Ewōr Un Eļap n̄an Ad Lan̄lōn̄

Ke ļeo jema-jemen ļeo ippa eaar mej, baam̧le eo am kar koba ippān doon im kar iak-iakwe ro raar itok n̄an būrom̧ōj tok ippāer. Ilo aolepān joten eo. ke iaar loļo̧k baam̧le eo im ro m̧ōttam̧, emakijkij aō kar kile ļaddik eo jibūn 10-iiō dettan, Porter, jutak turin lio jinō-jinen ļeo ippa—eo “jibūn.” Jet iien eaar jutak itulikin, mije. Ke iaar jeļā pein eaar jibwe pein. Iaar lale an pein jibwe, atbakwōje jidik, im jutak ikōjaan.

Ium̧win jet raan ko ālkin jekjek jab in, iaar jab maron̄ joļo̧k pija in jān ļōmņak eo aō. Kar im̧we eō n̄an jilkinļo̧k n̄an Porter juon leta, jiron̄ e ta eo iaar lale. Iaar email e im jiron̄ e bwe iaar lo im en̄jake. Iaar kakeememej Porter kōn bujen ko eaar kōm̧m̧ani ke eaar peptaij, kōnono jān naan ko an Alma ilo Mosaia jepta 18:

“Im kiiō, ainwōt kom̧ij kōņaan itok ilo wōrwōr an Anij, im n̄an kūr kom̧ armej ro An, im kom̧ij m̧ōņōņō n̄an ineek eddo ko an ro jet, bwe ren maron̄ mera;

“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko kom̧ maron̄ pād ie, em̧ool m̧ae mej, … bwe kom̧in maron̄ bōk mour indeeo—

“… Eļan̄n̄e en̄in ej ikdelel eo an buruōmi, ta ippāmi ņae baptais ilo etan Irooj, āinwōt juon ri kam̧ool im̧aan mejān ke em̧ōj ami kar delon̄e juon bujen Ippān, bwe kom̧ naaj jerbal n̄an E im kōjparok kien ko An, bwe E en maron̄ lukōkleplep eļapļo̧k Jetōb eo An ioomi?”¹

Iaar kōm̧eļeļeik Porter bwe Alma eaar katakin bwe ro me rej kōņaan kar peptaij raikuj in m̧ōņōņō in jerbal n̄an Irooj kōn jerbal n̄an ro jet—kōn aolepān mour eo am̧! Iaar ba: “Ijjab jeļā eļan̄n̄e kwar kile, bōtaab wāween eo kwaar kwaļo̧k iakwe im n̄ūrbōktak n̄an Būbū, eaar kōjparok bujen ko am̧. Jej kōjparok bujen ko ad aolep raan ilo ad jouj, kwaļo̧k iakwe, im kōjparok doon. Iaar kōņaan bwe kwon jeļā eutiej būruwō kōn eok kōn am̧ juon rikōjparok bujen! Ilo am̧ kōjparok bujen eo kwar kōm̧m̧ane ke kwar peptaij, kwonaaj kōppopo n̄an ekkapit n̄an priesthood eo. Bujen in enaaj lewaj n̄an eok eļapļo̧k iien ko rem̧m̧an n̄an kōjeram̧m̧an im jerbal n̄an ro jet im jipan̄ eok kōppopo n̄an bujen ko kwonaaj kōm̧m̧ani ilo tampeļ. Kom̧ool kōn am̧ juon waanjon̄ak em̧man n̄an n̄a! Kom̧ool kōn kwaļo̧k n̄an eō ta eo ej āinwōt erom juon rikōjparok bujen!”

Porter eaar uwaak tok: “Būbū, kom̧ool kōn ennaan eo. N̄e iien otemjej iaar atbakwōj Būbū, iaar jab jeļā bwe iaar kōjparok bujen ko, bōtaab iaar en̄jake okmeņeņ ilo būruwō im kar em̧m̧an aō en̄jake. Ijeļā bwe Jetōb Kwojarjar kar pād ilo būruwō.”

Iaar barāinwōt en̄jake okmeņeņ ilo būruwō ke iaar kile bwe Porter eaar meļeļe kadkad eo an kōjparok bujen ko an ippān kallim̧ur eo n̄an an Jetōb eo An pād ippād iien otemjej²—juon kallim̧ur kar kapidodoik jān bōk menin letok eo an Jetōb Kwojarjar.

Sister ro, ilo aō kar lowaj kom̧ aolepān laļ in, iaar lo bwe elōn̄ iaami rej āinwōt Porter. Kom̧ij jutak āinwōt rikam̧ool ro an Anij, jan̄ ippān ro me rej jan̄, im kaenōm̧m̧an ro rej pād ilo aikuj in aenōm̧m̧an ilo jab kile bwe kom̧ij kōjparok bujen ko—bujen ko kom̧ kar kōm̧m̧ani ilo dān ko an peptaij, im ilo tampeļ eo. N̄e kom̧ij iakwe, mije, im jerbal n̄an ro jet ilo wāween ko reddik im ļam waan, kom̧ niknik in bōk kuņami ilo jerbal in lo̧mo̧o̧r, jerbal an Anij n̄an bōk m̧aantak mour jab wabanban im mour indeeo an armej.³

Āinwōt leddik ro ilo aelōn̄ in kiin̄ eo An,⁴ Jaar kōm̧m̧ani bujen ko rekwojarjar. Jej etetal ilo ta eo Nipai eaar ņa etan “iaļ in erānin im eaidik ej tōlļo̧k n̄an mour indeeo.”⁵ Jej aolep pād ilo jikin ko roktak ioon iaļ eo. Bōtaab jemaron̄ jerbal ippān doon n̄an jipan̄ doon “bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k.”⁶

Jeanne ej jerbal āinwōt juon rikapilōk an Doulul eo an Jiron̄ ro. Jet allōn̄ remootļo̧k eaar katak kōn juon m̧akūtkūt n̄an jodikdik ro ilo ward eo: etetal lōn̄ļo̧k n̄an juon jikin kar ņa etan Malan’s Peak. Liin eaar laudin̄din̄ kōnke eaar jab to kar kōm̧m̧ane juon an kōttōpar n̄an tallōn̄ eo.

Ke liin eaar itakļo̧k ilo jino in iaļ eo, eo m̧ōttan em̧m̧an Ashley eaar jibadōkļo̧k. Jibwe pein Jeanne, liin eaar kōņaan etetal ippān, ba, “Inaaj ilo̧k ippam̧.” Ashley, eo eaar 16 iiō dettan ilo tōre eo, ewōr jet apan̄ ko ilo ānbwinin me eaar kapen n̄an e n̄an an m̧ōkaj an tallōn̄. Kōn menin liin im Jeanne raar rum̧wij aer etetal, kile kōm̧anm̧an ko an Jemedwōj Ilan̄: dekā ko jabōn toļ eo ilōn̄ier im wut ko ipeļakier. Jeanne tok ālik eaar ba, “Eaar jab to n̄an n̄a n̄an meļo̧kļo̧k kōttōpar eo aō kōn etetal eo n̄an lōn̄tata, bwe eaar m̧ōkaj an erom juon iien em̧m̧an an bar juon kain—juon iien em̧m̧an n̄an kwaļo̧k aiboojoj ko ilo iaļ eo ļo̧k, elōn̄ iaaer me in kar jab loi n̄e iaar etetal wōt n̄an tōpar kōttōpar eo an Malan Peak.”

Ke Jeanne im Ashley raar etetal wōt, kanooj ļe lik jān aolepān kumi eo, Emma eaar koba ippāaer, bar juon jiron̄ ilo ward eo, eo eaar jokālet n̄an kōttar im etetal ippāer. Emma eaar kakobabļo̧k n̄an lem̧ōņōņō eo aer. Liin eaar katakin er juon al im leļo̧k bar rie im kōketak. Jeanne eaar kememej: “Kōm kar jijet im kakkije, kōm̧ kar al, kōm̧ kar kōnono, im kōm kar ettōn̄. Iaar maron̄ jeļā kajien Ashley im Emma ilo juon wāween me iban kar maron̄ jeļā. Eaar jab kōn toļ eo bon̄ōn eo—eaar ļap, ļapļo̧k wōt. Eaar kōn jipan̄ doon ilo iaļ eo ļo̧k, juon bun̄tōn ilo juon iien.”

Ke Jeanne, Ashley, im Emma kar etetal lōn̄ļo̧k im al im kakkije im ettōn̄ ippān doon, raar jab bōlen ļōmņak, “E, jej kōjparok bujen ko ad kiiō.” Bōtaab raar kōjparok ko aer. Raar jerbal ippān n̄an doon kōn iakwe, tenkwadik, im kallim̧ur. Raar kōkajoorļo̧k tōmak eo an doon ilo aer kōketak im kwaļo̧k n̄an doon.

Elder Russell M. Nelson eaar katakin: “N̄e jej kūle bwe jej ajri in bujen eo, jejeļā wōn kōj im ta eo Anij ej kōtmene kōj kake. Kien eo An ej jeje ilo būruwōd.”⁷

Marina Kuyzena ej juon rioktak leddik nejin Anij eo ejeļā wōn e im ta eo Anij ej kōtmene e kake. Ke eaar karuwaineneik eō n̄an m̧weo im̧ōn ilo Omsk, Russia, iaar lōm̧ank iaar pād ijo n̄an jerbal n̄an e, bōtaab ejjab to iaar kile bwe iaar pād ijo n̄an katak jān e. Juon rioktak n̄an Kabun̄ in, Marina ej mour kōn tōl eo loe ilo Luk 22: “N̄e em̧ōj am̧ bar oktak, kwōn kakajoor ro jeiōm̧ im jatōm̧.”⁸ Eaar wōr an tōmak ilo naan ko an rikanaan eo ad emour, Būreejtōn Thomas S. Monson, eo eaar ba:

“Kiiō ej iien eo n̄an membōr im mijenede ro n̄an itok ippān doon, n̄an jerbal ippān doon, n̄an jerbal ilo vineyard eo an Irooj n̄an bōktok jetōb ko n̄an E. …

“… N̄e jej jerbal ilo tōmak Irooj enaaj kwaļo̧k n̄an kōj ekōjkan kōkajoorļo̧k Kabun̄ eo An ilo ward im branch ko me jej jokwe ie. Enaaj pād ippād im naaj erom juon m̧ōttad enikink ilo jerbal in mijenede ko ad.

“… Kōjerbal ami tōmak … ilo ami kanooj ļōmņak kōn wōn baam̧le eo ami, ro m̧ōttami, ro riturimi, im ro kom̧ jeļā kajier kom̧ij kōņaan kūr er n̄an m̧weo imōmi n̄an ioon mijenede ro, bwe remaron̄ ron̄jake ennaan eo an Jepļaaktok eo.”⁹

Marina ej ļoor kapilōk in kōn mije im kwaļo̧k n̄an sister ro kar kajjitōk ippān n̄an jerbal in loļo̧k an kōrā im barāinwōt im kōm̧m̧ane eļapļo̧k kakūrm̧ool ijjitōn̄ in. Liin eaar lōn̄ m̧ōttan me raar jab-niknik im ro me rejjan̄in kar ron̄ ennaan eo an ko̧jpeļ eo an Jisōs Kraist kar kōjepļaaktok. Kajjojo raan liin ej kōjerbal tōmak eo an im jar n̄an jeļā wōn ej aikuji jipan̄ eo an, innām liin ej jerbale im̧we eo ej bōke. Liin ej kōm̧m̧ani call ko ilo talboon, kwaļo̧k an iakwe, im jiron̄ ro m̧ōttan, “Jej iakwe kom̧.” Liin ej kōm̧m̧ane nokon in jotan an baam̧le eo an ilo apartment eo an aolep wiik im ej kūr ro riturin, membōr ro, im mijenede ro n̄an itok—im ej najdik er. Liin ej kūr er n̄an itok n̄an jar, mije er, im jijet ippāer n̄e rej itakļo̧k.

Marina emeļeļe kakeememej eo an Elder Jeffrey R. Holland jem̧aanļo̧k bwe “juon kūr me ej im̧we jān iakwe eo ad n̄an ro jet im n̄an Irooj Jisōs Kraist … rejjamin lo āinwōt kakkure ak ekajet.”¹⁰ Liin ej dāpij juon laajrak in armej ro me rej ba raar metak, im liin ej wōnm̧aanļo̧k wōt n̄an kwaļo̧k n̄an er. Kōnke rejeļā liin ej iakwe er, liin emaron̄ jiron̄ er, “Jab metak. Menin eudiekek!”

Marina ej juon rikaļoor rikōjparok bujen an Jisōs Kraist. Men̄e liin ejjeļo̧k an juon rikabwijer priesthood ilo m̧weo im̧ōn, liin ej en̄jake kajoor an Anij kajjojo raan ilo kakūrm̧ool bujen ko an tampeļ eo an ilo an bun̄m̧aanļo̧k ioon iaļ eo, niknik n̄an jem̧ļo̧k in im jipan̄ ro jet bōk kuņaer ilo jerbal an lo̧mo̧o̧r ilo iaļ in ļo̧k.

Ilo aō kar kwaļo̧k en̄jake kein, kwoj ke lo eok make ilo jerbal in lo̧mo̧o̧r eo? Bōk juon iien n̄an ļōmņak kōn bar juon leddik nejin Anij eo ej aikuji kōketak eo n̄an bar ro̧o̧l n̄an iaļ in bujen ak eo ej aikuj jidik jipan̄ n̄an pād ioon iaļ eo. Kajjitōk ippān Jemam̧ ilo Lan̄ kōn e. Liin ej Nejin leddik. Ejeļā e kōn etan. Ebarāinwōt jeļā kwe, im Enaaj jiron̄ eok ta eo ej aikuji. Kijenmej im wōnm̧aanļo̧k wōt ilo jar ilo etan, im jerbal ioon im̧we ko kwoj būki. Ilo am̧ jerbali en̄jake kein, Jetōb eo enaaj kapen bwe jortak eo am̧ ej em̧man n̄an Irooj.

“Sister Eliza R. Snow … eaar kam̧oolol ilo kile kijejeto ko an sister ro n̄an kōkajoorļo̧k doon. … Eaar jiron̄ er bwe men̄e Kabun̄ in eaar jab kōm̧m̧ane juon ļo̧o̧k kōn aolep menin jipan̄ raar kōm̧m̧ani n̄an jipan̄ ro rej aikuj, Irooj eaar kōjparok juon ļo̧o̧k eweppān kōn jerbal in lo̧mo̧o̧r eo aer:

“‘… Būreejtōn Joseph Smith eaar ba doulul in eaar ejaak n̄an lo̧mo̧o̧r jetōb ko. Ta eo [jej] kōm̧m̧ane “n̄an wiini tok ro me em̧ōj aer ilo̧k jōbwābwe?—n̄an kōmeņeņ bōro ko an ro me em̧ōj aer m̧ōļo ļo̧k ilo ko̧jpeļ eo?—Bar juon bok kar kōjparoke kōn ami tōmak, jouj, jerbal ko ami rem̧m̧an, im naan ko [ami]. Bar juon ļo̧o̧k kar kōjparoke. Ejjeļo̧k ejako.’”¹¹

Ilo Bok in Mormon, Ammon ej kōnono kōn un eo eļap ewōr ippād n̄an lan̄lōn̄. Ej ba: “Im kiiō, ij kajjitōk, ta jeram̧m̧an ko reļļap [Anij] eaar likūt iod? Kom̧ maron̄ ke ba?”

Ilo laudin̄din̄ eo an, Ammon eaar jab kōttar n̄an juon uwaak. Ej ba, “Lo, ij uwaak n̄an kom̧; … im men in ej jeram̧m̧an eo kar likūt iood, bwe em̧ōj kar āik kōj kein jerbal ko ilo pein Anij n̄an bōktok n̄an likio jerbal in eļap.”¹²

Jej leddik in bujen ro ilo aelōn̄ in kiin̄ eo an Irooj, im ewōr ippād iien eo em̧m̧an n̄an kein jerbal ko ilo Pein. Ilo ad bōk kuņaad ilo jerbal in lo̧mo̧o̧r kajjojo raan ilo wāween ko reddik im ļam waan—mije, kōkajoorļo̧k, im katakin doon—jenaaj maron̄ in koba ippān Ammon, eo eaar kwaļo̧k:

“Lo, aō lan̄lōn̄ eobrak, aaet, buruō elutōk majidjid kōn lan̄lōn̄, im inaaj m̧ōņōņō ilo aō Anij.

“Aaet, ijeļā bwe n̄a jekdo̧o̧n; im kōn aō kajoor im̧ōjņo̧; kōn menin ijjamin naaj kōmjāje kōn n̄a make, a inaaj kōmjāje kōn aō Anij, bwe ilo kajoor eo An imaron̄ kōm̧m̧an aolep men kein.”¹³

Jen menin ij kam̧ool ilo etan Jisōs Kraist, amen.