Shepherd ro Rem̧ool

Joten in ilo Im̧ōn Kweilo̧k in Eļap ilo Salt Lake City im jikin ko rettoļo̧k im repaak rej koba ro me rej kabwijer priesthood eo an Anij. Em̧ool kom̧ij “priesthood eo eļap”—em̧ool juon “epepen kar kālet,” āinwōt an Rijilōk Paul kar kwaļo̧k.¹ Iutiej n̄an wōr iien eo em̧m̧an n̄an ekōnono n̄an kom̧.

Ke iaar rūttoļo̧k, kajjojo jōm̧m̧ar baam̧le eo am ekōn ettōr ļo̧k n̄an Provo Canyon, enan̄in 45 m̧aiļ ko (75km) turōk turear jidik in Salt Lake City, ijo kōm kōn pād ilo cabin eo an baam̧le eo ium̧win jet wiik ko. Kōm ļaddik ro kar iien otemjej laudin̄din̄ n̄an etal in eon̄ad ilo reba ak etal in tutu, im kōm kōn kajieon̄ kakijooror baba bwe en ettōr kōkairiri. Ilo raan ko, wa eo baba ekōn ettōr kake eaar juon 1928 Oldmobile. Eļan̄n̄e ej eļļāļo̧k jān 35 mile ko (56 km) juon awa, m̧am̧a ekōn ba, “Kadikdikļo̧k! Kadikdikļo̧k!” ikōn ba, “Buuļi juri laļļo̧k, Baba! Juuri!”

Baba ekōn kattōr enan̄in 35 m̧aiļ ko juon awa ļo̧k n̄an Provo Canyon ak m̧ae iien kōm kōņ ettōr peļaakin bōōl eo ilo iaļ eo im em̧m̧akūt eo am etal im kōn bōjrak kōn juon im̧aajaj in jiip. Kōm kijon̄ lale ilo an buki jiip ko eļļāļo̧k jān kōm, āinwōt ilo an ejjeļo̧k juon Shepherd, jet kidu rej rurruri er ilo aer ilo̧k. Ettoļo̧k itulik kōm kar maron̄ lo juon sheepherder ioon kidia eo waan—ejjeļo̧k juon bridle ilo lon̄iin ak juon halter. Emakijkij an, ettā an jijet ilo an eddo, kiki, kōn an kidia eo kar jeļā ewi iaļ eo n̄an etal n̄an e im jerbal eo an kar kōm̧m̧an jān an kidu ko rurrur.

Eoktak jān jekjek eo me iaar lale ilo Munich, Germany, elōn̄ iiō ko remootļo̧k. Eaar juon Jabōt jibbon̄, im kōm kar ettōrļo̧k n̄an juon kweilo̧k an mijenede. Ke iaar reinam̧ōjļo̧k ilo wintō eo an wa eo waan mijen būreejtōn eo, iaar lo juon shepherd ippān juon aļaļ ilo pein, tōl jiip eo. Raar ļoor e jabdewōt jikin eaar etal ie ļo̧k. Eļan̄n̄e eaar ilo̧k ituanmiin̄ļo̧k, raar ļoor e n̄an ituanmiin̄. Eļan̄n̄e eaar ilo̧k ituanbwijmaron̄ ļo̧k, raar ļoor e ituanbwijmaron̄ ļo̧k. Iaar kōm̧m̧ane juon keidi ikōtaan shepherd eo em̧ool im me eaar tōl jiip ee nejin im sheepherder eo eaar ekkā an iuwe ioon jiip eo nejin.

Jisōs eaar ba, “N̄a seperd em̧m̧an, im jeļā ro Aō.” ² Ej letok n̄an kōj waanjon̄ak eo eweppān an ta juon shepherd em̧ool aikuj erom.

Em̧m̧aan ro, āinwōt priesthood eo an Anij ewōr juon ad eddo an rilale jiip. Māletlet eo an Irooj eaar letok unin tōl ko me jemaron̄ erom shepherd ro n̄an baam̧le ko an Kabun̄ in, ijo jemaron̄ jerbal, jemaron̄ katakin, im jemaron̄ kam̧ool n̄an er. Kain kūr eo an rūkaki in loļo̧k m̧ōko, im ej kōn menin bwe ikōnaan kōnono n̄an kom̧ joten in.

Bisop eo an kajjojo ward ilo Kabun̄ in ej lale ijjitōn̄ eo an rikabwijer priesthood ro āinwōt rūkaki in loļo̧k m̧ōko an baam̧le n̄an loļo̧k m̧ōko im̧ōn kajjojo membōr aolep allōn̄. Rej ilo̧k ruo iaan. Ijo emaron̄, juon likao me ej juon pris ak rūkaki ilo Priesthood eo an Aaron eo ej ilo̧k ippān juon rūtto ej kabwijer Priethood eo an Melkisedek. Rej ilo̧k n̄an im̧ōko im̧ōn ro me rej eddo kaki, rikabwijer eo an Priesthood eo an Aaron eo ej aikuj bōk kuņaan ilo katakin eo ej kōm̧m̧an. Kain ijjitōn̄ rōt in enaaj jipan̄ kōpooj likao rein n̄an mijen ko barāinwōt n̄an jerbal in jipan̄ an priesthood toon wōt an mour.

Būrookraam̧ in katakin ilo m̧ōko eaar ejaak n̄an revelesōn eo raan kein, eo ej letok jerbal eo n̄an ro kar kapit er n̄an priesthood eo n̄an katakin, kōmeļeļeik, kōketak, peptaij, im loļo̧k im̧ōko im̧ōn kajjojo membōr, kōketak er n̄an jar ilo ainikien im ilo ittiņo̧ im kōm̧m̧ani aolep jerbal ko an baam̧le. Rej barāinwōt wōr eddo eo n̄an mije Kabun̄ eo iien otemjej, im pād ippān im kōkajoorļo̧k membōr ro an, im kanooj lale bwe ejjeļo̧k jerawiwi ilo Kabun̄ eo, ak lāj n̄an doon, ak riab, kōnono riab ņāe doon, ak kanijnij.³

Būreejtōn David O. McKay kar kakkōl: “Katakin ilo m̧weo ej juon iaan iien ko rem̧m̧an rekairujruj im em̧m̧an n̄an najdik im im̧we, n̄an kapilōk im tōl ajri ro nejin Jemedwōj. …  [Ej] juon jerbal in jipan̄ ekwojarjar, juon kūr ekwojarjar. Ej jerbal eo ad āinwōt Rūkaki ro an M̧ōko n̄an bōkļo̧k. … jetōb eo n̄an aolep em̧ im bōro. N̄an iakwe jerbal eo im kōm̧m̧ane ijo em̧m̧an tata ippād naaj bōktok aenōm̧m̧an eo, lan̄lōn̄ eo, im bun̄bōro eo ejjeļo̧k jon̄an n̄an [rūkaki] an ajri ro nejin Anij [ettā,] kijejeto.”⁴

Jān Bok in Mormon jej riit bwe Alma kar “kapit aolep pris ro aer im aolep rūkaki ro aer; im ejjeļo̧k eaar ekapit ijello̧kin eļan̄n̄e raar jab armej ro re jim̧we.

“Kōn menin raar lale armej ro aer, im kar naajdik er kōn men ko rej dien re weppān.”⁵

Ilo kōm̧m̧ane eddo ko ad an katakin ilo m̧ōko, jej lo̧ļe eļan̄n̄e jej katak im meļeļe apan̄ ko an membōr ro an kajjojo baam̧le, bwe jān maron̄ wejepedik ilo katakin im ilo kake aikuj eo emenin aikuj.

Juon loļo̧k an katakin m̧ōko ej barāinwōt ļapļo̧k an erom wejepedik eļan̄n̄e juon ijjitōn̄ ej kōm̧m̧an m̧oktaļo̧k. N̄an kōmeļeļeik jibadbad in, in kwaļo̧k ippāmi juon en̄jake iaar bōk jet iiō ko ļo̧k. Ilo tōre in Missionary Executive Committee eo eaar koba in Spencer W. Kimball, Gordon  B. Hinckley im Thomas  S. Monson. Juon joteen Brother im Sister Hinckley kar kōm̧m̧ane juon kōjota ilo m̧weo im̧weer n̄an committee membōr ro im lim̧aro pāleer. Ej kab dedeļo̧k am m̧ōn̄ā ke kar kōļaļļaļ ilo kōjām eo. Būreejtōn Hinckley eaar kōpeļļo̧k kōjām eo im lo juon iaan rūkaki in loļo̧k m̧weo ro an ej jutak ijo. Rūkaki in loļo̧k m̧weo eaar ba, “Ijeļā iaar jab kōm̧m̧ane juon iien lotok n̄an itok, im ejako eo m̧ōtta ippa, bōtaab iaar en̄jake ij aikuj itok joten in. Iaar jab jeļā enaaj kar wōr am̧ rilotok kadede.”

Būreejtōn Hinckley eaar jouj ilo karuwaineneik rūkaki in loļo̧k m̧weo n̄an deļo̧n̄ im jijet im n̄an katakin jilu rijilōk ro im kōrā ro ippām ikkijien jerbal eo am āinwōt membōr ro. Kōn jidik mijak, rūkaki in loļo̧k m̧weo eaar kōm̧m̧ane ijo em̧m̧an tata ippān. Būreejtōn Hinckley eaar kam̧oolol e kōn an itok, ālkin eaar ekairir in diwōjļo̧k.

In kwaļo̧k juon bar waanjon̄ak kōn wāween eo ebōd n̄an kadedeļo̧k katakain ilo m̧ōko. Būreejtōn Marion G. Romney, eo eaar juon rikakpilōklōk ilo Būreejtōnji eo Kein Kajuon jet iiō ko ļo̧k, ekōn ba kōn rūkaki in m̧weo eo an me juon iien eaar etal n̄an im̧ōņ Romney ilo juon bon̄ in iien m̧ōļo. Eaar jibwe wōt at eo an ilo pein im eaar mijak wōt ke kar karuwaineneik n̄an jijet im tilmake ennaan eo an. Ke eaar jutak wōt, eaar ba, “Ekwe, inaaj kwaļo̧k n̄an eok, Brother Romney, em̧ōļo nam̧ōj, im iaar kōjo̧ wōt injin in wa en waō bwe en jab bōjrak. Iaar baj itok wōt bwe in maron̄ jiron̄ bisop eo iaar kōm̧m̧ane loļo̧k ko aō.”⁶

Būreejtōn Ezra Taft Benson, ālkin kwaļo̧k en̄jake in an Būreejtōn Romney ilo juon kweilo̧k an rikabwijer ro an priesthood, innām kar ba, “Emaron̄ em̧m̧anļo̧k ad kōm̧m̧an jān jon̄an in, em̧m̧aan ro—ļapļo̧k an em̧m̧an!” ⁷ Ij errā.

Katakin ilo m̧ōko eļapļo̧k jān juon loļo̧k ejjeļo̧k en̄jake juon kōttan juon allōn̄. Eddo eo ad ej n̄an katakin, n̄an im̧weo, n̄an kōm̧akūt, im ijo jej loļo̧k ro me rejjab niknik, n̄an kōro̧o̧l tok er n̄an niknik im āliktata lelōn̄ ļo̧k ļaddik im leddik ro nejin Anij.

N̄an jipan̄ ilo kijejeto ko ad, in kwaļo̧k kapilōk in emeļeļe me em̧ool ej jerbal n̄an rūkaki ro an m̧ōko. Ej itok jān Abraham Lincoln, eo eaar ba, “Eļan̄n̄e kwonaaj wiini juon armej n̄an jerbal eo am̧, m̧oktata kareel e bwe kwoj juon m̧ōttan eo em̧ool.”⁸ Būreejtōn Ezra Taft Benson eaar kapilōk: “Ilōn̄ in aolep men, erom juon m̧ōttan eo em̧ool n̄an kajjojo im n̄an baam̧le ko kwoj katakin. … Juon m̧ōttan ej kōm̧m̧ane eļāpļo̧k jān juon eddo in loļo̧k kajjojo allōn̄. Juon m̧ōttan eļapļo̧k an n̄ūrbōktak kōn jipan̄ armej jān bōk nōbar. Juon m̧ōttan ej kea. Juon m̧ōttan ej [kwaļo̧k] iakwe. Juon m̧ōttan ej ron̄jake. Im juon m̧ōttan ej leļo̧k jipan̄.”⁹

Katakin ilo m̧ōko ej uwaake elōn̄ jar ko im kōtļo̧k bwe jān lo oktak ko me remaron̄ bōk jikin ilo mour ko an armej.

Juon waanjon̄ak an menin ej Dick Hammer, eo eaar itok jan Utah ippān Civilian Conservation Corps ilo tōre eo an Depression eo. Ke eaar pād ijin, eaar ioon im m̧areik juon jiron̄ in Armej ro Rekwojarjar ilo Raan-ko Āliktata. Eaar kōpeļļok Dick’s Café eo ilo St.  George, Utah, eo eaar erom juon jikin ebun̄bun̄ jikin ioon armej.

Kar jitōn̄ e āinwōt rūkaki in m̧ōko n̄an baam̧le eo an Hammer eaar Willard Milne, juon m̧ōtta. Iaar jeļā kajien Dick Hammer jān kar tōre eo barāinwōt, kōnke iaar printi manu ko n̄an café eo an, iaar kajjitōk ippān eo m̧ōtta Brother Milne ke iaar loļo̧k St. George, “Ejiet eo m̧ōttad Dick Hammer an eddōkļo̧k?”

Uwaak eo ekka an kar, “Ej eddōkļo̧k, bōtaab erum̧wij.”

Ke Willard Milne im eo m̧ōttan raar loļo̧k m̧weo im̧ōn Hammer kajjojo allōn̄, rej iien otemjej maron̄ kwaļo̧k juon ennaan an ko̧jpeļ eo im n̄an kwaļo̧k naan in kam̧ool ko aer ippān Dick im baam̧le eo an.

Iiō ko raar eļļāļo̧k, innām juon raan Willard eaar kūr tok eō kōn juon ennaan em̧m̧an. “Brother Monson,” eaar jino, “Dick Hammer ej oktak im enaaj peptaij. Ej pād ilo 90th an iiō, im kōm kar m̧ōttā ilo aolepān iiō in rūtto ko an. Jokālet eo an ej kōmeņeņ būruwō. Ilakkar an rūkaki in m̧ōko ium̧win elōn̄ iiō ko.” Willard erom jidik m̧weiur ke eaaar kwaļo̧k ennaan in an.

Brother Hammer eaar ilo m̧ool peptaij im juon iiō tok ālik deļo̧n̄e St. George Tampeļ eo eaiboojoj im ijo kar bōk menin letok kwojarjar eo an im kōjeram̧m̧an ko an liāp.

Iaar kajjitōk ippān Willard, “Kwar ke tōn ebbwer āinwōt an rūkaki in m̧ōko ilo jon̄an aitok in?”

Eaar uwaak, “Jaab, eaar wōr tokjen aolep kijejeto. Ke iaar kam̧ool lan̄lōn̄ eo me eaar itok n̄an membōr ro an baam̧le eo an Hammer, būruwō eaar obrak kōn kam̧oolol kōn kōjeram̧m̧an ko an ko̧jpeļ eo eaar bōktok n̄an mour ko aer im n̄an iien eo em̧m̧an eaar wōr ippa n̄an jipan̄ ilo jet jekjek. Ij juon armej em̧ōņōņō.”

Em̧m̧aan ro, enaaj ad iien em̧m̧an ilo iiō ko n̄an loļo̧k im katakin elōn̄ kajjojo ro roktak—ro me rej jāniknik barāinwōt ro me rej lukkuun wujlepļo̧k aer. Eļan̄n̄e jej mejmejkaruo ilo kūr eo ad, enaaj wōr ad iien ko rem̧m̧an n̄an kōjeram̧m̧an mour ko. Loļo̧k ko ad n̄an ro me raar kōttoļo̧k er make jān m̧akūtkūt an Kabun̄ in maron̄ kii eo me enaaj āliktata kōpeļļo̧k kōjām ko n̄an aer bar ro̧o̧l tok.

Kōn ļōmņak in ilo kōļmenļo̧kjeņ, jān pukōtļo̧k ro me jej eddo kaki im bōktok er n̄an tebōļ eo an Irooj n̄an naajdik er kōn naan eo An im n̄an lem̧ōņōņō kōn jemjerā eo an Jetōb eo An, im erom “jab bar ruwamāejet im ri itok-itak, ak kom̧ zitizen ippān ro rem̧m̧an, im kom̧ nukun Anij.”¹⁰

Eļan̄n̄e jabdewōt iaami eaar erom jabde ikkijien loļo̧k ko ami an rūkaki in m̧ōko, imaron̄ ke ba bwe kiiō ej iien eo n̄an bar ajeļo̧k eok make n̄an kakūrm̧ool jerbal ko ami an rūkaki in m̧ōko. Jokālet kiiō n̄an kōm̧m̧ane jabdewōt kijejeto emenin aikuj n̄an pukōt ro me kar lewaj eddo eo kōn er. Ewōr iien ko n̄e eļapļo̧k kōketak me emaron̄ aikuji, barāinwōt, n̄an jipan̄ eo m̧ōttam̧ an katakin ilo m̧ōko lo iien eo n̄an ilo̧k ippam̧, bōtaab eļan̄n̄e kwoj kije, kwonaaj wejepedik.

Em̧m̧aan ro, kijejeto ko ad ilo katakin ilo m̧ōko rej wōnm̧aanļo̧k wōt. Jerbal eo ejjamin naaj dedeļo̧k m̧ae iien eo ad Irooj im M̧aajta eo ej ba, “Em̧ōj.” Ewōr mour ko n̄an kōketak. Ewōr bōro ko n̄an un̄uri. Ewōr jetōb ko n̄an lo̧mo̧o̧ren. Iien eo em̧m̧an ad ekwojarjar ej n̄an kōketak, n̄an un̄ur, im n̄an lo̧mo̧o̧ren jetōb ko raorōk kar lōke kōj n̄an kea kake er. Jej aikuj kōm̧m̧ane āindein ilo tiljek im kōn bōro ko robrak kōn laudin̄din̄.

Ilo kiili ij kōjerbal juon waanjon̄ak n̄an kōmeļeļeik kain rūkaki in m̧ōko rōt eo jej aikuj in erom. Ewōr juon Rūkaki me mour eo an eaar ļapļo̧k jān aolep ro jet. Eaar katakin kōn mour im mej, kōn jerbal im jem̧ļo̧k eo. Eaar mour ejjab n̄an jerbal n̄an e ak n̄an jerbal, n̄an jab bōk ak n̄an leļo̧k, n̄an jab lo̧mo̧o̧ren mour eo An ak n̄an katok kake n̄an ro jet. Eaar kōmeļeļeik iakwe eo eļapļo̧k an aiboojoj jān lōn̄, jeram̧ōļ jān m̧weie. Kar ba kake kōn Rūkaki in me Eaar katakin kōn mālim im ejjab āinwōt rijikiraib ro.¹¹ Kien ko An raar jab jeje ioon dekā ak ilo būruwōn armej.

Ij kōnono kōn M̧aajta Rūkaki eo, em̧ool Jisōs Kraist, Nejin Anij, Rilo̧mo̧o̧r im Ripinmuur eo an aolep armej. Bwebwenato eo ilo baibōļ ej ba kōn E, “etetal im kōm̧anm̧an em̧man.”¹² Kōn E āinwōt ad unin tōl im waanjon̄ak ejjab likjab, jenaaj karbōb n̄an jipan̄ kwojarjar eo An ilo katakin ilo m̧ōko imōd. Mour ko renaaj jeram̧m̧an. Bōro ko renaaj kaenōm̧m̧an. Jetōb ko renaaj lo̧mo̧o̧r. Jenaaj erom shepherd ro rem̧ool. Bwe menin emaron̄ erom, ij jar ilo etan Jisōs Kraist, amen.