E I Ai se Mafuaaga Sili mo i Tatou e Olioli Ai

Ina ua maliu lou tama faaletulafono, na potopoto faatasi lo matou aiga e faafeiloai atu i isi o e na o mai e faaalia lo latou faaaloalo. I le afiafi atoa ao matou faatasi ai ma aiga ma uo, sa tele ina ou matauina le atalii a le ma tama teine e 10 tausaga, o Porter, o tu i autafa o lo’u tina faaletulafono—lona “tina matua.” O nisi taimi na te tu ai i ona tua, ma vaaia o ia. I se tasi taimi sa ou vaaia ai o uuina le lima o tina matua. Sa ou vaai atu o ia milimiliina ona lima, opo mai o ia, ma tu i ona autafa.

Ina ua mavae lena aafiaga mo le tele o aso, sa le mafai ona aveesea lena vaaiga mai lou mafaufau. Sa uunaia au e auina atu ia Porter se tamai tusi, e tau atu ia te ia le mea sa ou matauina. Sa ou imeli atu ia te ia ma tau i ai le mea sa ou vaaia ma lagonaina. Sa ou faamanatu atu ia Porter ia feagaiga sa ia osia ina ua ia papatiso, ma sii atu upu a Alema i le Mosaea mataupu e 18:

“Ma o lenei, ona ua outou mananao e o mai i le lafu a le Atua, ma ta’ua o ona tagata, ma outou loto e tauave avega a le tasi, ina ia mama;

“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma atonu tou te i ai, seia oo lava i le oti, … ina ia mafai ona outou maua le ola e faavavau—

“… Afai o le manao lea o o outou loto, se a se mea tou te tetee ai i le papatisoina i le suafa o le Alii, o se molimau i ona luma ua outou ulu atu i se feagaiga faatasi ma ia, o le a outou auauna atu ia te ia ma tausi ana poloaiga, ina ia mafai ona liligi atili tele mai e ia lona Agaga i luga o outou?”¹

Sa ou faamalamalamaina ia Porter na aoao mai Alema o i latou o e mananao e papatiso e manaomia le naunau e auauna atu i le Alii e ala i le auauna atu i isi—mo lou olaga atoa! Sa ou fai atu: “Ou te le iloa pe ua e iloaina, ae o le ala sa e faaalia ai le alofa ma le popole mo Tina matua, o le tausiga lea o au feagaiga. Tatou te tausia a tatou feagaiga i aso uma pe a tatou agalelei atu, faaalia le alofa, ma fetausiai le tasi ma le isi. Ou te fia manao ia e iloa ua ou mitamita lava ia te oe i le avea ma se e tausi feagaiga! Ma a e tausia feagaiga na e osia ina ua e papatiso, o le a e saunia e faauuina i le perisitua. O nei feagaiga faaopoopo o le a atili tuuina atu ai ia te oe ni avanoa e faamanuia ai ma auauna atu ai i isi ma fesoasoani ia te oe e saunia mo feagaiga o le a e osia i le malumalu. Faafetai tele lava mo le avea ma se faataitaiga lelei ia te au! Faafetai mo le faaalia mai ia te au o foliga o se tagata e tausi feagaiga!”

Sa toe tali mai Porter: “Tina matua, faafetai mo le savali. O taimi uma ou te fusiina ai Tinamatua, ou te leiloa o loo ou tausia a’u feagaiga, ae sa ou lagona le mafanafana i lou loto ma sa matuai lelei lava le faalogona. Ou te iloa o le Agaga Paia lea sa i lou loto.”

Sa ou lagonaina foi le mafanafana i lou loto ina ua ou iloa ua malamalama Porter i le tausiga o ana feagaiga faatasi ai ma le folafolaga ina ia “maua pea lona Agaga e faatasi ma i [tatou]”²—o se folafolaga na maua mai e ala i le mauaina o le meaalofa o le Agaga Paia.

Uso e, ao o’u asiasi atu ia te outou i le salafa o le lalolagi, na ou iloa ai o le toatele o outou e faapei lava o Porter. O loo outou tutu filemu o ni molimau a le Atua, faanoanoa faatasi ma e o faanoanoa, ma faamafanafana ia i latou o e o manaomia le faamafanafanaga e aunoa ma le iloaina o loo outou tausia a outou feagaiga—o feagaiga na outou faia i vai o le papatisoga ma le malumalu. Afai tou te alolofa atu, tausia, ma auauna atu i isi i ni auala itiiti ma faigofie, o loo e auai ma le naunautai i le galuega o le faaolataga, le galuega a le Atua “ia aumaia le tino ola pea ma le ola faavavau o le tagata.”³

I le avea ai ma ni “afafine i [le] malo [o le Alii],”⁴ ua tatou osia ni feagaiga paia. Ua tatou savavali i le mea ua ta’ua e Nifae o le “ala lauitiiti ma le vaapiapi e tau atu i le ola e faavavau.”⁵ E eseese uma nofoaga o tatou i ai i le ala. Ae e mafai ona tatou galulue faatasi e fesoasoani le tasi i le isi ia “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.”⁶

O Jeanne o loo galue o se faufautua a Tamaitai Talavou. Na ia iloa i le tele o masina ua tea e uiga i se gaoioiga o loma mo le autalavou i le uarota: savalisopo i se nofoaga e ta’ua o le Tumutumu o Malan. Sa fiafia o ia aua talu ai nei lava sa ia seti ai se sini e faia lena ā’ega.

Ina ua ia taunuu i le amataga o le alasopo, sa alu atu lana uo lelei o Ashley ia te ia. Sa la uulima ma Jeanne, ma ofo atu la te fe’a’ei faatasi ma sa ia fai atu, “Ta te o faatasi.” O Ashley, lea ua 16 ona tausaga i lena taimi, na i ai ni faaletonu faaletino na faigata ai ona vave lana a’e. Ma o lea sa la savavali lemu ai ma Jeanne, ma maimoaina ia foafoaga a le Tama Faalelagi: o papa i luga o tumutumu mauga i luga ae o i laua ma fugalaau o siomia ai laua. Na fai mai Jeanne mulimuli ane, “E lei umi se taimi ae galo ia te au lau sini o le savalisopo atu i le tumutumu, aua o lea ua avea ma se isi ituaiga malaga—o se malaga ua faaali mai ai le matagofie o mea i le aluga o le ala, semanu ou te misia nei vaega e tele pe ana faapea nao lo’u savalisopo lava ia taunuu i le Tumutumu o Malan.”

Ao faaauau pea le fe’a’eiga a Jeanne ma Ashley, ua mamao lava i tua mai le vaega atoa, sa faatasi atu i ai ma Ema, o se isi tamaitai talavou i le uarota, lea sa filifili e faatalitali latou te savavali faatasi. Sa faaopoopo atu Ema i lo la fiafia. Sa ia aoao atu ia i laua se pese ma tuuina atu se lagolago ma le faamalosiauga faaopoopo. Na manatua e Jeanne: “Sa matou saofafai i lalo ma malolo, matou pepese, matou talanoa, ma sa matou talie. Sa mafai ona ou faamasani ia Ashley ma Ema i se auala semanu e le mafai ona ou faia i se isi tulaga. Sa lei faatatau i le mauga i lena po—ae sa faatatau i se mea na sili atu. Sa faatatau i le fesoasoani o le tasi i le isi i luga o le ala, i lea laa ma lea laa.”

Ao fe’a’ei ia Jeanne, Ashley, ma Ema ma usu pese ma malolo ma talie faatasi, atonu latou te lei mafaufauina, “Ei, o loo tatou tausia a tatou feagaiga i le taimi nei.” Ae sa latou tausia a latou feagaiga. Sa auauna atu le tasi i le isi i le alofa, agaalofa, ma le tautinoga. Sa latou fefaamalosiau i le faatuatua o le tasi ma le isi ao latou uunaia, ma feauaunaai le tasi i le isi.

Na aoao mai Elder Russell M. Nelson: “Pe a tatou iloa o i tatou o fanau o le feagaiga, ua tatou iloa ai pe o ai i tatou ma mea ua faamoemoeina e le Atua mai ia i tatou. Ua tusia Lana tulafono i o tatou loto.”⁷

O Maria Kuzina o se afafine o le feagaiga a le Atua ma e na te iloa lena mea ma iloa foi le mea o faamoemoe mai le Atua ia te ia. Ina ua ia faafeiloaia au i totonu o lona fale i Omsk, Rusia, sa ou faapea sa ou i ai iina e auauna atu ia te ia, ae e lei umi ae ou iloa ai sa ou i ai iina e aoao mai ia te ia. O Maria o se tagata liliu mai i le Ekalesia, ma o loo ola i le aoaoga o loo maua i le Luka 22: “Pe a e liua mai, ona e faamalosi ai lea i ou uso.”⁸ E faatuatua o ia i upu a lo tatou perofeta soifua, o Peresitene Thomas S. Monson, lea na saunoa mai:

“O le taimi lenei mo tagata o le ekalesia ma faifeautalai e o mai faatasi ai, e galulue faatasi, e galueaiina le tovine a le Alii ma aumai agaga ia te Ia. …

“… A tatou galulue i le faatuatua o le a faaali mai e le Alii ia i tatou le ala e faamalosia ai Lana Ekalesia i uarota ma paranesi o tatou nonofo ai. O le a i ai o Ia ma i tatou ma o le a avea ma se soa mataalia ia tatou galuega faafaifeautalai.

“… Faaaoga lo outou faatuatua … ao e mafaufau ma le agaga tatalo po o ai o lou aiga, o au uo, ou tuaoi, ma e tou te masani e te fia valaauliaina i lou fale e feiloai ma faifeautalai, ina ia latou faalogo i le savali o le Toefuataiga.”⁹

E mulimuli Maria i lenei fautuaga e ala i le leoleo ma auauna atu i uso ua tofia o ia e faiaoga asiasi ai ma faia ia sili atu nai lo le na o le faiaoga asiasi. E tele ana uo e le toaaga mai pe e lei faalogo i le savali o le talalelei toefuataiina a Iesu Keriso. Na te faaaogaina lona faatuatua i aso taitasi ma tatalo ai ia iloa po o ai o manaomia lana fesoasoani, ona ia galue lea i le musumusuga na ia maua. Na te faia ni valaau i le telefoni, faaalia lona alofa, ma tau atu i ana uo, “Matou te manaomia oe.” Na te faia afiafi faaleaiga i lona fale mautotogi i vaiaso taitasi ma valaaulia ai tuaoi, tagata o le ekalesia, ma faifeautalai e o mai—ma e na te fafagaina i latou. Na te valaauliaina i latou e o mai i le lotu, faatalitali mo lo latou taunuu atu, ma saofafai faatasi ma i latou pe a taunuu.

E malamalama Maria i le faamanatu talu ai nei a Elder Jeffrey R. Holland faapea “e fanau mai se valaaulia i lo tatou alolofa mo isi ma mo le Alii o Iesu Keriso … o le a le vaaia lava o se osofaiga pe faamasinoina.”¹⁰ Na te teuina se lisi o tagata o e fai mai na faamaasiasia i latou, e faaauau pea ona ia auauna atu ia i latou. Talu ai latou te iloa e alofa o ia ia i latou, e mafai ona ia fai atu ia i latou, “Aua e te tigagofie. E valea lena mea!”

O Maria o se soo tausi feagaiga a Iesu Keriso. E ui e leai se tagata o umia le perisitua i lona aiga, ae na te lagona le mana o le Atua i aso taitasi i lona faataunuuina o ana feagaiga o le malumalu ao ia fetaomi atu i luga i le ala, tumau ai e oo i le iuga ma fesoasoani i isi e auai i le galuega o le faaolataga i le aluga o le ala.

Ao ou faasoaina atu ia te outou nei aafiaga, na outou vaai atu ia te outou i le galuega o le faaolataga? Faaalu sina taimi e mafaufau ai i se isi afafine o le Atua o loo manaomia se faamalosiauga e toe foi ai i le ala o le feagaiga pe o manaomia sina fesoasoani e tumau ai i le ala. Ole atu i le Tama oi le Lagi e uiga ia te ia. O ia o Lona afafine. Na te silafia o ia i lona igoa. Na te silafia foi oe, ma o le a Ia tau atu ia te oe mea o loo ia manaomia. Ia onosai ma faaauau pea ona faatuatua ma tatalo mo ia, ma galue i musumusuga e te mauaina. A e faatinoina nei uunaiga, o le a faamautu atu e le Agaga le taliaina e le Alii o lau taulaga.

“Sa faailoa ai ma le agaga faafetai e Sister Eliza R. Snow… taumafaiga a tamaitai e faamalosia e le tasi le isi. Sa ia tau atu ia i latou e ui lava sa lei tausia e le Ekalesia se faamaumauga o foai uma sa latou faia e fesoasoani ai ia i latou o e le tagolima, ae sa tausia lava e le Alii se faamaumauga sa’o atoatoa o a latou galuega laveai:

“‘… Sa saunoa Peresitene Iosefa Samita o lenei sosaiete sa faatulagaina e laveai ai agaga. O le a le mea ua [tatou] faia “e toe aumaia ai i latou ua se? E faamafanafana ai loto o i latou ua maluluina i le talalelei? O loo tausia se tasi tusi o lo outou faatuatua, o lo outou agalelei, o a outou galuega lelei, ma upu. O loo tausia se isi tusi. E leai lava se mea o leiloa.’”¹¹

I le Tusi a Mamona, o loo talanoa ai Amona i le mafuaaga sili e tatau ai ona tatou olioli. Fai mai o ia: “Ma o lenei, ou te fesili atu, o a faamanuiaga silisili ua… tuuina mai [e le Atua] ia te i tatou? E mafai ona outou ta’u mai?”

I lona fiafia, e lei faatali Amona mo se tali. Fai mai o ia, “Faauta, ou te tali atu mo outou; … O le faamanuiaga lenei ua faaee mai i o tatou luga, lea ua avea ai i tatou o ni mea faigaluega i aao o le Atua e faataunuu ai lenei galuega tele.”¹²

O i tatou o afafine o le feagaiga i le malo o le Alii, ma ua tatou maua le avanoa e avea ai ma ni meafaigaluega i Ona aao. A o tatou auai i le galuega o le faaolataga i aso taitasi i auala itiiti ma faigofie—tausia, faamalosia, ma aoao atu le tasi i le isi—o le a tatou auai faatasi ma Amona, o le na tautino mai:

“Ae faauta, ua atoatoa lou olioli, ioe, ua tumu lou loto i le olioli, ma o le a ou olioli i lou Atua.

“Ioe, ua ou iloa o au o se meanoa; a faatatau i lou malosi ua ou vaivai, o lea ou te le mitamita ai ia te au lava ia, ae ou te mitamita i lou Atua, ona o lona malosi e mafai ai ona ou faia o mea uma.”¹³

Ou te molimau atu ai i le suafa o Iesu Keriso, amene.