Kaj Siab Ris Lawv tej Nra
Los ntawm Txwj Laug David A. Bednar
Ntawm Pawg Kaum Ob tug Thwj Tim
Tej lub nra nyob hauv peb lub neej pab peb tso siab rau tej hauj lwm, kev hlub tshua, thiab kev tshav ntuj ntawm tus Mexiyas Dawb Huv.
Kuv muaj ib tug phooj ywg zoo, es thaum nws nyuam qhuav yuav poj niam, nws xav tias nws thiab nws tsev neeg yuav tsum muaj ib lub tsheb thauj khoom uas khiav plaub lub log. Nws tus poj niam paub tseeb tias tsis tas muaj lub tsheb ntawd tiam sis nws tsuas xav tau xwb. Nkawm niam txiv no lam sib tham txog tej yam zoo thiab tej yam tsis zoo yog tias nkawd yuav ib lub tsheb zoo li no.
Tus txiv hais tias, “Koj niam, wb yuav tsum muaj ib lub tsheb thauj khoom, os.”
Tus poj niam nug tias, “Vim li cas koj xav tias peb yuav tsum muaj ib lub tsheb tshiab thiab mas?”
Kuv tus phooj ywg xav hais tias nws muaj muaj tswv yim thiab teb hais tias: “Es yuav ua li cas yog tias muaj cua daj cua dub loj loj thiab wb yuav tsum yuav mis nyuj rau wb cov me nyuam, thiab yog tsis muaj lub tsheb loj ces mus tsis tau rau tom lub khw yuav khoom noj nev?”
Nws tus poj niam luag nyav thiab teb tias, “Yog tias wb yuav ib lub tsheb tshiab, wb yeej yuav tsis muaj nyiaj txaus yuav mis nyuj—yog li ntawd, vim li cas yuav txhawj txog kev mus rau lub khw yuav khoom noj thaum raug xwm txheej li ntawd!”
Sij hawm dhau mus ces nkawd sib tham ntxiv thiab txiav txim siab yuav lub tsheb thauj khoom. Tsis ntev tom qab nkawd yuav lub tsheb tshiab ntawd, kuv tus phooj ywg xav qhia tias lub tsheb muaj nqi npaum li cas thiab yuav paub yog vim li cas nws xav yuav. Yog li ntawd nws txiav txim siab tias nws yuav mus thiab txiav ntoo taws rau nkawd lub tsev. Yog lub caij nplooj ntoo hlav, thiab twb los daus nyob pem roob ntawm qhov chaw uas nws yuav mus nrhiav ntoo taws. Thaum nws tsav tsheb pem roob, ces cov daus siab zuj zus. Kuv tus phooj ywg twb paub tias txoj kev nplua nplua heev, tiam sis nws tso siab rau nws lub tsheb tshiab thiab nws tau mus tom ntej ntxiv.
Tu siab uas kuv tus phooj ywg tsav tsheb mus deb dhau. Thaum nws tsav tsheb nres rau ntawm ntug kev nyob ntawm qhov chaw uas nws xav tias nws yuav txiav ntoo, nws lub tsheb daig kiag. Tag nrho plaub lub log ntawm lub tsheb tshiab kiv kiv xwb nyob hauv cov daus. Nws cia li lees hais tias nws tsis tau paub xyov nws yuav tsum ua li cas kom dim ntawm xwm txheej no. Nws txaj muag thiab txhawj heev.
Kuv tus phooj ywg txiav txim siab hais tias, “Nim no, kuv yeej tsis xav zaum ntawm no xwb.” Nws tawm nws lub tsheb mus thiab pib txiav ntoo. Nws tso cov ntoo rau ntawm lub tsheb sab nraub qaum kom puv nkaus. Ces kuv tus phooj ywg txiav txim siab tias nws yuav sim tsav tsheb tawm cov daus ib zaug ntxiv. Thaum nws kho lub tsheb kom tsav tau thiab tsuj roj, nws cia li pib mus tom ntej me ntsis. Lub tsheb maj mam tawm cov daus mus thiab rov qab mus txog txoj kev. Nws zoo siab thiab txo hwj chim hais tias nws tau dim thiab mus tau tsev.
Peb lub Nra
Kuv thov kom tus Vaj Ntsuj Plig Dawb Huv pab kuv thaum kuv qhia tej yam tseem ceeb uas peb kawm tau los ntawm zaj dab neeg txog kuv tus phooj ywg, lub tsheb no, thiab cov ntoo. Kuj yog lub nra uas tau pab. Kuj yog cov ntoo uas ua rau lub tsheb khov kho txaus kom nws thiaj tawm tau cov daus, rov qab mus rau txoj kev thiab mus tom ntej. Kuj yog lub nra uas ua rau nws muaj peev xwm rov qab mus rau nws tsev neeg thiab nws lub tsev.
Peb txhua tus kuj ris ib lub nra thiab. Peb nyias muaj nyias lub nra uas yog peb tej lub cib fim, tej yam uas peb yuav tsum ua, kev txom nyem thiab cov koob hmoov, thiab tej kev xaiv thiab tej yam uas tab kaum peb. Muaj ob lo lus nug uas yuav pab peb thaum tej lub sij hawm peb thov Vajtswv pab peb ntsuam xyuas peb lub nra: “Lub nra uas kuv ris tam sim no puas ua rau kuv sab ntsuj plig khov kho kuv thiaj yuav muaj peev xwm mus tom ntej nrog kev ntseeg Yexus Khetos taug txoj kev ti thiab nqaim thiab pab kom kuv tsis txhob daig? Lub nra uas kuv ris tam sim no puas ua rau kuv sab ntsuj plig khov kho txaus kom kuv muaj peev xwm rov qab mus rau Leej Txiv Saum Ntuj Ceeb Tsheej thaum kawg?”
Tej lub sij hawm peb xav tias kev zoo siab yog qhov uas peb tsis ris ib lub nra. Tiam sis kev ris lub nra yog ib qho tseem ceeb ntawm txoj kev zoo siab. Vim tias peb lub nra yuav tsum ua rau peb sab ntsuj plig khov kho, peb yuav tsum ua tib zoo tsis txhob ris tej yam ntau uas peb nyiam tiam sis tsis tas muaj hauv peb lub neej, thiab tej yam uas ua rau peb hnov qab tej uas muaj nqi tshaj plaws.
Txoj Kev Theej Txhoj lub Hwj Chim Ntxiv Dag Zog
Tus Cawm Seej hais tias:
“Nej cov uas sab sab vim nej ris nra hnyav, nej cia li los cuag kuv, kuv yuav cia nej so.
“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav” (Mathais 11:28–30).
Ib tug quab yog ib tus nqaj ntoo, uas yus muab tso rau nruab nrab ntawm ob tug nyuj los yog lwm tus tsiaj kom nkawd rub tau ib lub nra ua ke. Ib tug quab ua rau yus yuav tsum tso ob tug tsiaj ua ke kom nkawd siv zog ua ke thiaj ua tau dej num.
Cia li xav txog tus Tswv cov lus caw kom peb “kwv kuv tus quab.” Qhov uas peb ua thiab ua raws li tej kev khi lus dawb huv ua rau peb kwv tus quab nrog tus Tswv Yexus Khetos. Zoo li tus Cawm Seej thov peb cia siab rau nws thiab rub peb lub nra nrog Nws, txawm yog peb tsis muaj zog npaum li Nws thiab peb lub zog yeej piv tsis tau rau Nws lub zog. Thaum peb tso siab thiab rub peb lub nra nrog Nws nyob hauv lub neej no, ces nws tus quab yooj yim kwv, thiab Nws lub nra yeej sib.
Peb yeej tsis nyob peb ib leeg. Peb mus tau tom ntej txhua hnub nrog Vajtswv txoj kev pab. Dhau los ntawm tus Cawm Seej txoj Kev Theej Txhoj peb muaj peev xwm thiab muaj dag zog ntxiv rau peb lub siab (“Lord I Would Follow Thee,” Hymns, naj npawb 220). Tus Tswv hais kom peb cia li mus tom ntej thiab kom peb lub siab cia li xyiv fab; vim Nws twb yuav nrog peb nyob kom txog thaum kawg (saib Q&K 100:12).
Cia li xav txog qhov piv txwv nyob hauv Phau Ntawv Maumoos thaum Amuloos tsim txom Amas thiab nws cov neeg. Tus Tswv lub suab tau hais rau cov thwj tim no thaum lawv raug txom nyem: “Cia li tsa nej tej taub hau thiab cia li zoo siab, vim kuv paub txog tej lus sib khi uas nej tau khi rau kuv lawm; thiab kuv yuav sib khi lus nrog kuv cov neeg thiab coj lawv dim ntawm txoj kev poob cev qhev” (Mauxiyas 24:13).
Cia li saib tias tej kev khi lus tseem ceeb npaum li cas rautxoj kev cog lus tias yuav txais kev txhiv dim. Yuav tsum ua ncaj ncees ua raws li tej kev khi lus thiab ua cov kab ke los ntawm txoj cai pov thawj hwj kom txais tau tag nrho cov koob hmoov uas muab dhau los ntawm Yexus Khetos txoj Kev Theej Txhoj. Vim los ntawm tej kab ke pov thawj hwj, cov txiv neej thiab cov poj niam thiaj pom lub hwj chim ntawm Vajtswv tshwm sim, tsis hais cov koob hmoov ntawm txoj Kev Theej Txhoj (saib Q&K 84:20–21).
Cia li nco txog tus Cawm Seej tej lus uas hais tias, “Tus quab uas kuv muab rau nej yooj yim kwv, thiab lub nra uas kuv muab rau nej ris tsis hnyav” (Mathais 11:30), thaum peb xav txog ib nqe vaj lug kub ntxiv nyob hauv zaj uas hais txog Amas thiab nws cov neeg.
“Thiab kuv kuj yuav ua rau tej nra uas nyob saum nej tej xub pwg kom yooj yim, xwv kom nej yuav tsis hnov tias lawv nyob saum nej nraub qaum” (Mauxiyas 24:14).
Tej zaum peb feem coob xav tias nqe vaj lug kub no qhia hais tias yuav muab ib lub nra tshem kiag mus ib txhis. Tiam sis nqe tom ntawd piav hais tias tau ua rau lub nra ntawd yooj yim ris li cas.
“Thiab nim no tau muaj tias tej nra hnyav uas tau tso saum Amas thiab nws cov kwv tij tau raug ua kom sib; muaj tseeb tiag, tus Tswv tau txhawb lawv lub dag lub zog ces lawv thiaj ris tau lawv tej nra hnyav [kom yooj yim], thiab lawv tau kam ua zoo siab hlo thiab ua siab ntev nyiaj rau tag nrho tej uas tus Tswv lub siab nyiam” (Mauxiyas 24:15; ntxiv qhov uas ntawv qaij).
Tus Tswv tsis tau muab tej kev nyuaj siab thiab kev cov nyom tshem kiag ntawm cov neeg tam sim ntawd. Tiam sis Nws tau ntxiv dag ntxiv zog rau Amas thiab cov uas nrog nws mus, thiab qhov uas lawv haj yam muaj peev xwm tau ua rau lawv tej nra sib dua qhov qub. Cov neeg zoo no txais hwj chim los ntawm txoj Kev Theej Txhoj kom ua neeg sawv cev (saib Q&K 58:26–29) thiab hloov lawv tej zwj ceeb. Thiab “nrog tus Tswv lub zog” (Maumoos cov Lus 1:14; Mauxiyas 9:17; 10:10; Amas 20:4), tus Tswv coj Amas thiab nws cov neeg mus rau thaj av Xalahelas.
Yexus Khetos txoj Kev Theej Txhoj kov yeej tej yam uas raug los ntawm Adas txoj Kev Poob kom thiaj txais kev zam txim rau peb tej kev txhaum thiab kev ua txhaum, thiab Nws txoj Kev Theej Txhoj kuj ua rau peb muaj hwj chim ua zoo thiab rais los ua neeg zoo dua li peb xav tias peb ua tau hauv lub neej no. Peb feem coob paub thaum twg peb ua txhaum thiab xav tau kev pab kov yeej kev txhaum nyob hauv peb lub neej, tus Cawm Seej tau ua rau peb muaj peev xwm ua neeg huv dhau los ntawm Nws lub hwj chim uas txhiv peb dim. Tiam sis peb puas to taub hais tias txoj Kev Theej Txhoj pab cov txiv neej thiab cov poj niam uas rau siab ntseeg, uas mloog lus, yog neeg tsim nyog, xyuam xim thiab cov uas rau siab xav ua neeg zoo dua thiab ua hauj lwm pab lwm tus zoo dua ntais? Kuv xav paub seb peb puas txais yuav qhov uas ntxiv dag zog rau peb lub neej los ntawm txoj Kev Theej Txhoj thiab ntseeg yuam kev hais tias peb yuav tsum ris peb lub nra peb ib leeg xwb—dhau los ntawm peb lub dag zog, thiab kev tswj peb tus kheej thiab peb lub peev xwm uas peb yeej paub tias tsis txaus.
Yog ib qho zoo thaum peb paub tias Yexus Khetos tau los rau lub ntiaj teb tuag theej peb. Tiam sis peb kuj yuav tsum paub tias tus Tswv xav kom ua rau peb muaj sia, dhau los ntawm Nws txoj Kev Theej Txhoj thiab tus Vaj Ntsuj Plig Dawb Huv lub hwj chim—Nws xav ua li no kom coj peb kev, ntxiv dag zog rau peb thiab kho peb.
Tus Cawm Seej Tsom Kwm Nws cov Neeg
Amas piav txog yog vim li cas tus Cawm Seej xav pab peb thiab nws yuav pab peb li cas:
“Thiab nws yuav mus, raug tej kev mob nkeeg thiab tej kev txom nyem thiab tej kev dag ntxias txhua yam; thiab ua li no xwv kom txoj lus thiaj yuav muaj puv npo li uas tau hais tias nws yuav ris nws cov neeg tej kev mob thiab tej kev nkeeg.
“Thiab nws yuav ris txoj kev tuag, xwv kom nws yuav txo tau txoj kev tuag tej hlua uas khi nws cov neeg kom xoob; thiab nws yuav ris lawv tej kev qaug dag qaug zog, kom nws lub siab thiaj li yuav muaj puv nkaus kev hlub tshua, raws li cev nqaij daim tawv, xwv kom nws yuav paub pab nws cov neeg raws li ntawm cev nqaij daim tawv raws li lawv tej kev qaug dag qaug zog” (Amas 7:11–12).
Yog li ntawd tus Cawm Seej tsis tau raug txom nyem rau peb tej kev txhaum xwb—tiam sis nws kuj raug mob rau peb txoj kev mob kev nkeeg ntawm cev nqaij daim tawv thiab peb tej kev nyuaj siab, peb tej kev qaug zog thiab tej kev ua yuam kev, peb tej kev ntshai thiab kev tu siab, peb tej kev poob siab, tej yam uas peb khuv xim, tej yam tsis ncaj uas peb raug, thiab tej kev mob siab.
Tsis muaj ib qho mob ntawm sab cev nqaij daim tawv, tsis muaj ib qho mob ntawm sab ntsuj plig, tsis muaj kev nyuaj siab los yog tu siab, tsis muaj ib qho kev mob kev nkeeg los yog ib qho kev qaug zog uas peb raug hauv lub ntiaj teb no uas tus Cawm Seej tsis tau raug ua ntej. Thaum peb qaug zog lawm tej zaum peb qw hais tias, “Tsis muaj leej twg paub. Tsis muaj leej twg to taub hlo li.” Tiam sis Vajtswv Leej Tub paub thiab to taub tag nrho, vim Nws twb paub thiab ris peb txhua tus tej nra. Thiab vim Nws ua kev txi uas nyob mus ib txhis (saib Amas 34:14), Nws thiaj paub peb lub siab xav thiab yuav ncav tes pab peb nrog Nws txoj kev hlub tshua . Nws muaj peev xwm ncav tes, tshoov peb lub siab, tsom kwm peb, kho peb, thiab ntxiv dag zog rau peb kom peb yuav rais ua neeg zoo tshaj li peb ua tau yog muaj peb tus kheej xwb thiab pab peb ua tej yam uas peb ua tsis tau yog tias peb tso siab rau peb lub hwj chim xwb. Tiag mas, nws tus quab yeej yooj yim kwv thiab Nws lub nra sib heev.
Kev Caw, Kev Cog Lus thiab zaj Lus Tim Khawv
Kuv caw nej kom nej kawm, thov Vajtswv, xav txog thiab siv zog kawm ntxiv txog tus Cawm Seej txoj Kev Theej Txhoj thaum nej ntsuas nej lub nra. Muaj ntau yam ntawm txoj Kev Theej Txhoj uas peb neeg ntiaj teb lub siab tsis to taub. Tiam sis muaj ntau yam ntawm txoj Kev Theej Txhoj uas peb to taub tau thiab yuav tsum to taub.
Lub nra ntoo ua rau kuv tus phooj ywg lub tsheb khov kho nws thiaj dim tau. Txawm lub tsheb ntawd muaj plaub lub log uas khiav tau los, lub tsheb yeej mus tsis tau hauv cov daus. Yuav tsum muaj ib lub nra hnyav kom thiaj khov kho.
Kuj yog lub nra uas tau pab. Yog lub nra uas ua rau kuv tus phooj ywg lub tsheb nyob khov kho nws thiaj dim tau, rov qab mus rau txoj kev, mus tom ntej, thiab rov qab mus rau nws tsev neeg.
Tej lub nra nyob hauv peb lub neej pab peb tso siab rau tus Mexiyas Dawb Huv tej hauj lwm, kev hlub tshua, thiab kev tshav ntuj (saib 2 Nifais 2:8). Kuv ua tim khawv thiab cog lus tias tus Cawm Seej yuav pab peb ris peb lub nra (saib Mauxiyas 24:15). Thaum peb kwv tus quab nrog Nws dhau los ntawm tej kev khi lus dawb ceev thiab txais lub hwj chim ntawm Nws txoj Kev Theej Txhoj nyob hauv peb lub neej, ces ua rau peb haj yam xav to taub thiab ua raws li Nws lub siab nyiam. Peb kuj yuav thov Vajtswv kom muaj dag zog kawm, hloov los yog lees txais peb tej zwj ceeb es tsis thov Vajtswv tsis tu tsis tseg kom Nws hloov peb tej zwj ceeb raws li peb lub siab nyiam. Peb yuav ua cov neeg sawv cev uas ua tej yam thiab tsis raug lwm tus ua tej yam rau peb (saib 2 Nifais 2:14). Peb yuav txais koob hmoov kom peb sab ntsuj plig nyob khov kho.
Thov kom peb yuav ua zoo dua thiab rais los ua neeg zoo dua dhau los ntawm tus Cawm Seej txoj Kev Theej Txhoj. Hnub no yog lub Plaub Hlis Ntuj hnub tim 6. Peb paub los ntawm kev tshwm sim hais tias hnub no yog hnub uas tus Cawm Seej yug los tiag tiag. Plaub Hlis Ntuj hnub tim 6 kuj yog hnub uas tau muab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txhim tsa. (Saib Q&K 20:1; Harold B. Lee, “Strengthen the Stakes of Zion,” Ensign, Xya Hli Ntuj 1973, 2; Spencer W. Kimball, “Why Call Me Lord, Lord, and Do Not the Things Which I Say?” Ensign, Tsib Hlis Ntuj 1975, 4; Spencer W. Kimball, “Remarks and Dedication of the Fayette, New York, Buildings,” Ensign, Tsib Hlis Ntuj 1980, 54; Discourses of President Gordon B. Hinckley, Phau 1: 1995–1999 [2005], 409.) Thaum Hnub Caiv no uas tshwj xeeb thiab dawb ceev, kuv ua tim khawv hais tias Yexus Khetos yog peb tus Txhiv Dim. Nws muaj txoj sia nyob, thiab nws yuav kho, coj, pov hwm, thiab txhawb nqa peb. Kuv ua tim khawv txog tej yam no los ntawm Yexus Khetos lub npe, amees.