Kasamw ong Tiepene

Ia uwen mwahu, riei ohl oh lih kempoak kan, en pwurehng tuhpene. Ahpwtehn sounpar 183 sang ansou me Mwomwohdiso kokouda sang Soukohp Joseph Smith, pahn kaweid en Kauno. Ni mihting en Epreil 6, 1830, tohn Mwomwohdiso meh wenemen.

I pereniki pakairki me wihk riau samwalahro, tohn Mwomwohdiso lel meh dep lime rar. Mwomwohdiso doulahte wie kekeirda oh wekidala mour en ahpwete tohtohlahn aramas nan pahr koaros. E wie doudouwei nan sampah ni atail kehl en misineri kan kin rapahkihda irail akan me wie raparapahki mehlelo.

E saikinte lel sounpar ehu mwurin ansou me I pakairki keidien sounpar en papah ni duwen misineri. Sangete ansouo uwen tohtohn misineri me wie papah rahn koaros kalaudsangehr 58,500 nan Oaktohpe 2012 ong 80,333 rahn wet. Kitail kilangehr pasapeng kalaimwun oh kapehm!

Sohte nan pwuhk sarawi kan kalohk me doke met, sohte pwukoa katengteng, sohte kaweid inen sang poahngok me kohda sang Kaun iasadahro ni Eh ketin pwarohng tohnpadahk ehk emeno nan Kalili. E mahsanih, “Kohwei wasa koaros oh padahkihong wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime Ngehn Sarawi.”¹ Soukohp Joseph Smith pakairki, “Mwurin mehkoaros me mahsendahr, pwukoa me keieu lap oh kesempwal iei en kalohk Rongamwahu.”² Ekei kumwail wasaht rahn wet pahn tamatamante mahsen en President David O. McKay, me kihda mahseno me “Towe koaros en wia misineri!”³

Ong arail mahsen I kapatahieng pein ahi. Met iei ansou ong towe kan koaros oh misineri kan koaros en patpene, doadoahkpene, en doadoahk nan Sapwellimen Kauno mwetuwel en wahdo aramas ong Ih. E kaunopadahr ahl pwe kitail en kalohk rongamwahuo ni wiepe tohto, oh E pahn ketin seweseikitail nan atail doadoahk kan ma kitail mwekidiki pwoson ong kapwaiada Sapwellime doadoahk.

Pwehn sewese laudlahn misineri kan, I pekihier rehn neitail towe kan en kihda sent, ma irail kak, nan ward missionary fund de General Missionary Fund en Mwomwohdiso. Pasapengpen pekipek wet sewesehier kid en misineri me arail irair kan sohte mweidehng irail en utung pein irail. I kaping kalahnganki sawas en mwohni sapan. Anahnepen sawas sohte kin uhdi, eri kitail kak doula ni sewese irail akan me arail ineng en papah laud ahpw sohte, arail ahl, en wia met.

Eri, riei ohl oh lih akan, kitail kohdohng alehdi kaweid oh en kamarainda. Padahk tohto, me pid soahng ehusoahng dir, pahn kohda erein rahn riau me kohkohdo. Ohl oh lih akan me pahn patohieng kumwail rapahkihier sawas sang nanleng me dip padahk kan me irail pahn ehukihda.

Iei ahi kapakap me kitail pahn direkihda Ngehn en Kauno ni atail rong oh esehla. Ni mwaren atail Sounkomouro, Sises Krais, ahmen.