Bo Mesisiich e Bekeu!

Rodam er ngak, ng mera lungil a renguk el lemuut e mei obengkemiu. Ak meluluuch er a ngesou er a babeluades er chelecha mocha techellek el mo mengedecheduch er kemiu.

A ikrel tial Conference Center a lmuut el betok el telael el kldibel er a ikelesia er a ikel le ngarngii er a betok el beluu er a beluulechad. Ngar ngii a de kaisisiu er ngii el omak er kid el mo dmak, el le kede mla nguu a ngerachel el mo oba priesthood er a Dios.

Ke de ngar tial beluulechad er a klou a belkul taem er a reksi er ngii. A techelled a diak el ngemed, eng di kede chelbangel a betok el chetituokel el tekoi, a bebil er ngii a dilubech er chelechal taem er a beluulechad.

Kede kiei er a beluu el kldung, el klou er ngii, a mla mechoit, e a klengit a di chemotang, e a omengetikaik el mo cheroid er a melemalt e chibutek el rael a di iliuekl er kid. Ke de chelebangel a odubech me a cheleblad el melemall a ungil omeruul e melasem el omtechei a chelsengsang el uldasu me a omeruul er a leko te mellomes el ngarngii a skulir.

A uchul a ikaikid me a bebil er a omelasem, e a omelilt e blechoel el de chelbangel el ngii a sebechel mo olechotel a de bo er ngii er a ngar medad. Me a lsekum me kid el rokui a mo ngiltii a melemalt el uldasu, e a blekeu a dousbech er ngii—bekeu el kmu ng “Diak” sel kirel, bekeu el kmo “Oi” sel le kirel, bekeu el mo meruul a melemalt e le ngii el melemalt.

Me sel le klou a blekeradel er a beluu el merael mo cheroid er a ungil teletael me a osisechakl el Rubak a mla meskid, eng sebeched el mo mokedong el mo mesebechakl a ikel ngii a doumerang. Kid kede bekeu el mo rulii a tiang?

A President J. Reuben Clark Jr., el mla er a Kot el Presidency el betok el rak a dilu el kmo: “Ng ulecholt el omeruul el tirke el oba klaumerang … a mlo omelchesiu el, sekum te kongei er a mui el klaumerang er tir e te mo olechau a tekoi el mo er tir el ulekako er a re diak loumerang el le kaodengei chad, meng kirir el ngodechii me a lechub e te smodii loridii a klaumerang ma lechub e te chongchengchii, malechub e a leko te mengoit er ngii. Tirkaikid a cheblad.”¹ Ng diak a ta er kid el soal nguu tial ngakl, e ngdi ng meringel er kid el ocholt a klaumerang er kid er a bibil er a teletael?

Ng sebeched el ngosukid er a ikel soad el meruul el melemalt a lsekum me kede ngoikid el mora basio el mo teloi a omeruul el mengetikaik a uldesued el mo ungil e a Reng er a Rubak a mo chelellakl.

Ak loltkii el milenguiu er a sesei el taem ruriul er a omellach er a chedam el mora ngelekel sechal er sera lebo er a skuul: “A lsekum me ke mometik er kau er a diak el kirem el ngarngii, mcheridau!” Ak meskemiu a derta er kemiu tial el osisechakl: “Alsekum me ke mo metik er kau el ngara diak el kirem el ngarngii, mcheridau!”

A okedong er a blekeu a blechoel el mei er a derta er kid. Bek el sils er a klengar er kid e ke dousbech a blekeu—ng diak el dil bora ikel meklou a belkul tekoi; eng di ng bai omesingd sel bocha dolilt el kirel a teletael el iliuekl er kid. Ng dilung a melluches a hong el Scottish el Robert Louis Stevenson: “Bek el sils e a blekeu a diak el sal meues. Eng di blekengem a diak de dung diak a belkul e le ngii el diak a rechad el omrotech malechub el oldiu el kirem me a diak a seked el loldiu er a ngklem.” ²

A blekeu e kakerous a teletelel. Ng milluches a Kristiano el Charles Swindoll: “A blekeu a diak el di le ngara blil a mekemad … malechub e bekeu el medechemii a merechorech er a blim. A meral skeng er a blekeu a chelellakl. A ikang a skeng er a rengud, el di ngara klaumerang sel diak a chad el omes, … el di uai a chomdechor el di kau el tang ngii me sel diak a chad el medengei omoruul.”³ Ak mo dochelir el kmo tiang el ngara chelsed el blekeu a ngarngii a meruul a llemalt ngii me sel de medakt, mesebechakl a doumerang ngii me sel loltuub er kid, e urekodel a doumerang ngii me sel lorrouk er kid el mo diak a resechelid malechub a deruchelled er a buai. Ngike el dechor el mesisiich el kirel a llemalt a ngarngii a techellel a lebebil er a taem el mo diak el luldimukl e mo diak a rechad el sorir ngii.

Se er ak soldau el ngara United States Navy er a Ongerul Mekemdil a Beluulechad, e ak silubii a blekeu lomeruul, bekeu er a chelsel a kengaol tkeoi, me a okesiul a blekeu. A ta er a diak bo kubes er ngii a dilmuk e bekeu el teruich me a eai a rekil el chad er a diall—ng diak el chedal a ikelesia—el di mlak el medakt el meluluuch. Chelsel tirka el eru el dart me a okeim el soldau, e ngii a di mle ngii el tang el bek el kebesengei e ng moutubuach er a chebodel a dukkellel, e sel bebil er a taem e mo er ngii a diu er a ulekako me a otuub er a rediak loumerang. Meng terrob, e milluluuch el mora Dios. Ng dimlak el bol medakl. Ng dimlak el kora mo stob. Ngika mle bekeu.

A kulerrenges er a kesai el sesei el taem ruriul er a okesiu er a ta el meral dimlak el bekeu a rengul. A tal sechelei a uluchais er a tara melisiich a klaumera el miting er a sakrament el ngii me a bechil a mlo er ngii er a ward er tir. A tara ngeasek el buik el ngara obis er a re pirest er a Aaronic Priesthood a rirutech a rengrir a re mla er tial miting er a longedecheduch er a klemerang er a ebangkelio me a deureng er a oltirakl a llach. Ng ulechotii a mesisiich, e remutech a rengud el klaumerang er a ldechor er a medal, ng dilechor el beches e ungil loubail er a becheleleu el chelchedal a bail me a tie.

Uriul er tial osisiu el sils, ng ka el redil me a bechil a ulemekall el merolang, e milsa ng ka el osisiu el ngeasek el buil el kmal rirutech a rengrir er a sesei el sikang ruchei. Chelechang, e a osenged er ngii a kmal klou el ngoded er a lorael er a rael el oubail a diak lungil bail—e meloko a dekool. A sechelik me a bechil a dimlak el dil miltirm a rengrir te dirrek el mlo mekngit a rengrir, e mlo rrau a rengrir el me kera e sebechel kuk ta er a chad el ngara sakrament miting e okor e di chelsel a mereched el taem eng kuk ua le ngoded el chad.

Rodam, kau ke osisiu el chad er sel omngarngii me a ngiidi el ngara el moruul—chad el ngii a soal a Demad er a babeluades obom uai ngii e ng kel chad el kau a kirem el mo ngii?

A cheldecheduch el mlotobed er a national magazine, el merael chisel chad er a basket er a American NCAA el ngkel a Jabari Parker, el chedal a Ikelesia, a mlongit el mo ouchais er a kot el ungil omelach el ngiluu er a demal. A Jabari e ulenger, “[A demak] a dilu el kmo, Di bom osisiu el chad er a milkolk me a mellomes.”⁴ Ng kmal lungil tekoi, e rodam, el mo er kid el rokui.

A chedaol llechukl a mui er ngii a okesiu er a teletelel a blekeu lousbech a derta er kid er chelechang. A profet el Daniel e ulechotii a ngarbab el blekeu er a losebechakl er a lodengei el melemalt e chochotii a blekengel el mo meluluuch, el mlo er ngii a ulecheracheb lobengkel a kodellel a lsekum eng mo rulii.⁵

A blekeu a smodii a klengar er a Abinadi, el ullecholt er a ngara rengul el mo tongetengii a klengar er ngii er a bai le bol ikrii a klemerang.⁶

Kid ng diak de modubech er a klengar er a eru el telael el ngeasek el soldau er a Helaman, el mlosisechakl e ulechotii a ulsbechellel a bekeu el moltirakl a osisecheklir a redemerir me a rederrir, el mo kedung e klikiid?⁷

Alta e a derta er a ikal omeruul er a chedaol llechukl a mo er cheungel a okesiul a Moroni, el mle bekeu el outekangel el ngara llemalt el mo er sel kot lulebongel.⁸

Klengar er ngii el rokir, e a Profet Joseph Smith a ulecholt a betok el okesiu er a blekeu. A ta er a kmal smiich el tekoi a dilubech er sera le ngii me a tara odam blel dmak el llechotel er a bambatel—kau momdasue, dmak el lechotel—e mle kelebus er a dirkak bol merek el blai er bita er a blai er a court er a Richmond, Missiouri. A Parly P. Pratt, el mle uldimukl er tirka el kelebus, a milluches el mesaod er a ta el kesus: “Aki mlo ultuil el diua ki bechiuang er a mocha tal sikang el imiit er a sueleb ra klebesei, a dingemang me a rengmam a mle mui er a ringel, er a ki morrenges el betok el sikang a otuub, sius, mekngit e mekikiongel tekoi el lolekoi a re remengkerngam.”

Ng millemolem a Elder Pratt:

“Ak kulerrenges e mocha imis el chetik, mechas a renguk, medakl, e mui er a melemalt el ngasechereng me ak meringel lorreked er ngak eleng soak el modechor e mengokl er tirka el mengkar; eng di dimlak a ngera el kdu er a Joseph, me a ngii de el ta er kemam, me ak uaisei el milechiuaiu er bita er ngii e medengei el kmo ng mekar. Ng di mle merreched el mo dechor, e milengedecheduch el di ua ngerel a derumk, malechub a raichong, el melekoi, el kmeed el uai kal el tekoi, sel kumdasu:

“‘Llak mongerodech. … Nga er a ngklek a Jesus Kristo e ak oklemiu, e kmu er kemiu el mo chelellakl; Ng diak lmuul el kiei er tiang e kurrenges er a choua ika el omelekoi. Mterbengii a uai sei el cheldecheduch, e leng kau malechub eng ngak a mad er chelechal taem.’”

A Joseph “a dilechor el temat el di ua ngarbab el chad,” er a losaod er ngii a Elder Pratt. Ng millechet er a bambatel, e dimlak a dongu er a mekemad er ngii, eng ding mle klou a rengul e mle kuoll. Ngulemes el meriou er tirka el medekta el mengkar el merola el bedul a urukel me a osesus er bitar ochil.⁹

Ng diak el rokui el omerellel a blekeu a meskid a klou el ongasireng, malechub a mereched el nger, e ngdi a rokui a meskid a budech er a uldesued me a klemedengei el kmo a llemalt me a klemerang a mla mesebechakl.

Ng meringel er a chad a le dechor er a klaumerang er ngii alsekum me a loruul a ultuil er a mengedengodech el uldesuir me a kengei er a rebetok. A dousbech a blekengel a Daniel, Abinadi, Moroni, malebchub a Joseph Smith me bol sebeched el mesisiich el oltirakl a dodengei el klemerang. Te mle bekeu el meruul er a diak el ngii a beot ng bai melemalt.

Ke de rokui el mo chemau a dakt, soiseb er a otuub, e chobangel a ultok. Mei—kid el rokui—bode bekeu el omtok a sorir a rebetok, bekeu el dechor el kirel a doltirakl el tekoi. A bekeu, el diak dosiik a mo tabesul, a meskid a klengeltengat el kengei er a Rubak. A blekeu a mo outeliil el ngra rengud e mo soad el bedengel a kldung alsekum eng diak di domes er ngii el sebeched el kongei el mo mad ke de dirrek el oba blakelreng el mo kiei el melemalt. Me sel dorael bedul uchei, el melasem el kiei er sel meral teletelel, e kede meral mo ngmai a ngesou er a Rubak e mo metik er a ongelaod er a tekingel. Ng meral soak sel yaksok el llechukl er a babier er a Josua el kmo:

“E ngak a mo obengkem, ng kmal diak bo kchitau. …

“… Bo mesisiich e bekeu; lak medakl ma lechub e le telirm a rengum ele ngak el Rubak el Dios er kau a mo obengkem er a ikel bek el bor ngii.”¹⁰

Betik er a renguk el rodam, oba blekeu er a doumerang, e me douchais, lobengkel a Apostol Paulus, “Ng diak a rrengek er a tekingel a Kristo.”¹¹ E okor tial osisiu el blekeu, bo doltirak er a osisecheklel a Paulus: “Bo lungil a blekerdelem me losuub er kau a ruumerng, er a ungil el omerellem ma tekoi er a ngerem, ma bltikerreng er kau, ma blakerreng er kau er a ngerchelem ma klikiid el kelchad er kau.”¹²

A meklou el kerior e mei e merael, e ngdi a mekemad el kirel a rengul a chad a melemolem el diak el stob. A Rubak a mla meketeklii el mo er kau, me a ngak, me a rolab a priesthood er a ngii di el ker el mo suub e mo medengei a omeruul el oba blakelreng er sel obis el ngii a om ngiluu a ngerachel el kirel.”¹³ E sikid e kede mo uai a, ikel lolekoi a Apostol Petrus el “ngarbab el pristhood,”¹⁴ el dmak el ngara moktek er kid e mla nguu a klisiich el ngarbab el mei.¹⁵

Mei me a derta er kid lorael er chelechal kesus loba blakelreng me a blekeu el mo melekoi, lobengkel a Job er a rechuodel, “A klteketel a lomeskak a telik a Dios, … ng mol lmuut er a kodellek el di kdu ng diak a telemellek.”¹⁶ Me boluaisei a nglunguchek loba ngariou el reng el ngara ngklel a Jesus Kristo, amen.