2010–2019
Ng Sebechem el Kudmeklii er Chelechang!
October 2013


Ng Sebechem el Kudmeklii er Chelechang!

Sel blak a rengud el muut el mekiis e dolemolem el ngara rael. … e ngarngii a kmo ngera el desubii er a cheleuid er kid e sola mo ngara deureng.

Sera kngeasek, eng mle sebechek el mereched el mekiis el mo dechor sel kmesibas. Eng di, cherengel a rak, e ak mla mo ungil medengei el kmo ng diak el sebechek—el di mereched el mo dechor sel sekum ak mesibas.

Ng diak el sal meketeket er a memong e ak mlo ou ski ngak me a 12 a rekil ngelekel a ngelekek el sechal. Ng kmal kora mle ungil a rengmam e ak mekera el subechii er a ice e mlo merael rebab e mekereuat e riou er a kora kedengelengel.

Ak milasm el mereched el mekiis el mo dechor, eng di dimlak el sebechek—ak mla ruebet, e dikea el sebechek el me dechor.

Ng dimlak el mekesakl a bedengek, eng di sel klsechal er ngak a telkib el miltirm. Ak mle kerekikl me a ulekungek me a klas er ngak a ungil, leng dimlak el soak a rebebil er a rechad el ou ski a lesekak. Ak kora di omes er tir lengelakl er ngak e, oldiu el kmo, “Alii, Brother Uchtdorf!”

Ak mocha melbedebek el kmo ngera mo sobecheklak er a le merma ngika el ngelekel a ngelekek. A kuluchais er ngii er tial dilubech el teletael eng di ngii a kora dimlak el semeriar lorrenges omesodek el kmo ngera uchul eng dimlak el sebechek el mekiis. Ng ulemes a medak, e odersii chimal, lorkedii chimak, e kmal kora mesisiich oto er a ngerel kmo, “Opa, ng sebechem el kudmeklii er chelechang!”

Ak di mle mereched, el mo dechor.

Ng dirkak bo kuumera er ngii el tekoi. Sel uaia le mlak el sebechel mekedmokl el tekoi ruchei a di mle mereched el mekedmokl, ele 12 a rekil buik a silbecheklak e dilu el kmo, “Kau a sebechem el kudmeklii er chelechang!” A denguu er ngak, e tia silsichii a renguk, blakelreng er ngak, me a klisichek.

Rodam, ngarngii a taem er a klengar kid eng uaia bo lak a klisiched el melemolem e outekangel er a moktek er kid. Ngarngii ak silubii er tiaikid el sils, er bebul a kedengelengel el snow. Uldimukl er a ikel taem el domdasu el kmo ng dikea el sebeched el mekiis, eng di dirk ngarngii a urunguled. Ea le bebil er a taem er a klengar kid e kede di ousbech er a chad longeng a medad, odersii a chimal, e kmo, “Ng sebechem el kudmeklii er chelechang!”

Sel Cheleuid er a Oleko ke kmal Meisiich

Kede locha omdasu el mo a redil a blechoel lomelchesiu er tir el metitur e ngesonges el diak el uaia rsechal—ea ika di mora redil e diak el mei er kid. Ng diak kuumera el kmo ng klemerang. A rsechal me te omelchesiu a klengit, berraod er a uldasu, me a telitur. Kede locha rullid el oleko aika el domelchesiu a diak longesa er kid, eng di aika kmal mekesang er kid. Kede kmal mo omelchesiu loberaod er a telitur me a chelitechetud me kede omdasu el kmo ng locha diak el sebeched el mekerang. Kede locha dirrek el mo omdasu el kmo kede blechoel merberebet, me tiaikid a locha kirel mo teleteled. El uaia chimo el chad er a omeluches el kmo, “Kede melemolem, lomtok er a berius, e di lmuut el mo er sel dulemuchel er ngii.”1

Ak mla mesterir a rsechal el mui er a klungiaol me a ungil e mo diak el teloi er tial meringel el ureor lomekedechor er a rengedel a Dios le tir el mla tang malechub eng eru el rebet. Tirka rsechal el klou a techellir el sebecheir el kmal mo ungil loba priesthood e mesiungel a Dios. Eng di tir el mla ruebet e mlo seselk a rengrir, ete mla mo cheroid er a ngerchelel a priesthood e osiik er a beot eng di diak el sal ungil rael.

Me te, uaisei el melemolem, el di meruul er a telkib er sel ngii a mle sebechir el kudmeklii, el diak el bo er sel ngii a ultekellir e dikesir. El uaia chad er a omeluches el kmo, tirka tirkel mekerior el chad el mora “kodall e [dimlak el kedmokl] aikel [dirk] mle sebecheir el kudmokl.”2

Ng diak a chad el soal ruebet. E kmal diak el soad a rebebil—oumesingd tirkel betik er a rengud— a lesekid el ruebet. Ng soad a rechad a bo longull e loumera er kid. Ng soad el mo kats. Eng di kid el chad a diak el sebeched el mo kats a lak a blakelreng me a osisechakl malechub e lak a cheleuid el deruul.

Rodam, a ulebengelel omerolled a diak el moterekokl lokiu a iidisel a taem el derebet ng bai iidisel a taem el debekiis, e remiik a bedenged, e melemolem el bedul uchei.

Klengitelreng er a Kledios

Kede medengie el kmo tial klengar er a beluulechad a skeng. Eng di Chedam er a Babeluades oba cherrungel el beltikelreng el mei er kid, e Ngii a mla meskid a nger. Ng mla meskid a map el sobecheklid er a ikel diak dodengei el rael me a olibesongel el mei er kid. A tekingir a reprofet a telengtengil tial map.

Sel detouchakl—sel derebet malechub e bo decheroid er a rolel a Demad er a Babeluades—ea tekingir a reprofet a subedid el kmo kede mekera e lmuut el mora meral rael.

Aikel rokui el osisechakl er a reprofet er a rokui el taem, ea chimong el blechoel lomelekel er ngii a sel klumech el melisiich er a chad el mo sebechel ouchel a rengul er a kngtil, ngodechii a roled, e lmuut el mei er a meral rael loltirakl er a Kristo.

Ng diak el belkul a kmo ng kired el kiei lungil a rengud er a chelitechetud, cheleuid er kid, me a kngtid. E ngarngii a klakakerous er a klengitelreng er a klengit el uchul e kede mo ouchel a rengud me a klengittelreng el uchul a mo kerior.

A Apostol Paulus a ulsisechakl “klengitelreng er a kledios a ouchelreng el kirel a mo suobel … ea klengitelreng er a beluulechad a kirel a kodall.”3 A Klengitelreng er a klediosa ngodechid e meskid a urunguled lokiu a Tngakireng. E a Klengitelreng er a beluulechada tomellid, e smuld a urunguled, e mengesuseu er kid el soiseb er a lmuut el dmolech el ongetikaik.

AKlengitelreng er a klediosa meltid4 e ngmodech a rengud.5 Ng rullid el mo chetid a mekngit e mo soad a ungil.6 Ng smisichid el mo dechor e merael er a llomes er a Kristo. A meral ouchelreng a melutk el kirel a mesisiich el omelodech, ng diak longerusii er kid. Oi, a ouchelreng me a klengitelreng el dimlak dolngesenges a meklou a belkul telengtengil tial chedaol teletael er a ouchelreng. Eng di alsekum a kngtid a tomer kid meng diak deluut el mekiis el mo dechor, eng melemall er kid e diak lolisiich er kid el mo ouchel a rengud.

Rodam, ngarngii a ungil rael. Mei e debekiis el mo dechor el mo chedal a Dios. Kede oba mesisiich el chad, el Osobel, el ngii a mlora kodall el kired. Ngii a uldersii a klengar ngii el kirel a kngtid. Ng diak a ngodech loba mesisiich el beltikelreng el uai ngika el—Jesus Kristo, el diak a telemall er ngii el Ngelekel a Sib, el uldersii a klengar Ngii el mo metenget el kirel a kngtid el mo er sel “tkul rebab el sebechel.”7 Ngii a ngilai a rokui el ringel. Ngii a ngilai a berraod er kid, me a kngtid. Kemiu el sechelik, sel de bo er Ngii, e denguu a Ngklel e merael loltirakl er ngii, e ngokiu a Tngakireng eng diak di bo denguu a deureng me a “budech er tial klengar” kede dirrek el mo nguu “er sel diak a ulebengelel klengar el merael mei.”8

Sel derebet, sel derellii a mekngit, e mei e domdasu el kirel a kmo ngera meral belkul a ouchelreng. Ng belkul a kmo ng obult a rengud me a uldesued el mora Dios e mo cheroid er a mekngit. A ouchelreng a obengkel a mesisiich luldasu er babeluades el kmo ng sebeched el “kudmeklii er chelechang.”

Kau Ke Techang?

A tara rael loba cherarou el mengeuid a rengud a meruul er kid meng mo rrau a rengud el kirel a kmo kid kede techang e ngera kmal soad.

Ng soad lobengterir a rengeleked, eng di dirrek el soad el kuk meruul aikel soad lurerir a rsechal. Ng soad lomeksengaked, eng di dirrek el soad el menga kall el soad. Ng soad el mo uaia blekerdelel a Kristo, eng di ng mo ngmasech a rengud er a chad lomekall el di tongetengii a mlid.

A Diablong a soal a dutechei aikal diak el mochar el diak a ulebengelel llach e bo dolab a diak a meral belkul klalo el ngii a di mengeuid er a meral deureng el mei er kid.

A tara rael el cheraro a oba el melemall er kid meng diak de bekiis a rullid el mo omdasu el kirel a llach el uaia le tekoi el de morimel el meruul. A kumdasu eng di kse er kid a rechad el loltngakl er a tekoi el ngii a dimlak el ngara uldesued er a uchelel.

Alsekum e kede omes er a ungil e tabesul blengur me a exercise el toktang a kmu er kid me kede meruul, eng locha mo diak el sebeched. Eng di alsekum e kede omes er ngii el kmo ng kid e tiaikid a soad, eng locha klou a techelled el otireklii e mo ungil.

Alsekum e kede omes er a teletael er a oldingel e olisechakl el kmo ng di moktek er a stake, eng locha diak el blak a rengud er ngii. Eng di alsekum e kede omes er ngii el moktek er kid—el ngii a tekoi el kmal soad el meruul er ngii el mo uaia Kristo er a lolngeseu er a rebebil—eng locha mo sebeched el diak di dekedmokl a ngercheled kede dirrek el kudmokl er sel teletael el ngii a meral mo omekngeltengat a telungalek el kid oldingel e dirrek lomekngeltengat er kid.

Ng blechoel, el kid a ngmai a ngeso er a resechelid me a telungalek er kid. Eng di omko kede mo ungil omes el meliuekl e oba blekokeuii el reng, e kede mes a techall el Rubak a mla locha er medad el mo olngeseu er a rebebil el mekiis e omakes el bedul sel ngii a ultekellir. A chedaol llechukl a kmo, “Ngii di el ngera, e moruul er ngii loba rengum, el mora Rubak, e lak el bo er a chad.”9

Ng uchul a klou el chedaol klisiich sel de kiei er a melemalt el klengar e domes el bedul sel ngii a soad el morngii er a ulebongel. Luldimukl a di domes er ngii loba telkib el klaumerang, eng diak el sebeched el kmal mo cheroid er a rael.

Sel sekum e kede kuk kmal di omes aikel klungioled malechub a telitur er kid er a bek el sils, eng sebeched el touchakl, mo mererrorael, e ruebet. Eng di alsekum a osenged a ultuil er a ngarbab el moktek, eng mo sebeched el melemolem el ngara rael el ngalek el sechal, rodam, rechedam, me a rebechiil.

Tirkel ngmai a rengrir lotuil er a diak a ulebengelel moktek a locha mo ruebet, eng di diak lolemolem el make. Te ultuil a klaumera er tir er a Dios me a yaksok er ngii. Te lmuut el mekiis le tir loba llomes er a Dios e oba chedaol ues el kirel a tara klebesei.Te medengei el kmo ng sebechir el kudmeklii er chelechang.

Ng Sebechem el Kudmeklii er Chelechang

Bek el chad, ngeasek me a remeklou, lorrenges er ngak malechub ete menguiiu aikal tekoi a mla ta el rebet. A rebet a mei er kid el chad. Eng di alsekum e kede blak a rengud el mekiis e melemolem el ngara rael el bedul a chedaol moktek el Dios a mla meskid, eng sebeched el suubii a kmo ngera er a ikel chelitechetud e lmuut el mo ungil e mo ngara deureng ruriul.

Rodam er ngak, resechelik, ngarngii a taem e kede mesibas malechub e kedeomdasuel kmo ng dikea el sebeched el melemolem. Moumera er a Osobel me a beltikelreng er Ngii. Ngokiu a klaumerang er a Rubak el Jesus Kristo me a klisichel a mla moluut el ebangkelio, e kaua sebechemel mekiis el melemolem er a rael.

Rodam, ng betik a rengmam er kemiu. Aki meluluuch el kiriu. A kuureng ulekum me kom rongesii a President Monson el meluluuch el kiriu. Me a om ngeasek el chedam, klou el chad loba priesthood, me a om dirk mloterekokl el deacon, ea ki melatk el kiriu. A Rubak meng melatk el kiriu!

Aki medengei el kmo a roliu a mo meringel a lebebil er a taem. Eng di ak meskemiu tiaikid el yaksok el ngara ngklel a Rubak: alsekum e ko mekiis el mo dechor e oltirakl a blekeklel a Olsobel e Osobel, ea tara klebesei e ko mo melatk er ngii e mo ngara omereng el saul el kmo ko millilt el mo oumera er a Tngakireng me a klisichel el mesebechakl e melisiich er kemiu.

Kemiu el sechelik e odam er ngak, ng diak el iior er a kmo ng tela el taem el mrebet, e moutekangel el mekiis! A basio el borngii a klebokel! Bom dechor e morael er a llomes er a mla moluut el ebangkelio er a Jesus Kristo! Ko medengei el kmo ko mesisiich. Ng kmal klou a sebechiu remuul. Ng sebechem el kudmeklii er chelechang! Aikang a kdung el ngara chedaol a Mastang er kid e Olsobel, el Jesus Kristo, amen.