Juōn Jolet eo Ejjeļo̧k Wōņāān an Kōjatdikdik

Ro jeiū im jatū rōjitenbōro, jet iaami kar karwaineneik n̄an kweilok in jen mijinede ro an Kabun̄ eo an Jisōs Kriast im Armej ro Rekwōjarjar ilo Raan ko Āliktata. Mijenede rein em̧ōj aer bōlen kadede karwauneneik kom n̄an kōm̧m̧ane kelet e nan kōm̧m̧ane juōn bujen ippen Anij ilo ami naaj baptaij.

Jet iiami rej ron̄jake kōnke kom̧ kar bōk karwainene eo an juōn jinen ak jemen, ak ilo bar juōn wāween an juōn ajri, lewaj n̄an eok ilo juōn kōjatdikdik eo bwe kwonaaj kelet n̄an bōk bujen eo emōj am̧ kar kōm̧m̧ane ippen Anij ilo ioļap en mour ne am. Jet iami ro rej ron̄jake em̧ōj aer kadede kōm̧m̧ane kelet eo aer n̄an rooltok n̄an Rilo̧mo̧o̧r eo im rainin rej en̄jake lan̄lōn̄ in karwainene eo An.

Jekdoon wōn kwe im ia ne kwōj pād ie, kwōj kabjōr ilo peim̧ m̧ōņōņō an elōn̄ armej eļapļo̧k jen am̧ maron̄ antone. Aolep raan kab kajojo awa kwōmaron̄ kelet n̄an kōm̧m̧an ak kōjparok bujen ippen Anij.

Jekdoon ia eo kwōj pād ie ilo ial in n̄an jolet e menin letok eo an mour indeeo, kwōj kabjōr ilo peim̧ iien em̧m̧an n̄an kwaļok n̄an elōn̄ armej iaļ eo n̄an m̧ōņōņō eo eļapļok. Elan̄e kwōj kelet n̄an ejaak ak kōjparok bujen ippen Anij, kwōj kelet elan̄e kwōnaaj likūt menin jolet ko an kōjatdikdik n̄an ro remaron̄ in ļo̧o̧r waanjon̄ak ko am.

Kwe im n̄a em̧ōj arro jeram̧m̧ān kōn kallim̧ur eo an jolet jab in. Eļap aō m̧uri kōn m̧ōņōņō eo aō ilo mour in n̄an juōn em̧m̧aan ijjan̄in kar ioone ilo mour in. Ekar juōn riatijinemjen eo ekar erom̧ juōn jim̧aan-jim̧aan-jim̧ao. Ekar kōjolet eō kōn juōn jolet ejej wōņāān an kōjatdikdik. Ikōņaan kwaļok jet iaan m̧ōttan ko ekar kōm̧mani bwe en ejake menin jolet in n̄an eō.

Etan ekar Heinrch Eyring. Ekar lotak āinwōt juōn eo em̧weie. Jemen ekar ļap jikin ilo Coburg, im kiō ņa etan Germany. Jinen ekar Viscountess Charlotte Von Blomberg. Jemen eaar rilale ane ko āneen Kiin̄ eo an Prussia.

Heinrich ekar ajri eo erūtto tata nejin Charlotte im Edward. Charlotte ekar mej ke ej 31 an iiō, Ālkin mej eo an ajri eo nejin kein kajilu. Ejjab etto im Edward ekar mej, ālkin an kar luuji aolepen men ko m̧weien im jeram̧m̧an ko an ilo juōn likjab ippen jikin kōm̧m̧ān jāān. Ekar 40 wōt an iiō. Ekar ilo̧k jen jilu ajri atajinemjen.

Heinrich, jim̧aan-jim̧aan-jim̧m̧a, ekar luuji ro jinen im jemen im jolet ko reļļap an mour in. Ekar ļo̧o̧ki ilo bwebwenato ko an ke ekar en̄jake ke kōjatdikdik eo em̧m̧antata ekar bwe en ilok n̄an Amedka. Jekdoon n̄e ekar ejjeļo̧k nukin ak m̧ōttan ijo, elōn̄ an kar en̄jake in kōjatdikdik in etal n̄an Amedka. Ekar m̧okta etal n̄an New York City. Tok ālik ekar em̧m̧akūt ippen leddik eo jatin n̄an St. Louis, Misouri.

Ilo St. Louis, juōn iaan rijerbal ro m̧ōttan eaar juon Armej ro Rekwojarjar ilo Raan-ko Āliktata. Jen e ekar bōk juōn bok jidikdik kar je jān Elder Parley P. Pratt. Ekar riiti innem ekkatak aolep naan emaron in kar katak kōn Armej ro Rekwojarjar ilo Raan-ko Āliktata. Ekar jar n̄an jelā elan̄e ekar lukkun wōr enjel ekar waļok n̄an armej, elan̄e ekar wōr rikanaan emour, im elan̄e ekar lo kabun̄ eo em̧ool kar kwaļo̧k tok.

Ālkin ruo allōn̄ in tiljek etale in ekkatak im jar, Heinrich eaar wōr juon an ettōņak me kar jiron̄ e n̄an peptaij. Juōn em̧m̧aan eo etan im priesthood eo an ij likūt wōt ilo ittiņo̧, Elder William Brown, ekar kōm̧m̧ane kain̄i eo. Heinrich ekar baptaij ilo juōn ļe in dān in wōt ilo M̧aaj 11, 1855, ilo 7:30 jibbon̄.

Ij tōmak ke Heinrich Eyring ekar jelā ke ta in ij katakin kom̧ rainin ej m̧ool. Ekar jelā ke m̧ōņōņō eo an mour indeeo ej itok jen kotaan ko ilo baam̧le im rej wōnm̧aanļo̧k n̄an indeeo. Jekdoon n̄e ekāāl an lo karōk in m̧ōņōņō eo an Irooj, ekar jeļā ke kōjatdikdik eo an n̄an lan̄lōn̄ eo ejeļo̧k jem̧lokin ej pedped wot ioon kelet ko an ro jet n̄an ļo̧o̧r waanjon̄ak eo an. Kōjatdikdik eo an kōn mour indeeo ej pedped wot ioon armej ro rejjanin kar lotak.

Āinwōt m̧ōttan jolet in kōjatdikdik eo an baam̧le eo am, ekar likūt juōn bwebwenato n̄an ro bwijjin.

Ilo bwebwnato in imaron̄ en̄jake iakwe in an n̄an kōm̧ ro renaaj kar ļo̧o̧r e. Ilo naan ko an ij en̄jake kōjatdikdik eo an bwe ro bwijjin remaron̄ in ļo̧o̧r e ilo iaļ in ļo̧k n̄an m̧weo im̧ōd ilan̄. Ekar jeļā enaaj kar juōn kelet eo em̧m̧an n̄an kōm̧m̧ane bōtaab elōn̄ kelet dikdik ko. Ij kwaļo̧k:

“Jen iien eo ikar jinoin tata ron̄ an Elder Andrus kōnono ... Aolep ien ij kobaļo̧k ilo kweilo̧k ko an Armej ro Rekwojarjar ilo Raan-ko Āliktata im elukkun jeja an jab kobaļo̧k ilo iien kweļok kein, kōnke ej aō eddo n̄an kobaļo̧k ilo kweiļo̧k kein.

“Ikar jei ilo bwebwenato ko aō bwe ro nejū ren maron̄ ļo̧o̧r waanjon̄ak ko aō im jamin jowan kōn eddo in n̄an kobaļo̧k ippen ro rekwōjajar.”¹

Heinrich ekar jeļā bwe ilo iien kweiļok in kwojkwoj eo jemaron̄ kōkāāl kallim̧ur ko ad n̄an iien otemjej kememej Rilo̧mo̧o̧r eo im bwe Jetōb eo An en pād ipped.

Ekar ejja Jetōb in wōt im ekar rejtak e ilo mijen eo kar kūr n̄ani ālkin wōt jejjo allōn̄ in a kar bōk bujen baptaij. Eaar door āinwōt an waanjon̄ak jolet an pād tiljek n̄an mijen eo an ium̧win jiljino iiō ko ilo ta eo kar ņa etan Indian Territories. N̄an bōk kōtļo̧k eo an jān mijen eo an, eaar etetal jān Oklahoma n̄an Salt Lake Cith, juon kōtaan eo emaron̄ 1,100 m̧aiļ ko (1,700 km).

Ālkin wōt ekar kūr jen rikanaan an Anij n̄an em̧akūt n̄an turōk in Utah. Jān ijo ekar bar eoron̄ juōn kūr n̄an jebal ilo kapijuknen eo an Germany. Innem ekar bōk karwainene eo jen juōn Rijilōk an Irooj Jisōs Kraist n̄an jipan̄ kalōk juōn jikin n̄an Armej ro Rekwojarjar ilo Raan-ko Āliktata ilo tuion̄ in Mexico. Jen ijin kar kūr i n̄an jerbale juōn mijinede ilo Mexico City. Ekar ļap an kautiej kūr kein. Ekar kalbūni ilo juōn lōb jidikdik ilo jikin in Juárez, Chihuahua, Mexico.

Ij ba melele kein ejjab bwe in kwaļok kōn bun̄bun̄ ko an ak kōn ta ko ekar kōm̧m̧ani ak n̄an ro bwijjin. Ij ba bwe in kautiej e kōn waanjon̄ak in tōmak im kōjatdikdik eo ekar pād buruwōn.

Ekar eoron̄ kūr kein kōn tōmak eo an bwe Kraist eo em̧ōj an jerkakpeje im Jemedwōj Ilan̄ rekar waļo̧k n̄an Jospeh Smith ilo bukwōn wōjke ko ilo New York. Ekar eoron̄i kōnke ewōr an tōmak bwe kii ko an priesthood eo ilo kabun̄ eo an Irooj em̧ōj aer jepļaaktok kōn kajoor in liāp baam̧le n̄an indeeo, elan̄e enaaj ļap tōmak ippāer n̄an dāpij bujen ko aer.

Āinwōt Heinrich Eyring, aļap eo aō, kwōmaron̄ in eo m̧o̧ktata ilo baam̧le eo am n̄an tōl iaļ eo n̄an mour indeeo ilo ial in an bujen ko rekwōjarjar kōm̧m̧ani im kōjparoki kōn tenwadik im tōmak. Kajojo bujen ej itok ippen eddo ko an im kallim̧ur ko. N̄an kōjwōj, āinwōt an kar n̄an Heinrich, eddo kein rej jet iien pidodo ak enan̄in aolep ien rej eppen. Ak kememej, bwe eddo kein jet iien remaron in eppen kōnke wūn eo ej n̄an kōm̧m̧an bwe jen wōnm̧aanļo̧k ilo iaļ in n̄an mour indeeo ippen Jemedwōj Ilan̄ im Nejin Jitenbōro, Jisōs Kraist, ilo baam̧le ko.

Kwōj ke kememej naan ko jen bok in Abraham:

Anij ekar kwalok n̄an Abraham bwe ewōr juōn ej pād ilubūjid im ej āinwōt Anij, im ekar ba n̄an ro rekar pād ippen bwe ren etal ippen n̄an laļ im bōk men ko im kōm̧anm̧an laļin eo jemaron̄ jokwe ie;

Im renaaj kam̧ool n̄an kōj, n̄an lale elan̄e jemaron̄ kōmm̧an aolep men Irooj ad Anij enaaj kakien kōj;

Im elan̄e renaaj kōjparok ijo kuņaer m̧oktata naaj bar leļok n̄an er, im elan̄e jeban kōm̧m̧ane ijo koņaad innem jejjab maron̄ in bōk aibojoj ilo ejja aelōn̄ in kiin̄ eo ippen ro rekar rekar kōm̧m̧ane ijo koņaer m̧okta, im ro rekar kōm̧m̧ane ijo koņaer tok ālik naaj leļok aibojoj n̄an er n̄an indeeo im indeeo.²

Kōjparok ijo koņaad kein karuo ej pedped wōt ioon ad kōm̧m̧ani bujen ko ippen Anij im tiljek ilo ad kōm̧m̧ane eddo eo emenin aikuj jān kōj. Ej bōk tōmak ilo Jisōs Kraist āinwōt ad Rilomor n̄an kōjparok bujen ko rekwōjarjar ad n̄an aolepen ad mour.

Kōnke Adam im Eve rekar kōm̧m̧ane wōtlo̧k eo, ewōr ad kapo, melijjon̄, im mej āinwōt jolet eo an aolepen laļin: Mekarta, Jemedwōj Ilan̄ eo ej iakwe kōj ej letok n̄an kōj menin letok eo an Nejin Jitōnbōro, Jisōs Kraist, āinwōt ad Rilo̧mo̧o̧r. Menin letok in eļap im kōjeram̧m̧an eo an Pinmuur eo an Jisōs Kraist ej bōk menin jolet eo n̄an aolepen laļ: kallim̧ur eo an Jerkakpeje eo im maron̄ eo an mour indeeo n̄an aolep ro im rej lotak.

Kōjeram̧m̧an eo eļaptata an aolep kōjeram̧m̧an ko an Anij, mour indeeo, enaj itok wōt n̄an kōj ilo ad kōm̧m̧an bujen ko ilo kabun̄ eo em̧ool an Jisōs Kraist jen rikarejeran ro em̧ōj kōmālim er. Kōn wōtlok eo, jej aolep aikuiji karreo eo an peptaij im likūt ioon ko an pā ko n̄an bōk menin letok eo an Jetōb Kwōjarjar. Kain̄i kein rej aikuij in kōm̧m̧an jen ro rej kabjōr mālim eo an priesthood eo ejim̧we. Innem, kōn jipan̄ eo an Jetōb eo an Kraist im Jetōb Kwōjarjar, jemaron̄ kōjparok aolep bujen jej kōm̧m̧ani ippen Anij, eļaptata ko liļok ilo temple ko An. Ilo jōkjōk in wōt, im kōn jipan̄ in, jabdewōt emaron̄ bōk jolet eo an āinwōt ajri eo nejin Anij ilo baam̧le eo indeeo.

N̄an jet ro rej ron̄jake n̄a, emaron̄ in juōn etōņak eo ejej tokjen.

Em̧ōj ami lo ro jinen im jemen im rej būrom̧ōj kōn ajri ro rej kōwaan ak rej kelet n̄an rupe bujen ko aer ippen Anij. Ak rein jinen im jemen remaron bōk kaenem̧m̧an in bōro im kōjatdikdik jen bwebwenato ko an jinen im jemen ro jet.

Alma im ļaddik ro nejin Kiin̄ Mosaia rekar rool jen aer kar jum̧ae ņae bujen ko im kien ko an Anij. Alma eo edik ekar lo an laddik eo nejin Corianton oktak jen jerawiwi eļap n̄an tōmak ilo jerbal eo. Bok in Mormon eo ej bar āinwōt ļo̧o̧k e kabūlōn̄lōn̄ in an kar Rileman ro raar likūt itu rāejet manit in dike mour jim̧we n̄an delon̄ bujen n̄an mej bwe ren kōm̧m̧an aenem̧m̧an.

Juōn enjeļ kar jilkintok n̄an Alma eo edik im lomaro nejin Mosaia. Enjeļ eo ekar itok kōn tōmak im jar ko an jemeer im armej ro an Anij. Jen waanjon̄ak ko an kajoor eo an pinmuur eo ej jerbal ilo būruwōn armej, kwōmaron̄ bōk peran im kaenem̧m̧an.

Irooj eaar letok n̄an kōj aolep unin kōjatdikdik ilo ad likjab n̄an jipan̄ ro jej iakwe er bōk jolet eo aer indeeo. Ekar kōm̧m̧an kallim̧ur n̄an kōj ilo ad kajjeon̄ n̄an boktok armej n̄an E, jekdoon ke rej ko rej karwainene eo an n̄an kōm̧m̧ane. Ilo aer ko rej kabūrom̧ōj E, Ak E ejjab bōjrak, innem bar āinwōt kōj. Ekar kōm̧m̧ane waanjon̄ak eo em̧m̧āntata n̄an kōj kōn iakwe eo an emakijkij: “Im bar juon alen, ewi lōn̄ in Aō kar kakwelo̧ktok kom̧ āinwōt juon lo̧lo̧ ej kakwelo̧ktok jojo ko nejin ium̧in pā ko pein, aaet, O kom̧ armej in imōn Israel, ro raar bun̄, aaet, O kom̧ ro rej pād iJerusalem, āinwōt kom̧ ro ro raar bun̄; aaet, ewi lon̄ in Aō kar kakwelo̧ktok kom̧ āinwōt lo̧lo̧ eo ej kakwelo̧ktok jojo ko nejin, im kom̧ kar jab kōņaan”³

Jemaron̄ pedped ioon ikdelel eo eban likjab an Rilomoor eo n̄an boktok aolepen ajri in jetōb ro nejin Jemedwōj Ilan̄ n̄an rool n̄an m̧weo im̧wer ippen. Aolep jinen im jemen, jibūn im jim̧m̧an, im jibūn im jim̧m̧an-jim̧m̧an retiljek rej kwaļo̧k ilo ikdeelel jab in. Jemedwōj Ilan̄ im Rilo̧mo̧o̧r rej waanjon̄ak ko reweppān kōn ta eo jemaron̄ im aikuj kōm̧m̧ane. Rejjan̄in kipel ilo jim̧we kōnke jim̧we ej aikuj kālet. Rej kōm̧m̧an jim̧we ralikkar n̄an kōj, im Rej kōm̧m̧an bwe jān lo bwe leen ko rekaijoļjoļ.

Aolep armej ro rej lotak tok n̄an mour in rej bōk Meram eo an Kraist, eo ej jipan̄ kōj lo im en̄jake ta eo ejim̧we im ta eo ebōd.Anij ej letok rikajeran ilo mour in ro remaron̄, kōn Jetōb Kwōjarjar eo, jipan̄ kōj kile eo ekōņan bwe jen kōm̧m̧ane im ta eo ej kamoiki. Irooj ej kōm̧m̧ane bwe en em̧m̧ān paltokin n̄an kelet jim̧we eo ilo an kōm̧m̧an bwe jen en̄jake im̧we ko ad kelet ko ad. Elan̄e jej kelet jim̧we eo, jenaaj lo m̧ōņōņō—ien otemjej. Elan̄e jenaaj kelet men nana, enaaj itok būrom̧ōj im ememļo̧kjen kake—aolep ien. En̄jake kein rej lukkuun m̧ool. Bōtaab jet ien rej rum̧wij aer itok kōn jet un ko. Elan̄e enaaj kar m̧ōkaj an itok kōjeram̧m̧an ko, kelet jim̧we eban kar kalōk tōmak. Im kōnke jet ien būrom̧ōj kake jet ien ej rum̧wij an itok, ej bōk tōmak n̄an en̄jake aikuij n̄ān pikot jeorļok in jerawiwi m̧o̧kajļok ijelokin ālkin ad bōk en̄jake ko rōkabūrom̧ōjm̧ōj im kōmetak.

Jemed Liai ekar būrom̧ōj kōn kelet ko kar kōm̧m̧ane jen jet iaan ļōm̧aro nejin im baam̧le ko aer. Ekar juōn em̧m̧aan eo em̧m̧an—juōn rikanaan an Anij. Aolep ien ej kam̧ool kōn ad Rilomoor, Jisōs Kraist, n̄an er. Ekar juōn waanjon̄ak in pokake im jerbal ke Irooj ekar kūri bwe en ilok jen aolep m̧weie ko an laļ n̄an lo̧mo̧o̧ren baam̧le eo an jen jorrāān. Ilo jem̧ļokin mour eo an, Ekar kwaļok naan in kam̧ool n̄an ajri ro nejin. Āinwōt Rilomoor eo─im jekdoon kajoor in jokelet e oak būruweer im n̄an lo ilju im jaklaj jimor būrom̧ōj im men ko rem̧m̧an—Liai eaar wōnm̧aanlak wōt im jipan̄ boktok baam̧le eo an.

Rainin milien jen bwijjin Jemed Liai rej kwaļo̧k unin kōjatdikdik eo an n̄an er.

Ta eo kwe im n̄a maron̄ ekkatak jen waanjon̄ak eo an Liai? Kwōmaron̄ kōm̧m̧ane ilo buul jar im ekkatak jen jeje ko rekwōjarjar im ilo am̧ lale.

Ij kajjitōk bwe kwōn bōk jimor ļōmņak eo ekadu kitien im eo eaitok kitien ilo am kajjeon̄ leļok jolet in kōjatdikdik eo n̄an baam̧le eo am. Ilo iien eo ekadu kitien, enaaj wōr jorrāān ko im satan enaaj lam̧ōj. Im elōn̄ men ko n̄an kijenmej im kōttari, ilo tōmak, jeļā ke Irooj ej jerbal ilo iien eo an make im ilo jōkjōk eo an emake.

Ewōr men ko kwomaron̄ kōm̧m̧ani m̧okta, n̄e ro kwōj iakwe er rej iddik. Kememej bwe jar an baam̧le kajojo raan, katak kōn jeje ko rekwōjarjar an baam̧le, im kwaļok naan in kam̧ool ko ad ilo iien jar ļapļap eo rejjab pen im eļap aer jipan̄ ne ajri ro rej dik wōt. Ajri ro reddik ekkā aer en̄jake jetōb eo jen jon̄an ad kōtmene.

Elan̄e rej rūttoļo̧k, renaaj kememej al in jar ko raar al ippam̧. Em̧ol eļapļok jen al, renaaj kememej naan ko an jeje ko rekwōjarjar im naan in kam̧ool. Jetōb kwōjarjar eo emaron̄ boktok aolep men n̄an kōlmenļo̧kijeņ eo aer, ak naan ko ilo jeje ko rekwōjarjar im al ko naaj to aer pād. Ien kakememej kein naaj naaj kūnōōrtok er bwe ren maron̄ kōroltok er elan̄e rej jōbwābwe ium̧win jet ien, emaron̄ iiō, jen iaļ eo n̄an mweo im ej mour indeeo.

Jenaaj aikuji ļōmņak eo aetok kitien n̄e ro jej iakwe er rej kūnōōrtok jen laļ in im kōdo in pere rej kajeon̄ in kam̧ōjņoik tōmak eo aer. Elōn̄ ad tōmak, kōjatdikdik, im iakwe n̄an tōl kōj im kōkajoorļo̧k er.

Em̧ōj aō loe bwe āinwōt rikōkapilōklōk n̄an ruo rikanaan ro an Anij remour. Rej jet armej ro kōn jet m̧wil ko rejenolok. Bōtaab ewōr ippāer jim̧or lem̧ōņōņō eo ien otemjej. Elan̄e jabdewōt rej kwaļok jorāān ko kōn Kabun̄ in, uwaak eo aer ien otemjej ej “Oh, aolep men renaaj em̧m̧an.” Eļap aer jeļā kōn jorāān eo eļapļok jen armej ej kwaļo̧k.

Rej barāinwōt jeļā kōn wāween eo an Irooj, im aolep ien rej kōjatdikdik kōn aelōn̄ in kiin̄ eo An. E ej jeban eo. E ekajoor-bōtata im E ekea. Elan̄e kwōnaaj kōm̧m̧an bwe En ritōl n̄an baam̧le eo am, aolep men renaaj em̧m̧an.

Jet iaan ro jibun Heinrich Eyring em̧ōj aer jebwābwe. Ak elōn̄ iaan ro jibūn-jibūn-jibūn rej ilok n̄an temple eo an Anij ilo 6:00 awa jibbon̄ n̄an kōm̧m̧ani kain̄i ko n̄an ro jim̧aer rejjan̄in kar iooner. Rej kōm̧m̧ane jen menin jolet eo an kōjatdikdik ekar likūt itulik. Ekar likūt itulik juōn jolet eo im elōn̄ iaan ro būjjin rej amen e.

Ālkin aolep men jemaron̄ kōm̧m̧ane ilo tōmak, Irooj enaaj bōbrae kōjatdikdik ko n̄an kōjeram̧m̧an ko reļļapļo̧k n̄an baam̧ļe ko ad jān ad maron̄ pijaikļo̧k. Ekōņaan men ko rem̧m̧āņ tata n̄ān er im n̄ān kōj, āinwōt ro Nejin.

Jej aolep ajri ro nejin Anij eo emour. Jisōs RiNazareth eo ej Nejin Jitōnbōro im ej ad Rilomor eo em̧ōj an jerkakpeje. En̄in ej kKabun̄ eo An. Ilo ie ej pād kii ko an priesthood eo, innem bam̧le remaron̄ ippen doon indeeo. En̄in ej menin jolet eo ad ejej wōņāān an kōjatdikdik. Ij kam̧ool ej m̧ool ilo etan Jisōs Kraist, amen.