Paoa blong Stap Strong

Evri moning, taem yumi wekap, yumi fesem wan niu dei we i fulap long ol jalenj blong laef. Ol jalenj ia oli defren kaen: ol jalenj blong helt, problem blong mane, hadtaem wetem ol rilesensip, ol tes blong filing, mo iven, ol traehad wetem fet.

Plante long ol jalenj we yumi fesem long laef, oli save stretem mo winim; be, sam oli had blong andastanem mo i no posibol blong winim, mo bae i stap wetem yumi kasem taem yumi muv long nekis laef. Taem we, blong sot taem, yumi stap strong wetem ol jalenj ia we yumi save stretem, mo taem yumi stap gohed blong stap strong tru long ol jalenj we yumi no save stretem, hem i impoten blong tingbaot se paoa long saed blong spirit we yumi stap developem, bae i givhan long yumi blong gat sakses blong stap strong kasem en wetem evri jalenj we yumi fesem long laef.

Ol brata mo sista, yumi gat wan Papa long Heven we i lavem yumi we i droem plan blong laef blong yumi long wol, blong mekem se man mo woman, hemwan i save lanem lesen we hem i nidim blong lanem blong kwalifae from laef we i no save finis wetem Hem.

Wan taem long laef blong Profet Josef Smit i soemaot prinsipol ia. Profet mo sam fren blong hem oli prisena long Libeti, Misuri blong plante manis. Taem oli bin stap safa long kalabus, Profet Josef i bin prea long Lod, long hambol prea se bae Ol Sent oli nomo fesem safaring we oli stap long hem. Lod i ansa mo tijim Profet Josef, mo yumi evriwan, se ol jalenj we yumi fesem, sapos yumi stap strong kasem en, bae i blong bigfala gud blong yumi. Lod i ansarem kwestin blong Josef taem hem i talem se:

sol blong hem i mas fulap wetem pis; ol samting we oli kam agensem hem mo ol hadtaem blong hem, oli blong smol taem nomo;

mo sapos yu mekem gud blong stap strong, God bae i leftemap hem long heven.¹

Papa long Heven i bin oganaesem rod blong yumi tru long laef blong i olsem wan tes blong fasin blong yumi. Yumi fesem tugeta, gud mo nogud fos, mo afta, wetem fridom blong joes blong yumi, yumi jusum yumiwan rod we bae yumi tekem. Olsem profet long Buk blong Momon, Samuel blong bifo i tijim: “Yufala i fri, God i letem yufala blong mekem ol samting blong yufalawan; from luk, God i bin givim long yufala wan save mo hem i bin mekem yufala i fri.”²

Papa long Heven i bin andastanem tu se from yumi save ded, bae i no oltaem we bae yumi mekem ol stret mo gud joes. From se yumi no stret evriwan, mo from se yumi mekem ol mistek, yumi nidim help blong gobak long ples we Hem i stap long hem. Help we yumi nidim i kam tru long ol tijing, eksampol, mo sakrifaes we i pemaot man blong Jisas Kraes. Sakrifaes blong pemaot man blong Sevya, i mekem i posibol blong Hem i sevem yumi mo yumi kam olsem god tru long prinsipol blong fasin blong sakem sin. Sapos yumi ones mo stap tru blong sakem sin, Atonmen i save helpem yumi kam klin, i jenisim fasin blong yumi, mo yumi gat sakses blong stap strong kasem en long ol jalenj blong yumi.

Blong stap strong i wan impoten prinsipol we i stap long doktrin blong Jisas Kraes. Hem i impoten from kwaliti blong fiuja blong yumi we i no save finis i folem hamas yumi save mekem blong stap strong kasem en long stret mo gud fasin.

Long 2 Nifae 31 profet Nifae i tijim yumi se afta we yumi kasem semfala odinens blong baptaes we i sevem man we Jisas Kraes i bin kasem, mo afta, kasem presen we i Tabu Spirit, yumi mas “wokbaot fored, kakae gud long toktok blong Kraes, mo stap strong kasem en, [mo afta] luk, olsem ia nao Papa i talem: Bae [yumi] kasem laef we i no save finis.”³

From hemia, blong save kasem blesing blong Papa long Heven we i moa hae long evriwan, we i laef we i no save finis, yumi mas finisim stret wok blong odinens, mo afta, gohed blong kipim ol kavenan we oli go wetem. Long nara toktok, yumi mas gat sakses blong stap strong kasem en.

Paoa blong yumi, blong save stap strong kasem en long stret mo gud fasin, bae i go stret wetem paoa blong testemoni blong yumi, mo hamas nao yumi jenisim laef. Taem ol testemoni blong yumi oli strong, mo yumi tanem yumi tru long gospel blong Jisas Kraes, Tabu Spirit bae i lidim joes blong yumi, bae oli folem Kraes, mo bae i sapotem tingting blong yumi blong stap strong long stret mo gud fasin. Sapos testemoni blong yumi i no strong, mo yumi no jenis fulwan, denja i bigwan i stap blong ol giaman kastom blong wol ia i trikim yumi blong mekem ol nogud joes.

Mi wantem komperem wan eksperiens we i soemaot wan traehad blong stap strong long bodi, mo afta, komperem wetem traehad blong stap strong long spirit. Taem mi kambak long misin blong mi, mi gat janis blong plei basketbol blong wan koj we oli respektem hem, mo i man blong raet long wan yunivesiti long Kalifonia. Koj ia, i series abaot ol pleia blong hem oli mas fit bifo stat blong taem blong kompetisen blong basketbol. Wan long ol trening blong hem we yu mas pas bifo eniwan long mifala i save tajem balong long praktis, i blong ron long wan kros-kantri resis long ol hil kolosap long skul, mo ron long wan taem we hem i putum we i sot. Mi tingbaot fas taem blong mi ron long kros-kantri ia stret afta mi kambak long misin: !mi ting se bae mi ded nomo!

I tekem sam series trening blong mi save bitim taem ia we koj i putum i stap olsem wan gol. I wan gud filing, i no blong save mekem resis ia nomo, be tu, blong save ron bitim spid blong yu kasem en blong laen.

Blong plei basketbol wetem sakses, yu nidim blong yu fit. Blong stap fit long bodi, i kam wetem wan praes, mo praes ia i, putum ful tingting, stap gogohed, mo disiplin long yuwan. Blong stap strong kasem en long spirit, i kam tu wetem wan praes. Hem i sem praes: putum ful tingting, stap gogohed, mo disiplin long yuwan.

Wan testemoni, semmak olsem bodi blong yu, i nidim blong stap fit sapos yu wantem se i stap strong. ?So olsem wanem yumi kipim testemoni blong yumi i fit? Yumi no save mekem bodi blong yumi i fit blong plei basketbol taem yu lukluk basketbol nomo long televisen. Semmak, bae yumi no mekem testemoni blong yumi i fit sapos yumi stap lukluk jeneral konfrens nomo long televisen. Yumi nidim blong stadi mo lavem ol stamba prinsipol blong gospel blong Jisas Kraes, mo afta, yumi mas mekem bes blong yumi laef folem. Olsem ia nao yumi kam ol disaepol blong Jisas Kraes, mo olsem ia nao yumi bildimap wan testemoni we i stap strong.

Taem yumi fesem agens long laef, mo tingting blong yumi i blong kopi ol fasin blong Jisas Kraes, hem i nid blong rere long saed blong spirit. Blong rere long saed blong spirit, i minim se yumi developem wan strong kat, o strong paoa—bambae yumi fit long spirit. Bambae yumi fit long spirit gogo bae yumi stap jusum raet oltaem. Bambae oli nomo save muvmuvum yumi long tingting mo paoa blong yumi blong laef folem gospel. Olsem wan man i raetem: “Yu mas kam ston ia we reva i no save wasem i go.”

From se yumi fesem ol jalenj evri dei, hem i impoten blong yumi wok blong gat strong kat long spirit evri dei. Taem yumi developem wan strong kat long spirit, ol giaman kastom blong wol, mo tu, ol jalenj blong yumi evri dei, bae i no save kasem paoa blong yumi blong stap strong long stret mo gud fasin.

Ol bigfala eksampol blong pipol we i gat strong kat long spirit, oli kam long famle histri blong yumi. Long medel blong plante stori blong ol bubu blong yumi, bae yumi save faenem ol eksampol we i soemaot ol gudfala fasin blong stap strong.

Wan stori blong famle histri blong mi i soemaot prinsipol ia. Bigfala bubuman blong mi, Josef Watson Mein i bon long 1856 long Hal, Yoksae, Inglan. Famle blong hem i joenem Jos long Inglan, mo afta, oli mekem rod blong olgeta i go long Sol Lek Siti. Hem i bin maredem Emili Kip long 1883, mo oli kam papa mo mama blong 8 pikinini. Oli bin singaotem Josef blong go long fultaem misin long Jun 1910, taem hem i gat 53 yia. Wetem sapot blong waef blong hem mo eit pikinini, hem i gobak long ples blong hem long Inglan blong go long misin.

Afta we hem i fetful blong wok blong samples 2 yia, hem i stap ron long baeskel wetem kompanion blong hem blong go long Sandei Skul klas long Glusesta, Inglan, be wil i bosta. Hem i kamaot long baeskel blong luk damej. Taem hem i luk se i bigwan, mo bae i tekem taem blong fiksim, hem i talem kompanion blong hem blong gohed, mo statem Sandei seves, mo bae hem i kam biaen. Taem hem i finis blong talem hemia, hem i foldaon long graon. Hem i ded wantaem long wan hat atak.

Josef Watson Meins i neva luk waef mo ol eit pikinini blong hem bakegen long laef ia. Oli bin save tekembak bodi blong hem i gobak long Sol Lek Siti, mo mekem fenerol seves blong hem long olfala Watelu Asembli Hol. Long fenerol seves blong hem, wan toktok we Elda Antoni W. Aeven blong Kworom blong Olgeta Twelef Aposol i tijim yumi wan impoten lesen abaot laef, ded, mo fasin blong stap strong: “Hemia nao wanem gospel i givim yumi—i no blokem ded, be yumi winim ded tru long hop we yumi gat blong laef bakegen long ded wetem glori. … I semmak long Josef Mein. Hem i wan gud tingting, wan gud filing, mo glad blong save se man i stap givim laef blong olgeta long stret mo gud fasin, long fet, mo long fasin blong stap tru long fet.”⁴

Famle stori ia i givim insperesen long mi blong traem bes blong mi blong folem eksampol blong fasin blong stap strong mo gat strong kat olsem bigfala bubuman blong mi i soem. Mi gat semmak insperesen tru long fet blong waef blong hem, Emili, we laef blong hem afta long ded blong Josef, i wan hevi trabol blong tekem. Testemoni blong hem i strong, mo jenis blong hem i fulwan, mo hem i spendem haf laef blong hem blong stap tru long fet taem hem i sapotem eit pikinini blong hem, hemwan.

Aposol Pol i talem: “Yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.”⁵ Resis we i stap long fored blong yumi long wol ia, i wan resis blong stap strong, we i fulap wetem samting i blokem rod. Ol samting ia we i blokem rod long resis, oli ol jalenj we yumi wekap wetem evri moning. Yumi stap long wol ia blong ron long resis ia, blong yusum fridom blong joes, mo jusum bitwin raet mo rong. Blong save finisim resis ia wetem ona mo sakses mo gobak long Papa long Heven, bae yumi mas pem praes ia blong ful tingting, stap gogohed, mo disiplin blong yuwan. Yumi nid blong stap fit long spirit. Yumi nid blong gat strong kat long spirit. Yumi nidim strong testemoni we bae i lidim yumi blong jenisim laef tru, mo long en, bae yumi faenem, insaed long yumi, pis mo paoa we yumi nidim blong stap strong long wanem jalenj yumi fesem.

So wanem jalenj yu wekap wetem evri moning, tingbaot—wetem paoa long spirit we yu developem, ademap wetem help blong Lod, long en blong resis, bae yu save glad long tras ia we Aposol Pol i tokbaot taem hem i talem:

“Taem i kam finis blong mi givim laef blong mi … blong mekem wosip long God. Taem i kam finis blong mi aot long wol ia.

“Long laef blong mi … i olsem mi stap resis strong long wan resis, we mi kamtru finis long en. Mi stap holemstrong fasin blong bilif.

“Mo naoia, praes blong man we i win, i stap rere finis blong Masta blong yumi i givim long mi blong ona long mi.”⁶

Mi talem testemoni mo witnes blong mi long yufala se i tru Papa long Heven we i gat lav mo bigfala plan blong hapines we i no save finis i tekem yumi kam long wol ia long taem ia. Bae Spirit blong Lod i givim insperesen long yumi evriwan blong developem, insaed long yumi, paoa blong stap strong. Long nem blong Jisas Kraes, amen.