O Sa na Rawata Ena Gauna Oqo!

Eda nanuma beka ni o ira na marama era na dau yalolailai ka sega ni rawata e dua na ka ni vakatauvatani kei ira na tagane—ka ra dau vakaleqai vakalevu cake ena yalo vakaoqo ni vakatauvatani kei keda. Au sega mada ni kila na kena dina. O ira na tagane era dau cala, nuiqawaqawa, ka ra sotava na leqa. Eda na dau vakalecalecavi keda ni sega ni rawai keda na veika vakaoqo, ia e yaco tiko. Eda dau vakaogai ena veika veivakaleqai kei na malumalumu eso ka da sa tekivu meda nanuma ni da sa sega ni rawata tale. Eda na rairai nanuma me vaka ni da sa bale tikoga vakawasoma, sa na keda icavacava na bale sobu. Me vaka a vakaraitaka e dua na dauvolaivola, “Eda na mua yani, ka coqa yani na uwa, ni veivakataotaki ni veika sa sivi.”¹

Au a raica eso na tagane era a gugumatua ka dauloloma era sa luluqa mai na cakacaka veibolei oqo ni kena tarai cake na matanitu ni Kalou baleta ni ra a sega ni rawata ena vica na gauna. Oqo o ira na tagane nuitaki era a rawa ni iliuliu ni matabete qaqa ka italai ni Kalou. Ia ena vuku ga ni ra a sikalutu ka yalolailai kina, era sa vakasuka kina mai na nodra yalodina ki na matabete ka goleva yani na sasaga tale eso ka sega ni yaga.

Sa yaco kina, mera tomana sara, e dua na bula luluqa era rawa ni mua kina, ka sega ni tucake mera gugumatua yani ni ra sa sucu ulumatua. Me vaka e mai lelevaka o daunivucu, sai ira oqo era sa mai okati kei ira na tamata vakadrukai era sa “mate ni [se tu ga ]vata kei ira e [vuqa] na ivakatagi mera meketa”²

E sega ni dua e vinakata me druka. Ka vakabibi noda sega ni vinakata mera raica eso—o ira eda lomana—na noda vakadrukai. Eda gadreva taucoko meda dokai ka qoroi. Eda gadreva meda tamata qaqa. Ia eda na sega ni qaqa rawa na tamata kevaka eda sega ni cakacakataka ka bula vakaivakarau se kakua ni caka cala.

Kemuni na taciqu, e sega ni keda icavacava na levu ni gauna eda lutu kina ia na levu ga ni gauna meda tucake kina, taviraka laivi na noda duka, ka kalawa yani ki liu.

Eda sa kila tu ni bula oqo sa gauna ni vakatovolei. Me vaka ga ni lomani keda tiko na Tamada Vakalomalagi ena dua na loloma sa uasivi sara, ena vakaraitaka o Koya na kena isau. Sa solia oti tu vei keda na mape meda na rawa ni muataki keda yani ki na veivanua tawa-kilai kei na veivakatovolei sega ni namaki eda dau sotava yadudua. Na nodra vosa na parofita sa tiki tiko ni mape oqo.

Ni da sa lakosese—ni da lutu se lakotani mai na salatu nei Tamada Vakalomalagi—era na kaya vei keda na nodra vosa na parofita na sala meda tucake rawa kina ka mua tale ki na ilakolako donu.

Mai na ivakavuvuli taucoko era vakavulica na parofita ena veisenitiuri sa oti, e dua na kena sa dau vakamatatataki tiko vakawasoma ena veigauna o ya na itukutuku nuitaki ka veivakauqeti ni sa rawa ki na kawa tamata me veivutuni, veisautaka na nona ilakolako, ka lesu tale ki na salatu donu ni bula vakatisaipeli.

E sega ni kena ibalebale oqo meda sa vakaweleweletaka sara na noda malumalumu, caka cala, se ivalavala ca. Ia e tiko e dua na duidui bibi me baleta na rarawataka na ivalavala ca e veimuataki ki na veivutuni kei na rarawa e veimuataki ki na nuiqawaqawa.

E vakavulica o Paula na iApositolo ni “rarawa sa vaka na loma ni Kalou sa vakayacora na veivutuni ki na bula … ia na rarawa vakavuravura sa vakayacora na mate.”³ Na rarawa sa vaka na loma ni Kalou e vakauqeta na veisau kei na inuinui ena kaukauwa ni Veisorovaki i Jisu Karisito. Na rarawa vakavuravura ena dreti keda sobu, bokoca na inuinui, ka vakauqeti keda meda soli keda yani meda temaki tikoga.

Na rarawa sa vaka na loma ni Kalou e veimuataki ki na saumaki mai⁴ kei na veisau ni yalo.⁵ E vakavurea meda cata sara na ivalavala ca ka taleitaka na valavala dodonu.⁶ E vakauqeti keda meda tucake ka lako voli ena rarama ni loloma i Karisito. Na veivutuni dina sai koya na veisau, e sega ni rarawa vakayago se rarawa ni vakasama. Sa dina sara, na veivutuni ena lolosi ni yalo kei na rarawataka dina na talaidredre sa dau mosi sara ga ka ra sa ikalawa bibi ki na cakacaka tabu ni veivutuni. Ia ena gauna e veimuataki kina na noda kila ni da sa cala meda lomani keda ga kina se tarovi keda meda kakua ni tucake tale, ena yaco me veivakataotaki ka sega ni vakayaloqaqataka meda veivutuni kina.

Kemuni na taciqu, e tiko e dua na sala e vinaka cake. Meda sa tucake tale ka yaco meda sa tamata ni Kalou. Sa tiko e dua na noda qaqa, o ya na noda iVakabula, a lako curuma na buca ni iyaloyalo ni mate ena vukuda. A soli Koya me isau ni noda ivalavala ca. E sega ni dua tale e cecere cake na nona loloma me vaka na kena oqo—mai vei Jisu Karisito, na Lami sa sega ni ca, sa lomana ga me soli Koya yani ena icabocabo ni isoro ka sauma na ivoli ni noda ivalavala ca ka “sauma kece mada na ilavo.”⁷ Sa vakataqara Vua na noda rarawa. Sa vakataqara Vua na noda lomaocaoca, kei na noda ivalavala ca ki Tabana. Kemuni na itokani lomani, ni da sa digitaka meda sa lako Vua ka da sa taura na Yacana, ka lako ena salatu ni bula vakatisaipeli, ia ena kaukauwa ni Veisorovaki sa sega ni yalataki walega vei keda na bula marau kei na “kune vakacegu ena bula oqo” ia sa vaka talega kina na “bula tawamudu sa bera mai.”⁸

Ni da sa caka cala, ni da sa ivalavala ca ka lutu, meda vakasamataka sara na ibalebale ni veivutuni dina. Sa kena ibalebale me vagolei na yalo kei na lomada vua na Kalou ka biuta vakadua na ivalavala ca. Na veivutuni dina mai loma e kauta vata mai na veivakadeitaki vakayalo ni da sa na “rawata ena gauna oqo.”

E dua na iwalewale nei vu-ni-ca me tarovi keda meda toro cake o ya me vakaseva na noda vakasama meda sega ni kilai keda kei na veika eda sa gadreva vakaidina.

Eda gadreva me tiko na noda gauna vata kei ira na luveda, ia eda gadreva talega meda vakaitavi ena veika eda dau taleitaka meda cakava. Eda gadreva meda vakalutu yago, ia eda gadreva talega meda marautaka na kakana eda dau taleitaka dina. Eda gadreva meda bula vaKarisito, ia eda gadreva talega meda cudruvi koya e takosova vakasauri na noda motoka e gaunisala.

Sa inaki nei Setani me temaki keda meda vakaisosomitaka na mataniciva talei ni bula marau kei na veika mareqeti sa yalataki tu kei na dua na kava palasitika ka lasutaki ni na kauta mai na bula marau kei na reki.

E dua tale na iwalewale nei vu-ni-ca e dau vakayagataka me vakayalolailaitaki keda meda kakua ni tucake tale o ya meda raica na vunau ni sa vakasaurarataki tiko vei keda. Au vakabauta ni sa ivakarau ni tamata me drotani mai na veika eso eda a sega ni vakasamataka taumada oi keda.

Kevaka eda raica ni da kania na veika bulabula kei na vakaukauwa yago me sa dua na ka e namaka vei keda o noda vuniwai, eda na rawa ni vakaleqai. Kevaka meda raica ni sa keda ituvaki dina o ya ka da sa gadreva ga vakai keda, sa na levu cake na madigi meda tikoga ena ituvatuva oqo ka rawata sara.

Kevaka meda raica na veituberi ena vuvale me sa nona inakinaki ga o peresitedi ni iteki, eda na rawa ni vakawalena na yaga ni kena vakayacori. Kevaka meda raica ni sa noda inakinaki ga—meda sa gadreva sara meda vakayacora, eda sa na rawa ni bula Vakarisito kina ka qaravi ira kina na tamata—eda na sega walega ni vakayacora na noda cakacaka ia eda na vakayacora talega ena sala ena vakalougatataki kina na matavuvale eda sikova vakakina na noda matavuvale.

Dau vakawasoma, na noda vukei cake mai vei ira na noda itokani se matavuvale. Ia, kevaka meda tu ka vakararai ka gadreva na yaloda meda veivuke, eda na raica na madigi ni veivukei ena vakarautaka na Turaga e matada mera vukei kina o ira mera tucake ka karoni yani kina kedra icavacava dina. E kaya na ivolanikalou, “Ia, na ka kecega dou sa cakava, kitaka mai na vu ni yalomudou me vaka vua na Turaga, me kakua ni vaka vei ira walega na tamata”⁹

Sa dua na ivurevure cecere ni kaukauwa vakayalo meda bulataka na bula sa dodonu ka savasava ka rai matua tiko ki na vanua eda gadreva ena veigauna tawamudu. E dina ga ni da rawa ni raica na itinitini ni ilakolako vakalou oqo ena matada walega sa vakabauta, ena vukei keda meda lako tikoga ena kena salatu.

Ni da sa rai matua tiko ki na noda rawa-ka se druka ena veisiga, ena rawa me da lakosese kina, veilecayaki, ka lutu sara. Nida raica matua tiko na inakinaki cecere ena vukei keda meda luve ni tagane ka tuakana, tama dauloloma cake, ka tagane vakawati yalololoma vinaka cake.

O ira mada ga era tuvanaka na yalodra ki na inakinaki tawamudu vakalou era rawa ni lutu ena so na gauna, ia era na sega ni vakadrukai. Era na vakararavi ka vakanuinui kina yalayala ni Turaga. Era na tucake tale baleta ni tiko na nodra inuinui rarama ki na dua na Kalou sa savasava sara kei na nodra rai veivakauqeti baleta e dua na veisiga ni mataka lagilagi. Era kila ni sa rawa mera rawata ena gauna oqo.

Na tamata yadua, gone kei na qase, sa sotava oti na gauna eso ni lutu. Sa noda ivakarau na tamata meda lutu. Ia kevaka ga meda gadreva tiko meda tucake tale ka tomana na ilakolako ki na inakinaki vakayalo sa solia vei keda na Kalou, sa rawa meda vulica na veika eso mai na noda druka ka yaco meda tamata vinaka cake ka bula marau me kena isau.

Kemuni na taciqu, kemuni na noqu itokani, ena tiko na gauna ko ni na nanuma kina ko sa na sega tale ni tomana na ilakolako. Vakararavi vua na iVakabula kei na Nona dauloloma. Ena vuku ga ni vakabauta na Turaga o Jisu Karisito, kei na kaukauwa kei na vakanuinui kina kosipeli vakalesui mai, ko sa na rawa ni lako vakadodonu ka tomana tikoga.

Kemuni na taciqu, keimami lomani kemuni. Keimami dau masulaki kemuni. Au diva mo ni rogoca na nona daumasulaki kemuni o Peresitedi Monson. O ni tama ni gone cauravou beka, o ni dua beka na lewe qase ni matabete, se dua na dikoni tabaki vou, keimami sa dau nanumi kemuni tikoga. Sa dau nanumi kemuni tikoga na Turaga!

Keimami kila ni so na gauna ena dredre na nomuni ilakolako. Ia sa noqu yalayala oqo vei kemuni ena yaca ni Turaga: tucake ka muria na mawe ni yavai noda Dauveivueti ka iVakabula, ka na yaco na siga o na railesu kina ka vakasinaiti ena vakavinavinaka tawamudu ni ko a digitaka mo vakararavi ki na Veisorovaki kei na kena kaukauwa a laveti iko cake ka vakaukauwataki iko.

Kemuni na noqu itokani kei na taciqu lomani, se cava sara na levu ni gauna o a sikalutu se lutu kina, tucake! E ka lagilagi dina na kemuni icavacava! Tucake ka lako yani ena rarama ni kosipeli vakalesuimai i Jisu Karisito! O ni sa kaukauwa cake sara mai na kena o ni kila rawa. Ko ni sa tamata rawa-ka sara mai na kena o ni vakasamataka rawa. O sa na rawata ena gauna oqo!” Au sa vakadinadinataka oqo ena yaca tabu ni noda iVakavuvuli ka Dauveivueti, o Jisu Karisito, emeni.