Tae atu i te taime e farerei faahou ai tatou

E au mau taea‘e e au mau tuahine here, ua mauruuru roa vau i teie taime te opani nei tatou i teie amuiraa rahi a te Ekalesia. Ua faaamuhia tatou i te pae varua na roto i to tatou faarooraa i te parau a‘o e te mau iteraa papû o te feia tei paraparau mai i roto i te tuhaa pureraa tata‘itahi.

Ua haamaitaihia tatou i te mea e, ua ti‘a ia tatou ia putuputu i ô nei i roto i teie Pû Amuiraa nehenehe ma te hau e te pe‘ape‘a ore. Aita â i itehia a‘enei hoê haapuroro mai teie te huru, no te haapuroro i te amuiraa i te mau taata atoa i tera fenua e tera fenua. Noa’tu e, e mea atea roa matou ia outou, te ite nei matou i to outou varua.

No to tatou mau taea‘e tei haamauruuruhia i to ratou ti‘araa i roto i teie amuiraa, te hinaaro nei au e faaʻite atu i te haamauruururaa rahi a to te Ekalesia taatoa no te mau matahiti e rave rahi o to outou taviniraa ma te maitai. E rave rahi taata tei haamaitaihia na roto i ta outou taviniraa i roto i te ohipa a te Fatu.

Te faaʻite nei au i te mauruuru i te pupu himene no te Fare Menemene e i te tahi atu mau pupu himene tei haa atoa mai i roto i teie amuiraa. E mea nehenehe roa te mau himene, e na te reira i faarahi atu i te Varua ta tatou i fana‘o i roto i te tuhaa pureraa tata‘itahi.

Te haamauruuru atu nei au ia outou no ta outou mau pure no’u e no te mau hui mana faatere rahi e te feia toro‘a o te Ekalesia. Ua haapuaihia matou na roto i te reira.

Ia vai mai te mau haamaitairaa o te ra‘i i ni‘a ia outou. Ia î to outou mau fare i te here e te faaturaraa e i te Varua o te Fatu. E mata na outou i te faaamu maite noa i to outou iteraa papû no ni‘a i te evanelia, ia riro hoʻi te reira ei paruru no outou i mua i te mau tupaʻipaʻiraa a te enemi.

Ua faaoti te amuiraa i teie nei. Ia ho‘i atu tatou i to tatou mau nohoraa, a ho‘i ma te pe‘ape‘a ore. Te Varua ta tatou i farii i ô nei, ia parahi mai ïa te reira i roto ia tatou a rave ai tatou i te mau ohipa ta tatou e rave nei i te mahana tata‘itahi. E mata na tatou i te faaʻite i te maitai rahi a‘e i te tahi e te tahi, e ia itehia tatou i te mau taime atoa te rave ra i te ohipa a te Fatu.

E au mau taea‘e e au mau tuahine, ia haamaitai mai te Atua ia outou. Ia vai mai i roto ia outou te hau Ta’na i fafau mai i teie nei e i te mau taime atoa. Te faatae atu nei au i te aroha ia outou e tae atu i te taime e farerei faahou ai tatou i roto e ono ava‘e i muri nei. Na roto i te i‘oa o to tatou Faaora, o Iesu Mesia te Fatu, amene.