2010–2019
E Mafai Ona E Faia Nei Lava!
Oketopa 2013


E Mafai Ona E Faia Nei Lava!

Ae a tatou naunau lava e tulai ae i luga ma faaauau i luga o le ala … e mafai ona tatou aoaoina se mea mai le toilalo ma atili lelei ma fiafia atili ai.

A o ou laitiiti, e foliga mai sa mafai lava ona vave tu i luga pe a pa’ū i lalo. Peitai, i le aluga o tausaga, ua ou iloa ai ua le toe tutusa aso ona o le matua—ua le toe mafai ona vave tu i luga pe a ou pa’ū.

E lei leva atu na ma faasee ai i luga o le aisa ma le atalii o lo’u atalii e 12 tausaga le matua. Sa ma fiafia lava i le ma taimi sa faatasi ai seia oo ina ou see i se vaega aisā ma ou patatū ai ma le mataina i lalo i se tifatō.

Sa ou taumafaia togafiti uma e tu ai i luga ae sa ou le mafai—sa ou pa’ū, ma sa le mafai lava ona ou tu i luga.

Sa ou lagona lava le lelei faaletino, ae sa fai si faamanualia o ou lagona. O lea sa taumafai ai ia mautinoa o loo mau lelei lo’u pulou ma le matatioata ona e sili atu ia te au le aua nei iloaina au e isi tagata faasee. Sa mafai ona ou mafaufauina lou saofai iina ma le leai o se faamoemoe ao latou pasi ane, ma faamalo mai ma le fiafia, “Talofa Uso Uchtdorf!”

Sa amata ona ou tomanatu po o le a se mea e fai e laveai ai au. O le taimi na na oo mai ai le atalii o lou atalii i ou talaane. Sa ou faamatala i ai le mea na tupu, ae sa foliga mai sa ia le naunau mai i lau faamalamalamaga i le mafuaaga na le mafai ai ona ou tu i luga. Sa ia pulatoa mai i ou mata, aapa mai, uu lou lima, ma i se leo mausali, “Tamamatua, e mafai ona e faia nei lava!”

Sa vave ona ou tu i luga.

Sa ou gatete pea i lena mea. O le mea sa foliga mai na faigata mo na o sina taimi a o lei vave ona avea ma se mea moni, ona o se tamaitiiti e 12 tausaga le matua na aapa mai ia te au ma fai mai, “E mafai ona e faia nei lava!” Ia te au lava ia sa faateleina ai le mautinoa, naunautaiga, ma le malosi.

Uso, e i ai taimi i o tatou olaga e foliga mai ai ua le gafatia e lo tatou malosi ona tutulai ae ma faaauau ai pea. Sa ou aoaoina se mea i lena aso i luga o se tifato sa lilofia i le kiona. E tusa lava pe tatou te manatu ua le mafai ona tatou tulai ae i luga—ae o loo i ai pea se faamoemoe. Ma o nisi taimi ua na ona tatou manaomia o se tasi e pulatoa mai ia i tatou i mata, uu o tatou lima, ma fai mai, “E mafai ona e faia nei lava!”

O Le Manatu Sese o le Malosi

Atonu tatou te manatu e sili atu ona maua e tamaitai ni lagona o le le atoatoa ma le toilalo nai lo alii—lea e aafia tele ai i latou i nei lagona nai lo i tatou. Ou te le mautinoa e moni lenei mea. E lagona e alii ia aafiaga o le tausalaina, faanoanoa, ma le toilalo. Atonu tatou te faafoliga ai e le o mamafa ia lagona ia i tatou, ae e mamafa. E mafai ona tatou lagonaina le mamafatu ona o lo tatou toilalo ma le le atoatoa lea e amata ai ona tatou manatu o le a le mafai lava ona tatou manumalo. E mafai foi lava ona tatou mafaufau ona e talu ai na tatou pā’ū’ū muamua, o le pa’ū lava la lo tatou taunuuga. E pei ona tusia ai e se tasi tusitala, “Tatou te faaauau pea, e pei o vaa e taia i peau malolosi, ia e toe lafo ai lava i tua i mea na o mai ai.”1

Ua ou vaai i alii e faatumulia i le gafatia ma le alofatunoa ua le toe auai i le galuega luitauina o le fausiaina o le malo o le Atua ona ua faatasi pe faalua foi ona latou toilalo. O alii nei o le folafolaga o e semanu o ni tagata e umiaina ma le tulagaese le perisitua ma o ni auauna a le Atua. Ae ona sa latou tautevateva ma oo ai ina faalotovaivaia, na latou o ese ai mai tautinoga o le perisitua ma saili atu ai i isi taumafaiga ae itiiti se aoga.

Ma o lea, ua latou faaauau ai, ma ausiaina na o sina vaega itiiti o mea e mafai ona latou ausiaina, ua le tutulai ae i le gafatia e fitoitonu i lo latou tofi. E pei ona faailoa ai le faanoanoa o le tusitala, o nisi nei o i latou o agaga ua le faamanuiaina o e e “feoti lava e lei ausiaina mea latou te gafatiaina.”2

E leai se tasi e fia toilalo. Ma e tatou te le fiafia patino lava i ai pe a vaaia e isi—aemaise lava i latou tatou te alolofa i ai—lo tatou toilalo. Tatou te mananao uma ina ia faaaloalogiaina i tatou, ma faamamaluina. Tatou te fia mananao e avea ma ni siamupini. Ae o tatou o tagata soifua e le avea ma ni siamupini e aunoa ma se taumafaiga ma se loto pulea pe aunoa ma le faia o ni mea sese.

Uso e, o lo tatou taunuuga e le fuafuaina i le aofai o taimi tatou te tautevateva ai ae o le aofai o taimi tatou te tutulai ae ai, tafi ese le pefu mai ia i tatou, ma agai i luma.

Tiga e Tusa i le Atua

Ua tatou iloa o lenei olaga faaletino o se tofotofoga. Ae ona e alofa lo tatou Tama Faalelagi ia i tatou i se alofa atoatoa, ua Ia faaalia mai ia i tatou le mea e maua ai tali. Ua Ia tuuina mai ia i tatou le faafanua e faatagaina ai i tatou e sopoia ia laufanua le mautonu ma alasavali e lei faamoemoeina ia e fetaiai ma i tatou taitoatasi. O upu a perofeta o vaega ia o lenei faafanua.

Pe a tatou se ese—pe a tatou pauu pe o ese mai le ala a lo tatou Tama Faalelagi—e tau mai e upu a perofeta ia i tatou le auala e tutulai ae ai i luga ma toe foi ai i luga o lena ala.

Mai mataupu faavae uma na aoaoina e perofeta i le aluga o seneturi, o le tasi ua faamamafa pea lava pea o le savali faamalosiau o loo i ai se faamoemoe e faapea e mafai ona salamo tagata, suia auala, ma toe foi atu i luga o le ala moni o le avea ma soo.

E le faapea la e tatau ai ona tatou maua le toafimalie i o tatou vaivaiga, mea sese, po o agasala. Ae o loo i ai se eseesega taua i le va o le faanoanoa mo agasala lea e taitai atu i le salamo ma le faanoanoa lea e taitai atu i le pagatia.

Sa aoao mai le Aposetolo o Paulo e faapea “o le tiga e tusa i le Atua e tupu ai le salamo e oo i le ola … a o le tiga faalelalolagi e tupu ai le oti.”3 O le tiga e tusa i le Atua e musuiaina suiga ma faamoemoe e ala i le Togiola a Iesu Keriso. O le tiga faalelalolagi e toso i tatou i lalo, aveesea ai le faamoemoe, ma faatosinaina i tatou ia lolo atu atili i faaosoosoga.

O le tiga e tusa i le Atua e taitai atu i le liua4 ma se suiga o le loto.5 Na te uunaia i tatou ia inoino i le agasala ae fiafia i le lelei.6 Na te uunaia i tatou ia tutu i luga ma savavali i le malamalama o le alofa o Keriso. O le salamo moni e faatatau i le suiga, ae le o tiga ma mafatiaga. Ioe, o le faanoanoa faamaoni ma le loto momomo moni mo le le usiusitai e tele lava ina tiga ma o ni laasaga taua ia i le faagasologa paia o le salamo. Ae a oo atu le tausalaina i le musuā o le tagata lava ia po o le taofia o i tatou mai le toe tutulai ae i luga, o le a faatuai ai nai lo le uunaia o lo tatou salamo.

Uso e, o loo i ai se ala sili atu. Ia tatou tutulai ae i luga ma avea ma tagata o le Atua. O loo i ai sa tatou siamupini, o se Faaola, na savalia le vanu o le ata o le oti mo i tatou. Na Ia foai mai o Ia lava e maliu e totogi ai a tatou agasala. E leai lava se isi alofa e sili atu i lo lenei alofa—Na faataatia ma le loto i ai e Iesu Keriso, le Tamai Mamoe e aunoa ma se pona, o ia lava i luga o le fata faitaulaga ma totogi le tau o a tatou agasala “i tupe uma lava.”7 Na Ia tauave i Ona luga o tatou mafatiaga. Na Ia ave a tatou avega, ma lo tatou tausalaina i Ona tauau. Au uo pele, a tatou filifili e o mai ia te Ia, ma ave i o tatou luga Lona suafa, ma savavali ma le lototoa i le ala o le avea ma soo, ma e auala mai i le Togiola ua folafola mai ai ia i tatou e le gata o le fiafia ma le “filemu i lenei lalolagi” ae faapena foi le “ola e faavavau i le lalolagi a sau.”8

A tatou faia ni mea sese, a tatou agasala ma pauu, ia tatou mafaufau i le uiga moni o le salamo faamaoni. O lona uiga o le liliu atu o o tatou loto ma le tuuto i le Atua ma le lafoaia o le agasala. O le lagonaina o le salamo moni e aumaia faatasi ai le faamautinoaga faalelagi lea e mafai ai ona “tatou faia nei lava.”

O Ai Oe?

O se tasi o metotia a le tiapolo e taofia ai i tatou mai le alualu i luma o le faafememeaiina lea o i tatou e uiga i lo tatou tagata moni lava ma mea tatou te mananao moni ai lava.

Tatou te mananao e faaalu se taimi ma a tatou fanau, ae tatou te mananao foi ia auai i a tatou mea e fiafia i ai faatamatane. Tatou te mananao ia lusi ia pauna, ae tatou te mananao foi ia aai i meaai tatou te faananau i ai. Tatou te mananao ia faapei o Keriso, ae tatou te mananao foi ia faasa’o le tagata lea sa tau lavea ai le tatou taavale i le auala.

O le faamoemoega o Satani ia faaosooso i tatou e faafesuiai penina tautele o le fiafia sili ma tulaga faatauaina paia e faavavau mo maataua e leai se aoga lea e na o se manatu sese ma se faafoliga o le fiafia ma le olioli.

O le isi metotia o loo faaaoga e le fili e faalotovaivai ai i tatou mai le tutulai ae i luga o le faaosoina o i tatou e vaai atu i poloaiga o ni mea ua fai faamalosi i tatou e fai. Ou te manatu o le natura faaletagata le tetee atu i soo se mea e le o foliga mai i le taimi muamua o ni o tatou lava manatu.

Afai tatou te vaai atu i le taumafa i meaai maloloina ma le faamalositino o se mea ua na ona faamoemoeina i tatou e fomai e fai, atonu la o le a tatou toilalo ai. Afai tatou te vaai i nei filifiliga i lo tatou lava tulaga ma po o ai tatou te mananao e avea ai i tatou, o le a tele atu so tatou avanoa o le tumau i luga o le ala ma faamanuiaina ai.

Afai tatou te vaai i faiaoga o aiga ua na o se sini a le peresitene o le siteki, o le a le mafai la ona tatou faatauaina lona faataunuuina. Afai tatou te vaai i ai o sa tatou sini—o se mea tatou te mananao e fai ina ia mafai ai ona avea atili e faapei o Keriso ma auauna atu ai i isi—e le gata o le a tatou faataunuuina la tatou tautinoga ae o le a ausia ai foi i se ala lea e manuia ai aiga tatou te asia faapea ai ma i tatou lava.

O le tele lava o taimi, o i tatou lava ia o loo fesoasoani i ai a tatou uo po o aiga e faatulai ae i luga. Ae afai tatou te tilotilo solo ma mata naunautai ma le faamoemoega o se loto popole, o le a tatou iloa ai o avanoa ua tuuina e le Alii i o tatou luma e fesoasoani ai i isi ina ia tutulai ae i luga ma agai i luma i o latou gafatia moni. Ua tauina mai e tusitusiga paia, “O mea uma lava tou te faia, ia faia ma le loto, … i le Alii, a e le o tagata.”9

O se puna maoae o le mana faaleagaga le ola i ni olaga o le amiosao ma le amiotonu ma lo tatou taulai atu i mea tatou te mananao e nonofo ai i le faavavau. E tusa lava pe na o mata o le faatuatua e mafai ona tatou iloa atu ai lenei taunuuga paia, o le a fesoasoani ia i tatou ina ia tumau ai i le ala.

Pe a taulai atoa atu lo tatou gauai i mea tatou te manumalo ai pe toilalo ai foi i aso taitasi, e mafai ona tatou leiloloa i le ala, fesesetai, ma pauu. O le faatumauina o la tatou vaai i ni sini maualuluga atu, o le a fesoasoani lea ia i tatou ina ia avea ma ni atalii, ma uso sili atu ona lelei, tamā agalelei ma ni tane sili atu le alolofa.

E oo lava ia i latou o ē tuu o latou loto i sini paia atonu e i ai lava taimi e tautevateva ai, ae o le a le faatoilaloina i latou. Latou te faatuatua ma faalagolago i folafolaga a le Atua. O le a latou toe tutulai ae i luga ma se faamoemoe ola i se Atua amiotonu atoa ai ma le vaai mamao musuia i se lumanai sili. Latou te iloa e mafai ona latou faia nei lava.

E Mafai Ona E Faia Nei Lava

O tagata uma, talavou pe matutua, ua i ai sona lava ia aafiaga patino i le pa’ū. O le pa’ū o le mea lea e oo i ai i tatou o tagata soifua. Ae a tatou naunau lava e toe tutulai ae i luga ma faaauau i luga o le ala e agai atu i sini faaleagaga ua tuu mai e le Atua ia i tatou, e mafai lava ona tatou aoaoina se mea mai le toilalo ma atili lelei ai ma fiafia atili ai i se taunuuga.

Ou uso pele, au uo pele, o le a i ai taimi pe a e mafaufau ai ua le mafai ona e tu i luga pe faaauau. Ia faatuatua i le Faaola ma Lona alofa. Faatasi ai ma le faatuatua i le Alii o Iesu Keriso, ma le mana ma le faamoemoe o le talalelei toefuataiina, o le a mafai ai ona e savali maualuga ma faaauau pea.

Uso e, matou te alolofa ia te outou. O loo matou tatalo mo outou. Ou te moomoo maimau pe ana mafai ona outou faafofoga ao tatalo ia Peresitene Monson mo outou. Pe o oe o se tama talavou, o se toeaina matua o loo umiaina le perisitua, po o se tiakono fou faatoa faauuina, o loo matou manatu atu ia te outou. O loo manatu mai foi le Alii ia te outou!

Matou te iloa o nisi taimi e faigata ai o outou ala. Ae ou te tuu atu ia te outou lenei folafolaga i le suafa o le Alii: tutulai ae ma mulimuli i tulagaaao o lo tatou Togiola ma le Faaola, o le a i ai se aso e te tepa ai i tua ma faatumulia i le loto faafetai e faavavau ona sa e filifili e faalagolago i le Togiola ma lona mana e sii ae oe ma faamalosia oe.

Au uo ma uso pele, e tusa lava pe faafia ona e see pe pa’ū, tulai ae! O lou taunuuga o se taunuuga mamalu! Tu i luga ma savali i le malamalama o le talalelei toefuataiina a Iesu Keriso! E te malosi atu nai lo le mea e te iloaina. E sili atu lou gafatia nai lo le mea e mafai ona e mafaufauina. E mafai ona e faia nei lava! O nei mea ou te molimau atu ai i le suafa paia o lo tatou Matai ma le Togiola, o Iesu Keriso, amene.