E Te Fia Malolo Ea?

I se vaitau o le tausamiga fiafia i Ierusalema, sa tuua ai e le Faaola le motu o tagata ae saili atu mo i latou o e sa sili ona manaomia le fesoasoani. Sa Ia maua i latou i Petesa, o le taelega e lima ona vaitaele e lata i le maketi o mamoe lea sa lauiloa mo le tosina atu i ai o e puapuagatia.

Ua tau mai e le Talalelei a Ioane ia i tatou e faapea o talaane o le taelega “sa taooto ai tagata e toatele o e mama’i, o e tauaso, o e pipili, ma e ma’i tino vale, o faatalitali ai le gaepu o le vai.

“Aua a oo i ona aso, ua alu ifo ai le agelu i le taelega, ma faagaepu le vai, i le o le ua muamua ifo, ina o gaepu le vai, ua malolo ai o ia i le ma’i na ma’i ai o ia” (Ioane 5:3–4).

O le asiasiga a le Faaola ua faaalia i se atavali matagofie na saunia e Carl Bloch ua faaautuina Keriso o loo Faamaloloina e Mamai i Petesa. Ua valiina e Bloch ia Iesu o ia susueina malie se faapaologa le tumau ma iloa atu ai “le na ma’i” (Ioane 5:7) o loo taoto latalata i le taelega, e faatalitali ai. O i, o le upu ma’i e faatatau i se tasi ua leai sona malosi ma faamamafaina ai le alofa mutimutivale ma le alofa tunoa a le Faaola, o lē na afio filemu ane e auauna atu ia i latou o e e le mafai ona fesoasoani ia i latou lava.

I le atavali, o loo faapupuu le taulealea i luga o le fola i le paolo, ua lelava ma lotovaivai ona ua mafatia i lona ma’i mo le 38 tausaga.

A o susue e le Faaola le pito o le ie i [Lona] aao e tasi, sa Ia faailoa atu i le isi [Ona aao] ma fetalai atu i se fesili ootia: “E te fia malolo ea?”

Na tali le taulealea, “Le Alii e, e leai lava se tagata na te tuuina ifo a’u i le taelega, pe a gaepu le vai: a alu ifo a’u e muamua ifo le tasi ia te a’u” (Ioane 5:6–7).

I le luitau e foliga mai e faigata i le taulealea, sa tuuina atu ai e Iesu se tali o’oo’o ma e le’i faamoemoeina:

“Ina tu ia i luga, ave ia lou moega, ma ia e savali.

“Ona malolo ai lea o le tagata, ua ave lona moega ma ua savali” (Ioane 5:8–9).

I se tasi vaaiga o le alofa, ua ta’u mai ai e Luka e faapea, a o maliu atu le Faaola i Ierusalema, sa feiloai ai i lepela e toa 10. Ona o lo latou gasegase, sa latou “tutu mamao mai” (Luka 17:12). Sa faatō i latou—eleelea ma le manaomia.

“Le Alii e, Iesu, ia e alofa mai ia te i matou,” sa latou tagi atu ai (Luka 17:13)—i se isi faaupuga, sa augani atu, “E leai lava se mea e mafai ona E faia mo i matou?”

O le Fomai Sili, e tumu i le agaalofa, sa silafia lava e ao ona muamua le faatuatua i le vavega, ma faapea ona fetalai atu ai ia i latou, “Ina o ia, ia faaali atu outou i faitaulaga” (Luka 17:14).

A o latou o atu i le faatuatua, sa tupu le vavega. Mata e mafai ona outou tagai faalemafaufau i le olioli lofituina i laasaga taitasi a o latou molimauina i lena lava taimi le faamamaina, faamaloloina, ma toefuatai mai o o latou tino i o latou lava luma?

“O le tasi o i latou, ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele,

“Ua faapau fao ia i vae [o le Matai], ua faafetai mai ia te Ia. …

“Ua fetalai atu [Iesu] ia te ia, Ina tulai ia, ina alu: ua e ola i lou faatuatua” (Luka 17:15–16, 19).

I la’u matata muamua o se fomai lautele ma fomai tipitipi, sa ou taulai atu i le fonofonoina ma le faasaoina o tulaga faaletino. O Iesu Keriso e faamaloloina le tino, mafaufau ma le agaga, ma e amata Lana faamalologa i le faatuatua.

E te manatua, ina ua tumu lou faatuatua ma le olioli i le taumasuasua? Manatua le taimi na e maua ai lau molimau po o le taimi na faamautu atu ai e le Atua ia te oe, o oe o Lona atalii po o le afafine ma e alofa tele o Ia ia te oe ma e lagona ai le malologa? Afai ua galo lena taimi, e mafai ona toe manatua.

Ua apoapoai mai le Faaola ia i tatou i auala ia malolo ai—ia atoatoa, pe amata ona maloloina ai:

“Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou.

“Ia outou amoina la’u amo, ma ia outou faaa’oa’o ia te a’u; aua o a’u le agamalu ma le lotomaualalo: ona maua lea e outou o le malologa mo outou agaga.

“Aua e avegofie la’u amo, o la’u avega foi e māmā ia” (Mataio 11:28–30).

“Mulimuli, mai ia te a’u” (Luka 18:22) ua valaauliaina i tatou e lafoai le olaga tuai ma tuinanau o le lalolagi ma ia avea ma tagata fou o e “ua mavae mea tuai [ae] ua faafouina mea uma” (2 Korinito 5:17), faatasi ai ma se loto faamaoni fou. Ma o le a toe faamalolo ai i tatou.

“Faalatalata mai ia te a’u ma o le a Ou faalatalata atu ai ia te outou; saili mai ia te a’u ma le filiga ma o le a outou maua ai a’u; ole mai, ma o le a outou maua ai; tu’itu’i mai, ma o le a tatala atu ai ia te outou” (MF&F 88:63).

A o tatou faalatalata atu ia te Ia, tatou te iloa ai o le olaga nei e tatau lava ona faigata ma o le i ai “o le faafeagai i mea uma” (2 Nifae 2:11) e le o se mea sese i le ata o le faaolataga. Ae o le faafeagai, o le elemene e le mavavaeeseina o le olaga faaletino ma e faamalosia ai lo tatou naunau ma faaleleia ai a tatou filifiliga. O tulaga fesuisuiai o le olaga e fesoasoani tatou te fatuina ai se mafutaga e faavavau ma le Atua—ma togitogia ai Ona foliga i o tatou mata pe a gauai atu o tatou loto ia te Ia (tagai Alema 5:19).

Ia “faia le mea nei e fai ma faamanatuga ia te a’u” (Luka 22:19) o le finagalo lea o lo tatou Faaola ina ua Ia faatulagaina le mea ua tatou ta’ua o le faamanatuga. O lenei sauniga faatasi ai ma le areto ma le vai e faafouina ai feagaiga paia ua tatou osia ma le Atua ma valaauliaina le mana o le Togiola i o tatou olaga. Ua faamaloloina i tatou e ala i le lafoai o amioga masani ma sitaili o le olaga e faapea ona faamaaaina ai loto ma ua malōlō. Pe a tatou tuu i lalo o “auupega o lo [tatou] fouvale” (Alema 23:7), ua avea i tatou o “pule ia te i [tatou lava]” (MF&F 58:28), ua le toe faatauasoina i manatu taufaasese a Satani pe faalogonoaina e le soona malomaloā o le lalolagi faaletino.

A tatou salamo ma liua i le Alii, o le a faamaloloina i tatou, ma o le a tafieseina lo tatou tausalaina. Atonu tatou te manatunatu, e pei o Enosa, “Ua faapefea ea ona faia lenei mea?” Ma na tali mai le Alii: “Ona o lou faatuatua ia Keriso. … O le mea lea, ina alu ia, ua faamamaina oe i lou faatuatua” (Enosa 1:7, 8).

O Corrie ten Boom, o se tamaitai Kerisiano tuuto mai Take, sa ia maua se faamalologa faapena e ui lava na faapagotaina i tolauapiga tetele i le taimi o le Taua Lona Lua o le Lalolagi. Sa matua puapuagatia o ia, ae e le pei o si ona uso pele o Betsie, o lē na maliu i se tasi o tolauapiga, sa faasaoina mai ai Corrie.

Ina ua mavae le taua, sa masani ona saunoa faalauaitele o ia e uiga i ona aafiaga ma e uiga i le faamalologa ma le faamagaloga. I se tasi o taimi, na alu atu ai ia te ia se tasi sa avea ma leoleo o le Nazi o le sa avea lava ma vaega na faafalepuipui ai ma le faalealofa ia Corrie i Ravensbrück, i Siamani, sa fiafia i lana savali o le faamagaloga ma le alofa o Keriso.

Sa ia faapea atu, “‘Ou te matuai faafetai lava i lau savali, Fraulein,’ Pe a mafaufau i lena mea, e pei ona e fai mai ai, ua Ia tafiesea la a’u agasala!’

“Sa tuu mai lona lima e faatalofa mai ia te a’u,” o le faamatalaga lea a Corrie. “Ae o a’u, o lē sa faafia ona ou talai atu … le manaomia o le faamagalo atu, sa tuu pea lo’u lima i lo’u autafa.

“E oo lava i mafaufauga ita ma le tauimasui sa pupuna a’e ia te a’u, sa ou vaaia ai o le agasala le tauimasui. … Le Alii e, Iesu, na ou tatalo ai, faamagalo mai a’u ma fesoasoani mai ia ou faamagalo ia te ia.

“Sa ou taumafai e ataata, [ae] sa faigata ona sii a’e lo’u lima. Sa ou le mafaia. E leai se mea na ou lagonaina, leai ma sina fasi lagona o le mafanafana po o le alofamama. Ma o lea na ou toe faia ai se tatalo le leoa. Iesu, e le mafai ona ou faamagalo ia te ia. Aumai ia te a’u Lau faamagaloga.

“A o o’u tago atu i lona lima, sa faapea ona tupu se mea mataina lava. Mai lo’u tauau e faasolo atu i lo’u ogalima ma oo atu i lo’u lima na pei o se uila na sosolo atu mai ia te a’u ia te ia, ae o totonu o lo’u loto na oso a’e ai se alofa mo lenei tagata ese lea na toetoe lava a lofituina ai a’u.

“Ma o lea na ou iloa ai, e le o toe faalagolago le faamaloloina o le lalolagi i la tatou faamagaloga po o lo tatou amiolelei, ae o loo faalagolago ia te Ia. A Ia fetalai mai ia i tatou ia alolofa i o tatou fili, Na te aumaia, faatasi ma le poloaiga, le alofa lava ia.”¹

Sa faamaloloina Corrie ten Boom.

Ua saunoa mai Peresitene Thomas S. Monson, “E i ai le soifua e tasi e lagolagoina ai i latou o e faanoanoa pe lofituina i le faavauvau ma le tiga—o le Alii o Iesu Keriso lea.”²

Afai e te lagona le le mama, lē alofaina, lē fiafia, lē agavaa po o le lē faamaloloina, ia manatua “o mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.”³ Ia faatuatua ma onosai i le taimi ma faamoemoega o le Faaola mo oe. “Aua e te matau, tau lava ina e faatuatua” (Mareko 5:36).

Ia mautinoa o loo saili pea le Faaola e faaleleia o tatou agaga ma o tatou loto. O loo Ia faatali i le faitotoa ma tu’itu’i mai. Ia tatou tali atu e ala i le toe amata ona tatalo, salamo, faamagalo, ma faagalo. Ia tatou alolofa atu i le Atua ma auauna atu i o tatou tuaoi ma tutu i nofoaga paia ma se olaga ua faamamaina. O le tamaloa ma’i i le taelega o Petesa, le lepela i le aluga o le malaga i Ierusalema, ma Corrie ten Boom sa faamaloloina. “E te fia malolo ea?” Tu ia i luga, ma ia savali. O Lona “alofa tunoa e lava lea” (2 Korinito 12:9), ma o le a e le savali lava na o oe.

Ua ou iloa o loo soifua le Atua. Ua ou iloa o i tatou uma o Lana fanau ma e alofa o Ia ia i tatou, mo le ituaiga tagata o tatou i ai ma mo le ituaiga tagata e mafai ona avea ai i tatou. Ua ou iloa na Ia auina mai Lona Alo i le lalolagi e avea ma taulaga togiola mo tagata uma, ma o i latou o e talia Lana talalelei ma mulimuli ia te Ia o le a faamaloloina ma atoatoa “i lona lava taimi, ma i lana lava ala, ma e tusa ai ma lona lava finagalo” (MF&F 88:68), e ala i Lona alofa mutimutivale. O la’u molimau lenei ia te outou i le suafa o Iesu Keriso, amene.