2010–2019
!Yu Save Mekem Naoia!
Oktoba 2013


!Yu Save Mekem Naoia!

Be nomo, taem yumi wantem blong girap bakegen, mo gohed long rod we i go long ol gol long saed blong spirit we God i givim long yumi, yumi save lanem wan samting long taem yumi bin foldaon, mo kam gud moa, mo hapi moa long en.

Taem mi yangfala, blong foldaon mo girap kwiktaem i olsem wan go nomo. Ova long ol yia, mi kam blong luksave se ol loa blong bodi oli jenis—mo i no helpem mi nating.

I no longtaem i pas, mi bin stap ski wetem apuboe blong mi blong 12 yia. Mitufala stap gat gud taem tumas taem mi fas long aes mo mi flae mo foldaon long wan stip smol hil.

Mi traem evri trik blong stanap be mi no save—mi bin foldaon mo mi no save girap.

Mi filim gud long bodi, be mi bin sem lelebet. So, mi mekemsua se hat blong mi mo glas blong mi i stap gud from se mi no wantem ol nara man we oli ski oli luksave mi. Mi stap ting se nogud mi sidaon ia nating mo oli flae pas gud mo singsingaot: “!Halo Brata Ukdof!”

Mi stat blong askem miwan se bae i olsem wanem blong sevem mi. Taem ia nao apuboe blong mi i kam long saed blong mi. Mi talem long hem wanem i hapen, be hem i no intres long wanem mi stap talem we i mekem se mi no save stanap. Hem i lukluk mi long ae blong mi, i tekem han blong mi, mo long wan strong voes hem i talem: “!Opa! !Yu save mekem naoia!”

Wantaem nomo, mi stanap.

Mi stap saksakem hed blong mi yet from hemia. Wanem we i no bin posibol smol taem bifo, wantaem nomo i hapen, from se wan boe blong 12 yia i kam long mi mo talem: “!Yu save mekem naoia!” Long mi, i olsem oli fulumap mi wetem tras, laef tingting, mo paoa.

Ol brata, i gat ol taem long laef blong yumi, we blong stanap bakegen, mo gohed i go fored i save bitim paoa blong yumiwan. Long dei ia long hil ia we i fulap long sno, mi bin lanem wan samting. Iven taem yumi ting se yumi no save girap—i gat hop yet i stap. Mo samtaem, long laef blong yumi, yumi jes nidim wan blong lukluk yumi long ae, tekem han blong yumi, mo talem: “!Yu save mekem naoia!”

Rong Tingting se Man I Strong

Maet yumi ting se ol woman, bitim man, oli gat filing se oli no naf mo oli stap harem nogud—se ol filing ia oli spolem olgeta moa bitim yumi. Mi no sua se hemia i tru. Ol man oli gat ol filing blong stap gilti, trabol long tingting, mo filim se oli no mekem samting. Maet yumi priten se ol filing ia oli no spolem yumi, be oli spolem yumi. Yumi save filim hevi tumas wetem ol samting we yumi no mekem mo ol sot maen blong yumi, we yumi stat blong tingting se bambae yumi no save win. Yumi iven ting se, from se yumi bin foldaon bifo finis, blong foldaon, hemia nao fiuja blong yumi. Olsem wan man blong raet i talem: “Yumi stap gohed, olsem ol bot we i ron agensem taed, we i tekem yumi gobak long ples we yumi stap long hem bifo.”1

Mi bin stap luk ol man wetem fulap paoa blong kasem mo gladhat, we oli aot long jalenj wok blong bildimap kingdom blong God from se oli bin foldaon, wan o tu taem. Ol man ia, oli bin ol man blong promes, we bae oli save kam ol gudfala prishud mo wokman blong God. Be, from se oli bin folfoldaon, mo tingting i kam slak, oli aot long prishud komitmen blong olgeta mo oli gohed long sam nara wok we oli no gud tumas.

Mo olsem ia, oli gohed, oli laef long wan smol pat long wanem oli save mekem, oli neva griap i go kasem ful paoa we i raet blong laen blong ol. Olsem poet i talem: “Olgeta ia, oli ol sol we oli no gat janis be oli ded wetem [plante miusik blong] olgeta i stap [yet] wetem olgeta.”2

I no gat wan i laekem blong no mekem samting. Mo speseli, yumi no laekem nating, taem ol narawan—speseli olgeta we yumi lavem—oli luk yumi foldaon. Yumi evriwan i wantem se oli respektem yumi mo oli luk gud long yumi. Yumi wantem stap ol jampion. Be, yumi, ol man blong wol, yumi no kam jampion sapos yumi no hadwok mo gat disiplin, o no mekem mistek.

Ol Brata. Fiuja blong yumi, oli no kaontem wetem namba blong taem we yumi folfoldaon, be wetem namba blong ol taem we yumi girap, yumi kilkilim das long yumi, mo yumi muv fored.

Harem Nogud wetem Lukluk long God

Yumi save se laef long wol ia i wan tes. Be from se Papa blong yumi long Heven i lavem yumi wetem wan stret lav, Hem i soem yumi weples blong faenem ol ansa. Hem i givim yumi wan map we i letem yumi wokbaot long graon we yumi no save, mo fesem ol tes we yumi no ting long olgeta be yumi fesem. Ol toktok blong ol profet oli pat blong map ia.

Taem yumi gowe long rod—taem yumi foldaon o aot long rod blong Papa blong yumi long Heven—ol toktok blong ol profet oli talem yumi olsem wanem blong girap mo kambak long rod.

Aot long evri prinsipol we ol profet oli tijim ova long plante handred yia, i gat wan oli tokbaot plante mo plante mo plante taem bakegen, mo hem i mesej blong hop mo lav we man i save sakem sin, i jenisim rod, mo i kambak long tru rod blong stap disaepol.

Hemia i no minim se bae yu se i oraet nomo i stap wetem ol wiknes blong yu, ol mistek o sin blong yu. Be, i gat samting i defren bitwin harem nogud from sin we i lidim man i sakem sin, mo harem nogud we i lidim man i go lus.

Aposol Pol i tijim se “Taem man i harem nogud be i luk long God, … i save mekem man i tanem tingting blong hem from ol sin …, mo hemia i rod blong God i sevem man. Be taem we man i harem nogud be i luk long wol nomo, hemia i rod blong ded.”3Harem nogud wetem God i pusum man blong jenis mo gat hop tru long Atonmen blong Jisas Kraes. Harem nogud wetem wol, i pulum daon yumi, i kilimded hop, mo i winim tingting blong yumi blong foldaon long moa temtesen.

Harem nogud wetem God i lidim man blong jenisim laef4 mo i tanem hat blong hem.5 I mekem yumi nomo laekem sin, be yumi lavem gud.6 I leftemap tingting blong yumi blong stanap mo wokbaot long laet blong lav blong Kraes. Tru fasin blong sakem sin i abaot fasin blong jenis, i no blong safa mo trabolem tingting. Yes, blong harem nogud tru, mo filim nogud tru from fasin blong no obei, i soa plante mo oli ol step we i impoten tumas long tabu rod ia blong sakem sin. Be taem sem i lidim yumi blong nomo laekem yumiwan, o i blokem yumi blong girap bakegen, hem i stap holembak, be i no pusum yumi blong sakem sin.

Ol brata. I gat moa gud wei. Bae yumi girap mo kam ol man blong God. Yumi gat wan jampion, wan Sevya, we i bin wokbaot long ples we i tudak olgeta, i ples blong ded, long bihaf blong yumi. Hem i givim Hemwan olsem praes blong sin blong yumi. I no gat wan i gat moa bigfala lav bitim Hem—Jisas Kraes, Smol Sipsip we i no gat mak, we i glad blong givim laef blong Hemwan antap long olta blong sakrifaes, mo i bin pem praes from ol sin blong yumi gogo i finisim.”7 Hem i tekem long Hemwan, safaring blong yumi. Hem i tekem ol hevi trabol blong yumi, ol sem blong yumi antap long ol solda blong Hem. Ol dia fren blong mi. Taem yumi blong disaed blong kam long Hem, taem yumi tekem long yumiwan, nem blong Hem, mo wokbaot klia long rod blong disaepol, mo afta, tru long Atonmen, yumi no kasem nomo promes blong hapines, mo pis long wol ia, be tu blong laef we i no save finis long wol we i stap kam.8

Taem yumi mekem ol mistek, taem yumi mekem sin mo foldaon, bae yumi mas tingting se i minim wanem blong sakem sin wetem tru hat. I minim blong tanem hat mo tingting blong yumi long God mo blong nomo mekem sin. Fasin blong sakem sin wetem tru hat i tekem wetem hem, stret save we i kam long heven se “yumi save mekem naoia.”

?Huia Yu?

Wan long ol teknik blong enemi blong blokem yumi blong progres i blong tantanem tingting blong yumi abaot huia stret yumi, mo wanem nao stret yumi wantem.

Yumi wantem spendem taem wetem ol pikinini blong yumi, be tu, yumi wantem go pleiplei long top entetenmen blong yumi long wol. Yumi wantem katem kilo i go daon, be tu, yumi wantem stap kakae we yumi laekem tumas. Yumi wantem blong kam olsem Kraes, be tu, yumi wantem blong talem wan rabis toktok long man ia we i draev i katem rod blong yumi.

Stamba tingting blong Setan i blong temtem yumi blong jenjenisim ol perel blong bigfala praes blong tru hapines mo valiu we i no save finis wetem wan giaman plastik pleiplei, we i wan giaman pikja mo wan kopi blong hapines mo glad.

Wan nara teknik we enemi i yusum blong daonem tingting blong yumi blong girap, i blong yumi tingting long ol komanmen olsem ol samting we oli fosem yumi blong mekem. Mi ting se i fasin blong man blong stanap agensem eni samting we i luk olsem tingting blong yumi long fas ples.

Sapos yumi luk se helti fasin blong kakae mo spot olsem wan samting we dokta nomo i wantem yumi blong mekem, bae yumi foldaon. Sapos yumi luk ol joes ia olsem huia yumi, mo huia yumi save kam, yumi gat moa janis blong stap long rod mo win long en.

Sapos yumi luk hom tijing olsem gol blong stek presiden, nao yumi no tingting hevi blong mekem. Sapos yumi tekem se i gol blong yumi—wan samting we yumi wantem mekem blong kam moa olsem Kraes mo givhan long ol narawan—bae yumi save fulfilim komitmen blong yumi, be tu, bae yumi mekem long wan wei we i blesem ol famle we yumi visitim, mo famle blong yumiwan tu.

Plante taem, yumi nao, yumi kasem help long ol fren mo famle. Be, sapos yumi lukluk raon long yumi wetem ae we i luklukgud, mo wetem hat we i blong kea, bae yumi luksave ol janis we Lod i putum long fored blong yumi blong helpem ol narawan blong girap mo muv i go from ful paoa blong olgeta. Skripja i talem se: “Wanem wok we yufala i mekem, be …mekem long gladhat blong yufala, olsem we yufala i stap wok blong Masta blong yumi, [be] i no blong ol man nomo.”9

Hem i wan bigfala spring blong paoa blong saed blong spirit blong laef wetem tru fasin mo stret mo gud fasin, mo blong kipim ae blong yumi i stap long ples we yumi wantem stap long hem long taem we i no save finis. Nating se yumi luk hemia olsem wan tabu ples blong kasem wetem ae blong fet, bae i helpem yumi blong stap long rod.

Taem tingting blong yumi i stap nomo long ol sakses o lus blong yumi evri dei, bae yumi lusum rod, yumi gowe, mo yumi foldaon. Taem yumi kipim ae blong yumi i stap long ol moa hae gol, bae i helpem yumi kam ol boe mo brata we i gud moa, ol papa we oli moa kaen, mo ol hasban we i gat moa lav.

Iven olgeta we oli putum hat blong olgeta long ol tabu gol, oli save foldaon wanwan taem, be bae oli win. Oli trastem mo stap dipen long ol promes blong God. Bae oli stanap bakegen wetem wan bigfala hop long wan God we i stret mo gud, mo visen blong wan bigfala fiuja. Oli save se oli save mekem naoia.

Yu Save Mekem Naoia

Evriwan, yangfala o olfala, i bin gat wan eksperiens blong hem, we hem i bin foldaon. Foldaon i wanem we yumi ol man blong wol i stap mekem. Be nomo, taem yumi wantem blong girap bakegen, mo gohed long rod we i go long ol gol long saed blong spirit we God i givim long yumi, yumi save lanem wan samting long taem yumi bin foldaon, mo kam gud moa, mo hapi moa long en.

Ol dia brata blong mi, ol dia fren blong mi, bae i gat ol taem we yu ting se yumi no save stanap, o gohed. Plis, trastem Sevya mo lav blong Hem. Wetem fet long Lod Jisas Kraes, mo paoa mo hop blong gospel we i kambak, oltaem bae yu save wokbaot wetem hed antap mo gogohed.

Ol brata. Mifala i lavem yufala. Mifala i prea from yufala. Mi hop nomo se yufala i save harem Presiden Monson taem hem i prea from yufala. Nomata yu wan yang papa, wan olfala prishud, o wan niu dikon we oli odenem, mifala i tingting long yufala. !Lod i tingting long yufala!

Mifala i luksave se, samtaem, rod blong yufala bae i had. Be mi givim yufala promes ia, long nem blong Lod: stanap bakegen mo folem ol futstep blong Ridima mo Sevya blong yumi, mo wan dei, bae yufala i luklukbak mo kam fulap long fasin blong tangkyu we i no save finis, se yufala i jusum blong trastem Atonmen mo paoa blong hem blong leftemap yufala mo givim paoa long yufala.

Ol dia fren mo brata blong mi. Nomata hamas taem yufala i bin glis o foldaon, !girap! !Fiuja ples blong yufala i wan blong glori! Stanap stret mo wokbaot long laef blong gospel we i kambak blong Jisas Kraes! Yufala i strong moa bitim yufala i tingting long hem. Yufala i save mekem moa samting bitim we yufala i tingting long hem. !Yufala i save mekem naoia! Long hemia, mi testifae long tabu nem blong Masta mo Ridima blong yumi, Jisas Kraes, amen.