2010–2019
Mataroan nako Karawa
Okitobwa 2013


Mataroan nako Karawa

Ti na karekei kakabwaia n tamnei ao n rabwata ni maiura ngkana ti kawakina tuan te kabwianibwai.

I tangiria ni kabwarabwarai uoua reirei aika a boongana are I a tia n reiakinna ibukin tuan te kabwianibwai. Te moan reirei e kaatuuaki iaon taian kakabwaia are e reke nakoira n tatabemaniira ao ara utu ngkana a kakaonimaki n ongeaba n te tua aio. Te kauoua n reirei e karawawataaki bonganan te kabwianibwai i bukin karikirakean Ana Ekaretia Iesu Kristo Ibukiia Aika Itiaki ni Boong Aika Kaitira. I tataro bwa te Tamnei ae Raoiroi e na kamatoa nakoira koauan tain reirei aika I taekin.

Reirei Nambwa 1— E kakawaki ma Kakabwaia aika kaangaanga karekeaia

Tinan Titita Bednar bon te aine ae kakaonimaki ao te tia mwakuri n te mweenga ae rabakau. Man te tai are e moan n iein iai, ao e a tia ni kawakina raoi taekan mwiin aia mwane. Tebwina te ririki n nako e a tia ni kawakina raoi aron tauan mwiin karekemwane ao kabanemwane ibukin te utu ni kabonganai booki n tauan mwiin akaunti aika bebete. Te rongorongo are e a tia ni karekea inanon te ririki a bwarabwara raoi ao a kakaongora.

Titita Bednar ngke te ateinaine ngaia, e a tia tinana ni kabonganai rongorongo inanon te reetia ni kamatatai raoi aron te maiu ae baireaki raoi ao aron tararuan raoi te mweenga. N te bong teuana ngke a uaia n rinanon tein nako taian kabane mwane aika kakaokoro, e kunea tinana te banna ae kamimi. Te kabanemwane ibukin kawarakin te taokita ao bwain aoraki ibukin aia utu e rangin uarereke nakon are a kantaningaia. E ka irekerekea te bwai are kuneaaki ma ana euangkerio Ana Ekaretia Iesu Kristo ao e kabwarabwara nakon natina te koaua ae mwakaroiroi bwa ngkana ti maiuakina tuan te kabwianibwai ao ti na aki toki ni karekei baika raraoi ma kakabwaia aika moan te bati ake ti na aki kantaningai ao a kona n aki ataaki. Akea te bwai ae karina n reke ke te raka ni mwane nakon ana karekemwane te utu, N onea mwiina E a tia te Tama ae Akoi ni karokoi kakabwaia aika tau ni kawai aika e bon tataneiai te aba iai. E aki toki ni ururinga te reirei ae bongana aei Titita Bednar mairoun tinana n aron te buoka are reke nakoira rinanon mataroa n nako karawa n te kawai are beritaaki iai n ni Maraki n te O Tetamenti (tara Maraki 3:10).

Angiin te tai ngkana ti reirei ao ti kakoaua tuan te kabwianibwai, ti katurutrua aron tamaroana ao waekoan reken kakabwaia n te rabwata ao te tamnei ake ti kona ni karekei. Ao ni koauana ti na boni karekei kakabwaia aikanne. Engae n anne ao e kona reke kakabwaia aika kakaokoro ngkana ti ongeaba nakon te tua aei. A kona naba n reke kakabwaia aikai ti ngkana ti neneri man taratara raoi n te aro n tamnei (tara 1 I-Korinto 2:14).

Te iango ibukin “mataroan” karawa are kabonganaaki iroun Maraki e bon rangin ni kakaongora. Taian wiinto a kariaia te oota bwa e na rin inanon te auti. N aron aei, e kona otan ao iangoan te tamnei ni kabwaroaki rinanon mataroan nako karawa ao nakon nanon maiura ngkana ti karinea tuan te kabwianibwai.

N aron aei, te kakabwaia ae bongana man kanganga are ti karekea bon ana bwai n tangira ni kakaitau te tamnei are e na kaira nanora nakon te bwai are ti kainanoia ni kan karekea. Te aomata ae kukurei e bon rauaki. Te aomata ae aki kukurei e taonaki n te mamara ao te aki rauaki (tara Ruka 12:15).

Ti na bae ni kainnanoia ao n tataro ibukin te ibuobuoki ni kakaea te mwakuri ae tau. Maata ao taninga n onimaki (tara Ita 12:19) a kainanoaki, e ngae n anne, kinakin te bwaintangira n te tamnei ae tamaroa are e na kona ni kakorakoraira ni karekea te mwakuri are a aki noraki irouia aomata aika mwaiti—ke te kakabwaia ni karekean te nano ae korakora ni karaoa te ukeuke ae korakora riki ao n te tai ae maan ibukin te mwakuri ae ana kona aomata tabeman n tangiria ke ni kani karaoia. Ti kona n tangira ao ni kantaninga te mwakuri ae ti na anganaki, ma te kakabwaia are roko man mataroan nako karawa e kona ni korakora ni karaoa ao ni bitii arora nakon kantaningan arora bwa e na bitaki iroun temanna ke n te bwai teuana.

Ti boni kainanoa te mwakuri korakora ni maiura bwa ti aonga ni maiu raoi. Te ataibwai ao te ota ni bwain te tamnei a kainanoaki, engae n anne atakin rikiraken te tamnei ao bwain te rabwata (tara Ruka 2:52) mwakuriakin riki aron kainanora ibukin ara kabane mwane ae tau, te bitaki ae tamaroa, moanibwaiakin bwaai nako ao maiuakinana n te aro ae bebete ao katamaroan riki te aroaro n tararuakin bwaai ake iai iroura. Ti kainanoa ao ni kantaningaia bwa ti na karekea riki te mwane ae raka ma te kakabwaia are e na reke nakoira ni mataroan nako karawa tina kakorakora riki bitakin ara katei nakon are kantaningaki bwa a na bitaki iroun temanna ke tabeman riki.

Taani buaka aika ataei n Ana Boki Moomon (tara Aramwa 53; 56–58) a tataro ma te nano korakora nakon te Atua bwa E na kakorakoraiia ao ni kamaiuia mai nanon baiia aia kairiribai. Te kamimi, te kaeka nakon tataro aikai e aki karekei riki bwainibuaka ke ni karakai mwaitiia taan buaka. Irarikin anne, E angania te Atua te raunnano taan buaka aika a onimaki aikai bwa E na anganiia te rau nakon tamneia, ao te onimaki ae korakora ao te kantaninga ibukin kamaiuakiia Irouna (tara Aramwa 58:11). Ngaia ae, natin Ereman a karekea te korakora, ao a matoa nanoia ni kani buaka, ao a waaki ma korakoraia ni kaitaraia Reimwanaite (tara Aramwa 58:12–13). Onimakinaia irouia, te rau, te onimaki, ao te kantaninga e taraa n ae ti aki te bwai n tangira ae a tangiria taan buaka, aika kakabwaiaki, ma boni ngaai kakabwaia ae a kainnanoia ataeinimwane aika ninikoria aikai bwa a na waaki nako ao n tokanikai n rabwataia ao n tamneia.

N taai tabetai ti kona ni bubutia te Atua ibukin te tokanikai, ao E anganira te korakora ao te nanomwaka n ara iango. Ti kona ni bubuti ibukin te kakabwaia, ao ti karekea te tamaroa ae korakora ao te taotaona n nano ae rikirake, ke ti bubuti ibukin te rikirake ao ti kakabwaiaki n bwaintangiran te raoiroi. E katoka iaora te onimaki ae matoa ao te onimakiniira bwa ti na kaei kouru aika itiaki. Ao ngkana ti bubuti ibukin katokakin ara kanganga n rabwata, ao kangangan te iango, kanganagan te tamnei, E na karikirakea ara kantaninga ao ara kakaonimaki.

I berita bwa ngkana ngai ao ngkoe ti mwannanoa ao ni uaia ni kawakina tuan te kabwianibwai, ni koauana raoi mataroan nako karawa a na kaukaki ao kakabwaian rabwata ao tamnei a na bane ni kamwaitaki n te aro bwa e na aki reke n neia (tara Maraki 3:10). Ti na uringa naba ana katanoata te Uea:

“Ba tiaki nanomi nako nanou nako, ao tiaki naba arou nako aromi nako, bon ana taeka te Uea.

“Ba aroni karawa ngkae e rietata riki nakon aontano, ao ai aron naba arou nako, ba a rietata riki nakon aromi nako, ao nanou nako nanomi nako” (Itaia 55:8–9).

I kakoaua bwa ngkana ti ongeaba n tamnei ao n tantani, ti na kakabwaiaki ma mata aika noora ae itiaki riki, taninga aika a teimatoa n ongo, ao naano aika a ota riki n tamaroan ao kangangan Kawaina nako, Ana iango, ma Ana kakabwaia inanon maiura.

Reirei Nambwa 2— kabebetean Ana Kawai te Uea

Imwain weteakiu bwa n na riki bwa kaain te Kooram n Abotoro n te Tengaun Ma Uoman, E bati au tai ni wareware inanon te Doctrine ao Covenant ibukin te kauntira are rineaki bwa e na tararua ao ni karaoi bwaka mwane man kabwianibwai aika tabu. Te Kauntira are e Karaoi Bwaka Mwane man Kabwianibwai e kateaki man te kaotioti ao e wakinaki man te Moan Beretitentii, Aia Kooram Abotoro Ake Tengaun Ma Uoman, ao te Bitiobiriki n Tararua (tara D&C 120). Ngke I katauraoai bwa n na ira au moan boowi inanon Ritembwa 2004 n te kauntira aei, I bon ingainga ao mani kantaninga te tai n reirei ae moan te kamimi.

I bon uringi bwaai aika I rinanoi ao n namakin n te kauntira anne. I a karakaa riki te kantaninga ao te karinerine ibukin ana Tua te Uea ibukin te mwane ibukira, ibukiia utu ao ibukin Ana Ekaretia. Ana buroukuraem ibukin te mwane Ana Ekaretia Iesu Kristo Ibukiia Aika Itiaki Ni Boong Aika Kaitira—ibukin te mwane ae roko ao te kabane mwane—e kamatataaki n tiekition 119 ao 120 n te Doctrine ao Covenants. Uoua rongorongo aika kuneaki inanon kaotioti aikai aika a kabwarabwara aron kabonganakin mwanen te Ekaretia.

E taekinaki n tiekition 119 bwa ni kabane membwa “a na kabwaka teuana te katebwina man aia bwai ae reke irouia ni katoa ririki, ao e na riki aei bwa te Tua ibukiia n aki toki, … e taku te Uea” (kibu 4).

Ngkanne, ni kaineti ma kariaiakan kamanenakin te kabwianibwai, E taku te Uea bwa E na kamanenaaki iroun te kauntira, ae kainaki iroun te Moan Beretitentii n au Ekaretia, ao te Bitiobi ma ana kauntira, ao irouia au kauntira aika rietata, ao ni bon oin bwanaau nakoia. (tara Doctrine ao Covenant 120:1). Te Bitiobi ma ana kauntira ao ana kauntira ae rietaata te Uea e kaineti nakon te kaotioti aio are aranaki n te bong aio bwa te Bitiobiriki n Tararua ao Aia Kooram Abotoro Ake Tengaun Ma Uoman, Taian mwane aika tabu aikai a kamanenaaki ibukin kabutimwakaan te ekaretia ni kakabwaiaia aomata ao utu nako n te aro n tamnei man kateakin ao tararuan taian tembora, auti n taromauri, boutokakin mwakuri ni mitinare, rairakin ao boretiakin booki aika tabu, kaungakin kakae ibukin rongorongon te utu, mwanenakin taian reirei, ao reirei ibukin te aro, ao kakoroan ana mwakuri te Ekaretia n aron are baireaki irouia Ana toro te Uea aika tia ni katabuaki.

I mimi n itiakin ao uarereken kaotioti aika uoua aikai ni kabotauaki ma kawai ni karin mwane aika kamangaongao ao kawai n tararua aika kamanenaaki inanon bootaki aika mwaiti ao n tautaeka ni kabuta te aonaaba. E na kanga aron mwakurin te bootaki teuana ae bubura n aekan Ana Ekaretia Iesu Kristo ni waaki inanon te aonaaba ae bwanin ni karaoi nanon kaetieti aika bebete aikai? Kaekana irou e bon rangi ni bebete: aio bon ana mwakuri te Uea, E kona ni karaoa oin ana mwakuri (tara 2 Nibwaai 27:20), ao te Tia Kamaiu e ninia ao e kaetiia Ana toro ngkana a karaoa are E tuangiia ao ni karaoa Nanona.

Inanon te moan ni boowi n te kauntira I rangi n riingaki ni bebeten taian reirei are a kaira aron are ti karaoia ao ara babaire. Inanon mwakurian mwanen te Ekaretia, uoua reirei aika matoa man bebete ae a na mwannanoaki, te Moan, e na mwakuri te Ekaretia man are karekea ao e na aki kamanena ae raka riki nakon are karekea. Kauoua mwakoron te karekemwane ni katoa ririki e kawakinaki bwa te tania ibukin baika a karina ao kainano aika a aki kantaningaaki. Inanon bwi n ririki aika nako E reireiniia ana membwa te Ekaretia te reirei ae kawakinan te raka n amwarake, te bwaa, ao te mwane, are na kaitarai kanganga aika karina n riki. Iai ana reirei te Ekaretia ae bebete ae e irii nanon tuua aika aki toki ni kaokiokaki nakoia membwa.

Ngke e a waaki te bowi, I iangoia bwa ai terana ngke a kona taian membwa n te Ekaretia ni mwananoa bebeten, maatatan, wakiraoin te nano ni kan anga ao mwakan oin ana kawai te Uea (taraD&C 104:16) ibukin karaoakin bwain Ana Ekaretia. I a mena ngkai inanon te Kauntira n Tibwatibwai Kabwianibwai inanon ririki aika mwaiti. Au kakaitau ao au karinerine ibukin Ana baeten te Uea ae rikirake ni katoa ririki, ao taian reirei ake a reiakinaki a na karikirakea te ataibwai ae bati.

E onrake nanou n te tangira ni mataiakinakiia membwa n te Ekaretia aika kakaonimaki man ongeaba man aaba, reeti, neewe, ao aomata ni kabane. Ngke I mwananga rinanon te aonaaba, I reiakini baika kam kantaningai ao aika kam tangiri, aromi ni maeka aika kakaokoro, ao ami kakamwakuri. I a tia n taromauri ma ngkami ao ni kawari mwengami tabeua. E kakorakoraaki au onimaki n ami onimaki. Ami tangira e karikai bwa N na tangira riki. Ao ami tamaroa ma motin nanomi n ongeaba nakon tuan te kabwianibwai e kaungaai bwa n na riki bwa te aomata, te buu te mwane, te karo ao te Tia Kairiri n te Ekaretia ae nakoraoi riki. I uringii ao n ni iangoi ngkami ni katoa te tai are I ira iai te Kauntira are e Karaoi Bwaka Mwane man Kabwianibwai. Kam rabwa ibukin aromi aika raraoi ao ami kakaonimaki ngkai kam ongeaba n ami berita.

Taan kairiri n Ana Ekaretia te Uea ae kaokaki a namakina tabeia ae moan te tamaroa n tararuai raoi anganano aika tabu membwa n te Ekaretia. Ti bon ataa raoi kakawakin mangorin ma tabun ana anganano te aine ae mate buuna.

“Ao E tekateka Iesu i rarikin te ne ni mane, ao e noria aomata ngke a nnei aia mane i nanon te ne ni mane, ao a bati ake a kaubwai ake a nnea te mane ae bati.

“Ao e roko te aine te manna ae aki kaubwai ae e mate buna, ao e nnei iai uoua te rebeta, aika ai aron teuana te baring.

“Ao teuarei E weteia ana reirei, ao E taku nako ia, E koaua ae I a tuangngkami, ba e kamaiti riki ana bwai ni nnei te aine ane e mate buna anne, nakoia akekei ni kabaneia ake a nnei i nanon te ne ni mane, ba a bane ni nnei mani kaubwaia:

“Ao e roko te aine te manna ae aki kaubwai ae e mate buna, ao e nnei iai uoua te rebeta, aika ai aron teuana te baring” (Mareko 12:41–44).

I ataia man au moan atatai bwa te Kauntira are e Karaoi Bwaka Mwane man Kabwianibwai e bon kaea nanon ana rebeta te aine ae kananoanga ae mate buuna. I kaota au boutoka nakon Beretitenti Thomas S. Monson ma ana kauntira ibukin te kairiri ae nakoraoi ni karaoan te mwakuri ae tabu aio. Ao I kamatoa te bwana (tara D&C 120:1) ao bain te Uea are kamatoaia Ana toro aika katabuaki ni kakoroa nanon te tabe n tei Ibukina.

Te Kakao ao te Koaua

Kabwakan te kabwianibwai ma te nano ni koaua e mwaiti riki nakon te tabe; bon te mwaneka ae bongana nakon kaitiakan temanna. Nakoimi ngkami aika kam kabwakai ami kabwianibwai, I kamoamoai ngkami.

Nakoimi ngkami aika kam aki ongeaba nakon tuan te kabwianibwai, I anoi ngkami bwa kam na manga iangoi kawaimi man rairi nanomi. I kakoaua bwa man ami ongeaba nakon ana tua te Uea, mataroan nako karawa a na kaukaki nakoimi. Taiaoka tai kairemwea ami tai n raira n nano.

I kakoaua bwa kakabwaian te tamnei ao te rabwata a na roko nakoira ngkana ti maiuakina tuan te kabwianibwai. I kaota au koaua bwa taiani kakabwaia akanne a kakawaki n tainako ma a bon kanganga karekeaia. I kakoaua naba bwa bebeten ana kawai te Uea e kakoauaki n ana waaki te Ekaretia ni karaoi baeten are kona ni kairira n tatabemaniira n ara utu. I tataro bwa ngaira n tatabemanira ti kona n reiakinna ao ni mabiao man reirei aika bongana aikai, n Aran te Uea ae Iesu Kristo, amen.