Winto Ko An Lan̄

Jinen Sister Bednar ej juon kōrā eo eļap an tōmak eitoklimoin ilo jerbal ilo mweo. Jen jinoin an kar epelele, ekar tiljek ilo kōjparok rekoot in jaan ko an mweo, elōn̄ļo̧k jen jonoul iiō ko an kanuj kōjparok jon̄an diwoj-deļo̧n̄ in jāān an baam̧le eo ilo an kōjerbal juon wāween kōjparok eo epidodo. Meļeļe ko eaar kōjparoki iumwin elōn̄ iiō ko eļap aer jim̧we im alikar.

Ke Sister Bednar eaar juon jiron̄, jinen eaar kōjerbal meļeļe ko eaar kōjparoki n̄an kwaļo̧k katak eo eaorōk n̄an mour eo epolōmen im juon mweo euun̄kipiden. Juon raan ke rej etale ippān doon jon̄an eo kar joļo̧k n̄an elōn̄ men ko rooktak jen doon, jinen eaar loe juon jon̄ok eo ekaitoktok limo. Wōnāān takto im uno n̄an baam̧le eo eaar dikļo̧k jen jon̄an eo emaron̄ kar kōtmāne. Ear eddeikļo̧k ta eo eaar loe n̄an Ko̧jpeļ eo an Jisōs Kraist im kōmeļeļeik leddik eo nejin juon kajoor in m̧ool: ilo ad mour kōn kien juon mōttan jon̄oul, ekka ad bōk kōjeram̧m̧an ko raorōk ak epen tōpari ko ejeja ad kejatdikdik kaki im pidodo ad kajejtokjeer. Baam̧le eo ejab emakijkij an bōk ak elolo eļapļo̧k kōļļā ko. Ijeļo̧kin, Jemedwōj Ilan̄ eo eobrak kōn iakwe ej letok kōjeram̧m̧an ko ralikar ilo wāween ko rekapwilōn̄lōnn̄. Sister Bednar aolep iien ej kememej katak in jen jinen kōn jiban ko rej itok n̄an koj jen winto in lan̄, āinwōt an kalim̧m̧ur ilo Kalim̧m̧ur Mokta (lal Malakai 3:10).

Ilo an emakijkij ad kwaļo̧k kōn kien juon mōttan jon̄oul, jej kōmejajaik an wōr kitien, ļap tokjen im bojak n̄an letok kōjeram̧m̧an ko ilo ānbwin ko jej būki. Im em̧ool kōjeram̧m̧an kein rej waļo̧k. Ak jet iaan kōjeram̧m̧an ko roktak jej buki ilo ad pokake kein in rellōn̄ ak epen tōpari. Kōjeram̧m̧an kein remaron̄ wōt itok elan̄n̄e jej jimor niknik ilo mour in jetōb im pokake. (lale 1 Korint 2:14).

Kōļmenļo̧kjeņ eo kōn “wintō ko” in lan̄ kar kōmeļeļeik jen Malakai ej ba kake eļap an karelļo̧k kōj. Wintō ej kōm̧m̧an an meram deļo̧n̄ ilowaan mōko. Ilo ejja wāween in wōt, ad arromeļo̧k im kōļmenļo̧kjeņ kake āinwōt n̄e rej wōtļo̧k tōk ilo wintō ko jen lan̄ im tōllon̄e tok mour kein ad ilo ad kōjparok kien juon mōttan jon̄oul.

N̄an waanjon̄ak, juon kōjeram̧m̧an eo epen tōpare ak eļap tokjen jej bōke ej juon menin letok an jetōb kōn kam̧oolol eo ej kōm̧m̧an ad m̧ōņōņō kōn ta kōnan eo ad epen ad tōpare ak jekōņaan. Juon armej eo em̧ōņōņō eobrak kōn kam̧oolol. Juon armej eo ejjab m̧ōņōņō ej en̄taan ilo jeramōl eo ejjeļo̧k jem̧ļo̧kin kōn burom̧ōj (lale Luk 12:15).

Jemaron̄ aikuj jipan̄ ilo jar n̄an bōk jipan̄ ilo pukōt jerbal. Māj im lo̧jin̄i ko an tōmak (lale Ether 12:19) rej menin aikuj, ijokwe, n̄an kile menin letok eo an jetōb ej kōkajoorļo̧k kālet eo ej komaron̄ kōj n̄an lo jerbal ko jet armej remaron̄ lo notaeer—ak kōjeram̧m̧an eo eļapļo̧k kōn kijejeto an juon make n̄an lukkuun kapukōte im juon jerbal eo eto kitien bwe armej ro jet remaron̄ maron̄ kōm̧m̧ane. Jemaron̄ kōņaan im bōke juon jerbal letok, ak jeram̧m̧an eo tok n̄an kōj ilo wintō ko in lan̄ emaron̄ ļap ļo̧k aorokiier n̄an jerbal im ukōt wāween ko ad jen ad kōtmāne bwe wāween ko ad ren oktak kake juon armej ak bar juon men.

Emaron̄ jejjet kōņaan im jerbal eo n̄an bōk juon ļap ļo̧k in wōņāād jān ad jerbal ilo wāween kake eo ejejjet n̄an kōj make kōn men ko jej aikuji ilo mour in. Mej im lojilni ko rej tōmak rej menin aikuj, mekarta, n̄an kakemej kōj make juon ļapļo̧k eo ilo jetōb im kanniōk (lale Luk 2:52) bwe jen kōm̧m̧an eļapļo̧k kōn jidik wōt, juon maron̄ eo ekam̧ōņōņō n̄an kōmōkajkaje im kapidodoiki, im kōkajoorļo̧k maron̄ eo n̄an kōjparok eo epolel n̄an mweiuk ko ewōr ippād kadede. Jemaron̄ kōņaan im kōtmāne bwe en ļapļo̧k kōļļā ko ad, ak jeram̧m̧an eo ej iieokwe tok kōj jen wintō ko an lan̄ eļapļo̧k aer lōn̄ļo̧k n̄an ukōt mantid im jab jen bōklokot eo bwe mwilid en oktak kōn juon armej ak bar juon men.

Ritariņae ro rem̧m̧an ded ilo Bok in Mormon (lale Alma 53; 56–58) raar lukkuun jar bwe Anij en kōkajoor er im lo̧mo̧o̧ren kōm jān pein ro am ri kōjdat. Kaitoktoklimo eo, uwaak in jar ko raar jab kwaļo̧k elōn̄ļo̧k kein tariņae ak kalōn̄ļo̧k oran jarin tariņae ko. Ijeļo̧kin, Anij ear leļo̧k kalim̧m̧ur n̄an ritariņae ro ewōr ippād tōmak bwe Enaj kōjparok er, aenōm̧m̧an ilo buruwer, im eļap tōmak kab kōjatdikdik bwe E eo enaj kōjparok er (lale Alma 58:11). Kōn menin, lomaro nejin Hilamōn raar bōk peran, karōk kōn juon kōttōpar n̄an anjo̧, im raar wōnm̧aanļo̧k kōn aolepen aer kajoor nae ri Leman ro (lale Alma 58:12–13). Kalim̧m̧ur, aenōm̧m̧an, tōmak im kōjatdikdik raar moktata jab āinwōt kōjeram̧m̧an ko ritariņae ilo tariņae enaj kar aikuji, ak raar lukkuun kōjeram̧m̧an ko likao ro reperan raikuji n̄an wōnm̧aanļo̧k wōt kōn kajoor ilo ānbwin im jetōb.

Jet iien jemaron̄ kajitok bwe Anij en jipan̄, bwe En letok n̄an kōj kajoor ilo ānbwin im kōļmenļo̧kjeņ. Jemaron̄ kūr n̄an jeram̧m̧an, im jej lo eddōkļo̧k im ļapļo̧k ad jeļā kijenmej, ak jej kajitok kōn eddōkļo̧k im jej jeram̧m̧an kōn menin letok eo ej jouj. E emaron̄ letok iiod jorrāān im lōke ilo ad kate kōj m̧aanļo̧k ilo jibadōk mejen kajik eo ilo wānōk. Im eļan̄n̄e jej kūr n̄an kōjoor jen apan̄ ko an ānbwin, kōmālij im an jetōb, E maron̄ kōļapļo̧k bōklekōt im niknik eo ad.

Ij kalim̧m̧ur bwe ilo arro lale im kōjparok kien juon mōttan jon̄oul, ilo m̧ool wintō in lan̄ enaaj pelļo̧k im kōjeram̧m̧an ilo mour in jetōb im kanniōk naaj lutōk im enaaj ejjeļo̧k jikin n̄an kakoni (lale Malakai 3:10) Jenaaj barāinwōt keememej kean̄ eo an Irooj:

“Bwe ļōmņak ko Aō re jab ļōmņak ko ami; im iaļ ko ami re jab iaļ ko A, Jeova ej ba.

“Bwe āinwōt lan̄ ko re utiej jān laļ, āindein iaļ ko Aō re utiej jān iaļ ko ami, im ļōm̧ņak ko Aō jān ļōmņak ko ami” (Aiseia 55:8–9).

Ij kam̧ool bwe ilo ad pukōt tōl an jetōb im jet ro rokipliie, jenaaj jeram̧m̧an bwe mejed enaaj maron̄ loļo̧kjen, lo̧jiln̄i ko ren ron̄ļo̧kjeņ, im bōro ko ren meļeļe eļapļo̧k kake E, Kōļmenļo̧kjeņ ko An, im kōjeram̧m̧an ko An ilo mour ko ad.

M̧okta jen aō kūr n̄an jerbal āinwōt uwaan Doulul eo an Jon̄oulruo, iaar riiti Doctrine and Covenants elōn̄ alen kōn naan in kapilōk eo letok n̄an bōk eddoin im leļo̧k jāān in juon mōttan jon̄oul ko rekwojarjar. The Council on the Disposition of the Tithes eaar ejaak kōn madenļo̧k im ekitbuuj Būreejtōnji eo Kein Kajuon, Doulul eo an Jon̄oulruo Rijilok ro, im Bisoprik eo Eutiej (lale D&C 120). Ilo aō kōbpopo ilo Tijem̧ba in 2004 eo n̄an pād ilo kweilo̧k eo aō m̧oktata ippān doulul in, iaar kijoror im kōtmāne bwe enaaj juon iien ekatak em̧m̧an.

Ij ememej wōt iminene im en̄jake eo aō iaar en̄jake ippān ko̧o̧njeļ eo. Ear ļap ļo̧k aō m̧ōņōņō im kam̧oolol n̄an Irooj kōn kein eo An ikijen menin jeram̧m̧an ko n̄an armej, n̄an baam̧le ko, im n̄an Kabun̄ in An. Lukkuun būrookraam̧ in jāān in jipan̄ eo an Kabun̄ eo an Jisōs Kraist im Armej ro Rekwojarjar ilo raan-ko Āliktata—n̄an jimor deļo̧n̄ tok im diwojļo̧k—ej kōm̧eļeļeik ilo section 119 im 120 in Doctrine and Covenants. Ruo ennaan ko rej waļo̧k ilo madenļo̧k kein rej letok pedped ko n̄an kejeikik jāān ko an Kabun̄ in.

Ilo section 119, Irooj eaar ba bwe aolep membōr reaikuj kōļļā juon m̧ōttan jon̄oul in aolep wōrļo̧k ko aer ilo kajjojo iien. Men in enaaj juon kien n̄an er indeeo, … Irooj eaar ba (eoon 4).

Innām, n̄an kōmālim kadiwōj juon m̧ōttan jon̄oul ko, Irooj eaar ba bwe [juon m̧ōttan jon̄oul] eo eaikuj in kōjemooj jen juon iaan Būreejtōnji eo Kein Kajuon ilo Kabun̄ in An im bisop eo im ko̧o̧njeļ eo an, jen ko̧o̧njeļ eo eutiej An [Irooj], im jen ainikien Make n̄an er (lale D&C 120:1). “Bisop eo im ko̧o̧njeļ eo an” im “konjel eo aō euteej” ej kajin kake ilo rainin ekkar n̄an madenļo̧k in ej Bisoprik eo ej Eutiej im Doulul eo an Jon̄oulruo Rijilok ro jimor. Jāān kein rekwojarjar rej jerbal ilo an mōkaj an eddōkļo̧k kabun̄ eo n̄an kōjeram̧m̧an armej ro im baam̧le ko ilo an ekkal im kōjparoki tampeļ ko im imōn jar ko, rejtake jerbal in mijinede, jeje im ukok jeje ko rekwojarjar, kōkajoorļo̧k jerbal in bwebwenato im kappok ko an baam̧le, jipan̄ jikuuļ ko im jeļāļo̧kjeņ eo kōn mour in jetōb, im barāinwōt kotobrak kōttōpar ko jet an Kabun̄ in āinwōt an ri jerbal ro an Irooj emōj kapit er ba.

Ij bwilōn̄ kōn alikar im kadu eo an madenļo̧k kein keidi n̄an an kapokpok wāween kōm̧akūtkūti jāān kein im kilen kōjparoki ko rej jerbal ilo elōn̄ doulul im kien ko ipeļaakin laļ in. Ekōjkan an jekjek ko an mour in ilo juon doulul maron̄ kanuuj ļap āinwōt Kabun̄ in an Jisōs Kraist eo emōj an bar jepļaaktok maron̄ jerbal ilo aolepān peļaakin laļ in ilo an kojerbal wōt juon wāween tōl em̧m̧an? N̄an n̄a uwaak eo ebwe an alikar: jerbal in ej an Irooj, E ej maron̄ kōm̧m̧ane jerbal eo an make (lale 2 Nipai 27:20), im Rilomoor eo ej rejan im kappeik rijerbal ro An ilo aer ļoor naan in jiron̄ ko An im jerbal kōn un ko An.

Ilo kweilo̧k eo m̧oktata an ko̧o̧njeļ iaar bwilōn̄ kōn an pidodo kien ko rej tōl kōj ilo kōnono im kālet ko ad. Ilo wāween kōm̧akūtkūt jāān ilo Kabun̄ in, ewōr ruo katak ko rededeļo̧k jej ļoori. M̧oktata, Kabun̄ in ej jerbal wōt kōn ta eo ewōr ippān im ejab joļo̧k eļapļo̧k jen an bōk. Kein karuo, jidikin jon̄an eo ej waļo̧k kajjojo iiō ej kōjenoļo̧ke n̄an menin idin ko im aikuj kar jab kōtmāne kaki. Ilo iiō ko m̧aantak, Kabun̄ in ekōn katakin membōr ro n̄an kōm̧m̧an demoļo̧k ikijen m̧ōn̄ā, kaan im jāān n̄an kake aikuj remaron̄ idin aer waļo̧k tok. Kabun̄ āinwōt juon doulul ej barāinwōt ļoor ejja katak in wōt emakujkuj eliji n̄an membōr ro.

Ke kweilo̧k eo ej wōnm̧aanļo̧k wōt, iaar lo aō ikdelel bwe aolep membōr an Kabun̄ in ren maron̄ mour kake jon̄ok in epidodo, ealikar, ejim̧we, ejouj, im kajoor eo an Irooj kōn jon̄ok ko an make (lale D&C 104:16) n̄an kōm̧akūtkūt wāween ko an mour in kaniōk ilo Kabun̄ in An. Kiō emōj aō bōk koņaō ilo ko̧o̧njeļ in ilo leļo̧k juon mōttan jon̄oul iumwin elōn̄ iiō ko. Ej aō kam̧oolol im kautej n̄an Irooj ilo jon̄ok ko an rej eddokļo̧k aolep iiō, im kōn katak jaar erom em̧m̧anļo̧k.

Iaar obrak kōn inem̧m̧an im nōbar kōn membōr ro an Kabun̄ in rej pokake im tōmak jen aolep lal, bwij, lo, im armej. Ilo aō ito itak laļ in, ij ekkatak kōn kōjatdikdik im ettōņak ko ami, ukooktak in mour im mōjņo ko ami, im ta ko komij apan̄ kaki. Emōj aō koba ippāmi ilo iien kweilo̧k in kwojkwoj ko an Kabun̄ ippāmi lo waj kom ilo mōko imōmi. Tōmak ko ami rekōkajoorļo̧k tōmak eo aō. Wujlepļo̧k ko ami rekōm̧m̧an bwe in maron̄ barāinwōt wujlepļo̧k. Im ami em̧m̧an im m̧ōņōņō in pokake kien juon mottan jon̄oul ekōketak eō bwe in juon armej emanļo̧k, juon ļeo pālele, papa. Im ritōl ilo Kabun̄. Ij keememej im ļōmņak kōn kom kajojo iien otemjej ij bōk koņao ilo Ko̧o̧njeļ eo ilo leļo̧k juon mōttan jon̄oul. Kom̧ em̧m̧ool kōn ami em̧m̧an im tōmak ilo ami kōjparok bujen ko ami.

Ritōl ro rem̧m̧an ilo Kabun̄ in emōj an bar jepļaaktok rej en̄jake eddo ko aer relļap bwe en jejjet aer kea kōn jortak ko emōj kōjeram̧m̧ani im an ro uwaan Kabun̄ in. Eļap ad lukkuun meļeļe kōn piktokin kwojarjar eo an kōrā eo emej pāleen em emōjņo.

“Im Jisōs ej jijet ikijjien nien m̧ani, im lale kōjkan an armej āti m̧ani ņa ilowaan nien m̧ani eo; im elōn̄ ri m̧weiie rej āti elōn̄.

“Im juon kōrā, e jeram̧ōl,ej itok im āti ruo m̧ani, āinwōt juon farthin̄.

“Im Ej ān̄in̄intok ro rū kaļoran n̄an Ippān im ba n̄an er, “E m̧ool Ij ba n̄an kom̧, kōrā in e jeram̧ōl im ejako pāleen ear āti eļap jān jān er otemjej raar āti ņa ilo waan nien m̧ani;

“Bwe er otemjej raar āti wōt jet jān elōn̄ m̧weier, a lio kōn an jeram̧ōl ear āti men ko an otemjej, aet aoelp men in mour an” (Mark 12:41–44).

Iaar jeļā kōn juon make en̄jake bwe Ko̧o̧njeļ eo etiljek ilo an leļo̧k juon mōttan jon̄oul n̄an lale eo ejjeļo̧k pāleen im emōjņo. Ij leļo̧k aō nōbar n̄an Būreejtōn Thomas S. Monson im rikapilōklōk ro an kōn tōl eo aer em̧m̧an ilo aer kotļo̧k eddo in ekwojarjar. Im ij kile ainikien (lale D&C 120:1) im im̧we an Irooj eo ej rejtak rein karejaren n̄an kakūrm̧ool eddo eo n̄an bōk Jikin E.

Kōļļā juon motan jon̄oul eo em̧ool eļap ļo̧k jen eddo eo; ej juon bun̄tōn eaorōk ilo toreen ad kokwojarjar kōj make. N̄an ro rej kōļļā aer juon mōttan jon̄oul, ij nōbar kom̧.

N̄an kom̧ ro ilo tōre in komij jab pokake kien juon mōttan jon̄oul, Ij kur kom n̄an ļōmņak kōn ta eo kwoj kōm̧m̧ane im ukweļo̧k. Ij kam̧ool bwe am pokake kien in an Irooj, wintō ko an lan̄ renaaj peļļo̧k n̄an kwe. Jouj im jab karumijļo̧k raan eo n̄an am ukweļo̧k.

Ij kam̧ool kōn jeram̧m̧an ko an jetōb im kaniok rej itok n̄an mour kein ad ilo ad mour ekkar n̄an kien juon mottan jonoul. Ij kwaļo̧k aō kamool bwe kōjeram̧m̧an kein emakujkuj aer wōr tokjāer ak epen topari. Ij barāinwōt kean̄ bwe jon̄an pidodo iaļ an Irooj ealikar ilo men ko mweien Kabun̄ in An ko rej kwaļo̧k jon̄ok ko remaron̄ tōl kōj armej im baam̧le ko. Ij jar bwe kōj kajjojo jen katak im jeram̧m̧an jen katak kein eļap aer aorōk, ilo et eo ekwojarjar etan Irooj Jisōs Kraist, amen.