Nuh sin Tuhlihk Nuhtin Tuhlihk Nuhtihk

Yac se inge tuhlihk muhtwacn luo emet nuhtin tuhlihk mukul nuhtihk fah pahyuckyak. Ke yac na ekahsr puhs oacna [singucul] 10 sin cousin lalos an kuh pac na in sun pacl ke moul lalos ke elos fah oacyacpac orwaclah sucu lalos sifacna, suc pa sie ma wolacna.

Ma engan ingacn oruh nga in nuhnkuh yohk ke elos ac siyuck sihk ke kahs in kahsruh uh. Elos ac siyuck na, “Meac sulaclah nga kuh in orwaclah ma fah kolyuc nuh ke engan?” Ac kihsen siyuck ma siena, “Sulaclah fuhkah ac kuh in kolyuc nuh ke tiacengan?”

Pahpah Lucng El orwaclah kais sie sesr in siena. Wacngihn sesr oasr la puhlakihnyuck sefanna. Sucu nuh kwewa tiac oacna sie. Na oruh tiacna mwe lut lah mwe kahsruh ke ohiyac in sulaclah engan ke moul in sucu uh upac in ituckyang. Tuhsruhk sie Pahpah luhngse Inkuhsrao El orwaclah ohiyac sacn pacna nuh ke eisyacn engan nuh sin tuhlihk nuh kwewa Nahtuhl. Finne fuhkah ohiyacsr sifacna kuh finne fuhkah puhlakihnyuck lasr uh, oasr plwacn in engan sefanna. Plwacn se ingacn pa in ukwe masap nuh kwewa luhn God.

Tuh kuht nuh kwewa, weacng tuhlihk nuhtin tuhlihk nahtuhsr ma ahkolah in pahyuck uh, oasr masap fuhlwact emet ma fah kahsrwe kuht in lain ma upac uh ac kol nuh ke sie inse luhn sie moul engan luhn sucu. Ma inge ma nuh ke aetuhi nuh kwewa macnsiskihn ohiyac kac an. Kalweniyuck ke ma suhmuhslah uh ac ke luti luhn mwet pahluh ke pacl lasr uh. Ma inge ma Pwacpuhl fahk ke kahs in kahsruh luhn Leum nuh sin mwet nuh kwewa suc luhngse in tuhkweni moul ma pahtpaht ke luhngse engan uh:

“Na sie selos suc pihsrlac ke masap, el srihke in srihfe Jisus ke sie mwe siyuck, el fahk,

“Mwet Luti, piyac masap se ma yohk emet ke masap uh?

“Ac Jisus El fahk, Kom fah luhngse Leum God lom ke insiom kwewa, ke nguhnum kwewa, ac ke nuhnkom kwewa.

“Pa inge masap se ma yohk emet ac yohk srihpac emet.

“Masap se ahkluo yohk srihpac oacpacna ma se met an, Kom fah luhngse mwet tuhlan lom oacna kom luhngse kom sifacna.

“Masap nuh kwewa lal Moses ac mwe luti nuh kwewa luhn mwet pahluh oan ye masap luo inge.”¹

Ke pohloh kahs fihsrwacsr ingacn tiacna upac in ahkfototoye ma nuh kwewa nga lotwelah ke sulaclah fuhkah ac kol nuh ke engan in sucu uh. Nga muhtwacwacack ke kihsen siyuck inge, “Sulaclah fuhkah ma kolyucme in luhngse Leum ke insiuck nohfohn ac nguhnihk ac ke nuhnkuhk nohfohn? Nuh sihk, top nuh ke kihsen siyuck soko an pa sulaclah ma lwelah nga in puhla engan ma tuhkuh ke nuhnak muhnahs ke Iwaclah luhn Leum.

Yac somlah ah nga pacptaiselah sie mukul fuhsr fin acn Albuquerque, New York, suc misineri companion se luhk ah ac nga luti. Nga fihliyac mukul fuhsr sac nuh ye kof uh ac orwaclwack nuh lucng. Sahp el apkuhran na in loes oacna nga ke srihpen el sramsram suwohs nuh ke insrwek. Ke kof ke lun acn sac ac sronin muhta kahklah ke muhtahl ac ke engan ke puhsrwacl, el fahk, “Nga nwacsnwacslah, nga nwacsnwacslah.”

Nga liye kain sronin muhta engan ingacn pacna ke muhtuhn sie mwet suc kalweni kahs luhn sie Mwet Sap luhn God. El fahk nuh sel, tukun sie lohlngohk kuhlwacng ac suwohs, “Nga nuhnak muhnahs nuh sum ke inen Leum. El fah usot nuh sum mwe ahkpwacye ke nuhnak muhnahs Lal ke pacl Lal sifacna ac inkacnek Lal sifacna.” Ac El orwaclah.

Nga etuh lah efuh Leum El kuh in fahk lah ke ma koluk uh nuhnak muhnahskihnyucklac, El kuh in tiac sifil esam. Ke kuh luhn Iwaclah, mwet ma nga etuh wo ac luhngse uh forlah eklac, ac ma sikyak ke ma koluk uh iyucklac. Insiuck sesseslah ke luhngse nuh sin Mwet Lahngo ac Pahpah luhngse se suc Suhpwaclma uh.

Mwe insewowo yohk se ingacn tuhkuh ke ahkkweyeyacn mwet nga luhngse in som nuh yurin Mwet Lango nuh ke monglac ke kweok, sie monglac ma El muhkwena kuh in sang. Pa oruh nga pahtok mwet suc nga luhngse in eis ac in ahkyohkye pahng nuh kwewa ituckyang nuh selos ke Alu uh. Sulaclah se ingacn pa sie sin ki yohk emet nuh ke engan luhn sucu uh.

Elyah ke puhlan pacl nuh kwewa ke moul uh kuh in srihfe kuht in sruhnga kuh srihkkihn pahng in kuhlwacnsapuh Mwet Lahngo. Ma ingacn kuh in eiskuhtyang nuh ke mwe sensen luhn nguhn nuh sesr sifacna, muhtacn kiacsr, ac sucu lasr uh. Kuhtuh sin pahng inge ac kuh in nuhnkweyuck muh tiac yohk srihpac, tuhsruhk moul luhk, ac sucu luhk uh, eklac nuh ke ma wo ke nga eis sie pahng in luti sie u luhn tikin. Nga puhla luhngse luhn tikin ingacn ke Mwet Lahngo ac luhngse Lal nuh selos.

Nga liye ma ingacn sikyak ke moul luhn sie prestuhn luhn stek ac misin mah ke pahng lal nuh sel in mwet sang kahsruh ke u luhn mwet luti uh. Nga etuh ke sie pac mwet suc pisap se na sie Eria ke Mwet Itngucul suc orekmakihnyuck sin Leum in ahkkweye sie tuhlihk ke u luhn mwet luti suc ongaiyac ke sie acksitacn. Ma usrnguck ke kuhlwacnsap sac mokleack moul pucspucs, weacng moul luhk uh, ac ahkyohkye luhngse lalos nuh sin Mwet Lahngo.

Ke kuhlwacnsapuh mwet sahyac uh, kuht kwacna enenuh in siyuck ke wi luhn Nguhn Muhtahl. Orwaclah wo ke kuhlwacnsap luhn Leum kwacna orwaclah ma usrnguck yohk liki kuh lasr sifacna uh. Ninac pahpah ma nahtuh sie tuhlihk lihkkeke etuh lah ma inge pwacye, oacpacna mwet forfor luti uh sramsram nuh sin sie muhtwacn suk ahkkweye ke mukul tuhmwacl ah fahk nuh sel lah elac sahf sel. Kwewana mwet kuhlwacnsap ah tarilacna lah elos pruhe ke lututacng sac nuh sin Leum in suhpwaclah Nguhn Muhtahl in weluhlos.

Ke wi luhn Nguhn Muhtahl muhkwena tuh in oasr finsrak lasr in tuhkweni oacna sie ke sie pahyuck sukohsohk liki ahkuhkuhin. Nga liye ohiyac ma wi luhn Nguhn Muhtahl enenuh in kuh in engan ke sie pahyuck. Ma usrnguck ke eklac ma sefanna enenuh kahsruh luhn inkuhsrao, ac e eis kuhtuh pacl. Finsrak lasr pa in tuhkweni muhta ma pahtpaht ye muhtuhn Pahpah Lucng ac Mwet Lahngo lasr.

Pahpah ac ninac kiuck ah arulacna siena likina sie sin sie. Ninac kiuck ah el sie mwet on ac sie artist. Pahpah tuhmuhk ah luhngse chemistry. Sie pacl ah ke sie toeni luhlahp ke on, ninac kiuck ah lut ke pahpah tuhmuhk ah tuyak ac muhtwacwacack in tifoklac met liki mwet ah muhtwacwacack in pahspahs. Ninac kiuck ah siyuck lah elac som nuh oyac. Top se lal ah tahlahp na pwacye: “Na, mweyen tari, tiac?” Mokleyuck fihsrwacsr muhkwena luhn Nguhn Muhtahl pa moklacl elan wi concert sac weluhl uh, ac na moklacl elan weluhl nuh ke concert uh pacl puhkantwen pac.

Ninac kiuck ah muhta fin acn New Jersey ke yac 16 in muh pahpah tuhmuhk ah kuh in karihngihn sucu lasr ah ke oruh research ac luti chemistry. Nuh sel ma ingacn pa sie kihsackuhnlah orekwelihk liki ninac katinmas ac tahmtahel tiac pahyuck se wiyacl, suc karuhnguhnuhl lun lohm in imac mah se luhn sucu an. Elos tuhkweni misac ke Ninac el muhta loeslac fin acn New Jersey. Pacl ingacn muhkwefanna pa nga liye ninac kiuck ah tuhng uh.

Yac ekahsr tohkoh pahpah tuhmuhk ah ituckyang orekma se la fin acn Utah. El siyuck sin ninac kiyuhk ah, sifilpac ke tahlahpiyac na pwacye, “Mildred, meac kom nuhnkuh tuh nga enenuh in oruh?”

El fahk, “Henry, oruh na ma kom liye tuh wo emet an.”

El sulaclah in tiac eis orekma sac. Lututacng tohkoh ah muhtwacn kiacl suhmuhslah lwacta se nuh sel ma nga finsrak in srwackna oasr sihk. Nga esam lah el fahk nuh sel, “Met ikucslah inge. Som nuh ke ohfohs ah ac ikucslah we. Muhtwacwacack ke sie ahkuhkuhin. El olwelah nuh sin muhtwacn kiyacl ke yac met ah lah el fin muh kuh, el fah usacl in muhta siskacn sucu luhn muhtwacn kiyacl ah. El lut ke ahkkahlwemyeyacn kihructruct lal ah. El tiacna esam kena luhn insiacn muhtwacn kiyacl. El sana suhpwaclah sie pweng in eis orekma sac.

El fahk, “Mildred, efuh kom tiacna fahk nuh sihk?”

El fahk, “Kom enenuh in esam.”

El kwacna sramsramkihn sulaclah sacn in som nuh Utah oacna sulaclah lal, tiac in fuhlweack kuhtuh ip ke orekma suhmaht lal an. Elos eis sie ma usrnguck ke eklac ma sefanna. Ac kuh in wo likina fin Pahpah el ahkacsmakihnyeyuck ke Nguhn Muhtahl ke olwelah el orwaclah ke yac emet ah. Tuhsruhk el lwelah Nguhn Muhtahl in ahkfihsrwacsrye inisacl in oruh tuh sulaclah luhn muhtwacn kiacl an eklac ma lal.

Oasr kuh in liye na met wowo lal Pahpah Lucng, El etuh kais sie sesr, ac etuh pacl fahsruh lasr uh. El etuh ma upac kuht fah sun uh. El suhpwacma Wen Nahtuhl in kweok in oruh tuh Elan kuh in etuh ohiyac in kahsrwe kuht ke ma upac lasr nuh kwewa uh.

Kuht etuh oasr tuhlihk nguhn nuhtin Pahpah Lucng ke facluh se inge suc kuhtuh pacl uh sulaclah ma koluk ac suhpwacr luhlahp. Pa oruh El suhpwacma Wen Se Emet Nahtuhl in Mwet Molwelah lasr, suc pa mukwikwi yohk se emet ke luhngse uh. Pa oruh kuht enenuh in etuh tuh ac fah oruh kahsruh luhn God ac fah eis pacl in ahksuwohsye kuht nuh ke moul ma pahtpaht, in muhta yurin Pahpah tuhmwacsr.

Moul ke sucu uh fah srihke kuht. Pa ingacn sie srihpac luhn God ke El use nuh sesr mwe sang ke moul in mahno—in ahkkweye kuht ke oruh kuht in puhlakihn srihkeyuck uh. Ma ingacn ac arulacna pwacye nuh ke moul in sucu uh, ma kuht fah sokwack engan yohk ac ahsor ac ma upac yohk ma kuhtuh pacl uh oacna in yohk likina kuh lasr in kuhtanglah.

Prestuhn George Q. Cannon el fahk ma inge ke ohiyac ma God El ahkoekomlac ac nga ac tuhlihk nahtuhsr uh nuh ke srihkeyuck kuht ac sun uh: “Wacngihn sie sesr suc tiacna eis luhngse luhn God. Wacngihn sie sesr El tiacna karihngihnyuck ac luhngseyuck.Wacngihn sie sesr ma El tiacna plwacni sie inkacnek in molwelah. El sang nuh sin lupufacn lal kunohkohn in karihngihn kais sie sesr. Kuht kuh in nuhnkuh muh kuht tiac yohk srihpac ac fal in sruhngwacyuck, ac mwet sahyac uh ac nuhnkuh oacna, tuhsruhk ke ma inge pwacye lah kuht tuhlihk nuhtin God, ac lah El supwacma lupufacn Lal uh—mwet tiac kuh in lieyuck suc kuh ac fokoko—ma kunaclos pa kuht, ac elos liye kuht ac karihngihn kuhtyang.”²

Ma Prestuhn Cannon el luti ah pwacye. Kom fah enenuh mwe ahkpwacye se ingacn, oacna ke nga enenuh ac orekma nuh kac uh.

Nga pruhe ke luhlahlfongi tuh sie mwet nga luhngse kuh in suk ac puhla kuh luhn Iwaclah sac. Nga pruhe ke luhlahlfongi lah mwet mukwikwi oacna lupufacn uh in tuhkuh nuh ke kahsruh lalos, ac elos ac tuhkuh.

God El orwaclah sie inkacnek in molwelah kais sie tuhlihk Nahtuhl. Nuh sin mwet pucspucs, ma ingacn ac oruh in karihngihnyuck sin sie tamuhlwel kuh sie tahmtahel kuh sie ninac kuh pahpah mahtuh suc luhngse elos finne meac elos oruh.

Yac somlah ah sie kawuck luhk sramsram ke ninac mahtuh kiacl ah. El moulkihn sie moul suwohswohs, yohk luhlahlfongi la lwen nuh kwewa nuh sin Leum ac nuh ke Alu Lal. Tuhsruhk sie sin tuhlihk mukul nuhtin nahtuhl sulaclah in sie mwet koluk. Sahflahiyac ah suhpweyucklac el nuh nien kaclpous. Kawuck se luhk ah fahk lah ninac mahtuh kiacl ah, ke el kahsruhsr ke highway ah in muhtwacta yurin tuhlihk mukul se nuhtin nahtuhl ingacn nuh ke acn kaclpous ah, oasr sronin muhta ke muhtahl ke el pruhe ke kasrkuhsrak, “Nga srihke in moulkihn sie moul wo. Efuh, efuh oasr tuhlihk mukul nuhtin nuhtihk na koluk se suc ma ahkkolukyelah moul lal uh?”

Top uh tuhkuh nuh ke nuhnak lal uh ke kahs inge: “Nga usacloht nuh sum ke srihpen Nga etuh lah kom kuh ac fah luhngse el finne meac el orwaclah.”

Oasr sie lesin na wolacna nuh sesr nohfohn. Inkacnek nuh sin pahpah ninac ac pahpah ninac mahtuh luhngse ac mwet kuhlwacnsap nuh kwewa luhn God fah tiac fihsrwacsr nuh se ke sie facluh koluk. Kuht tiac kuh in ahkkohsye tuhlihk nuhtin God in sulaclah inkacnek nuh ke engan uh. God El tiac kuh in oruh ma ingacn ke srihpen sukohsohk in sulaclah El use nuh sesr uh.

Pahpah Lucng ac Wen Sacohk Nahtuhl luhngse tuhlihk nuh kwewa nuhtin God finne meac elos sulaclah in oruh kuh ma elos eklac nuh kac. Mwet Lahngo El molwelah molo ke ma koluk uh, finne fuhkah luhpan kolukiyac. Ne ohinge enenuh in oasr nuhnuhnkuh suwohs, pacl wowo nuh ke pahkotwen pa tahfweyucklac ma ac fah tiac pihsrwaclah nuhnuhnkuh suwohs uh.

Alma el ahkkahlwemye finsrak ingacn nuh sin wen nahtuhl Corianton ke el fahk nuh sel lah in oacna nuhnuhnkuh fal uh, plwacn ke molwelah tiac kuh in ituckyang in orekma, sahyen ke srihpac luhn auliyak luhn mwet uh ke pacl in srihkeyuck se inge, suc pa sie pacl in ahkolah. Ke srihpen fin tiac ohinge, pahkotwen tiac kuh in orekma sahyen kuhnaoslah orekma ke nuhnuhnkuh suwohs uh. Fin ohingacn, God El ac fah tiac God.”³

Na pweng luhk nuh sin tuhlihk nuhtihn tuhlihk nuhtihk, ac nuh sesr nuh kwewa suc srihke in orwaclah sucu ma pahtpaht, pa lah oasr engan uliyuck nuh sin mwet yohk luhlahlfongi la. Ke met liki facluh oreklac ah, sie Pahpah luhngse Inkuhsrao ac Wen Kuloh Nahtuhl luhngse ac orekma yurin mwet suc Elos etuh muh ac tuhlac uh. God El fah luhngse elos ma pahtpaht.

E oasr pacl wowo lom in etuh lah elos lotwelah plwacn ke molwelah ke lutlut elos eis ke facluh luhn nguhn ah. Elos ac kom ac yohk luhlahlfongi fal la in lwelah in tuhkuh nuh ke sie facluh ke mwet puhs sahyac uh tiacna.

Ke kahsruh luhn Nguhn Muhtahl, ma pwacye nuh kwewa fah utuckuh nuh ke mwe esam lasr uh. Kuht tiac kuh in ahkkohsye ma ingacn nuh sin mwet sahyac uh, tuhsruhk kuht kuh in lwelah elos in liye ke moul lasr uh. Kuht kwacna eis puhlaik ke ma pwacye lah kuht nohfohn tuh tuhkweni puhla engan oacna sie mempucr ke sucu sacohk nuhtin Pahpah tuhmasr Inkuhsrao. Ke kahsruh luhn God kuht nuh kwewa kuh in puhla finsrak sacn ac engan se ingacn pac. Nga pruhe tuh in sikyak nuh sesr nohfohn ke inen Leum Jisus Kraist, amen.