Kae ʻOua Ke Tau Toe Fakataha Mai

Siʻi kāinga ʻofeina, ʻoku fonu hoku lotó ʻi heʻetau aʻu mai ki he fakaʻosinga ʻo e konifelenisi lahi fakaʻofoʻofa ko ʻeni ʻo e Siasí. Kuo fafanga fakalaumālie kitautolu ʻi heʻetau fakafanongo ki he faleʻi mo e fakamoʻoni ʻa kinautolu kuo nau kau mai ki he fakataha taki taha.

Kuo tau monūʻia ke fakataha mai ki he Senitā Konifelenisi fakaʻofoʻofá ni ʻi he melino mo e malu. Kuo fakamafola atu e konifelenisí ki he ngaahi konitinēniti mo e kakai ʻi he feituʻu kotoa pē. Neongo ʻoku mau nofo mamaʻo mei hamou tokolahi ka ʻoku mau ongoʻi homou laumālié.

Ki homau Ngaahi Tokoua kuo tukuange ʻi he konifelenisí ni, tuku muʻa ke u fakahaaʻi atu ha fakamālō loto houngaʻia mei he Siasí kotoa koeʻuhí ko e ngaahi taʻu lahi ʻo hoʻomou ngāue mateakí. Kuo taʻefaʻalaua ha kakai kuo lavemonū ʻi hoʻomou ngaahi tokoni ki he ngāue ʻa e ʻEikí.

ʻOku ou fakamālō loto houngaʻia ki he Kuaea Tāpanekalé mo e ngaahi kuaea kehe ne kau mai ki he konifelenisí ni. Kuo fakaʻofoʻofa ʻa e hivá pea naʻá ne tānaki mai e Laumālie makehe kuo tau ongoʻi he fakatahaʻanga takitaha.

ʻOku ou fakamālō atu ʻi hoʻomou lotua kimautolu mo e Kau Taki Māʻolungá kotoa pea mo e kau ʻōfisa māʻolunga ʻo e Siasí. ʻOku fakamālohia ai kimautolu.

ʻOfa ke nofoʻia kimoutolu ʻe he ngaahi tāpuaki ʻo e langí. ʻOfa ke fakafonu homou ʻapí ʻaki ʻa e ʻofa mo e fakaʻapaʻapa pea mo e Laumālie ʻo e ʻEikí. ʻOfa ke mou tanumaki maʻu ai pē hoʻomou fakamoʻoni ki he ongoongoleleí pea ke hoko ia ko ha maluʻi kiate kimoutolu mei he ngaahi fakatauele ʻa e filí.

Kuo ʻosi ʻa e konifelenisí. ʻI heʻetau foki ki hotau ʻapí, ʻofa ke tau foki malu atu ki ai. ʻOfa ke nofoʻia kitautolu ʻe he Laumālie kuo tau ongoʻi hení ʻi heʻetau fakahoko ʻetau ngaahi ngāue fakaʻahó. ʻOfa ke tau fakahaaʻi ha angaʻofa ʻoku lahi angé ki he niʻihi kehé pea ke tau femoʻuekina maʻu pē ʻi hono fakahoko e ngāue ʻa e ʻEikí.

Siʻoku kāinga, ʻofa ke tāpuakiʻi kimoutolu ʻe he ʻEikí. ʻOfa ke nofoʻia kimoutolu ʻe he melino kuó Ne talaʻofa maí ʻi he ʻahó ni pea maʻu ai pē. ʻOku ou tatau atu kae ʻoua ke tau toe fakataha mai ʻi ha māhina ʻe ono mei heni. ʻI he huafa hotau Fakamoʻui mo e ʻEiki ko Sīsū Kalaisí, ʻēmeni.