O Pupuni o le Lagi

O le tina o Sister Bednar o se tamaitai faamaoni ma o se tagata fatuaiga musuia. Mai le popofou o lana faaipoipoga, na ia tausia ai ma le faaeteete ni faamaumauga tautupe a le aiga. Mo le tele o tausaga na ia faamaumau maeaea ai ia tupe maua ma tupe faaalu a le aiga e faaaoga ai ni api tausi tusi faigofie lava. O faamatalaga na ia aoina i le aluga o tausaga sa atoatoa ma malamalama lelei.

A o tamaitai talavou ia Sister Bednar, sa faaaoga e lona tina ia faamaumauga i api tausi tusi e faamamafa ai ni mataupu faavae autu o le ola faautauta ma le puleaina o le aiga ma le faaeteete. I se tasi aso ao la iloiloina faatasi le tele o vaega o tupe faaalu, sa matauina ai e lona tina se mamanu mataina. O le totogi o asiasiga i fomai ma vailaau faafomai mo lo latou aiga na matua maualalo lava nai lo le mea na faamoemoeina. Sa ia faatatauina lenei mea na maua i le talalelei a Iesu Keriso ma faamalamalama atu i lana tama se upumoni mamana: a tatou ola i le tulafono o le sefuluai, e tele lava ina tatou mauaina faamanuiaga lemafaamatalaina ae taua, ae e le o mea ia tatou te faamoemoeina i taimi uma lava ma faigofie ona le amanaiaina. Sa lei mauaina e le aiga ni tupe faaopoopo faafuasei pe iloga i tupe maua a le aiga. Ae, na foai atu e se Tama Faalelagi alofa ni faamanuiaga faigofie i ni auala masani ma iloagofie. Sa manatua pea e Sister Bednar lenei lesona taua mai lona tina e uiga i le fesoasoani lea e sau ia i tatou e auala i pupuni o le lagi, e pei ona folafolaina e Malaki i le Feagaiga Tuai (tagai Malaki 3:10).

E pei ona tatou aoao soo atu ma molimau atu e uiga i le tulafono o le sefuluai, tatou te faamamafa lava ia faamanuiaga faaletino tuusao, faagaeetia, ma faigofie ona iloaina ia tatou te mauaina. Ma e mautinoa lava o ia faamanuiaga o loo maua. Ae o nisi o ia faamanuiaga eseese tatou te maua pe a tatou usiusitai i lenei poloaiga e lemafaamatalaina ae taua. O ia faamanuiaga e faatoa mafai ona tatou iloatinoina pe afai tatou te gauai atu i ai ma mataala faaleagaga (tagai 1 Korinito 2:14).

O le vaaiga o faamalama po o “pupuni” o le lagi o loo faaaoga e Malaki e matua aoga lava. E faataga e pupuni po o faamalama le malamalama faanatura ona ulufale atu i se fale. I se ala faapena, e faasalalau atu ai le malamalama ma le vaaiga faaleagaga e auala atu i faamalama po o pupuni o le lagi ma i o tatou olaga pe a tatou faamamaluina le tulafono o le sefuluai.

Mo se faataitaiga, o se faamanuiaga lemafaamatalaina ae taua tatou te mauaina o le meaalofa faaleagaga o le loto faafetai lea e mafai ai ona tatou talisapaia mea ua tatou maua e faafetaiaia ai manaoga mo mea tatou te mananao i ai e lei mauaina. O se tagata loto faafetai e faatumulia i le lotomalie. O se tagata e le loto faafetai e mafatia i le mativa o le eleele e le malie i vai ona o le matapeapea (tagai Luka 12:15).

E manaomia ona tatou tatalo mo se fesoasoani e saili ai se galuega talafeagai. Peitai, e manaomia ni mata ma ni taliga o le faatuatua (tagai Eteru 12:19), e iloa ai meaalofa faaleagaga o le iloatino sili atu lea e mafai ona faamamanaina ai i tatou ia maua ni avanoa faigaluega lea e le amanaiaina e le toatele o isi tagata—po o le faamanuiaga o le faateleina o le naunautaiga patino e saili malosi ma faaumiumi atu mo se galuega nai lo isi tagata atonu o loo mafai pe naunau e fai. Atonu tatou te mananao ma faamoemoe e tuulima atu se galuega, ae o le faamanuiaga lea e sau ia i tatou e ala i pupuni o le lagi, atonu e sili atu le gafatia e faatino ai ma suia ai o tatou lava tulaga nai lo le faamoemoeina o o tatou tulaga ina ia suia e se tasi po o se isi mea.

Atonu tatou te mananao ma le talafeagai ma galulue ina ia maua se siitaga o le totogi i a tatou galuega ina ia maua ai mea e manaomia o le olaga. Peitai, e manaomia mata ma taliga o le faatuatua tatou te iloaina ai e i tatou lava se faateleina o le faaleagaga ma le gafatia faaletino (tagai Luka 2:52) ina ia tele atu mea e fai i sina tupe itiiti, se tomai ua faaleleia e faatulaga ai mea e faamuamua ma ola i se olaga faigofie, ma se tomai faaleleia e taulimaina ai ma le faaeteete ia meatotino faitino ua uma ona tatou maua. Atonu tatou te mananao ma faamoemoeina se totogi telē atu, ae o le faamanuiaga e oo mai ia i tatou e ala i pupuni faalelagi atonu e tele atu lona gafatia e sui ai o tatou lava tulaga nai lo le faamoemoeina o o tatou tulaga ina ia suia e se tasi po o se isi mea.

Sa tatalo faatauanau ia fitafita talavou i le Tusi a Mamona (tagai Alema 53; 56–58) ia faamalosia i latou e le Atua ma laveai i latou mai lima o o latou fili. O le mea e mataina ai, o tali i nei tatalo sa lei maua ai nisi auupega pe sa faateleina ai le aofai o le autau. Ae, na tuu atu e le Atua i nei fitafita faatuatua le faamautinoaga o le a Ia laveaiina i latou, le filemu i o latou agaga, ma le tele o le faatuatua ma le faamoemoe mo lo latou laveaiga ia te Ia (tagai Alema 58:11). O lea, sa lototetele ai atalii o Helamana, ma mausali i se naunautaiga e faatoilalo, ma o atu ma lo latou malosi atoa e tau faasaga ia sa Lamana (tagai Alema 58:12–13). O le faamautinoaga, filemu, faatuatua, ma le faamoemoe sa lei foliga mai i le amataga o ni faamanuiaga ia sa mananao i ai fitafita i le taua, ae o faamanuiaga tonu lava ia sa manaomia e nei alii talavou totoa e fetaomi ai i luma ma manumalo ai faaletino ma faaleagaga.

O nisi taimi atonu tatou te ole atu i le Atua mo le manuia, ma Ia tuu mai ai ia i tatou le malosi faaletino ma faalemafaufau. Atonu tatou te ole atu mo le uluola, ae tatou mauaina le vaaiga faateleina ma le faateleina o le onosai, pe tatou te faatoga atu mo le tuputupu a’e ae faamanuiaina i tatou i le meaalofa o le alofatunoa. Atonu Na te foai mai ia i tatou le talitonuga maumaututu ma le mautinoa a o tatou tauivi e ausia ni sini agavaa. Ma a tatou augani atu mo se toomaga mai faigata faaletino, faalemafaufau ma faaleagaga, atonu Na te faateleina lo tatou naunautaiga ma le onosai.

Ou te folafola atu a tatou usiusitai ma tausia le tulafono o le sefuluai, e moni lava o le a toina pupuni o le lagi ma sasaa mai faamanuiaga faaleagaga ma faaletino ia o le a leai se avanoa e totoe e teu ai (tagai Malaki 3:10). O le a tatou manatua foi le tautinoga a le Alii:

“Aua o o’u manatu e le o outou manatu, o o’u ala e le o outou ala, ua fetalai mai ai Ieova.

“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).

Ou te molimau atu a tatou gauai atu faaleagaga ma le toto’a, o le a faamanuiaina i tatou i mata e manino atili le vaai, o taliga e lelei atili le faalogo, ma loto e malamalama atoatoa atili i Ona ala, Ona manatu, ma Ana faamanuiaga lemafaamatalaina ma taua i o tatou olaga.

A o lei valaauina au e auauna atu o se uso o le Korama a le Toasefululua, sa ou faitau i le tele o taimi i le Mataupu Faavae ma Feagaiga e uiga i le aufono na tofia e vaavaaia ma tufatufa atu ia tupe paia o le sefuluai. O Le Aufono e Taulimaina le Sefuluai sa faavaeina e ala i faaaliga ma e i ai le Au Peresitene Sili, le Korama a Aposetolo e Toasefululua, ma le Au Epikopo Pule Faamalumalu (tagai i le MF&F 120). A o ou sauni ia Tesema o le 2004 e auai i lau fonotaga muamua o lenei aufono, sa ou mafaufau muamua lava ma le naunautai i se avanoa sili ona ofoofogia e aoao ai.

Ou te manatua pea ia mea na ou oo i ai ma lagonaina i lena aufono. Sa ou maua ai se talisapaia tele atu ma le migao mo tulafono a le Alii o mea tautupe mo tagata taitoatasi, mo aiga, ma mo Lana Ekalesia. O le polokalama tautupe autu a Le Ekalesia a Iesu Keriso o le Au Paia o Aso e Gata Ai—mo tupe maua ma tupe faamatuu atu—o loo faamatalaina i le vaega e 119 ma le 120 o le Mataupu Faavae ma Feagaiga. E lua faamatalaga o loo maua i nei faaaliga o loo tuu mai ai le faavae mo mataupu tautupe a le Ekalesia.

O loo taua manino i le vaega e 119 e faapea o tagata uma “ia totogi atu le tasi-vaesefulu o a latou mea faaopoopo uma i tausaga taitasi; ma ia avea lenei ma tulafono tumau ia te i latou e faavavau, … ua fetalai mai ai le Alii” (fuaiupu e 4).

Ae e faatatau i le faamatuu atu o sefuluai ua faatagaina, na fetalai ai le Alii, “Ia taulimaina ia mea e se aufono, e aofia ai le Au Peresitene Sili o la’u Ekalesia, ma le epikopo ma lana aufono, ma la’u aufono maualuga; ma i lo’u lava leo ia te i latou, ua fetalai mai ai le Alii” (MF&F 120:1). O le “epikopo ma lana aufono” ma “la’u aufono maualuga” o loo faatatau i ai le mau i lenei faaaliga ua lauiloa i aso nei o le Au Epikopo Pulefaamalumalu ma le Korama a Aposetolo e Toasefululua. O nei tupe paia o loo faaaogaina i se ekalesia ua televave le tuputupu ae ina ia faamanuiaina ai faaleagaga tagata taitoatasi ma aiga e ala i le fausiaina ma le tausia o malumalu ma fale tapuai, lagolagoina o le galuega faafaifeautalai, faaliliuina ma le lolomiina o tusitusiga paia, uunaiaina o sailiga o talafaasolopito o aiga, faatupeina o aoga ma aoaoga faalelotu, ma le faataunuuina o le tele o isi faamoemoega a le Ekalesia e pei ona taitaia ai e auauna faauuina a le Alii.

Ou te maofa i le manino ma le pupuu o faaaliga nei e lua e faatusatusa i taiala tautupe lavelave ma faiga faavae faalepulega o loo faaaogaina i le tele o faalapotopotoga ma faigamalo i le lalolagi atoa. E mafai faapefea ona faagaoioi mataupu faaletino a se faalapotopotoga e tele e pei o le Ekalesia toefuataiina a Iesu Keriso i le lalolagi atoa e faaaoga ai ia faatonuga pupuu? Ia te au lava ia o le tali e tuusao lava: o le galuega lenei a le Alii, e mafai ona Ia faia Lana lava galuega (tagai 2 Nifae 27:20), ma e musuia ma taitai e le Faaola Ana auauna a o latou faaaogaina Ana faatonuga ma galulue i Lana galuega.

I lena fonotaga muamua a le aufono sa faagaeetia ai lava au i le faigofie o mataupu faavae o loo taialaina ai a tatou fuafuaga ma faaiuga. I faagaoioiga tautupe a le Ekalesia, o loo matauina ai ni mataupu faavae se lua ma tumau. Muamua, e ola le Ekalesia e tusa ma mea ua ia maua ma na te le faaaluina ni tupe e sili atu ma mea ua ia mauaina. Lua, o se vaega o tupe maua i tausaga taitasi e tuuese, o se tupe faaleoleo lea mo ni mea faafuasei ma ni manaoga e lei mafaufauina. Mo le tele o tausaga, ua aoao ai e le Ekalesia ona tagata e uiga i le mataupu faavae o le tuuese o ni meaai faaopoopo, suauu, ma tupe e taulima ai ni faalavelave e ono tutupu faafuasei. E mulimulitaia ma le faigofie e le Ekalesia o se faalapotopotoga ia lava mataupu faavae e tasi o loo aoao soo atu i tagata.

A o faagasolo ai lea fonotaga, sa ou moomoo ai maimau pe ana mafai ona iloa uma e tagata o le Ekalesia le faigofie, le manino, ma le faatulagaga tatau, le lotofoai, ma le mamana o le ala a le Alii lava Ia (tagai MF&F 104:16) mo le faatautaiga o mataupu faaletino a le Ekalesia. Ua tele nei tausaga o ou auai ai i le Aufono e Taulimaina le Sefuluai. E faatupulaia lava lou loto faafetai ma le migao mo le mamanu a le Alii i tausaga taitasi, faapea ai ma lesona ua aoaoina ua faateleina le loloto.

Ua faatumulia lou loto i le alofa ma le faamemelo mo tagata faamaoni ma usiusitai o lenei Ekalesia mai malo uma, ituaiga, gagana, ma nuu. A o ou femalagaai ai i le lalolagi, ua ou iloaina ai faamoemoega ma sini, o tulaga eseese o loo outou ola ai, ma o outou tauiviga. Ua ou auai i sauniga a le Ekalesia faatasi ma outou ma asiasi i nisi o o outou aiga. Ua faamalosia e lo outou faatuatua lo’u faatuatua. O lo outou tuuto ua atili ai ona ou tuuto. Ma o lo outou lelei ma le usiusitai ma le loto i ai i le tulafono o le sefuluai ua uunaia ai au e avea o se alii, tane, tamā, ma se taitai o le Ekalesia sili atu. Ou te mafaufau ma manatua outou i taimi uma ou te auai ai i le Aufono e Taulimaina le Sefuluai. Faafetai atu mo lo outou lelei ma le faamaoni a o outou faamamaluina a outou feagaiga.

E lagona e taitai o le Ekalesia toefuataiina a le Alii se tiutetauave maoae e tausia ma le tatau ia taulaga faapaiaina a tagata o le Ekalesia. O loo matou matua nofouta i le natura paia o tupe iti e lua a le fafine ua oti lana tane.

“Sa nofo Iesu e feagai ma le mea e teu ai tupe, ua silafia foi e ia le vao tagata o lafo tupe i le mea e teu ai tupe; e toatele foi o e mauoa, ua tele a latou ua lafo ai.

“Ua alu ane foi le tasi fafine mativa ua oti lana tane, ua lafo ane ai tupe iti e lua, o le kotane e tasi ia.

“Ona valaau atu lea o ia i ona soo, ua fetalai atu ia te i latou, E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai:

“Aua o i latou uma, ua latou lafo nisi mea mai a latou mea ua tele, a o ia ua mativa ua ia lafo ana mea uma sa ia te ia, o ana mea uma e ola ai” (Mareko 12:41–44).

Ou te iloa mai o’u lava ia aafiaga o le Aufono e Taulimaina le Sefuluai o loo faaeteete i le malupuipuia o tupe iti e lua a le fafine ua oti lana tane. Ou te faailoa atu le lotofaafetai ia Peresitene Thomas S. Monson ma ona fesoasoani mo le taitaiga mataalia i le faamatuuina mai o lenei tiute paia o le tausimea. Ma ou te faamamaluina le siufofoga (tagai MF&F 120:1) ma le aao o le Alii o loo lagolagoina Ana auauna faauuina i le faataunuuina o le tiute e avea ma Ona sui.

O le totogiina ma le faamaoni o le sefuluai e sili atu lava nai lo se tiute; o se laasaga taua lea i le faagasologa o le faapaiaina faaletagata lava ia. Mo outou na e totogi a outou sefuluai, ou te faamalo atu.

Ae mo outou na e le o usitaia i le taimi nei le tulafono o le sefuluai, ou te valaaulia outou ia iloilo ou ala ma salamo. Ou te molimau atu e ala i lou usiusitai i lenei tulafono a le Alii, o le a matala mai ai pupuni o le lagi ia te outou. Faamolemole aua nei faatuai le aso o lo outou salamo.

Ou te molimau atu e oo mai faamanuiaga faaleagaga ma faaletino i o tatou olaga pe a tatou ola i le tulafono o le sefuluai. Ou te molimau atu o na faamanuiaga e lemafaamatalaina ae taua. Ou te tautino atu foi o le faigofie o le ala a le Alii ua matua manino lava i mataupu faaletino a Lana Ekalesia ua maua ai mamanu e mafai ona taiala ai i tatou taitoatasi ma aiga. Ou te tatalo ia tatou tau fai aoao uma ma manuia mai nei lesona taua, i le suafa paia o le Alii o Iesu Keriso, amene.