Kom Kuh In Oruh Ingena!

Sel President Dieter F. Uchtdorf

Mwet in Kahsruh Ahk Luo ke Prestuhnsi Se Met


Fin kuht kena in sifilpac tuyak ac kalweni nuh inkacnek uh, … kuht kuh in lotwelah sie ma liki puhtatlac lasr ac eklac nuh ke puhla wo ac engan liki met ah.

Ke nga fuhsr ah, nga sa in tuyak tukun nga puhtatlac. Ke yac ekahsr somlah, tuhsruhktuh, nga muhtwacwacack in nuhnkuh lah masap luhn physics kuh facluh eklac—ac tiac ke ohiyac in kahsrweyuck nga kac.

Pacl na tari ah nga wi tuhlihk mukul se nuhtin nuhtihk suc matwac 12 in ski. Kuht pwacrkihn mukwikwi lasr nuh ke pacl se nga sun acn aes se ac puhtatlac ke ohiyac wolacna se nuh ten.

Nga oruh ma nuh kwewa ngan kuh in tuyak, tuhsruhktuh nga tiac kuh—nga puhtatlac, ac nga tiac kuh in tuyak.

Nga puhla wo in mahno, tuhsruhktuh fuhlwact luhn insiyuck ngal kuhtuh. Na nga liye ahkwoyac lah susu ac kuhlahs luhk ah oan wo, mweyen nga sruhnga mwet ski sahyac ah in akihlen yuc. Nga kuh in liyeyuc sifacna muhta na tiac oruh kuhtuh ma ke elos ski ahliki arlac kahto, engan in fahk, “Lwen Wo, Tamuhlwel Uchtdorf!”

Nga muhtwacwacack in motko ma enenweyuck in moliyuclac. Sikyak ke tuhlihk mukul se nuhtin nuhtihk ah tuhkuh nuh siskuck. Nga fahk nuh sel ma sikyak ah, tuhsruhktuh el tiac luhman ke etuh ahkuhtweyac luhk lah efuh nga tiac kuh in tuyak. El siyac muhtuhk, saplakme, eis pouk, ac ke sie puhsra kuh fahk, “Opa (Pahpah mahtuh), kom kuh in oruh ingena!”

Nga sana tuyak.

Nga srwackna suhlahlahlfongi ke ma sikyak ah. Ma luhman oacna tiac kuh met eklac nuh ke ma pwacye ke srihpen tuhlihk mukul matwac 12 se saplak nuh sihk ac fahk, “Kom kuh in oruh!” Fahk se ingacn use luhlahlfongi, engan, ac kuh.

Tamuhlwel, sahp oasr pacl ke moul lasr in tuyak ac sifilpac kalweni ac oacna in upaclac nuh ke kuh lasr sifacna uh. Ke lwen se ingacn ke fuhluh nuklac ke snow uh, nga lotwelah ma se. Finne ke kuht nuhnkuh kuht tiac kuh in tuyak, srwackna oasr finsrak. Ac kuhtuh pacl uh kuht enenuh muhkwena mwet se in ngwetma nuh ke muhtahsr, sruhkwack pahosr, ac fahk, “Kom kuh in oruh ingena!”

Luhlahlfongi Stuhuh luhn Kuh

Kuhtuh pacl kuht nuhnkuh lah muhtwacn uh kuh in oruh likina mukul uh in eis puhla ke suhfal ac tiacna wo—lah puhla inge yohk nuh selos liki kuht. Nga nihkihn fin ma inge pwacye. Mukul uh puhlakihn puhla ke mwacta, ahsor, ac suhfal. Sahp kuht srihke in okanlah puhla inge, tuhsruhktuh elos oruh. Kuht kuh in puhla toasr ke ma suhfal lasr kuht in muh kuh in muhtwacwacack in nuhnkuh lah kuht koflah orwaclah wo. Sahp kuhtuh pacl kuht luhlahlfongi ke srihpen kuht puhtatlac met, puhtatlac pa acn sahflah lasr. Oacna sie mwet sihm fahkwack, “Kuht kalweni, oacna oak fungul lain acsr uh, ma kwacna fohlohkohnohlos nuh tok.”1

Nga liye mukul sesseslah ke kuh ac kuhlwacng tui in wi orekma upac ke muhsaheack tohkohsrahi luhn God ke srihpen elos oruh ma suhfal ke pacl se kuh luo. Mukul inge oasr kuh yohk tuh elos kuh in orekma in oruh ma wolacna ke mukul suc sruok pristut ac mwet kuhlwacnsap luhn God. Tuhsruhktuh ke srihpen elos puhtatlac ac puhla muhnahs, elos som liki ma kunaclos ke pristut ac fahsr ke kena sahyac ac sahp lusrohngtwen.

Na, elos som, ac oruh ma srihklac liki elos kuh in oruh, ac tiac sun kuh fal lal ma elos eis ke isuslac lalos. Ke mwet sihm se fahkwack, mwet inge pa nguhn suhfal suc “misac ac tiac ahkfalye ma elos kuh ke moul lalos.”2

Wacngihn mwet luhngse puhtatlac. Ac kuht arlac sruhnga ke mwet sahyac—yohkna mwet kuht luhngse—liye kuht puhtatlac. Kuht nuh kwewa luhngse eis suhnakihnyuck ac ahkfuhlwactyeyuck. Kuht ke itto. Tuhsruhktuh kuht mwet moul tiac kuh in itto fin wacngihn srihke ac ahkostwen kuh tiac oruh tahfonglac.

Tamuhlwel, fuhfahsryucsr lasr tiac suleyucklac ke pacl ekahsr kuht puhtatlac kuh pacl ekahsr kuht tuyak, ahknwacsnwacsyekuhtlac, ac fahsr nuh met.

Ahsor luhn God

Kuht etuh lah moul luhn facluh se inge pa sikeng se. Tuhsruhktuh ke srihpen Pahpah tuhmasr Inkuhsrao El luhngse kuht ke luhngse suwohswohs, El ahkkahlwemye nuh sesr acn in sokwack top an. El use macp uh ma lwelah kuht in kuhtanglah acn upac kuh mwe srihfeyuck ma kais sie sesr sun uh. Kahs luhn mwet pahluh pa ip ke macp se inge.

Ke kuht tuhlac—ke kuht puhtatlac kuh som liki ohiyacn Pahpah tuhmasr Inkuhsrao—kahs luhn mwet pahluh fahk nuh sesr ohiyac kuht kuh in tuyak ac fohlohk nuh ke inkacnek wo an.

Ke ip nuh kwewa ma lutiyuck sin mwet pahluh ke yac nohfohn, oasr sie ip ma kalweni in sruhmuhnyuck ac pa pweng ke finsrak ac luhngse lah mwet uh kuh in auliyak, ekuhllah inkacnek lalos, ac fohlohk nuh ke inkacnek pwacye luhn mwet tuhma lutlut.

Ma inge tiac kalmac lah kuht enenuh in puhla wo ke muhnahs, tahfonglac, kuh ma koluk lasr. Tuhsruhktuh oasr ip yohk srihpac siena ke puhla ahsor ke ma koluk ma kolyuck nuh ke auliyak ac ahsor ma kol nuh ke wacngihn finsrak.

Mwet Sap Paul el luti lah “ahsor suc God El orekmakihn uh pa oruh eklac luhn nuhnak, suc ac kohllah mwet nuh ke molwelah … ac ahsor luhn facluh ac kohllah mwet nuh ke misac.”3 Ahsor luhn God oruh in oasr eklac ac finsrak ke Iwaclah. Ahsor luhn facluh ulkuhti nuh ten, eslah finsrak, ac oruh mwet in puhtatlac nuh ke mwe sruhf sahyac.

Ahsor luhn God kol nuh ke eklac luhn luhlahlfongi4 ac sie eklac luhn insiyac.5 Ma inge oruh kuht in sruhnga ma koluk ac luhngse ma wo.6 Ac kahsrwe kuht in tuyak ac fahsr ke kahlwem ke luhngse luhn Kraist. Auliyak pwacye pa eklac wo, tiac ma in kweok kac. Ahok, auli ac ahsor pwacye ke seahkostwen pa kwacna sesseslah ke ngal ac ma inge ip yohk srihpac ke inkacnek luhn auliyak. Tuhsruhktuh ke auli som nuh ke ahsor paht kuh tiac lwelah kuht in sulpac tuyak, ma inge tulokihn tuh enenuh in kahsruh auliyak lasr.

Tamuhlwel, oasr ohiyac wo likina. Lwelah kuht in tuyak ac eklac mukul luhn God. Oasr mwet kuh lasr, Mwet Lahngo se, suc fuhfahsryucsr infahlfahl luhn nguhnin misac kacsr. El sang moul Lal in molikuhtlac. Wacngihn luhngse yurin mwet yohk liki luhngse se inge—Jisus Kraist, Lamb wacngihn ma koluk soko, sulaclah in sang moul Lal sifacna nuh ke loang ac molwelah ma koluk lasr nuh ke “ma nuh kwewa pakpucki.”7 El sruok sifacna nuh Sel ma koluk lasr. El eis mwe toasr lasr, auli lasr nuh ke Finpihsacl. Kawuck sacohk luhk, ke kuht sulaclah in tuhkuh nuh Sel, ac eis Inel kacsr ac fahsr suwohswohs ke inkacnek luhn mwet tuhma lutlut, na ke Iwaclah an kuht olweyucklac tiac engan ac mihslac ke facluh muhkwena se inge tuhsruhktuh nuh ke moul ma pahtpaht ke facluh se tohkoh uh.8

Ke kuht oruh tahfonglac, ke kuht oruh ma koluk ac puhtatlac, lwelah kuht in nuhnkuh ke kalmac in auliyak pwacye. Kalmac pa ekuhllah insiyacsr ac kena nuh sin God ac fuhlweack ma koluk uh. Puhlakihnyuck pwacye ke auliyak use kac mwe loh ma tuhkuh lucng me tuh “kuht kuh in oruh ingena.”

Suc Kom An?

Ohiyac se luhn Setuhn in kutong kuht liki in orwaclah wo pa in ahkfohsye kuht ke suc kuht an ac ma kuht kena pwacye uh.

Kuht kena sang pacl lasr yurin tuhlihk nahtuhsr, tuhsruhktuh kuht ke pac ahkolah nuh ke mwe ahkpwacr pahiyacsr lasr mukul uh. Kuht luhngse in ahksri tuhsruhktuh kuht oacyacpac luhngse engankihn mongo kuht ke kang uh. Kuht ke eklac oacna Kraist, tuhsruhktuh kuht oacyacpac luhngse sang nuhnak lasr nuh sin mwet se suc kosrekuhtlac inkacnek uh.

Srihpac lal Setuhn pa in srihfe kuht in ahollah ma sacohk ke engan pwacye ac ma pahtpaht yohk molo nuh ke sie ma srihsrihk plahstik ma pa sie nuhnak na ac tiac ma pwacye luhn engan pwacye ac pwacrwack.

Sie ohiyac sahyac setuhn el orekmakihn in ahkmuhnahsye kuht ke kuht srihke in tuyak pa in oruh kuht in liye masap uh oacna sie ahkkohsyeyuck nuh sesr. Nga muh ohiyacn mwet pa in sruhnga kuhtwena ma ma tiac luhman oacna in nuhnak lasr ke pacl se emet ah.

Kuht fin liye mongo wo ac ahsrosr oacna sie ma kwacfe luhn taktuh lasr nuh sesr muhkwena, kuht ac kuh in puhtatlac. Kuht fin liye sulaclah inge oacna suc kuht uh ac suc kuht luhngse in oacna, ac oasr pacl yohk se lasr in muhta na ke inkacnek uh ac orwaclah wo.

Kuht fin liye mwet luti luhn sucu oacna finsrak luhn prestuhn luhn stek muhkwena, kuht ahksrihkye kena lasr in oruh. Kuht fin liye oacna finsrak lasr—ma se kuht kena in oruh in eklac oacna Kraist ac kahsruh mwet sahyac—kuht fah tiac ahkfalye muhkwena wuhlweacng lasr tuhsruhk oacyacpac ahkfahsryelah ke sie ohiyac ma ac ahkinsewowoye sucu kuht ohsun nuh sac ac ma lasr sifacna uh pac.

Kwacna fal, kuht pa mwet suc kahsrweyucklac sin kawuck kuh sucu uh. Tuh kuht fin ngwetngwet liye ke ahtron muhta in liye ac enenuh luhn sie heart luhngse, kuht fah akihlen pacl wowo Leum El fihliyac nuh ye muhtahsr in kahsruh mwet sahyac in tuyak ac fahsr nuh met nuh ke kuh pwacye lalos. Ma suhmuhslah uh fahk, “Oacna sie ma kom oruh, oruh ke insiyom, oacna nuh sin Leum, ac tiac nuh sin mwet uh.”9

Sie mwe kahsruh yohk ke kuh luhn nguhn in moulkihn moul in nwacsnwacs ac suwohs ac in liyacacng motom na nuh ke acn kowos luhngse muhta we ma pahtpaht. Finne kuht kuh in liye acn wolacna se inge muhkwena ke muhta luhn luhlahlfongi, ac fah kahsrwe kuht in muhta ke inkacnek an.

Ke kuht porongo nuh ke ma sikyak wo kuh koluk luhn kais sie lwen, sahp kuht ac tuhlac, forfor, ac puhtatlac. In Liyacacng finsrak lasr lucng ac kahsrwe kuht in eklac tuhlihk mukul wo nahtuh ac wiyac, ac pahpah kuhlwacng wo emet, ac mukul tuhma luhngse yohk.

Finne mwet suc sang insiyaclos ke finsrak wolacna sahp ac srwackna tikuclkucl, tuhsruhktuh elos ac tiac kuh in kuhtangyucklac. Elos luhlahlfongi ac muhngnguh nuh ke olwelah luhn God. Elos ac sifilpac tuyak ke sie finsrak ac kahlwem lalos ke suwohswohs luhn God ac aruhrruhma mokleyuck ke sie pacl fahsruh wolacna. Elos etuh elos kuh in oruh ingena.

Kom Kuh In Oruh Ingena

Mwet nuh kwewa, fuhsr ac mahtuh, oasr pacl lal ke el puhtatlac. Puhtatlac pa ma mwet luhn facluh oruh. Tuhsruhktuh kuht fin kena sifil tuyak ac kalweni ke inkacnek nuh ke finsrak luhn nguhn ma God El use nuh sesr, kuht kuh in etwaclah ma ke puhtatlac lasr ac eklac nuh ke puhla wo ac engan liki met ah.

Tamuhlwel sacohk wiyuck, kawuck sacohk luhk, oasr pacl ke kowos nuhnkuh kowos tiac kuh in kalweni in fahsr na. Luhlahlfongi Mwet Lahngo ac luhngse Lal. Ke luhlahlfongi nuh sin Leum Jisus Kraist ac kuh ac finsrak luhn wosasuc fohlohkyak uh, kowos fah kuh in fahsr suwohselihk ac fahsr na.

Tamuhlwel, kuht luhngse kowos. Kuht pruhe keiwos. Nga finsrak kowos kuh in lohng ke Prestuhn Monson pruhe keiwos. Finne kowos pa pahpah fuhsr, mwet mahtuh suc sruok pristut, kuh tikin sasuc, kuht nuhnkuh keiwos. Leum el nuhnkuh keiwos!

Kuht etuh lah inkacnek lowos kuhtuh pacl uh upac. Tuhsruhktuh nga usot nuh suwos olwelah se inge ke inen Leum: tuyak ac ukwe srihkasrak luhn Mwet Molwelah ac Mwet Lahngo lasr, ac sie lwen kowos fah tahpuhllac ac puhla sruikihn na pwacye ke sulaclah lowos in luhlahlfongi ke Iwaclah ac kuh la in sruhkkowosyak nuh lucng ac usot nuh suwos kuh.

Kawuck sacohk luhk ac tamuhlwel, finne pacl puhspuhs kowos tahfonglac kuh puhtatlac, tuyak! Fuhfahsryucsr lowos pa acn wolacna se! Tu fuhlwact ac fahsr ke kahlwem luhn wosasuc fohlohkihnyuckyak luhn Jisus Kraist! Kowos fokoko liki ma kowos akihlen uh. Kowos etuh yohk liki ma kowos kuh in nuhnkuh. Kowos kuh in oruh ingena! Ke ma inge nga fahkwack ke ine muhtahl luhn Mwet Luti ac Molwelah lasr, Jisus Kraist, amen.

Ahkkahlwemye Reference an

  1.  

    1. F. Scott Fitzgerald, The Great Gatsby (1925), 180.

  2.  

    2. “The Voiceless,” in The Complete Poetical Works of Oliver Wendell Holmes (1908), 99.

  3.  

    3. 2 Corinthians 7:10; ahkuhtweyac wo ituckyang.

  4.  

    4. Liye Acts 3:19.

  5.  

    5. Liye Ezekiel 36:26; 2 Corinthians 5:17; Mosiah 3:19.

  6.  

    6. Liye Mosiah 5:2.

  7.  

    7. Matthew 5:26.

  8.  

    8. Liye Doctrine and Covenants 59:23.

  9.  

    9. Colossians 3:23.