អ្នករាល់គ្នាមិនមែនជាអ្នកដទៃទៀតទេ
ដោយ ប៊ីស្សព ហ្គែរ៉ល កូសសែ
ទីប្រឹក្សាទីមួយក្នុងគណៈប៊ីស្សពជាអធិបតី
ក្នុងសាសនាចក្រនេះ ពុំមានជនប្លែកមុខ និងអ្នកដែលត្រូវបោះបង់ឡើយ ។ មានតែបងប្អូនប្រុសស្រីប៉ុណ្ណោះ ។
ពេលខ្លះ យើងធ្លាប់ស្ថិតក្នុងស្ថានភាពថ្មីផ្ទាល់ខ្លួន ដែលយើងមានអារម្មណ៍ចម្លែក ហើយពុំមានសុវត្ថិភាព ។ ស្ថានភាពនេះកើតឡើងចំពោះគ្រួសារខ្ញុំប្រហែលជាប្រាំឆ្នាំកន្លងទៅ បន្ទាប់ពីប្រធាន ថូម៉ាស អេស ម៉នសុន បានបន្តការហៅខ្ញុំឲ្យបម្រើជាអ្នកមានសិទ្ធិអំណាចទូទៅនៃសាសនាចក្រ ។ ការហៅនេះ ចាំបាច់ឲ្យគ្រួសារខ្ញុំផ្លាស់ទីលំនៅពីតំបន់ស្រស់ស្អាតមួយ ដែលយើងរីករាយអស់ជាងពីរទសវត្សរ៍មកហើយនោះ ។ ភរិយាខ្ញុំ និងខ្ញុំចាំពីប្រតិកម្មរបស់កូនៗ ដែលគេបានរៀនពីការផ្លាស់ប្ដូរនេះ ។ កូនប្រុសអាយុ 16 ឆ្នាំយើងបន្លឺថា « វាពុំមែនជាបញ្ហាទេ ។ ម៉ាក់ប៉ាទៅចុះ កូននៅទីនេះបានហើយ ! »
ក្រោយមកគាត់សម្រេចចិត្តមកជាមួយយើង ហើយក្រសោបស្ថានភាពថ្មីយ៉ាងស្មោះត្រង់ក្នុងជីវិតគាត់ ។ ការរស់នៅក្នុងបរិយាកាសថ្មីជាងពីរបីឆ្នាំកន្លងទៅ បានបង្វែរទៅជាការរៀន ហើយរីករាយនឹងបទពិសោធន៍សម្រាប់គ្រួសារ ជាពិសេសការរាក់ទាក់យ៉ាងកក់ក្ដៅ និងសេចក្ដីល្អនៃពួកបរិសុទ្ធថ្ងៃចុងក្រោយ ។ ពេលយើងរស់នៅប្រទេសផ្សេងៗគ្នា យើងមានអំណរគុណចំពោះសាមគ្គីភាពនៃរាស្ត្រព្រះនៅពាសពេញពិភពលោក ដែលវាជាអ្វីមួយពិត ហើយជាក់ស្ដែង ។
ការហៅបម្រើ នាំឲ្យខ្ញុំធ្វើដំណើរទៅកាន់ប្រទេសជាច្រើន និងទទួលបានឯកសិទ្ធិពិសេសឲ្យធ្វើជាអធិបតីក្នុងការប្រជុំជាច្រើនផងដែរ ។ ពេលខ្ញុំសម្លឹងមើលទៅបណ្ដាជនគ្រប់គ្នា ខ្ញុំតែងឃើញសមាជិកមកពីប្រទេស ភាសា និងវប្បធម៌ជាច្រើន ។ ទិដ្ឋភាពដ៏ស្ញប់ស្ញែងនៃដំណឹងល្អជំនាន់យើងនេះ គឺពុំមានដែនកំណត់ភូមិសាស្ត្រ ឬក្រុមជាតិសាសន៍ឡើយ ។ វាគឺជាសាកល និងទូលំទូលាយ ។ វារៀបចំសម្រាប់ការយាងត្រឡប់មកនៃព្រះរាជបុត្រារបស់ព្រះដ៏រុងរឿងដោយការប្រមូល « កូនចៅរបស់ទ្រង់ពីគ្រប់ទិសទាំងបួននៃផែនដី » ។1
ទោះជាសមាជិកភាពនៃសាសនាចក្រកំពុងកើនឡើងក្នុងកន្លែងផ្សេងៗគ្នាក្ដី នោះកេរដំណែលដ៏ពិសិដ្ឋយើង បានពុះពារនៅពីក្រោយខ្នងនៃភាពខុសគ្នារបស់យើងនេះ ។ ក្នុងនាមជាសមាជិកសាសនាចក្រ យើងត្រូវបានរាប់ជាពូជពង្សអ៊ីស្រាអែល ។ យើងក្លាយជាបងប្អូនប្រុសស្រីនឹងគ្នា ទទួលមរតកស្មើៗគ្នាចំពោះត្រកូលខាងវិញ្ញាណតែមួយ ។ ព្រះសន្យាលោកអ័ប្រាហាំថា « មនុស្សជាច្រើន ដែលទទួលដំណឹងល្អនេះ នោះនឹងត្រូវបានហៅតាមឈ្មោះ [ លោក ] ហើយនឹងត្រូវបានរាប់ថាជាពូជ [ លោក ] ហើយនឹងក្រោកឡើង ហើយទទួល [ លោក ] ជាឪពុករបស់គេ » ។ 2
អ្នកដែលក្លាយជាសមាជិកនៃសាសនាចក្រត្រូវបានសន្យាថា ៖ « ដូច្នេះ អ្នករាល់គ្នាមិនមែនជាអ្នកដទៃ ឬជាអ្នកគ្រាន់តែសំណាក់នៅទៀតទេ គឺជាជាតិតែមួយនឹងពួកបរិសុទ្ធជាពួកដំណាក់ព្រះវិញ » ។ 3
ពាក្យ អ្នកដទៃ ចេញពីពាក្យភាសាឡាតាំងថា ពុំទាក់ទង ដែលមានន័យថា « ខាងក្រៅ » ឬ « មកពីខាងក្រៅ » ។ ជាទូទៅ វាសម្គាល់នរណាម្នាក់ដែលជា « អ្នកមកពីក្រៅ » តាមហេតុផលផ្សេងៗ ទោះជាដោយសារពូជពង្ស វប្បធម៌ គំនិត ឬសាសនាក្ដី ។ ក្នុងនាមជាសិស្សនៃព្រះយេស៊ូវគ្រីស្ទ ដែលព្យាយាមរស់នៅក្នុងលោកិយនេះ ប៉ុន្តែពុំមែនជារបស់ផងលោកិយនោះ ពេលខ្លះយើងមានអារម្មណ៍ថា ជាជនប្លែកមុខ ។ យើងប្រសើរជាងមនុស្សជាច្រើន ដែលដឹងថា ទ្វាអាចនឹងបិទដល់អ្នកដែលត្រូវចាត់ទុកជាអ្នកប្លែកពីគេ ។
អស់កាលជាច្រើន រាស្ត្រព្រះត្រូវបានបញ្ជាឲ្យខ្វាយខ្វល់ដល់មនុស្សគ្រប់គ្នា ដែលជាជនប្លែកមុខ ឬដែលអាចមើលទៅជាអ្នកខុសប្លែកពីគេ ។ កាលជំនាន់បុរាណ ជនប្លែកមុខទទួលគុណប្រយោជន៍ពីករណីយកិច្ចនៃការគាំពារដូចគ្នានឹងស្ត្រីមេម៉ាយ និងក្មេងកំព្រាដែរ ។ ដូចពួកគេដែរ ជនប្លែកមុខនៅក្នុងស្ថានភាពទុក្ខព្រួយខ្លាំង ហើយជីវិតគេផ្អែកលើការគាំពារ ដែលគេទទួលបានពីប្រជាជនក្នុងស្រុក ។ រាស្ត្រអ៊ីស្រាអែល ទទួលការណែនាំច្បាស់លាស់ពីប្រធានបទនេះថា ៖ « ឯអ្នកប្រទេសក្រៅដែលមកស្នាក់នៅក្នុងពួកឯងរាល់គ្នានោះ ត្រូវទុកដូចជាកើតនៅស្រុកឯងវិញ ហើយត្រូវស្រឡាញ់គេដូចជាខ្លួនឯងដែរ ត្បិតឯងរាល់គ្នាពីដើមក៏ជាអ្នកស្នាក់នៅក្នុងស្រុកអេស៊ីព្ទដែរ » ។ 4
អំឡុងទ្រង់បម្រើលើផែនដី ព្រះយេស៊ូវ ជាគំរូដល់អ្នកដែលធ្វើលើសពីករណីកិច្ចនៃការគាំពារ និងការត្រាប្រណី ។ អ្នកដែលត្រូវគេកាត់ចេញពីសង្គម ត្រូវគេបដិសេធ និងចាត់ទុកថាពុំស្អាតស្អំ ដោយអ្នកដែលគិតថាខ្លួនសុចរិត អ្នកនោះនឹងត្រូវបានផ្ដល់មេត្តាធម៌ និងសេចក្ដីគោរព ។ គេទទួលបានចំណែកនៃការបង្រៀន និងការបម្រើទ្រង់ស្មើៗគ្នា ។
តួយ៉ាង ព្រះសង្គ្រោះប្រឆាំងនឹងទំនៀមទម្លាប់ដែលធ្វើឡើងក្នុងជំនាន់ទ្រង់ ដោយមានបន្ទូលទៅកាន់ស្ត្រីសាសន៍សាម៉ារី ដោយសុំទឹកនាងសោយ ។ ទ្រង់សោយជាមួយម្ចាស់តៀមស្រា និងអ្នកយកពន្ធ ។ ទ្រង់ពុំស្ទាក់ស្ទើរនឹងទៅជិតមនុស្សគម្លង់កាន់ ហើយប្រោសគេឡើយ ។ ទ្រង់មានបន្ទូលទៅបណ្ដាជនដោយសរសើរពីជំនឿរបស់មេទ័ពរ៉ូមម្នាក់ថា « ខ្ញុំប្រាប់អ្នករាល់គ្នាជាប្រាកដថា ខ្ញុំមិនដែលឃើញសេចក្ដីជំនឿជាខ្លាំងដល់ម្ល៉េះទេ ទោះទាំងនៅក្នុងអ៊ីស្រាអែលផង » ។ 5
ព្រះយេស៊ូវ សុំឲ្យយើងរក្សាច្បាប់នៃក្ដីស្រឡាញ់ឥតខ្ចោះ ដែលជាអំណោយដ៏ធំមហិមា និងគ្មានកំហិត ។ ទ្រង់មានបន្ទូលថា ៖
« ត្បិតបើអ្នករាល់គ្នាស្រឡាញ់តែអ្នកណាដែលស្រឡាញ់ដល់ខ្លួន នោះតើបានបំណាច់អ្វី ? តើម្ចាស់តៀមស្រា តើគេមិនប្រព្រឹត្តដូច្នោះដែរទេឬអី ?
« ហើយបើអ្នករាល់គ្នាគំនាប់តែបងប្អូនអ្នកប៉ុណ្ណោះនោះតើបានធ្វើអ្វីប្លែកពីគេ ? ឯម្ចាស់តៀមស្រា តើមិនប្រព្រឹត្តដូច្នោះដែរទេឬអី ?
« ដូច្នេះ ចូរឲ្យអ្នករាល់គ្នាបានគ្រប់លក្ខណ៍ ដូចជាព្រះវរបិតានៃអ្នក ដែលគង់នៅស្ថានសួគ៌ ទ្រង់គ្រប់លក្ខណ៍ដែរ » ។ 6
ក្នុងសាសនាចក្រនេះ ពុំមានជនប្លែកមុខ និងអ្នកដែលត្រូវបោះបង់ឡើយ ។ មានតែបងប្អូនប្រុសស្រីប៉ុណ្ណោះ ។ តម្រិះដែលយើងមានពីព្រះបិតាដ៏អស់កល្បជួយយើងស្គាល់បងប្អូនប្រុសស្រីដែលគួរមានរវាងបុរស និងស្ត្រីលើផែនដី ។
ខ្សែរឿងក្នុងប្រលោមលោក Les misérables បង្ហាញពីរបៀបដែលអ្នកកាន់បព្វជិតភាពប្រព្រឹត្តចំពោះបុគ្គលដែលជាជនប្លែកមុខ ។ ជីន វ៉លជីន ទើបត្រូវដោះលែងចេញពីមន្ទីរឃុំឃាំង ។ គាត់អស់កម្លាំង ព្រោះធ្វើដំណើរផ្លូវឆ្ងាយ ហើយស្រេកឃ្លាន ក៏បានមកដល់ក្រុងតូចមួយរកអាហារ និងទីសម្រាកពេលយប់ ។ ពេលគេដឹងថា គាត់បានមកដល់ នោះប្រជាជនបានបិទទ្វាផ្ទះខ្លួន ។ គ្មានសណ្ឋាគារ ផ្ទះសំណាក់ សូម្បីតែគុកក៏ពុំទទួលគាត់ដែរ ។ គាត់ត្រូវគេបោះបង់ ច្រានចោល និងនិរទេស ។ ទីបំផុត ដោយល្ហិតល្ហៃពេក គាត់ដួលនៅមុខទ្វាប៊ីស្សពម្នាក់ ។
សាសនាចារ្យល្អម្នាក់នោះបានដឹងពីប្រវត្តិ វ៉លជីន ហើយ តែគាត់បានអញ្ជើញជនអនាថានោះចូលក្នុងផ្ទះគាត់ដោយចិត្តបន្លឺពាក្យពេជន៍ចិត្តករុណាថា ៖
« ‹ នេះពុំមែនជាផ្ទះខ្ញុំទេ តែជាដំណាក់នៃព្រះយេស៊ូវគ្រីស្ទ ។ ទ្វាផ្ទះនេះ ពុំទាមទារឈ្មោះអ្នកចូលឡើយ តែថាជននោះមានទុក្ខព្រួយឬអត់វិញទេតើ ។ លោករងទុក្ខ លោកស្រេកឃ្លាន លោកត្រូវបានស្វាគមន៍ ។ … តើខ្ញុំត្រូវដឹងឈ្មោះលោកធ្វើអ្វីទៀត ? ពីមុនលោកបានប្រាប់ [ ឈ្មោះលោក ] ដល់ខ្ញុំ នោះខ្ញុំស្គាល់លោករួចបាត់ទៅហើយ › » ។
« [វ៉លជីន] បើកភ្នែកធំៗដោយភ្ញាក់ផ្អើល ។
« ‹ មែនឬ ? លោកឪពុកស្គាល់ខ្ញុំជានរណាហើយឬ ? ›
« ប៊ីស្សពនោះឆ្លើយថា ‹ មែនហើយ លោកជាបងប្អូនប្រុសរបស់ខ្ញុំ › » ។ 7
ក្នុងសាសនាចក្រនេះ វួដ និងកូរ៉ុមពុំជារបស់យើងទេ ។ វាជារបស់ផងព្រះយេស៊ូវគ្រីស្ទ ។ នរណាក៏ដោយ ដែលចូលក្នុងសាលប្រជុំ យើងគួរមានអារម្មណ៍ដូចនៅផ្ទះខ្លួនដែរ ។ ទំនួលខុសត្រូវដែលត្រូវស្វាគមន៍មនុស្សគ្រប់គ្នា គឺសំខាន់ ។ ពិភពលោកដែលយើងរស់នៅ កំពុងឆ្លងកាត់រយៈកាលនៃសន្ទុះយ៉ាងខ្លាំង ។ ព្រោះតែសមត្ថភាពខាងគមនាគមន៍ ល្បឿនទំនាក់ទំនង និងសាកលភាវូបនីយកម្មសេដ្ឋកិច្ចកើនឡើង នោះផែនដីក្លាយជាភូមិឋានមួយ ដែលមនុស្ស និងសញ្ជាតិជួបជុំគ្នា តភ្ជាប់ និងរស់ជាមួយគ្នា ដែលពុំធ្លាប់មានពីមុនមក ។
ការផ្លាស់ប្ដូរដ៏ធំនេះបំពេញផែនការនៃព្រះ ។ ការប្រមូលផ្ដុំពីទិសទាំងបួននៃផែនដីរបស់ទ្រង់ពុំគ្រាន់តែធ្វើឡើងដោយការបញ្ជូនអ្នកផ្សាយសាសនាទៅប្រទេសឆ្ងាយៗនោះទេ តែក៏ជាមួយការមកដល់នៃមនុស្សពីតំបន់ផ្សេង មកនៅទីក្រុង និងសង្កាត់យើងដែរ ។ មនុស្សជាច្រើនត្រូវបានដឹកនាំដោយព្រះទាំងមិនដឹងខ្លួន ទៅតំបន់ដែលគេអាចឮដំណឹងល្អ ហើយចូលមកក្នុងក្រោលទ្រង់ ។
វាសមគួរណាស់ ដែលបុគ្គលមួយទៀតប្រែចិត្តជឿដំណឹងល្អក្នុងវួដរបស់អ្នក ពុំមែនជាអ្នកចេញពីរង្វង់មិត្តភ័ក្តិ និងមនុស្សដែលស្គាល់ ។ អ្នកនឹងសម្គាល់បានដោយរូបរាង ភាសា របៀបស្លៀកពាក់ ឬពណ៌សប្បុរ ។ បុគ្គលនេះ អាចដឹងក្ដីក្នុងសាសនាផ្សេង ដោយមានប្រវត្តិ និងរបៀបរស់នៅខុសគ្នា ។
ការបង្កើតមិត្តភាព ជាទំនួលខុសត្រូវសំខាន់របស់បព្វជិតភាព ។ កូរ៉ុមបព្វជិតភាពអើរ៉ុន និងមិលគីស្សាដែក ត្រូវប្រព្រឹត្តដោយសាមគ្គីភាពនឹងបងប្អូនស្រី ក្រោមការដឹកនាំនៃប៊ីស្សព ដើម្បីធានាថា បុគ្គលម្នាក់ៗ ត្រូវបានស្វាគមន៍ដោយក្ដីស្រឡាញ់ និងសណ្តានចិត្តល្អ ។ គ្រូបង្រៀនតាមផ្ទះ និងសួរសុខទុក្ខនឹងធានាដោយប្រុងប្រយ័ត្នថា គ្មាននរណាម្នាក់ត្រូវគេភ្លេច ឬបដិសេធឡើយ ។
យើងទាំងអស់ត្រូវធ្វើការជាមួយគ្នាកសាងសាមគ្គីភាពខាងវិញ្ញាណក្នុងវួដ និងសាខា ។ គំរូមួយនៃសាមគ្គីភាពឥតខ្ចោះមានក្នុងចំណោមរាស្ត្រនៃព្រះ បន្ទាប់ពីព្រះគ្រីស្ទបានមកទ្វីបអាមេរិក ។ បញ្ជីប្រវត្តិចែងថា « គ្មានចែកទៅជាពួកលេមិន ឬ ពួកណាផ្សេងទៀតឡើយ តែគេទាំងអស់គ្នាទៅជារូបមួយ គឺជាកូនចៅនៃព្រះគ្រីស្ទ និងជាអ្នកគ្រងនគរព្រះទុកជាមរតក ។ 8
សាមគ្គីភាព ពុំសម្រេចបានដោយការបដិសេធ និងការទុកសមាជិក ដែលមើលទៅខុសពីគេ ហើយទន់ខ្សោយជាងគេឲ្យនៅតែឯង ហើយរាប់អានតែមនុស្សដែលដូចយើងនោះឡើយ ។ ផ្ទុយទៅវិញ វាត្រូវបង្កើនដោយការស្វាគមន៍ និងការបម្រើអ្នកដែលថ្មីថ្មោង ហើយមានតម្រូវការចាំបាច់ ។ សមាជិកទាំងនេះជាពរជ័យសម្រាប់សាសនាចក្រ និងផ្ដល់ឱកាសឲ្យយើងបម្រើអ្នកជិតខាងយើង ហើយសម្អាតចិត្តយើងឡើង ។
ដូច្នេះ បងប្អូនប្រុស នេះជាករណីយកិច្ចអ្នក ក្នុងការទទួលនរណាម្នាក់ ដែលមកដល់ទ្វានៃអគារសាសនាចក្រអ្នក ។ សូមស្វាគមន៍គេដោយអំណរគុណ និងកុំប្រកាន់ពូជសាសន៍ឡើយ ។ បើមនុស្សពុំស្គាល់មុខដើរចូលក្នុងការប្រជុំអ្នក សូមទទួលពួកគេយ៉ាងកក់ក្ដៅ ហើយអញ្ជើញគេអង្គុយមកជាមួយអ្នក ។ សូមផ្ដើមជួយគេឲ្យមានអារម្មណ៍ស្វាគមន៍ និងក្ដីស្រឡាញ់ ជាជាងចាំឲ្យគេមករកអ្នក ។
ក្រោយពីការស្វាគមន៍ដំបូងរបស់អ្នក សូមគិតពីរបៀបអ្នកអាចបន្តបម្រើគេ ។ ខ្ញុំធ្លាប់ឮពីវួដមួយ ដែលបន្ទាប់ពីបុណ្យជ្រមុជទឹកស្ត្រីថ្លង់ពីររូប មានស្ត្រីថ្នាក់សមាគមសង្គ្រោះពីររូបបានរៀនភាសាគដើម្បីពួកគាត់អាចទាក់ទងនឹងអ្នកប្រែចិត្តជឿថ្មីទាំងនេះបាន ។ ឱ នេះជាគំរូនៃក្ដីស្រឡាញ់ដ៏អស្ចារ្យណាស់ហ្ន៎សម្រាប់បងប្អូនប្រុសស្រីក្នុងដំណឹងល្អ !
ខ្ញុំសូមថ្លែងទីបន្ទាល់ថា គ្មាននរណាជាជនប្លែកមុខចំពោះព្រះបិតាសួគ៌ឡើយ ។ គ្មានព្រលឹងណាដែលពុំមានតម្លៃចំពោះទ្រង់ឡើយ ។ ខ្ញុំសូមថ្លែងទីបន្ទាល់ជាមួយពេត្រុសថា « ព្រះមិនរើសមុខអ្នកណាទេ « ប៉ុន្តែ គឺនៅក្នុងគ្រប់ទាំងសាសន៍ អស់អ្នកណាដែលកោតខ្លាចដល់ទ្រង់ ព្រមទាំងប្រព្រឹត្តសេចក្ដីសុចរិត នោះគាប់ដល់ព្រះហឫទ័យទ្រង់ដែរ » ។ 9
ខ្ញុំសូមអធិស្ឋានឲ្យព្រះប្រមូលកូនចៀមទ្រង់នៅថ្ងៃចុងក្រោយ នោះទ្រង់នឹងមានបន្ទូលមកយើងថា « យើងជាអ្នកដទៃ ហើយអ្នករាល់គ្នាបានទទួលយើង » ។
នោះយើងនឹងទូលទ្រង់ថា « តើយើងខ្ញុំបានឃើញទ្រង់ជាអ្នកដទៃ ហើយបានទទួលទ្រង់ពីកាលណា ? »
ទ្រង់នឹងមានបន្ទូលតបថា « យើងប្រាប់អ្នករាល់គ្នាជាប្រាកដថា ដែលអ្នករាល់គ្នាបានធ្វើការណ៍ទាំងនេះដល់អ្នកតូចបំផុតក្នុងពួកបងប្អូនយើងនេះ នោះឈ្មោះថាបានធ្វើដល់យើងដែរ » ។ 10
ក្នុងព្រះនាមព្រះយេស៊ូវគ្រីស្ទ អាម៉ែន ។