Nej Puas Tsaug Zog Kom Dhau Kev Txum Tim txoj Moo Zoo Rov Qab Los?
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Peb txhua tus, peb tsev neeg, thiab Khetos lub Koom Txoos muaj nqis heev peb thiaj yuav tsum tsis txhob lam ua txoj hauj lwm dawb ceev xwb.
Yuav luag 200 xyoo tas los, tib neeg nyiam nyeem ib zaj dab neeg ntawm Amelikas teb chaws hu ua “Rip van Winkle.” Rip yog ib tug neeg tub nkeeg uas paub ua ob yam zoo heev: tsis ua hauj lwm thiab dim ntawm nws tus poj niam.
Muaj ib hnub, thaum nws nyob pem roob nrog nws tus aub, nws nrhiav tau ib co txiv neegjuas hnav khaub ncaws txawv thiab ua si. Tom qab nws haus ib feem ntawm lawv cov cawv, Rip pib tsaug zog heev thiab qis muag tau ib me pliag. Thaum nws rov qab rua muag dua, nws ras dheev pom tias nws tus aub tsis nyob, xej noj nws rab phom, thiab nws twb tuaj hwj txwv ntev ntev lawm.
Rip rov qab mus rau nws lub zos pom hais tias txhua yam twb hloov lawm. Nws tus poj niam tuag lawm, nws cov phooj ywg tsis nyob, thiab lwm tus twb muab daim duab txog tus Vaj Ntxwv George thib peb nyob hauv lub tsev haus cawv pauv nrog ib daim duab ntawm ib tug uas nws tsis paub—yog tus Thawj Tub Rog George Washington.
Rip van Winkle twb tsaug zog tau 20 xyoo lawm! Thiab, thaum lub sij hawm ntawd, nws tsis tau pom ib lub caij zoo nyob hauv nws lub teb chaws zaj keeb kwm—nws tsaug zog dhau Kev Tsov Rog Amelikas.
Thaum lub Tsib Hlis Ntuj xyoo 1966, Dr. Martin Luther King Jr. siv zaj dab neeg ua ib qho piv txwv rau nws zaj lus hu ua “Tsis Txhob Tsaug Zog Kom Dhau Kev Sawv Rog.”1
Hnub no, kuv xav siv lub ntsiab no thiab nug peb txhua tus uas tuav Vajtswv lub pov thawj hwj hais tias: nej puas tsaug zog kom dhau Kev Txum Tim Txoj Moo Zoo Rov Qab Los?
Peb Nyob Hauv lub Caij Nyoog uas Txoj Moo Zoo Txum Tim Rov Qab Los
Tej lub sij hawm peb xav tias Kev Txum Tim Txoj Moo Zoo Rov Qab Los yog ib qho uas twb tiav lawm, tau muaj thaum yav tas los xwb—Yauxej Xamiv tau txhais Phau Ntawv Maumoos, nws txais yuav cov yuam sij pov thawj hwj, tau txhim tsa lub Koom Txoos. Tiam sis, Kev Txum Tim Txoj Moo Zoo Rov Qab Los yog ib qho uas tshwm sim tam sim no; peb nyob hauv lub caij nyoog ntawd tam sim no. Yog “txhua yam uas Vajtswv tau qhia los lawm, txhua yam uas Nws tab tom qhia tawm,” thiab peb ntseeg tias Nws tseem yuav qhia tawm ‘tej yam loj thiab tseem ceeb ntxiv.’2 Cov kwv tij, tej yam uas tshwm sim niaj hnub no yog tej yam uas cov yaj saub qhia tias yuav muaj los yav tom ntej kom npaj rau peb tus Cawm Seej, Yexus Khetos, txoj Kev Los Zaum Ob.
Nov yog ib lub caij nyoog zoo kawg tshaj plaws nyob hauv lub ntiaj teb zaj keeb kwm! Cov yaj saub thaum ub tau xav pom peb lub caij nyoog.
Thaum twg peb tsis muaj sij hawm ntxiv nyob hauv lub ntiaj teb no, ces peb yuav hais dab tsi txog qhov uas peb tau pab li cas nyob hauv lub caij tseem ceeb ntawm peb lub neej kom ua tus Tswv txoj hauj lwm? Peb puas hais tau hais tias peb twb siv zog ua hauj lwm kawg siab kawg ntsws thiab kawg dag kawg zog? Los sis peb puas yuav hais tias peb tau saib xwb?
Nyaj muaj ntau yam uas ua rau peb tsaug zog me ntsis thaum peb hais txog kev txhim tsa Vajtswv lub nceeg vaj. Cia kuv hais txog peb yam. Thaum kuv ua li no, kuv caw nej xav seb puas hais txog nej. Yog tias nej ua tau zoo dua, kuv thov kom nej xav seb nej yuav hloov dab tsi kom ua zoo dua.
Kev Qia Dub
Qhov ib, yog kev qia dub.
Cov uas qia dub xav kom muaj raws li lawv lub siab nyiam thiab lub siab xav. Lo lus nug tseem ceeb rau tus neeg qia dub yog “Kuv yuav txais tau dab tsi?”
Cov kwv tij, kuv paub nej pom tias qhov xeeb ceem no yeej tawm tsam tus xeeb ceem uas yuav tsum muaj kom ua tau Vajtswv lub nceeg vaj.
Thaum peb xav pab peb tus kheej thiab tsis xav pab lwm tus, ces ua rau peb tsom ntsoov rau peb lub siab nyiam thiab peb txoj kev muaj npe xwb.
Twb nyuaj rau tej tiam neeg yav tas los kom lawv tsis xav txog lawv tus kheej xwb, tiam sis niaj hnub no peb haj yam xav txog peb tus kheej tas li. Puas tsim nyog uas phau Oxford Dictionary hais tias lo lus “selfie” yog lo lus ntawm xyoo tas los?3
Peb ib txwm xav kom lwm tus saib peb, thiab tsis ua txhaum yog tias peb lam nyob me ntsis thiab ua si. Tiam sis thaum twg peb xav xav “nplua nuj thiab tau ntiaj teb ntsej muag”4, ces peb yuav tsis txais kev txhiv dim thiab kev xyiv fab uas los ntawm qhov uas peb rau siab ua tus Tswv txoj hauj lwm.
Yuav ua dab tsi kom kho qhov no?
Lo lus teb qhov no yeej muaj nyob hauv Khetos tej lus qhia.
“Yog leej twg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaub lig nrog kuv mus.
“Rau qhov tus uas khuv xim nws txoj sia, tus ntawd yuav tsis tau txoj sia. Tiam sis tus uas tsis khuv xim nws txoj sia, vim nws ntseeg kuv thiab mus qhia Txoj Moo Zoo, tus ntawd yuav tau txoj sia.”5
Cov uas txaus siab muab lawv lub neej rau tus Cawm Seej thiab ua hauj lwm rau Vajtswv thiab tib neeg txhua tus lawv txais tau ib lub neej uas muaj nplua mias uas tus uas qia dub yeej yuav tsis txais. Cov uas tsis qia dub pub lawv tus kheej. Tej zaum lawv ua tej yam me me los ntawm kev siab hlub uas zoo rau lwm tus xws li: luag nyav, tuav tes, khawm ib tug neeg, siv sij hawm mloog lwm tus, hais lus mos muag, los yog ib yam dab tsi kom lwm tus paub tias yus hlub nws. Tag nrho tej kev ua siab zoo li no yuav hloov tib neeg lub siab thiab lub neej. Thaum peb ua raws li peb muaj cib fim ua kom hlub thiab pab lwm tus, tsis hais peb tus khub thiab tsev neeg los yog, peb txoj kev hlub Vajtswv thiab kev txawj pab lwm tus yuav loj tuaj.
Cov uas pab lwm tus yuav tsis tsaug zog kom dhau Kev Txum Tim txoj Moo Zoo Rov Qab Los.
Kev Muaj Yees
Ib yam ntxiv uas ua rau peb tsaug zog kom dhau lub caij nyoog tseem ceeb ntawm lub ntiaj teb no yog kev muaj yees.
Kev muaj yees pib zuj zus. Kev muaj yees yog tej yam uas yus pheej rov qab ua ntau zaus zoo li tej txoj xov uas pheej ntos kom tuab zuj zus mus. Tej yam tsis zoo uas peb pheej ua muaj peev xwm los ua kev muaj yees.
Tej kev saw hlau ntawm kev muaj yees yeej muaj ntau hom, xws li kev saib duab liab qab, haus cawv, sib deev, haus tshuaj phem, haus luam yeeb, twv txiaj, ua hauj lwm, Internet, los yog kev ua neej hauv Internet. Dab Ntxwg Nyoog, peb tus yeeb ncuab, muaj ntau yam cuab yeej uas nws siv kom nyiag peb txoj kev muaj peev xwm ua peb txoj hauj lwm nyob hauv tus Tswv lub nceeg vaj.
Peb Leej Txiv Saum Ntuj Ceeb Tsheej nyuaj siab thaum nws pom ib txhia ntawm Nws cov tub uas txaus siab ncav tes cia lwm tus khi saw hlau ntawm kev muaj yees rau lawv tes.
Cov kwv tij, peb muaj lub pov thawj hwj mus ib txhis ntawm Vajtswv uas Muaj Hwj Chim Tag Nrho. Peb yeej yog cov tub ntawm tus uas Siab Tshaj Plaws thiab yeej muaj peev xwm tshaj piav tau. Vajtswv tsim peb kom peb ya tau nyob saum ntuj ceeb tsheej. Nws tsis tsim peb kom peb raug khi nyob hauv lub ntiaj teb, raug kaw nyob hauv tej lub nkuaj uas peb tau ua rau peb tus kheej.
Yuav ua dab tsi kom kho qhov no?
Qhov thib ib peb yuav tsum to taub hais tias kev muaj yees yog ib qho uas yooj yim tiv thaiv thiab nyuaj kho. Raws li tus Cawm Seej hais tias, “Tsis txhob cia ib yam txhaum ntawm tej yam no nkag rau hauv nej lub siab.”6
Ob peb xyoos tas los, Thawj Tswj Hwm Thomas S. Monson thiab kuv wb muaj cib fim saib Air Force One—yog lub nyab hoom uas thauj tus Thawj Tswj Hwm ntawm lub Teb Chaws Amelikas. Pawg Secret Service saib xyuas txhua yam kom muaj kev nyab xeeb tag nrho, thiab kuv luag me ntsis thaum lawv cov ntawd kuaj xyuas tus yaj saub ua ntej wb nce mus rau hauv.
Tus kws tsav nyab hoom caw kuv zaum hauv tus thawj tsav nyab hoom lub rooj zaum. Yog ib qho zoo kawg nkaus uas kuv rov qab zaum ntawm qhov chaw tsav nyab hoom zoo ib yam li kuv tau tsav tau ntau xyoo. Ua rau kuv xav txog thaum kuv tsav nyab hoom hla tej dej hiav txwv thiab tej teb chaws. Ua rau kuv nco txog tej kev nce thiab kev tsaws nyab hoom nyob ntawm tej tshav dav hlau nyob thoob plaws lub ntiaj teb.
Ua rau kuv txawm tso kuv txhais tes tuav nkaus plaub qho qhib roj ntawm B747 ntawd. Ces tam sim ntawd, kuv hnov ib lub suab uas kuv hlub thiab kuv paub zoo—yog Thomas S. Monson lub suab.
Nws hais tias, “Dieter, tsis txhob xav li ko.”
Kuv tsis lees tias kuv xav li ntawd, tiam sis tej zaum Thawj Tswj Hwm Monson txawj paub kuv xav li cas.
Thaum twg peb raug ntxias kom ua tej yam uas peb yuav tsum tsis txhob ua, cia peb mloog tej lus ceeb toom ntawm peb tsev neeg, cov phooj ywg, peb tus yaj saub, thiab tus Cawm Seej.
Kev tiv thaiv zoo tshaj plaws kom txhob raug qhov uas muaj yees yog kev tsis txhob pib.
Tiam sis yuav ua li cas rau cov uas twb muaj yees lawm?
Cia li paub hais tias, muaj kev cia siab. Cia li nrhiav kev pab los ntawm cov uas hlub nej, lub Koom Txoos cov thawj coj, thiab cov kws ntuas neeg. Lub Koom Txoos pab cov uas muaj yees los ntawm lub Koom Txoos cov thawj coj, Internet7 thiab nyob hauv tej qhov chaw los ntawm LDS Family Services.
Cia li nco ntsoov, nrog tus Cawm Seej txoj kev pab, nej dim tau kev muaj yees. Tej zaum yog ib txoj kev ntev thiab nyuaj, tiam sis tus Tswv yuav tsis tso nej tseg. Nws hlub nej. Yexus Khetos tau theej nej lub txhoj kom pab nej hloov siab, kom pab nej dim kev txhaum.
Qhov tseem ceeb yog nej yuav tsum pheej siv zog—tej lub sij hawm tib neeg yuav tsum sim ua ob peb zaus ua ntej lawv ua tau. Yog li ntawd tsis txhob tsum. Tsis txhob poob siab. Cia li tso siab rau tus Tswv, thiab Nws yuav muab hwj chim rau nej dim tau. Nws yuav cawm nej dim.
Kuv cov kwv tij, nyob deb ntawm tej yam uas yuav ua rau nej muaj yees. Cov uas ua li ntawd yuav ua hauj lwm rau Vajtswv kawg siab kawg ntsws thiab kawg dag kawg zog.
Lawv yuav tsis tsaug zog kom dhau Kev Txum Tim txoj Moo Zoo Rov Qab Los.
Lwm lub Hom Phiaj
Ib qho uas tav peb kev kom peb tsis txhob rau siab ua txoj hauj lwm no yog ntau lub hom phiaj uas peb muaj. Peb ib txhia maj heev ua rau peb xav tias peb yog ib lub tsheb uas cov tsiaj rub—txhua tus nyias rub peb mus rau nyias txoj kev. Lawv siv zog rub peb, tiam sis lub tsheb tsis mus qhov twg.
Ntau zaus peb siv zog kawm ib qho kev lom zem, ntaus pob ncaws pob, kawm ua hauj lwm, thiab kawm txog tej teeb meem hauv zej zog los yog kev kav teb chaws. Tej zaum tag nrho tej ntawd zoo, tiam sis tej ntawd puas pab peb muaj sij hawm thiab muaj zog ua tej yam uas tseem ceeb tshaj plaws?
Yuav ua dab tsi kom kho qhov no?
Ib zaug ntxiv, lus teb twb los ntawm tus Cawm Seej tej lus:
“Nej yuav tsum hlub tus Tswv nej tus Vajtswv kawg siab kawg ntsws, kawg plab kawg plawv.
“Nqe no thiaj yog lus txib uas tseem ceeb dua ntais.
“Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev.”8
Txhua yam nyob hauv peb lub neej tsis tseem ceeb npaum li ob lub hom phiaj no.
Txawm peb ua hauj lwm hauv lub Koom Txoos, yog ib qho yooj yim siv sij hawm ntau lam ua hauj lwm tiam sis tsis mob siab ua ib tug thwj tim.
Cov kwv tij, vim peb tuav lub pov thawj hwj peb tau cog lus tias peb yuav hlub Vajtswv thiab peb cov neeg zej zog thiab peb txaus siab qhia txog kev hlub ntawd los ntawm tej yam peb hais thiab ua. Nov yog lub ntsiab ntawm qhov uas peb yog Yexus Khetos cov thwj tim.
Cov uas ua raws li tej ntsiab cai no yuav tsis tsaug zog kom dhau Kev Txum Tim txoj Moo Zoo Rov Qab Los.
Kev Hu Kom Tsim Los
Tus Thwj Tim Povlauj sau hais tias, “Tus neeg uas pw tsaug zog koj cia li tsim, thiab sawv hauv qhov tuag rov qab los, thiab cia Yexus Khetos ci rau koj pom kev.”9
Kuv cov phooj ywg, cia li paub tias nej yog cov tub ntawm qhov kaj.
Tsis txhob qia dub! Tsis txhob ua tej yam uas muaj yees! Tsis txhob cia lwm lub hom phiaj ua rau nej tsis quav ntsej los yog tsis rau siab ua thwj tim zoo thiab siv lub pov thawj hwj ua hauj lwm pab lwm tus!
Peb txhua tus, peb tsev neeg, thiab Khetos lub Koom Txoos muaj nqis heev peb thiaj yuav tsum tsis txhob lam ua txoj hauj lwm dawb ceev xwb.
Kev ua ib tug thwj tim ntawm Yexus Khetos tsis yog ib qho uas peb ua tau ib zaug ib lub lim tiam los yog ib zaug ib hnub. Yog ib qho uas peb yuav tsum siv zog ua txhua lub sij hawm.
Tus Tswv txoj kev cog lus rau cov uas tuav Nws lub pov thawj hwj yuav luag zoo dhau peb thiaj tsis to taub.
Cov uas ua raws li ob lub pov thawj hwj thiab rau siab ua lawv tej hauj lwm mas tus Ntsuj Plig yuav ntxuav lawv lub cev kom dawb huv. Yog li ntawd, yuav muab tag nrho uas peb Leej Txiv muaj rau lawv.10
Kuv ua tim khawv tias lub hwj chim ntawm Yexus Khetos txoj Kev Theej Txhoj thiab lub hwj chim ntawm tus Vaj Ntsuj Plig Dawb Huv kho thiab cawm tau tib neeg. Yog peb lub cib fim, peb lub luag hauj lwm dawb ceev, thiab peb txoj kev xyiv fab kom ua raws li tus Cawm Seej txoj kev hu thiab txaus siab thiab nrog tag nrho peb lub siab nrog Nws mus. Thov kom peb yuav “cia li hle tej saw hlau uas khi [peb], thiab cia li tawm khiav ntawm txoj kev tsaus ntuj, thiab sawv tsees hauv tej plua av los.”11
Thov kom peb yuav tsim los thiab tsis txhob nkees ua zoo, vim peb teeb lub hauv paus ntawm ib txoj hauj lwm tseem ceeb,12 uas twb yog npaj rau tus Cawm Seej txoj kev los. Cov kwv tij, thaum peb muab qhov kaj ntawm peb tus yam ntxwv ntxiv rau qhov tim khawv txog kev tseeb uas zoo nkauj muaj hwj chim, peb yuav tsis tsaug zog kom dhau Kev Txum Tim Txoj Moo Zoo Rov Qab Los. Kuv ua tim khawv txog qhov no thiab thov Vajtswv foom koob hmoov rau nej los ntawm peb tus Xib Hwb lub npe, Yexus Khetos amees.