Meral Mengkar a Sib

Chelechal kesus er tial Conference Center er a Salt Lake City me a cheroid me a kmeed el basio a kldibel tirkel loba priesthood er a Dios. Ko meral “chetengakl el priesthood”—el “ngellitel el telcheroll,” el uaia lullekoi a Apostol Petrus.¹ Ng chetengakl el techall el kungedecheduch er kemiu.

Sera kurael me klou, e sel bek el summer e a telungalek er ngak a omekall el mora Provo Canyon, el kmeed el okeua me a eim el mile (72 km) er a diluches e telkib el dims er a Salt Lake City, el ki bo mkiei er tial blimam er a ked el sesei el sandei. Kemam el sechal a mle semeriar el mengereel er a omeuachel malechub aki mengedub, me a ki blechoel melekoi er a demmam me el telkib el spido lomekall. Sel taem, e a mlil a demak a mle 1928 el Oldsmobile. Alsekum e ngulmekall lengelakl er a 35 miles (56 km) er a chelsel a tal sikang, e a delak a blechoel kmo, “Bom soro! Bom soro!” E ngak a kmo, “Mspido, e Chedam! Mspido!”

A Demak a blechoel lomekall el locha 35 miles er a chelsel a tal sikang el mo lmuut er a Provo Canyon malechub e sel ki mkedang er a techukill er tial rael e mereko ng mo stob a mlai le delbechel el sib a me chengelakl. Aki ulemes a betok el sib lengelakl er kemam, el uaia lak a mengkerengel, e a bilis a oteb er tir sel lorael lengelakl. E a cheroid rullir e a ki omes er a mengkerengel a sib el ngara uos el diak tial lechet el mei er a ngerel ng di uak el klebikl er a iklel. Ng mle blechoel uaia le kora mechiuaiu, le ngika el uos a uaia ble lodengei el kmo ng merael mor me a dirrek el ika el bilis a ulengeseu.

Ka mongaisisiu er tiang el mora kilsang er a kngara Munich, Germany, er a betok el rak er a memong. Ng mle tutau er a Sandei, e a ki mlara omerollam el mora ongdibel er a remisionari. Tia er a bo kultom er a mado er tial mlil a merreder er a mission lomes e rikl, e a kmilsa mengkerengel a sib loba chelebed er a chimal, lomekrael a sib. Te oltirakl er ngii er sel le bo er ngii. A lorael mora katur, me te oltirakl el mora katur. A lorael mora kadikm, me te oltirakl er ngii el mora kadikm. Ak mlo mengaisisiu el kirel a meral mengkar a sib er ngike el kuk di mengidb a sib loeakullel aikal sib.

A Jesus a millekoi, “Ngak a ungil mengkar a sib, e medengei chermek el sib.”² Ngii a meskid a cherrungel lokesiu er a meral mengkar a sib el kmo ng kirel mekrang.

Rodam, kid loba priesthood er a Dios a klou a ngercheled el mengkar a sib. A llomes er a Rubak a mla meskid a ulekrael el sebeched el mo mengkar a telungalek me a Ikelesia, e sebeched el mesiou, sebeched lolisechakl, e sebeched louchais er tir. Tia domekedong er ngii el oldingel e olisechakl, e tiaikid a soak el mengedecheduch er ngii er kemiu er chelechal kesus.

A bisop er a bek el ward er a Ikelesia a mesterir a ngerachel a roba priesthood el mo oldingel e olisechakl el mo oldingel a rekeblirir a rechedal a ikelesia er a bek el buil. Te teru el chad el mong. A lsebechel, e a ngeasek el buik el prist malechub eng sensei er a Priesthood er a Aaron a obengkel a klou el chad loba Priesthood er a Melchizedek. Sel le bora blirir tirkel tir oungerachel er tir, e ngike loba Priesthood er a Aaron a kirel nguu a telkib er a osisechakl. Aikal ngerachel a ngosuterir tirkal ngeasek el kirel a kedmeklel a mora mission me a dirrek el klengar tir ruriul er a omesiungel a priesthood.

Tial prokuram er a oldingel e olisechakl a nger er a ocholt, el mesterir a ngerchelir tirkel mla moterekokl loba priesthood el mo olisechakl, omeketakl, orrimel, melecholb, … e oldingel a blirir a rebek el chad er a ikelesia, el mengelechel er tir el mo meluluuch e meruul a ngerchelir er a telungalek, … e blechoel omes er a Ikelesia, el melisiich er a dersta el chedal; e omes meng diak a mekngit el duubech er a chelsel a Ikelesia, diak a mekngit er a delongelel a ta me a tang, diak a blulak, omelaes, me a mekngit lomelekoi.”³

A President David O. McKay a milellach: “A oldingel e olisechakl a ta er a kot lorechudel e ngarbab el techall el mo melisiich e omekellomes, mellach e omekrael er a rengelekel a Chedam. … [Ng] chedaol omesiou, e chedaol ngerachel. Ngercheled a Roldingel e Olisechakl el nguu a … reng losisebii er a chelsel a bek lobliil me a rengrir a rechad. Sel bo de semeriar e doruul el mo er sel tkul er bab el sebeched eng mo uchul a klou el budech, deureng, me a ulserechakl el reng el mo er tirkel [chetengakl,] e blak a rengrir el [sensei] er a rengelekel a Dios.”⁴

Kede menguiu er a Babier er a Mormon el kmo a Alma a “milngedaol er a rokui el prist me a rokui el sensei; e dimlak a ta er tir el mechedaol alsekum eng dimlak el melemalt el chad.

“A leuaisei, e te ulemes er tirkal rechad e melisiich er tir lolab a melemalt el tekoi.”⁵

Sel doruul a ngercheled loldingel e olisechakl, e kede mellomes alsekum e kede suub e medengei a ringel el chedal a telungalek a ngara chelsel, me bo de meduch lolisechakl e odars a ngeso el tir ousbech.

A oldingel e olisechakl a sebechel lmuut el kmal mo ungil aslekum e kom kasbesubed ruchei. A okesiul tiang, e msall e kuuchais er a teletael dilubech er ngak er a sesei el rak er a memong. Seikid el taem e a rechedal sel Missionary Executive Committee a mle Spencer W. Kimball, Gordon B. Hinckley me a Thomas S. Monson. A tal kesus e a Brother me a Sister Hinckley a mirruul er a belsoil er a blirir el kirir a rechedal tial chelechad me a rebecherir. Aki kmal dirk mlomerek lomesoil eng melengod a chesimer. A President Hickley a milkengii a chesimer e a ta er a oldingel e olisechakl er ngii a dechor. Ngika loldingel e olisechakl a dula el kmo, “Ak medengei el dimlak kusubed er a uchei, e a kldemek a diak lobengkek, eng di a kulmelchesiu el kirek el mei er chelechal kesus. Ng dimlak kudengei el kmo te ngarngii a re okiak er kemiu.”

A President Hinckley a kmal ulenged er ngika loldingel e olisechakl e ulengit er ngii el mei tmuu e olisechakl er a retedei el Apostol me a rebecherir el kirel a ngerchelir. Meng kora mle telkib el medakt, eng di ng kmal mlo er sel sebechel. A President Hickley a ulureng a sulel el mlei, e sola ngii el chad a kmal mle mereched el merael.

Ak lmuut louchais er a ta er a diak lungil teletael el kirel oldingel e olisechakl. A President Marion G. Romney, el mle counselor er a First Presidency er a sesei el rak er a memong, a mle blechoel louchais el kirel a chad loldingel e olisechakl er ngii el mle tal bora blil a Romney er a mle temel a kelekolt. Ng di mle beldoel er a ulekungel er a chimal e kora medakt er a lolengit er ngii el mo dengchokl e louchais er a klemechel. Meng di millemolem el dechor, e dula el kmo, “E a, msall e, Brother Romney, eng kmal mekelekolt a iikr, me ak milcherei mlik meng di merael a mesil meng diak le mad. Ak di mlei me luchul e bok sbedii a bisop er ngak el kmo ak mla oldingel.”⁶

A President Ezra Taft Benson, ruriul er a louchais er tial teletael dilubech el mora President Romney er a miting lobengterir a roba priesthood, eng dilu el kmo, “Ng sebeched el muut el mo ungil, e rodam—kmal mo ungil!”⁷ Ak kongei er tiang.

A oldingel e olisechakl a lmuut el ngarbab er a di teletael moruul er ngii er a bek el buil. A ngercheled a mo olisechakl, omekellomes, melisiich, er tirkel diak el sal mesisiich el doldingel er tir, e deluut el melisiich er tir el mo nguu a diak a ulebengelel klengar el sechal me a redil ngelekel a Dios.

Me a ngeso el kirel a urered, e bo kuuchias er tial ungil suobel el sebechir a roldingel e olisechakl lousbech er ngii. Ng tekingel a Abraham Lincoln, el dilu el kmo: “Alsekum eng soam lomult er a chad el mo oltirakl er kau, e a kot e mrellii el kmal mo sechelim.”⁸ E a President Ezra Taft Benson a milngelechel el kmo: “Sel kot el ngaruchei, e bo mungil sechelei el mora rechad me a telungalek el moldingel. … A mo sechelei a lmuut el ngarbab er a di odingel er a bek el buil. A sechelei a bai melatk el kirel olngeseu er a rechad e diak lolatk a chetengakl. A sechelei a omekerreu. A sechelei [ochotii] a beltikelreng. E a sechelei orrenges,e dirrek el odars a ngeso.”⁹

A oldingel e olisechakl a nger er a betok el nglunguuch e meskid a techall el mes aikel omelodech el sebechel duubech er a klengar er a rechad.

A okesiul tiang a Dick Hammer, el mlei er a Utah lobengterir a re Civilian Conservation Corps er a taem er a Klou el Chelebuul er a Kerrul er a Merikel. Tiaikid er a le ngar tiang, eng mlo bechil a ngeasek el Uirul-klebesei el Santo el redil. Ng milchelii a Dick’s Café er a St. George, Utah, el kmal mlo merael chisel basio.

A uleldingel e olisechakl er a telungalek er a Hammer a mle Willard Milne, el sechelik. Me ngak el dirrek el mle medengelii a Dick Hammer, le ak mla mengedmokl a babilengel a kall er tial blil a blengur ngii, e sel bo kuldingel er a St. George e a kuker er a sechelik er a Brother Milne el kmo, “Ngua ngera sechelid er a Dick Hammer?”

E a nger a blechoel, “Ng kora merael mo ungil, eng di meoud.”

A Willard Milne me a kldemel sel bo loldingel er a telungalek er a Hammer er a bek el buil, e te blechoel louchais a klumech er a ebangkleio e ouchais a klaumera er tir lobengkel a telungalek er a Dick.

Ng mlo cheuekl a betok el rak, e a ta er a klebesei e a Willard a uldengua el mei er ngak louchais a ungil chais. “Brother Monson,” ng millekoi, “A Dick Hammer a mla obult e sola mo metecholb. Ng kmeed el oketiu a rekil, e kid a mla sechelei er a chelsel a klengar kid. Tial uldesuel a rirellak el mo ungil a renguk. Ak mla oldingel e olisechakl er ngii el betok el rak.” Ng kora mlo mekikngit a rengul a Willard er a louchais er tial teletael.

A Brother Hammer a mlo metecholb e a tal rak ruriul eng mlo soiseb er a Templo er a St.  George e ngmai a klengeltengat e mlo merenged el telungalek.

A kuleker er a Willard, “Ng mlo mesaul a rengum loldingel e olisechakl er ngii el kmal kemanget el taem?”

Ng millekoi, “Ng diak, ng mle klou a belkul. Sel kumes er a deureng el mla mei er a telungalek er a Hammer, e a renguk a mo mui er a omereng el saul el kirel a klengeltengat el ebangkleio a mla locha er a klengar tir me a techall el kuk mlo sebechek lolngeseu. Ngak a ungil a renguk el chad.”

Rodam, ng techelled er a ikal merael mei el rak loldingel e olisechakl er a rekakerous el chad— tirkel diak el sal mesisiich me a dirrek el tirkel kmal mesisiich. Alsekum e kede kerekikl a ngercheled, eng mo betok a techelled lomekngeltengat a klengar. A odngeled el mo er tirkel mla mocheroid er a Ikelesia a sebechel mo uchul a luut er tir el mei.

Me tiaikid luldasu el dobang, e bo dodars a ngeso el mo er tikrel doungerachel er tir e dengiteterir el mei er a ebangkleio er a Rubak e bol rengesii a Tekingel e bol ngara deureng lobengkel a Reng er Ngii e bo “lak el ngodech el chad malechub el chad er a ngodech el beluu, e bai bol teloi er a resanto, el ngara chimol kebliil er a Dios.”¹⁰

A le ngar ngii er kemiu a mla mo kora meterekakl el kirel odingel me a olisechakl, eng soak el kmu er kemiu el kmo chelcha eng taem el mluut el mo blak a rengmiu el kudmokl a ngercheliu el loldingel e olisechakl. Mtibir er chelechang el mo sumechokl aikel kirel mekedmokl el mo odars a ngeso er tirkel kau oungerachel er tir. Ngarngii a taem e a telkib lomelisiich a usbechall, ng uaisei, el ngoseuir a kldemem el mo sebechel loebengkem el mo oldingel e olisechakl, e a lsekum e kom di melemolem, e ko mo ungil.

Rodam, a blakelreng er kid er a oldingel e olisechakl a melemolem. Tial ureor a diak bol merek el dimerekmo a Rubak e Mastang a kmo, “Ngungiang.” Ngarngii a klengar el bo dolisiich. Ngarngii a rechad el bo dolngeseu er tir. Ngarngii a klengar el bo dolsobel. Ng chedaol a techellel el mo melisiich, olngeseu, e olsobel er tirkel mekreos el chad el kid oungerachel er tir. Ng kirel mo blak a rengud e mui er a deureng.

A ulebongel, e ak lmuut lousbech er a ta er a okesiu el smodii a teletael er a oldingel e olisechakl el kired el rokui el mo uai ngii. Ngarngii a chimo el Sensei el klengar ngii a ngarbab er a rokui. Ngii a ulsisechakl er a klengar me a kodall, me a ngerachel me sel kired el mo er ngii. Ng kiliei el dimlak el siungel ng bai mesiou, diak lolai ng bai oldars, diak lolsobel er a klengar Ngii ng bai odersii el kirir a rebebil. Ngii a smodii a beltikelreng el kmal klebokel er a ngibesreng, el muut el ngarbab er a mekreos el klalou. Te millekoi el kirel ngika el Sensei el kmo Ngii a ulsisechakl loba ngerachel el diak el uai tirkel chad er a llach.¹¹ A llechul a dimlak el meluches er a bad ng bai mlo llechukl er a reng.

Ak melekoi el kirel a Mastang el Sensei, el Jesus Kristo, el Ngelekel a Dios, el Osobel e Olsobel er a rokui el chad. A ngara bibilia a melekoi el Kirel kmo, Ngii a “mirrael el meruul a ungil.”¹² Me ngii el diak el ngemed el omekrael er kid e okesiu el mei er kid, eng sebeched el mo ngmai chedaol ngeso er Ngii sel doldingel e dolisechakl. A klengar a mo mukngeltengat. E a reng a mechelaod. A rechad a mo suobel. Kede meral mo ungil mengkar a sib. Me a ikang bol uaisei, a nglunguchek el ngara ngklel a ngarbab el Mengkar a Sib, el Jesus Kristo, amen.