Tus Txhiv Dim Khetos

Nws lub hwj chim kov yeej kev tuag kuj yog los ntawm Vajtswv los thiab. Yailus, ib tug thawj coj hauv lub tsev sab laj, thov “kom Yexus mus rau tom nws lub tsev: rau qhov nws tib tug ntxhais, … mob heev twb yuav tuag” (Lukas 8:41–42). Tus Xib Hwb hnov nws thov, thiab thaum lawv tseem tab tom taug kev, ib tug tuaj tom Yailus tsev tuaj thiab qhia nws tias, “Koj tus ntxhais twb tuag lawm; koj tsis txhob tab kaum tus Xib Hwb ntxiv lawm” (Lukas 8:49). Tom qab Yexus nkag hauv lub tsev, Nws thov kom sawv daws tawm ntawm lub tsev mus, thiab ncaj qha, Nws mus tuav tus ntxhais txhais tes, thiab Nws hais rau nws tias, “Koj cia li sawv!” (Lukas 8:54).

Muaj lwm lub sij hawm, thaum Nws tab tom mus rau lub zos Na-is, Nws ntsib ib co neeg uas tab tom taug kev mus faus ib tug neeg, tau pom ib tug poj ntsuam uas quaj heev vim nws tsuas muaj tib tug tub no xwb. Yexus muaj kev hlub tshua puv npo, Nws thiaj kov tus ncej txawb hleb thiab hais tias, “Tus hluas, kuv hais rau koj tias, koj cia li sawv tsees” (Lukas 7:14). Cov tib neeg, thaum lawv pom qhov txuj ci tseem ceeb no, cia li hais tias, “Muaj ib tug cev Vajtswv lus uas muaj hwj chim heev twb los rau hauv peb cov lawm; thiab … Vajtswv twb los cawm nws haiv neeg lawm” (Lukas 7:16). Qhov txuj ci no tseem ceeb tshaj vim lawv twb hais tias tus tub hluas tau tas sim neej lawm thiab tab tom coj nws mus faus. Vim Nws tau muab ob tug tub ntxhais hluas rov qab muaj txoj sia dua, cov uas ntseeg Nws xav tsis thoob txog Nws txoj cai thiab hwj chim kov yeej kev tuag thiab ua rau cov uas ntxub Nws ntshai heev.

Zaum thib peb yog zaum uas muaj nqis tshaj. Mathas, Maivliag, thiab Laxalus yog ib co nus muag uas Khetos mus xyuas ntau zaus. Thaum tib neeg qhia Nws tias Laxalus muaj mob, Nws nyob ob hnub ntxiv ua ntej Nws yuav mus kom Nws thiaj mus xyuas tau lawv tsev neeg. Thaum Nws nplij Mathas lub siab tom qab nws tus nus tuag, Nws hais lus tim khawv ncaj ncaj rau nws tias, “Kuv yog txoj kev sawv rov los, thiab yog txoj sia: tus uas ntseeg kuv, txawm yog nws tuag lawm los, nws yeej yuav muaj txoj sia” (Yauhas 11:25).

Thaum tus Cawm Seej hais kom cov neeg uas tu siab muab daim txiag zeb tshem ntawm lub qhov ntxa, Mathas hais lus ntxhi yau yau rau Nws tias, “Tus Tswv, peb twb muab nws faus tau plaub hnub lawm, ntshai nws twb tsw tsw lwj lawm” (Yauhas 11:39).

Ces Yexus rov qab teb zoo zoo rau nws dua tias, “Kuv puas tau hais rau koj tias yog koj ntseeg koj yeej yuav pom Vajtswv lub hwj chim xwb no?” (Yauhas 11:40). Thiab tom qab uas Nws hais li no, Nws hais lus nrog ib lub suab nrov nrov tias:

“Laxalus, koj cia li tawm los.

“Laxalus txawm tawm los” (Yauhas 11:43–44).

Vim Laxalus tau nyob hauv lub qhov ntxa plaub hnub lawm, Vajtswv Leej Tub cov yeeb ncuab paub zoo hais tias lawv tsis quav ntsej yeej tsis tau, hais tias tsis muaj raws li, los sis hais lus txawv tej yam uas lawv tau pom vim muaj tiag tiag, thiab lawv xav tsis zoo thiab xav ua phem “txij hnub ntawd los … tau koom ua ke kom muab Yexus tua pov tseg” (Yauhas 11:53).

Tom qab ntawd, tus Khetos uas muaj sia nyob ua koob tsheej hauv lub nroog Yeluxalees, nrog Nws cov Thwj Tim, noj Nws Pluas Qav zaum kawg ntawm txoj Kev Cai Hla Dhau, tsa txoj kab ke ntawm lub cim nco txog, thiab qhia lawv lo lus txib kom ib leeg hlub ib leeg dhau los ntawm kev ua hauj lwm sib pab tiag tiag.

Tom qab ntawd, qhov uas qhia zoo tshaj tias Nws hlub tib neeg, thiab ua raws li Nws lub siab nyiam, yog thaum Nws ua siab loj thiab rau siab taug kev mus ua yam uas nyuaj tshaj lwm yam Nws tau ua Nyob hauv lub Vaj Khexemanes, Nws nyob Nws ib leeg, Nws mob ib ce ntau tshaj lwm tus tau mob, los ntshav tawm hauv txhua lub qho hws los. Nws txaus siab hlo rau Nws Leej Txiv, Nws tuag theej peb lub txhoj thiab Nws kuj ris peb tej kev mob thiab kev txom nyem xwv kom paub pab peb li cas (saib Amas 7:11–13).

Peb tshuav Nws thiab peb Leej Txiv Saum Ntuj Ceeb Tsheej nqi vim Nws txoj kev txi foom koob hmoov rau txhua leej txhua tus, txij Adas, thawj tus neeg, los rau cov neeg uas nyob thaum kawg.

Thaum Nws mob tas hauv Khexemanes, Nws yeem muab Nws tus kheej rau Nws cov yeeb ncuab. Nws ib tug neeg ntxeev siab rau Nws, luag rau txim sai sai rau Nws, uas tsis ncaj thiab tsis raws cai, hais plaub siv lus ntxias thiab twb tsis tiav. Hmo ntawd luag liam tias Nws tau hais lus saib tsis taus thiab muab Nws rau txim kom tuag. Vim lawv ntxub Nws thiab xav ua pauj—vim Nws tau hais lus tim khawv rau lawv tias Nws yog Vajtswv Leej Tub—Nws cov yeeb ncuab tuav hauv xav kom Philaj muab Nws rau txim. Vim li ntawd, lawv thiaj pauv tswv yim tsis liam tias Nws hais lus saib tsis taus tiam sis liam tias Nws ntxeev siab tsim kev kub ntxhov rau cov nom tswv xwv kom Nws yuav tuag los ntawm kev ntsia saum ntoo khaub lig.

Nws txoj kev rau txim ntawm cov neeg Loos tseem phem tshaj ntawd: lawv thuam thiab ntxub Nws thiab cov uas ntseeg Nws, muab hmab pos los ua kauj looj Nws taub hau kom poob ntsej muag, muab Nws nplawm sab heev, thiab muab Nws ntsia saum ntoo khaub lig ntev ntev kom txhua tus pom zoo thiab ceev faj yog tias lawv xav sim los sis hais tawm tias lawv yog Nws ib tug pab coj.

Txhua lub sij hawm Nws raug tsim txom, neeg ntiaj teb tus Txhiv Dim nyiaj dhau zoo tshaj. Nws xav foom koob hmoov rau luag tas mus li; Nws ua siab zoo thiab siab mos muag thov kom Yauhas saib xyuas Nws niam, Maivliag. Nws thov Nws Leej Txiv Saum Ntuj Ceeb Tsheej zam txim rau cov uas tua Nws. Rau qhov Nws txoj hauj lwm hauv ntiaj teb tiav tag nrho lawm, Nws muab Nws txoj sia rau Vajtswv thiab Nws ua pa kawg. Khetos lub cev nqaij daim tawv raug coj mus rau lub qhov ntxa thiab tau nyob ntawd peb hnub.

Nws Leej Txiv txoj hau kev uas zoo heev tau muaj lwm yam hauj lwm rau Nws ua. Thaum Nws cov thwj tim tseem tab tom tu siab, poob siab, thiab tsis paub ua li cas, peb tus Cawm Seej ua hauj lwm pab neeg ntxiv yam Nws tau ua los. Nws tsuas siv peb hnub, ua hauj lwm tsis tu ncua kom txhim tsa tau txoj kev cawm seej ntawm cov neeg tuag. Tej hnub ntawd yog tej hnub uas muaj kev cia siab tshaj plaws rau tag nrho Vajtswv tsev neeg. Thaum Nws mus xyuas cov uas tuag, Nws sau cov uas ntseeg Nws los qhia xov zoo txog txoj kev txhiv dim rau cov uas thaum nyob hauv ntiaj teb tsis tau los paub txog txoj hau kev uas zoo heev los sis tsis kam mloog. Li no lawv yuav muaj lub cib fim los paub txoj moo zoo tseeb thiab raug dim los ntawm tus Vajtswv ntawm cov neeg uas muaj sia nyob thiab cov neeg tuag (saib Q&K 138:19, 30–31).

Tom qab Nws txoj hauj lwm tiav hauv lub ntuj ntsuj plig, Nws rov qab los rau ntiaj teb—kom Nws tus ntsuj plig rov los sib sau nrog Nws lub cev nqaij daim tawv. Txawm tias Nws tau qhia peb tseeb tseeb tias Nws muaj hwj chim kov yeej tau kev tuag, tej zaj hauv vaj lug kub uas qhia txog cov uas Nws tau rov qab ua kom ciaj dua ua ntej Nws txoj Kev Sawv Rov Los qhia peb tias lawv tsuas rov qab ciaj los rau ib lub neej uas tau raug ua ntev zog xwb; ib hnub ces lawv yeej tseem yuav tuag.

Khetos yog thawj tug uas sawv rov los thiab yuav tsis rov qab tuag, thiab muaj ib lub cev zoo tag nrho nyob mus ib txhis. Thaum Nws sawv rov los, Nws tshwm sim rau Maivliag, thiab thaum uas Maivliag pom Nws, nws pib teev tiam Yexus. Peb tus Txhiv Dim hais lus mos muag ceeb toom Maivliag txog Nws lub cev tshiab thiab zoo: “Koj tsis txhob tuav kuv; rau qhov kuv tseem tsis tau rov mus cuag kuv Txiv” (Yauhas 20:17)—qhov no qhia ntxiv tias Nws txoj hauj lwm pab hauv lub ntuj ntsuj plig yeej muaj tseeb thiab tiav lawm. Ces, Nws hais ib co lus uas qhia tias Nws txoj Kev Sawv Rov Los muaj tseeb tiag tiag. Nws hais tias, “Kuv yuav rov mus cuag tus uas yog kuv Txiv thiab nej Txiv; nws yog kuv tus Vajtswv thiab nej tus Vajtswv” (Yauhas 20:17). Tom qab Nws mus rau Nws Leej Txiv, Nws rov qab los dua thiab tshwm sim rau Nws cov Thwj Tim. “Nws cev nws ob txhais tes thiab thws nws sab tav rau lawv saib. Cov thwj tim zoo siab heev rau qhov lawv pom tus Tswv lawm” (Yauhas 20:20).

Kuv ua tim khawv tias Khetos yuav rov qab los thiab nws yuav txawv thawj zaus uas Nws los. Nws yuav muaj hwj chim thiab yeeb koob thaum Nws rov los nrog tag nrho cov Neeg Ntseeg ncaj ncees. Nws yog tus Vaj Ntxwv ntawm txhua tus vaj ntxwv thiab tus Tswv ntawm txhua tus tswv, tus Tub Vaj Ntxwv ntawm txoj kev Thaj Yeeb Nyab Xeeb, tus Mexiyas uas tau cog lus cia lawm, tus Cawm Seej thiab Txhiv Dim, los txiav txim rau cov neeg uas tseem muaj sia nyob thiab tau tuag. Kuv hlub Nws thiab ua hauj lwm pab Nws tas kuv lub siab lub ntsws, thiab kuv thov kom peb yuav zoo siab thiab rau siab ua hauj lwm pab thiab kom peb yuav ntseeg Nws mus txog thaum kawg. Los ntawm Nws lub npe, Yexus Khetos, amees.