa ai e uiga i le maoae o le faatuatua o tatalo a Alema mo lona atalii. Ae na fai mai le faamaumauga “ua faafofogaina e le Alii talosaga a lona nuu, ma talosaga foi a lana auauna, o Alema.”⁸

Ua tatou iloa e olioli le Alii “i le agaga e salamo,”⁹ ae ua sili atu lo tatou naunautai i lo mea uma ina ia mulimuli a tatou fanau i le fautuaga a Peresitene Henry B. Eyring ina ia “vave amata ma tutumau ai” i le osia ma le tausia o feagaiga.¹⁰ E lei leva atu, sa tulai mai ai se fesili faamaoni faatupu-manatu i se fonotaga a taitai perisitua ma ausilali: pe o tatou faamoemoe moni ea e tausia e tamaiti tai valu tausaga a latou feagaiga? Ao matou fefautuaai faatasi, sa fautua mai ai o se tasi o auala e saunia ai le fanau ina ia osia ma tausia feagaiga paia o le papatisoga o le fesoasoani lea ia i latou e aoao e fai ma tausi se folafolaga faigofie.

E agavaa matua faamaoni ia iloa pe faapefea ona aoao atu ni auala e sili ona faafetaiaia ai manaoga o a latou fanau. A o saili ma galulue matua e tusa ma faaaliga patino, fefautuaai faatasi, ma auauna atu ma aoao ia mataupu faavae faigofe o le talalelei, o le a latou maua le mana e faamalolosia ai ma puipuia ai o latou aiga. E mafai foi ona fesoasoani isi tagata o le aiga. Na aoao mai e lou tama matua aulelei ia i matou le taua o le tausia o folafolaga e ala i se pese faigofie. O se [pese] faapenei: “Ae e te lei faia se folafolaga, mafaufau lelei i lona taua. Afai e fai, ia tusi ai i le papa o lou loto. Tusi ai i le papa o lou loto.” O lena tamai pese na aoaoina mai ma le alofa, talitonuga, ma le malosi aua na tusia ai e Tama matua ana lava ia folafolaga i lona loto.

O se tina atamai ou te iloa, sa faaaofia lana lava fanau i ana taumafaiga e tausia ana feagaiga. Na te tauave ma le fiafia ia avega a tuaoi, uo, ma tagata o le uarota—ma faamafanafana ia i latou o e manaomia le faamafanafanaga. E le o se mea e ofo ai ina ua sau lata mai nei lana tama teine laitiiti e talosaga se fesoasoani i le ala sili e faamafanafana ai i sana uo ua faatoa maliu lona tama. O se faatulagaga atoatoa lena o le aoao faapea, o ona naunautaiga e faamafanafana i lana uo o se tasi lea o auala e tausi ai lana feagaiga o le papatisoga. E mafai faafefea ona tatou faamoemoe i fanau e osia ma tausia feagaiga o le malumalu pe afai tatou te le o faamoemoe ia i latou e tausia a latou uluai feagaiga—a latou feagaiga o le papatisoga?

Na matauina e Elder Richard G. Scott, “O se tasi o faamanuiaga silisili e mafai ona tatou ofoina atu i le lalolagi, o le mana lea o se aiga e faatotonugalemu ia Keriso lea e aoaoina ai le talalelei, tausia ai feagaiga, ma ola lauusiusi ai le alofa.”¹¹ O a nisi auala e mafai ona tatou fatuai ai sea ituaiga aiga e saunia ai a tatou fanau e osia ma tausia feagaiga o le malumalu?

• E mafai ona tatou aoao faatasi i le uiga o le agavaa mo se pepa faataga o le malumalu.

• E mafai ona tatou aoao faatasi i le auala e faalogo ai i le Agaga Paia. Talu ai ona o le pepa faataga o le malumalu e maua e ala i se faaaliga, e manaomia lo tatou aoaoina o lena tomai taua.

• E mafai ona tatou aoao faatasi pe faapefea ona iloa le faaaogaina o faatusa, amata i faatusa paia o le papatisoga ma le faamanatuga.

• E mafai ona tatou aoao faatasi pe aisea e paia ai le tino, aisea e faasino i ai i nisi taimi o se malumalu, ma e faapefea ona faatatau ia laei tauagafau ma teuga i le natura paia o lavalava o le malumalu.

• E mafai ona tatou aoao faatasi i le fuafuaga o le fiafia i tusitusiga paia. O le sili atu ona tatou faamasani i le fuafuaga a le Tama Faalelagi ma le Togiola i tusitusiga paia, o le sili atu foi lea ona anoa ia tapuaiga faalemalumalu.

• E mafai ona tatou aoao faatasi i tala a o tatou tuaa, saili ia talafaasolopito o aiga, faavasega ia igoa, ma faia galuega sui i le malumalu mo e pele ua maliliu.

• E mafai ona aoao faatasi i le uiga o faaupuga e pei o le faaeega paia, sauniga, faamauga, perisitua, ki, ma nisi upu e faatatau i le tapuaiga i le malumalu.

• E mafai ona tatou aoao atu tatou te o i le malumalu e osi feagaiga ma le Tama Faalelagi—tatou te toe foi i le aiga e tausi ai!¹²

Sei o tatou manatuaina le manatu faavae o le “lelei, lelei tele, ma le lelei silisili” ao tatou aoao atu.¹³ E lelei le aoao atu o a tatou fanau e uiga i le malumalu. E lelei tele le saunia ma faamoemoeina i latou e osia ma tausia feagaiga. E lelei silisili le faaali atu ia i latou e ala i faataitaiga tatou te pipii ma le fiafia ia tatou lava feagaiga o le papatisoga ma le malumalu! Uso e, ua tatou iloa ea la tatou matafaioi taua i le galuega o le faaolataga ao tatou faafailele, aoao atu, ma saunia le fanau ia alualu i luma i le ala o le feagaiga? O le a oo mai le mana e faia ai ao tatou faamamaluina ma tausia a tatou feagaiga.

2. O le tausia o feagaiga e taua mo le fiafia moni.

Na aoao mai Peresitene Thomas S. Monson, “O feagaiga paia e faamamaluina e i tatou, ma o le faatuatua i ai o se tulaga moomia lea mo le fiafia.”¹⁴ I le 2 Nifae tatou te faitau ai, “Ma sa oo ina matou ola e tusa ma le ala o le fiafia.”¹⁵ I luma o lenei lava mataupu ua tatou aoao ai na fausia e Nifae ma lona nuu se malumalu. E moni o i latou o ni tausi feagaiga fiafia! Ma i le Alema ua tatou faitauina ai, “Ae faauta sa leai se taimi sili ona fiafia i totonu o le nuu o Nifae, talu mai aso o Nifae, nai lo aso o Moronae.”¹⁶ Aisea? Ua tatou toe aoaoina i se fuaiupu i luga ifo, o i latou “o e sa faamaoni i le tausiga o poloaiga a le Alii.”¹⁷ O tagata tausi feagaiga o tagata foi ia e tausi i poloaiga!

Ou te fiafia i le mau e faitauina: “Ma o lenei ina ua faalogo mai tagata i nei upu [o lona uiga o upu o loo faamatalaina ia le feagaiga o le papatisoga], sa pati o latou lima i le olioli, ma alalaga mai: O le manao lea o o matou loto.”¹⁸ Ou te fiafia i le manao o o latou loto. Sa latou mananao ma le olioli e osia ma tausia a latou feagaiga!

Na alaga fiafia se uso talavou i se tasi Aso Sa, “Ua mafai ona ou ai ma inu i le faamanatuga i le asō!” O le a se taimi mulimuli na e olioli ai i lena avanoa? Ma o faapefea ona tatou faaalia? Tatou te faia lenei mea i le manatuaina pea o le Faaola ma tausia [pea] Ana poloaiga, lea e aofia ai le tausia o Lona aso Sapati ia paia. Tatou te faia i le manatuaina pea o Ia ao tatou faia e le aunoa a tatou tatalo patino ma faaleaiga, suesue i tusitusiga paia i aso uma, ma afiafi faaleaiga i vaiaso uma. Ma pe a tatou le mautonu pe faaleano i nei mea taua, tatou te salamo ma toe amata.

O le osia ma le tausia ma le fiafia o a tatou feagaiga e aumaia ai le malosi ma le uiga i sauniga faaola e taua ma paia ia e manaomia ona tatou mauaina ina ia mafai ai ona maua “mea uma ua i ai [i le] Tama.”¹⁹ O sauniga ma feagaiga o ni “tulaga maoae faaleagaga” ia na faatatau i ai Peresitene Henry B. Eyring ao ia aoao mai: “O le Au Paia o Aso e Gata Ai o ni tagata o le feagaiga. Mai lava i le aso na papatiso ai seia oo mai i taimi faaleagaga taua o o tatou olaga, tatou te faia ai lava ni folafolaga i le Atua ma Ia faia foi ni folafolaga ia i tatou. Na te tausia pea ana folafolaga sa faia e ala mai i Ana auauna faatagaina, ae o se tofotofoga taua tele i o tatou olaga le vaai pe o le a tatou osia ma tausia a tatou feagaiga ma Ia.”²⁰

3. O le tausiga o a tatou feagaiga e faaalia ai lo tatou alolofa mo le Faaola ma lo tatou Tama i le Lagi.

Mai mafuaaga uma lava e ao ai ona tatou filiga atili i le tausiga o a tatou feagaiga, o le mafuaaga lenei e sili atu le malosi nai lo mafuaaga uma—o le alofa. E i ai se mau i le Feagaiga Tuai e ootia ai lou loto pe a tatou mafaufau i le mataupu faavae o le alofa. E i ai se tasi o i tatou e le ootia i le tala faamama’i faatusipaia ia Iakopo ma Rasela ao tatou faitauina, “Ona auauna ai lea o Iakopo i tausaga e fitu ona o Rasela, ua peiseai o nai aso itiiti ia i lona manatu, aua o lona manao tele ia te ia”?²¹ Uso e, o tatou tausia ea a tatou feagaiga i lena lava ituaiga o alofa loloto ma tuuto?

Aisea na naunau ai le Faaola e tausia Lana feagaiga ma le Tama ma faataunuu Lana misiona paia e togiola mo agasala a le lalolagi? Ona o Lona alofa mo Lona Tama ma Lona alofa mo i tatou. Aisea na naunau ai le Tama e faataga Lona Alo atoatoa e Toatasi na Fanaua ina ia mafatia i tiga e le mafai ona faamatalaina e tauave ia agasala, faanoanoaga, ma’i, ma le vaivaiga o le lalolagi ma mea uma ua le talafeagai i lenei lalolagi? Tatou te maua le tali i upu nei: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi.”²²

“Afai tatou te talisapaia ma le atoatoa le anoanoai o faamanuiaga ua tatou maua e ala mai i le togiola na saunia mo i tatou, e leai la se mea o le a le mafai ai ona tatou faia ma le naunautai ma le malie i ai pe a fetalai mai le Alii.”²³ E tusa ai ma lenei faamatalaga mai ia Peresitene Iosefa Filitia Samita, o le tausiga o feagaiga o se tasi lea o ala e faaalia ai lo tatou alolofa mo le Togiola le iu a lo tatou Faaola ma le Togiola ma le alofa atoatoa a lo tatou Tama oi le Lagi.

Na fautua mai ma le agaalofa ia Elder Holland, “Ou te le o mautinoa pe o le a le mea o le a tatou oo i ai i le Aso Faamasino, ae o le a ou matuai ofo lava pe afai i lena talanoaga, e le fesili mai le Atua ia i tatou i le mea tonu foi lea na fesili ai Keriso ia Peteru: ‘Pe na e alofa mai ea ia te au?’”²⁴ I le po nei ou te valaaulia outou taitoatasi ina ia toe iloilo po o le a le tele o lo tatou alolofa i le Faaola, ia faaaoga o se fua le tulaga o tatou olioli ai i le tausiga o a tatou feagaiga. Na fetalai mai le Faaola, “O le ua ia te ia au poloaiga ma tausi i ai, o ia lea e alofa o ia i a te au: o le alofa mai foi ia te au, e alofaina o ia e lo’u Tama, ou te alofa foi ia te ia, ma ou faaali ia te ia.”²⁵ Tatou te mananao uma lava i se faaaliga faisoo a le Faaola i o tatou olaga i aso uma!

Sei o tatou manatuaina e oo lava ia i latou o e na faalogogata i le taimi ua tuanai pe o loo tauivi i le taimi nei e mafai ona lagona le pai mai o aao o le Leoleo Mamoe Lelei i luga o o latou ulu ma faalogo atu i Lona siufofoga o fetalai mai: “Sau loa. E le o toe nonoaina oe. Ua e saoloto.” Na fetalai mai le Faaola, “O au le leoleo mamoe lelei, e tuu atu e le leoleo mamoe lelei o lona ola e sui ai mamoe.”²⁶ E mafai ona ia faia lena mea aua na Ia tausia Lana feagaiga ma le alofa. O le fesili la e faapea, tatou te faia? Tau ina ia tatou agai i luma ma le faatuatua, loto faafiafiaina, ma se manao tele ina ia avea ma ni tagata tausi feagaiga. O le ala lea tatou te faaalia ai lo tatou alolofa i lo tatou Tama oi le Lagi ma lo tatou Faaola, lea ou te molimau atu ai ma le alofa silisili, i le suafa o Iesu Keriso, amene.