Ng Soam El mo Ungil er a Rektem?

Sera taem er a deureng er a mur er a Jerusalem, e a Osobel a milechititerir a rebetok e mlo osiik er tirkel kmal lousbech a ngesou. Ng miltik er tir er a Bethesda, el kleim el olengruul diosech el ngara bita er a sisebellel a sib el merael a chisel el betok el ngara ringel a merngii.

A Ebangkelio er a Johanes a ouchais er kid el kmo ngar bita er tia el diosech “e te mla er ngii a rebetok el mechitechut a bedengir, mikou, mechitechetong chocherir, mechitechetong er a rakt, a milengiil er a ralm sel bo longitengtik.

“Ele ng ngarngii a belsechel e a anghel a mo metengel er ngii el diosech el chodermotii: me ngike el smecher el kot el mor a chelsel ngii el diosech er uriul er a le mechederemaot, ngikei a mo ungil er a rektel” (Johanes 5:3–4).

A odngelel a Osobel a ulecholt er a kmal klebokel el sunga er a Carl Bloch el dai er ngii aKrito el Omekungil er a Smecher er a Bethesda. A Bloch a uluusunga er a Jesus el milkisii a omderngel el mlo chemolt er a “mechitecheto a bedengl el chad” ((Johanes 5:7) el mechiuaiu er a bita er a diosech, el mengiil. A tekoi el ngar tiang el mechitechetong a bedengel a mesaod er a chad el kmal dikea a klisichel e chochotii a ubechub me a krasi er a Osobel, el mlei el mo omekungil er tirkel diak el sebechir el di tir el ngosuterir.

Ngar tia el sunga, eng ka el chad a chelimetemet er a ulaol er chungel a chuu, el mesaul a bedengel e mertang a rengul el chuarm er a ringel er a bek el sils, bek el sandei, bek el buil el mla mo okedei me a eai el rak.

A Osobel er a lenguu el morbab a tkul a omderngel loba bita el chimal, e a bitang a bedul ngii e oker er a ker el kmal subechii er a rengud: “Ng soam el mo ungil er a rektem?

Ngkal chad a millekoi, “Rubak, sel le mechederemaot a ralm e ng diak a ngoikak el mor a chelsel a diosech: sel leko kmochung, e a ta er a chad a kuk ma mong” (Johanes 5:6–7).

Me tial kmal ual dikea el sebechel mechedechuul el berraod lobang, e a Jesus a milsang a dmolech el diak dolchesuar el nger:

“Bekiis, e mnguu a dukellem, e morael.

“Me ng di mle mereched el mlo ungil er a rektel, meng mekiis ngii el chad el ngma berul, e merolang” (Johanes 5:8–9).

A kuk ta er a milkedmokl el olchotel a beltikelreng, ea Lukas a uluchais el kmo a Osobel, er sera lorael el mo er a Jerusalem, a ulsiuekelterir a reteruich el chebedes. Aikal secherir a uchul, e te “dilechor er a cheroid” (Lukas 17:12). Te mle cheloit—diak el beches e diak a kmo tir.

“Jesus, Mastang, bom chebkemam,” te lilangel (Lukas 17:13)— malechub, e te milngeluch. “Ng diak a ngera el Sebechem el rulii el kiram?”

A kot el Ngarbab el Omekungil, el mui er a klechubechub, a kmal dirke medengei el kmo a klaumerang a kirel mekedmokl ruchei er a ongasireng meng dilu er tir el kmo, “Bo er a reprist me lesekemiu” (Luke 17:14).

Sera lorolang el ngara klaumerang, eng dilubech a ongasireng. Kau ng sebechem el mesa choua tia el deureng el bek el bakes e te mera el mes a bedengir el merael mo beches e mechubs er a mederir?

“Ma ta er tir, er a lesengei el kmo ng mla mo ungil, e ng liluut, e mle klou a ngerel el oldanges er a Dios,

“Ng mlo terrob er a ochil, [a Mastang] e mirreng a sulel. …

“Ma [Jesus] a dula er ngii el kmo, Bekiis, el merael: e ng kau el oumerang a uchul me ke mla mo ungil” (Lukas 17:15–16, 19).

A mle urerek el toktang e chad er a botk, e a kumekungil er a bedengel a chad. A Jesus Kristo a omekungil er a bedengel a chad, uldesuel, me a reng el lobang, se el lomekungil er kid a omuchel er a klaumerang er kid.

Kau ke dobedebekii a taem el klaumerang er kau me a deureng a mlo mui? Ke lotkii sel taem el blom nguu a sioning er kau malechub a Dios lulterkeklii er kau el kmo ke ngelekel el redil malechub a sechal e Ngii a kmal betik a rengul er kau —e ke ulemelchesiu el cherrungel? Alsekum ng dikea mlatk, eng ngarngii a rolel eng sebechem el lmuut el mo dobedebek.

A Osobel a olisechakl er kid el kmong mekerang e kede mo ungil—mo cherrungel malechub e kede moungil er a rekted.

“Mei er ngak, kemiu el rokui el chorma er a oberaod el chelungel, e ak mo meskemiu a ulengull.

“Mnguu ongelungel er ngak, e mosuub er ngak; ele ngak a medemedemek e ngariou a renguk: me kom mo metik er a ulengelliu.

“Sel ongelungel el bo kumeskemiu a beot, me sel chellungel el bo kumatk er ngii er kemiu a kebekakl” (Mateus 11:28–30).

“Mei, me moltirakl er ngak” (Lukas 18:22) a siotai er kid el mo mecherei a mechut el klengar me a soad er a beluulechad, e mo nguu a beches el klengar el “mechut a dikeang [e] a beches a mla mor ngii.” (2 Korinth 5:17), e lobengkel a beches, el klaumera er a rengud. E kid a sebeched el mo lmuut el mecherrungel.

Ng dilu el kmo ng kired el olekeed er kid er Ngii e Ngii a mo olekeed el merkid; ng kired el blak a rengud el osiik er Ngii e kede mo metik er Ngii; ng kired el olengit e kede mo ngmai; ng kired el melengod e ngii a mo obkais el kired (mesaD&C 88:63).

Me sel dolekeed el mo er Ngii, e kede mo medengei el kmo a klechad e kirel el mo meringel e a “erbitang el klautok er a rokui el tekoi” (2 Nephi 2:11) a diak el cheleuid el ngara uldasu er a olsobel. A ultok, a, usbechall el tekoi er a klechad el smisiich a reng e michii el moungil a dolilt. A ngedechel a klechad a ngosukid el mo meruul er a diak a ulebengelel el delongeled el obengkel a Dios—e luchesii a Medal meng mo llechukl er a medad e ngmai a rengud el mo er Ngii (mesa Alma 5:19).

“Moruul er ngii el kirel a omeletkiu er ngak” (Lukas 22:19) a ongtil a Osobel er sera le bechelii a do mekedong er ngii el sacrament. Tial chedaol ruoll el blauang me a ralm a omekbeches a chedaol telbiieled el de kildmokl lobengkel a Dios e meskid a klisichel a Tngakireng er a klengar er kid. Ke de mo ungil sel dechoit a blekeradel me a teletelel a klengar el ngii a melcherechel a rengud e melerd a ikled. Sel debechei a “dongu er a ultokl” (mesa Alma 23:7), e ke de meral mo dikid el “bekengerachel el melilt el [kired]” (mesa D&C 58:28), el diak de mechetakl er a blulekngel a Diablong malechub e ng diak bo dolchesuar a tekingel a beluulechad.

Me sel douchel a rengud er a kngtid e dobult el mo er a Rubak, e kede mo cherrungel, e a kngtid a mo mesuld. E kede locha mo melchedech, el ua Enos el oker er a Dios, el kmo ng mekera e mo uaisei. E a Rubak a mo nger el kmo ng mlo uaisei ele kid el oumerang er a Kristo … e kmu er kid me kede merael el bedul uchei, e le kid el oumerang me kede mla mo ungil (mesa Enos 1:7, 8).

Corrie ten Boom, el dmolech a klaumerang er ngii el Dutch el Kristiano el redil, a miltik er tiaikid el omekungil e ngii a mla er a kelebus er a concentration camp er a Ongeru el Mekemad. Ng imis el mlo chuarm, eng di dimlak el ua betik er a rengul el merrengel el Betsi, el mlad er a ta er a ikal blil a kelebus, a Corrie a silobel.

A uriul er a mekemad, eng mle blechoel el mesaod el mo er a buai a dilubech el morngii me a omekungil me a klausubes. A ta er a taem e a ta er a mle mengkar el Nazi el mle tebedechel tia el meringel el kelebus el mora Corrie er a Ravensbrück, Germany, a dilum er ngii, el uletkeu er a klemechel er a klausubes me a beltikelreng er a Kristo.

“Ng meral lungil a renguk er a ikal klemechem, e Fraulein,’ ng millekoi. ‘A kumdasu er ngii, el uai kel molekoi, Ngii a mla smuld a kngtik el mo diak!’

“A chimal a mle orreked er a chimak,” A Corrie a millatk. “E ngak, el mla olsisechakl el betok el taem … a ousbech el mo ousubes, a dimlak kudersii chimak.

“Me ng klsbengel a renguk, uldasu er omelai techei a mlengai el mo klou, ak miles a kngterir. … Rubak el Jesus, ak miluluuch, mousubes er ngak e mngesukak el mousubes er ngii.

Ak millasem el mo klikmechur, [e] meringel el mo oldars er a chimak. Ng dimlak el sebechek. Ng dimlak a ngerang el kulechesuar er ngii, kal telkib el delmedemek el reng malechub a beltikereng. Me ak limuut el mo a meluluuch er a chelsel a renguk. Jesus, ng diak el sebechek el ousubes er ngii. Beskak a klausubes er Kau.

“Sera kurkedii a chimal e a kot el ongasireng el tekoi a dilubech. Me ng mlara ongelngelek el mera bkul a chimak el mera cheruel chimak el klisiich el mla er ngak el mo er ngii, e a chelsel a renguk a dilubech a beltikelreng el mor ngkal diak kudengelii el chad el kmeed el chilsir a renguk.

“Me ak mlo metik er ngii el kmo ng diak el ngara klausubes er kid me a ka le ngara blekekouii e a omekungil el beluulechad a medengelii a morngii ng bai ultuil er a Rubak. Sel du er kid el mo oubeltikelreng er a cherreued, e Ngii a milskid, el obengkel tia el llach, a beltikelreng.”¹

A Corrie ten Boom a mlo mecherungel.

A President Thomas S. Monson a dilu el kmo, “Ng ngarngii a di imo el klengar el ngii a olengeseu er tirkel ngara uldikel malechub e te ulsiseb er a klengit el reng—el ngii a Rubak el Jesus Kristo.”²

Alsekum me komelchesiu er kau el diak beches, diak a oubeltikelreng er kau, diak mcherrungel, bo molatk el kmo “a rokui el diak el tabesul er a klengar a mo tabesul el okiu a Tngakireng er a Kristo.”³ Bo moba a klaumerang me a kllouelreng er a temel Osobel me a moktek er ngii. “Lak ko medakt, di moumerang” ” (Mark 5:36).

Bo le klou a rengum el Osobel a dirk osiik el mo omekungil a rengud. Sel le dechor er a chesimer e lolengod, e de luut el mekengii a chesimer el lomuchel el meluluuch, ouchel a rengud, ousubes, e obes. bol betik a rengud er a Dios e dosiou e de dechor er a chedaol basio el oba klengar el mla mukbeches. Ng kel mechitechut a bedengel el ngara diosech er a Bethesda, chebedes el merael er a rael er a Jerusalem, me a corrie ten Boom a mlo ungil er a rektir. “Ng soam el mo ungil er a rektem?” Bekiis, e morael. A “krasia er ngii a sebechel” (2 Korinth 12:9), e kau a mo diak morael el di kau el tang.

Ak mla merael el mo medengei el kmo a Dios a ngar. Ak medengei el kmo kid a rengelekel e Ngii a betik a rengul er kid el kmo kede techang e mo ua techang. Ak medengei el kmo nguldureklii a Ngelekel el mei er a beluulechad el mo uldars el tngakireng el mo er a rokui el chad me tirke el monguu a ebangkelio er Ngii e oltirakl er Ngii a mo ungil. “er sel ungil temel, sel ungil rengii, me sel soal (mesa D&C 88:68), lokiu a klechubechub er Ngii.Tiang ak sioning er ngii el ekor kau el ngara ngklel a Jesus Kristo, amen.