2010–2019
Me Yacova Ni Da Sota Tale
Okotova 2013


Me Yacova Ni Da Sota Tale

Meda sa qai vakaraitaka na noda veilomani vakalevu cake vakai keda, ka meda sa laurai ni da cakava tiko na cakacaka ni Turaga.

Kemuni na taciqu kei na ganequ, e vakasinaiti na yaloqu ena noda sa mai tinia tale na koniferedi raraba totoka oqo ni Lotu. Eda sa mai vakamamautaki vakayalo vakavinaka ni da mai vakarorogo ki na nodra ivakasala kei na ivakadinadina era a vakaitavi ena soqoni yadua.

Eda kalougata ni da mai soqoni vata eke ena Vale ni Koniferedi totoka oqo ena vakacegu kei na veitaqomaki. Eda sa vakayacora tiko mai na kena kaburaki yani na koniferedi oqo, me takosova yani na veivanua lelevu kivei ira na tamata ena veivanua kecega. E dina ga ni keimami tu vakayawa dina sara mai na vuqa vei kemuni, keimami vakila ga na yalomuni.

Kivei kemuni na Veitacini ko ni sa mai vagalalataki ena koniferedi oqo, au sa mai vakaraitaka eke na vakavinavinaka levu ni Lotu taucoko ena vuku ni nomudou veiyabaki ni veiqaravi yalodina. E sega ni wili rawa na levu ni tamata era sa vakalougatataki ena nomuni cau ki na cakacaka ni Turaga.

Au sa vakavinavinaka vakalevu ki na Matasere ni Tabernacle kei na veimatasere tale eso era a vakaitavi ena koniferedi oqo. A totoka dina na sere kei na ivakatagi ka keimami a vakila vakalevu kina na Yalotabu ena soqoni yadua.

Au sa vakavinavinakataka na nomuni veimasulaki ena vukuqu kei na vukudra taucoko na Vakaitutu Raraba kei ira na vakailesilesi raraba ni Lotu. Era dau vaqaqacotaki keimami.

Me sa tiko ga kei kemuni na veivakalougatataki mai lomalagi. Me vakasinaiti na nomuni itikotiko ena loloma kei na veikauwaitaki vakakina ena Yalo ni Turaga. Mo ni gumatua tiko mo ni vakabulabulataka na nomuni ivakadinadina ni kosipeli, me rawa ni nomuni isasabai mai na veivakacacani ni meca.

Sa mai tini tiko na noda koniferedi. Ni da sa lesu yani i vale, meda vakayacora ena tataqomaki. Me sa tiko ga kei keda na Yalotabu eda a vakila eke ena noda vakayacora na cakacaka eda vakaitavitaki keda kina ena veisiga yadua. Meda sa qai vakaraitaka na noda veilomani vakalevu cake vakai keda, ka meda sa laurai ni da cakava tiko na cakacaka ni Turaga.

Kemuni na taciqu kei na ganequ, me sa vakalougatataki kemuni na Kalou. Me sa tiko ga kei kemuni ena gauna oqo kei na veigauna kece na Nona veivakacegui yalataki. Au sa vakamoce eke vei kemuni ka me yacova na gauna eda na sota tale kina ena vula ono mai oqo. Ena yaca ni noda iVakabula, o Jisu Karisito na Turaga, emeni.