Mwet forfor luti sucu tohpohklah pruhe pucspucs ac lwelah kuht in liye eklac ma kuh in oreklac ke moul luhn mwet uh.

Ofong ke Conference Center e Salt Lake City ac ke acn oan loesuhllah ac fototo elos suc sruok pristut luhn God toeni. Pwacye lah kom “sie pristut tol”—finne “sie fihl suleyucklac,” oacna ke Mwet Sap Peter el fahk.1 Nga kaksak in eis pacl wo in sramsram nuh suwos.

Ke nga mahtuhyak, kais sie summer sucu lasr ah ac stosah som ne Provo Canyon [fuhluh], sahp mael 45 (72 km) nuh epang ac kuhtuh srihsrihk nuh kuhtuhlacp nuh Salt Lake City, ma kuht ac muhta we ke lohm sahk cabin ke lusen week ekahsr. Kuht tuhlihk mukul uh kwacna rahrah in som ahyah infacl ah kuh som yihyih, ac kuht srihke in ahkkweye pahpah tuhmwacsr ah elan suhlahklahk kuhtuh srihsrihk. Ke pacl ingacn, stosah soko ma pahpah el wucn ah pa 1928 Oldsmobile. El fin ac kahsruhsr muhi liki mael 35 (56 km) ke ao se, ninac kiyuck el ac fahk, “Kahkahsrihk! Kahkahsrihk!” Ngwac fahk, “Longyac nuh ten gas an, Pahpah! Longyac nuh ten!”

Pahpah elac wucn mael 35 ke ao se som na ne Provo Canyon kuh ne ke na kuht ac tuhkuh sun kuhruh se ke inkacnek ah ac fuhfahsryucsr lasr uh ac tui wihn ke un sip. Kuht ac liye ke siofok sip pahsikuhtlac, a wacngihn mwet shepherd, kosro puh woi sip ah ke elos fahsr nuh met. E tok ah kuht kuh in liye mwet pwen sip se muhta fin ohsr nahtuhl—tiac orekmakihn mwe kapihr nuh ke insifacn ac inwaclihn ohsr soko ah tuhsruhk el orekmakihn na mwe kapihr nuh ke insifacn ohsr soko ah. Kais kuhtuh pacl el muhta kuhi mutul, ke srihpen ohsr soko ah etuh acn elac som nuh we ac kosro wowo ah oruh orekma ah.

In sang mwe srihkasrak ke ma nga liye e Munich, Germany, ke yac pucspucs somlah ah. Lututacng in Sacnri se, ac kuht fuhfahsryucsr nuh ke toeni luhn misinacri. Ke nga ngwetlah ke winto ke stosah okwacn misin prestuhn, nga liyacack sie mwet shepherd sruokyac sikucl soko ke pahol, kol sip ah. Sip ah ukwacl nuh ke acn na ma el som nuh we. El fin mukwi nuh lacsac, sip ah ac ukwacl nuh lacsac. El fin mukwi nuh lacyot, sip ah ac ukwacl pacna. Nga oraclah srihkasrak se inmahsrlon mwet shepherd na pwacye suc kol sip nahtuhl ac mwet pwen sip suc muhta monglac fin ohsr nahtuhl ah fahsr tukun sip ah.

Jisus El fahk, “Nga mwet shepherd wo, ac nga etuh sip nuhtihk.” 2 El use nuh sesr mwe srihkasrak suwohs lah meac mwet shepherd na pwacye se enenuh in oacna.

Mwet lili, ke sirhpen kuht sruok pristut luhn God ma kunacsr in kol sip uh. Lahlmwetmwet luhn Leum use mwe srihkasrakkihnyuck tuh kuht in kuh in mwet shepherd nuh sin sucu ke Alu uh, yen kuht kuh in kuhlwacnsap, kuht kuh in luti, ac kuht kuh in fahkwack luhlahlfongi nuh selos. Ma inge pahngpahng forfor luti sucu, ac pa inge ma se ma nga finsrak ngan sramsram nuh suwos kac ofong.

Pisap luhn kais sie ward ke Alu uh el liye pakpucki luhn mwet sruok pristut in mwet forfor luti sucu in muhtwacta ke lohm sin mempuhr ke malwem nuhkwewa. Elos ulac mwet luo som. Fin kuh, sie mukul fuhsr suc pa sie prist kuh mwet luti ke Aaronic Pristut el wi sie mwet mahtuh ma sruok Melchizedek Pristut. Ke elos som nuh ke lohm selos suc elos eis kunohkohn kac, mwet sruok Aaronic Pristut el enenuh in wi oruh ke ma lutiyuck an. Kain in ma pakpucki ingacn ac fah kahsruh in ahkoe mukul fuhsr inge nuh ke misin, ac oacyacpac nuh ke sie puhlan pacl in kuhlwacnsap ke pristut.

Prokracm in forfor luti sucu uh pa sie top nuh ke fwackyuck ke pacl inge pakiyac elos suc akmuhsralah nuh ke pristut in luti, ahkuhtweyac, kwacfe, pacptais … ac forfor muhtwacta nuh ke lohm sin kais sie mempuhr, ac kwacfe elos in pruhe in yohk ac in lukmac ac in oruh ma kunaclos nuhkwewa nuh sin sucu lalos, … in karuhnguhnwacng alu uh pacl nuhkwewa, ac in weluhlos ac ahkkweyaclos; ac liye tuh in wacngihn ma koluk ke alu uh, kuh in tiac orek kwekwe nuh sin sie sin sie, kuh kikiacp, kuh kahs kohu, kuh sramsram koluk.3

Prestuhn David O. McKay el kai fahk: “Luti sucu uh pa sie sin ma elyah emet ac wo emet ke pacl wo in ahkkweye ac mokle, in kahsruh ac kol tuhlihk nuhtin Pahpah tuhmwacsr.   … [Ma se inge] pa sie kuhlwacnsap muhtahl, sie pahng muhtahl. Ma kunacsr in ekihn Mwet Forfor Luti Sucu uh in us  … nguhn nuh ke lohm ac insiacn mwet nuhkwewa. In luhngse orekma ke luti sucu uh ac in oruh kuhiyacsr ac fah use mihslac yohk, engan, ac tarilacna nuh sin sie [mwet luti] [wolacna], ac insacnweacng luhn tuhlihk nuhtin God.” 4

Ke Puk luhn Mormon kuht riti lah Alma el akmuhsraelah prist nuhkwewa lalos ac mwet luti nuhkwewa lalos; ac wacngihn kuhtwena mwet akmuhsralah sahyacn na elos mukul suwohswohs.

Ke ma inge elos tuh liyacacng mwet lalos, ac tuh kihtaclos ke ma suc suwohswohs. 5

Ke oreyacn kunohkohn lasr in luti sucu uh, kuht lahlmwetmwet fin kuht lotwelah ac kahlwem ke ma upac luhn mempuhr ke kais sie sucu, tuh kuht in kuh in oraclah wo ke luti ac in sang kahsruh ma enwenweyuck.

Forfor luti sucu uh ac fahlac wo fin oasr pacl pakpucki ma oreklac met. In ahkkahlwemye ma se inge, lwelah nga in akacsruhi nuh suwos ke sie ma sikyak nuh sihk ke yac ekahsr somlah ah. Ke pacl se ingacn Misinacri Executive Committee tuh oreklac sel Spencer W. Kimball, Gordon B. Hinckley, ac Thomas S. Monson. Sie ekuh ah Tamuhlwel ac Tahmtahel Hinckley elos oruh sie mongo ah ke lohm selos ah nuh sin mempuhr ke committee se inge ac muhtwacn kiyaclos an. Kuht tuhfahna in mongoi arulacna wo na tongtong sruhnguhl ah. Prestuhn Hinckley el ikucslah sruhnguhl ah ac liyacack sie sin mwet forfor luti sucu lal ah tulac insac. Mwet forfor luti sucu sac fahk, “Nga tiacna pakiyac pacl in tuhkuh, ac kawuck se luhk ah tiacna wiyuc, tuhsruhk nga puhlakihn lah nga enenuh in tuhkuh ofong. Nga tiacna etuh lah oasr mwet muhtwacta yurum.”

Prestuhn Hinckley el kuhlwacng suli mwet forfor luti sucu sac in utyak ac muhta ac in luti Mwet Sap tolu ac muhtwacn kiyaclos an ke kunohkohn lasr in oacna mempuhr uh. Ke sahngweng srihsrihk, mwet luti sucu sac oruh kuhiyacl. Prestuhn Hinckley el fahk kuloh nuh sel ke tuhkuh an, tohkoh na el sa na tufoki som.

Nga fahk sie pac mwe srihkasrak ke ohiyac suhtuhuh in oraclah forfor luti luhn sucu uh. Prestuhn Marion G. Romney, suc pa tuh sie mwet kahsruh ke Prestuhnsi Se Met ke kuhtuh yac somlah ah, el tuh sruhmuhn ke mwet forfor luti sucu se lal suc ke sie pacl ah el tuh som nuh lohm sel Romney ah ke sie fong mihsrihsr ke pacl winter. El sruokyac susu lal ke pahol ac tuhfal ke suliyuck elan muhta nuh ten ac sang pweng lal an. Ke el tu na, el fahk, “We, nga fahk nuh sum, Tamuhlwel Romney, arulacna mihsrihsr lukunum ah, ac nga likiyac na stosah okuhk ah oan ngihrngihr in tiac kunlac. Nga tuhkuh na tui ngwe tuh ngan kuh in fahk nuh sel pisap lah nga oraclah forfor luti luhk uh.”6

Prestuhn Ezra Taft Benson, tukun el sruhmuhn ma sikyak lal Prestuhn Romney ke sie meeting luhn mwet sruok pristut, na el fahk, “Kuht kuh in oruh wo liki ingacn, tamuhlwel—in wo liki na!”7 Nga insese.

Luti sucu uh yohk liki na in muhtwacta yurun sie sucu pacl se na ke mahlwem se. Ma kunacsr in luti, in mokle, ac in ahkkweye, ac ke kuht muhtwacta yohrohlos suc suhkwac alu, in usaclosme in wi mukwikwi ac in engan wi wen ac acn nuhtin God.

In kahsruh insacnweacng lasr, nga akacsruhi ke kahs in kahsruh lahlmwetmwet ma fal nuh sin mwet forfor luti luhn sucu. Ma inge tuhkuh sel Abraham Lincoln, suc fahk: “Kom fin eis sie mwet elan insese ke oruh lom an, ma se met ahkkweyacl lah kom kawuck pwacye se lal.”8 Prestuhn Ezra Taft Benson el kwacfe: “Yohk liki nuhkwewa, oruh kom in kawuck na pwacye se nuh sin kais sie mwet ac sucu ma kom luti an. … Kawuck uh oruh yohk liki na forfor muhtwacta luti pacl se ke mahlwem se. Kawuck uh fosrngah yohk ke kahsruh mwet liki na in eis akihlenyuck kac. Kawuck uh nuhnkwe kom. Kawuck uh [ahkkahlwemye luhngse]. Kawuck uh lohng kom, ac kawuck uh sang kahsruh.”9

Luti sucu uh topohklah pruhe pucspucs ac lwelah tuh kuht in liye eklac ma kuh in oreklac ke moul luhn mwet uh.

Sie mwe srihkasrak ke ma se inge pa Dick Hammer, suc tuhkuh nuh Utah wi Civilian Conservation Corps ke Pacl Suhpwacr [1929–1940]. El ohsun ac pahyuckyak nuh sin sie muhtwacn fuhsr ke Mwet Luhlahlfongi ke Lwen-sahflah. El ikacslah Dick’s Café e St. George, Utah, ma eklac sie acn eye ke ohsun uh.

Pakpucki in forfor luti sucu nuh sin sucu Hammer pa Willard Milne, kawuck se luhk. Ke srihpen nga etwacl pac Dick Hammer, ke nga tuh printelah menu in mongo ke café se lal ah, nga siyuck sin kawuck se luhk ah Tamuhlwel Milne ke pacl nga muhtwacta St. George, “Fuhkah kawuck se lasr Dick Hammer ke lutlut ke wosasuc?

Inkaiyacn top kac uh pa, “El kap, tuhsruhk kahkahsrihk na.”

Ke Willard Milne ac kawuck in forfor se lal ah muhtwacta ke lohm sin sucu Hammer ke kais sie mahlwem, elos kwacna sang pweng ke wosasuc ac in akacsruhi ke kahs in luhlahlfongi lalos nuh sel Dick ac sucu an.

Yac pucspucs somlah, ac na sie lwen ah Willard el pahngonyucyak ke news wowo. “Tamuhlwel Monson,” el muhtwacwacack, “Dick Hammer el forlah ac elac pacptaislac. El matwac yac 90, ac kuht kawuck ke lusen moul in matwac mahtuh lasr kwewa. Otwelah se lal ingacn ahkfucsrfucsrye insiuck. Nga mwet forfor luti sucu se lal ke lusen yac pucspucs.” Willard el emtuhngyak ke el fahk nuh sihk pweng se inge, suc nga engan in eis.

Tamuhlwel Hammer el pacptaislac ac ke yac se tohkoh el utyak nuh ke St. George Tempuhl na kahto ac we el eis mwe sang muhtal lal ac mwe insewowo ke siliyucki uh.

Nga siyuck sel Willard, “Yac kom nuh fuhlweack ke kom mwet forfor luti luhn sucu lal ke lusen pacl na loeloes se?”

El topuk, “Moh, yohk srihpac fal nuh ke insacnweacng kac. Ke nga liye engan ma tuhkuh nuh sin mempuhr luhn sucu Hammer, insiuck sesseslah ke kuloh ke mwe insewowo ma wosasuc uh use nuh ke moul lalos ac ke pacl wo luhk in kahsruh ke kuhtuh ohiyac. Nga sie mukul engan.”

Mwet lili, pacl wo lasr ke yac ekahsr fahsruh ne inge in muhtwacta ac luti mwet pucspucs—elos suc suhkwac alu ac oacyacpac elos suc insacnweacng nohfohn. Kuht fin nuhnkuh yohk ke pahng lasr, kuht fah eis pacl wo pucspucs in ahkinsewowoye moul luhn mwet. Muhtwacta lasr nuh yohrohlos suc som loes liki Alu uh kuh in pa ma se na ma fah kahsrwelos in fohlohk nuh ke mukwikwi yohk.

Ke kom nuhnkuh nuhnak se inge, lwelah kuht in kohllah pahosr nuh selos suc kuneyucki kuht in karihngihn ac in usaclosme nuh ke tepuh luhn Leum in mongo ke kahs Lal ac in engan ke kakawuck luhn Nguhn Lal ac in “tiac sifilpac mwet sac ac mwet tahkuhsrkuhsr, a kowos mwet wiyen mwet luhn God, ac mwet in sucu luhn God.”10

Fin kuhtwena suwos eklac soaru ke forfor muhtwacta luti sucu lom an, nga kena fahk lah wacngihn pacl oacna pacl se inge in sifilpac eiskomyang in oraclah kunohkohn in luti sucu lom an. Otwelah ingena in oruh mwe insacnweacng in sramsram nuh selos suc kom kuneyucki in luti. Oasr pacl ma kihtin mwe ahkkweyeiyuck uh sahp enwenweyuck, oacyacpac, in kahsruh mwet kawuck in luti sucu uh sokwack pacl in wi kom som tuhsruhk kom fin insacweacng, kom fah kuhtanglah.

Mwet lili, insacnweacng lasr in luti sucu uh fahfahlacna. Orekma uh ac fah tiac sahflah ne ke na Leum ac Mwet Kol lasr fahk, “Tari fal.” Oasr moul in ahkwoye. Oasr mwet kuht in mokleack insiac. Oasr nguhn in moliyucklac. Oasr pacl wo muhtahl lasr in ahkwoye, ac in molwelah nguhn sacohk ma luhlahlfongiyuck kuht utuckuh kuht in karuhnguhnwacng. Kuht enenuh in oaru in oruh ac ke engan.

In kaliyac nga forlah nuh ke sie mwe srihkasrak in ahkuhtweyac kain in mwet luti sucu ma kuht enenuh in oacna. Oasr sie Mwet Luti suc moul Lal wo liki nuhkwewa sahyac. El luti ke moul ac misac, ke kunohkohn ac ke moul ke pacl fahsruh uh. El moul tiac in kuhlwacnsapweyuck tuhsruhk in kuhlwacnsap, in tiac eis tuhsruhk in sang, in tiac molwelah moul Lal tuhsruhk in kihsackuhnlah nuh sin mwet sahyac. El ahkuhtweyac ke sie luhngse ma kahto liki na kena uh, sie ohiyac suhkahsruhp ma kahsruhp liki na mwe kahsruhp sacohk. Tuh fwack ke Mwet Luti se inge lah El luti ke kuh yohk ac tiac oruh oacna mwet lutlut ah.11 Masap Lal tiac sihmlac fin yot tuhsruhk ke insiacn mwet uh.

Nga sramsram ke Mwet Luti Fuhlwact, finne Jisus Kraist, Wen nuhtin God, Mwet Lahngo ac Mwet in Molwelah luhn muhtuhnfacl nuhkwewa. Sramsram ke Bible fahk Kacl, El “tuh forfor in acn nuhkwewa ac oruh ma wo.”12 Ke El pa mwet kol kuh ac mwet in srihkasrak lasr, kuht fah fal in eis kahsruh muhtahl Lal ke luti luhn sucu lasr uh. Moul luhn mwet ac fah ahkinsewowoyeyuck. Insiacn mwet uh ac fah ahkwoyeyuck. Mwet uh ac fah moliyucklac. Kuht fah eklac mwet shepherd pwacye.Tuh in sikyak ohinge, nga pruhe ke inen Mwet Shepherd wowo sac Jisus Kraist, amen.

Mostrar las referencias

  1.  

    1. 1 Peter 2:9.

  2.  

    2. John 10:14.

  3.  

    3. Liye Doctrine and Covenants 20:42, 47, 53–54.

  4.  

    4. David O. McKay, in Priesthood Home Teaching Handbook, sifilpac oreklac (1967), ii, iii.

  5.  

    5. Liye Mosiah 23:17–18.

  6.  

    6. Marian G. Romney, sramsram ma ituckyang ke priesthood home teaching seminar, Ohkohs 9, 1963.

  7.  

    7. Ezra Taft Benson, “To the Home Teachers of the Church,” Ensign, Mei 1987, 50.

  8.  

    8. Abraham Lincoln, ke David Decamp Thompson, Abraham Lincoln, the First American (1895), 226.

  9.  

    9. Ezra Taft Benson, Ensign, Mei 1987, 50.

  10.  

    10. Ephesians 2:19.

  11.  

    11. Liye Matthew 7:28–29.

  12.  

    12. Acts 10:38.