Welkam long Konfrens

Hem i gud tumas, ol brata mo sista blong mi, blong mit tugeta wan moa taem. Hem i jes 183 yia stat long taem we Jos i bin oganaes tru long Profet Josef Smit, anda long daereksen blong Lod. Long miting ia, long 6 Epril 1830, i bin gat sikis memba blong Jos i stap.

Mi hapi blong anaonsem se tu wik i pas, membasip blong Jos i kasem 15 milian. Jos i gohed blong gro gud mo i jenisim laef blong moa, mo plante moa pipol evri yia. I stap gogo raon long wol taem misinari fos blong yumi i stap lukaotem olgeta we oli stap lukaotem trutok.

I kolosap wan yia nao we mi bin anaonsem yia blong misinari seves we i go daon. Stat long taem ia, namba blong ol fultaem misinari we oli stap wok i go antap, i stat long 58 500 long Oktoba 2012 mo kasem 80 333 tedei. !Hemia i wan gudfala ansa we mifala i witnesem!

Ol tabu skripja i no gat wan ofisol toktok we i moa tru, i no gat wan responsabiliti we i mekem man i wok moa, i no gat instraksen we i tok stret moa we Lod we i laef bakegen long ded i givim taem Hem i bin kamaot long Galili long ol leven disaepol blong Hem. Hem i talem: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit.”¹ Profet Josef Smit i talem: “Afta we oli talem evri samting, diuti we i moa bigwan mo i moa impoten i blong prijim Gospel.”² Sam long yufala we i stap ia tedei bae i tingbaot yet ol toktok blong Presiden Deved O. MaKei, we i talem toktok ia “!Evri memba i wan misinari!”³

Long toktok blong olgeta, bae mi ademap hemia blong mi. Naoia i taem blong ol memba mo ol misinari oli kam tugeta, blong wok tugeta, blong wok long plantesen blong Lod blong tekem ol sol oli kam long Hem. Hem i bin rere ol tul blong yumi serem gospel long plante defren wei, mo bae Hem i helpem yumi long ol wok blong yumi sapos yumi tekem aksen wetem fet blong mekem wok blong Hem i kamtru.

Blong help blong holemtaet misinari ami blong yumi, mi bin askem ol memba blong oli givim mane, olsem we oli save mekem, long wod misinari fand blong olgeta o, long Jeneral Misinari Fand blong Jos. Yufala i bin mekem folem we i gud tumas, mo i bin help blong sapotem ol taosen misinari, we situesen blong olgeta i no letem olgeta blong sapotem olgetawan. Mi talem tangkyu from bigfala help blong yufala. Nid ia i stap gohed, blong yumi save gohed blong helpem olgeta we oli wantem go long misin, we olgetawan, oli no save pem misin blong olgeta.

Naoia, ol brata mo sista. Yumi kam long ples ia blong kasem instraksen mo insperesen. Plante mesej we oli kavremap ol defren topik blong gospel, bae i kamaot long ol nekis tu dei. Olgeta man mo woman ia we bae oli toktok, oli bin askem help blong heven long saed blong ol mesej we oli givim.

Hem i prea blong mi se bae yumi fulap long Spirit blong Lod taem yumi stap lisin mo lanem samting. Long nem blong Sevya blong yumi, Jisas Kraes, amen.