2010–2019
O Keriso le Togiola
Aperila 2014


O Keriso le Togiola

Ata
Elder Carlos H. Amado

O le taulaga [o le Togiola] na faamanuiaina ai tagata uma, mai ia Atamu, o le tagata muamua e oo i le tagata mulimuli o tagata soifua uma.

O Iesu Keriso, o le Alo o le Atua, sa soifua mai ma maliu i se tulaga uiga ese. Sa ia soifua ma tuputupu ae i tulaga maualalo, e aunoa ma ni mea faaletino. Sa ia fetalai e uiga ia te Ia lava, “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia” (Luka 9:58).

Na te lei mauaina ni viiga, ni faamamaluga, aloaiaina, po o se taulimaina faapitoa mai i ni taitai faalemalo o le lalolagi pe mai i taitai faalelotu o Ona aso. Pe sa Ia nofoia foi le nofoa sili i sunako.

Sa faigofie Lana talaiga, ma e ui na toatele tagata sa mulimuli ia te Ia, ae o Lana galuega i taimi uma sa aofia ai le faamanuiaina o tagata taitoatasi. Sa ia faatinoina le anoanoai o vavega ia i latou na taliaina o Ia o Le na auina mai e le Atua.

Na Ia tuuina atu i Ana Aposetolo le pule ma le mana e fai ai vavega “ma galuega sili” nai lo na [galuega] sa Ia faatinoina (Ioane 14:12), ae sa Ia le faamatuu atu lava ia i latou le avanoa e faamagaloina ai agasala. Sa le fiafia Ona fili ina ua latou faalogo ia te Ia o fetalai atu, “Alu ia oe, aua e te toe agasala” (Ioane 8:11) po o le “Ua faamagaloina [au] agasala” (Luka 7:48). O lena aia tatau sa na o Ia e onaina aua o Ia lava o le Alo o le Atua ma o le a Ia totogia na agasala i Lana Togiola.

O Lona Mana i le Oti

O Lona mana e pulea ai le oti o se isi uiga paia. O Iairo maoae, o se pule i le sunako, sa ia aioi atu “ia maliu atu o ia i lona fale: aua o lona afafine e toatasi, … o le a oti ia” (Luka 8:41–42). Sa faafofoga le Matai i lana aioi, ma a o latou savavali, sa oo atu se auauna ia Iairo ma tau atu ia te ia, “Ua oti lou afafine; soia e te faalavelaveina le A’oa’o” (Luka 8:49). Ina ua Ia ulufale atu i le fale, sa talosaga atu Iesu i tagata uma e o i fafo, ma i le taimi lena, a o tago atu i lona lima, sa Ia fetalai atu ia te ia, “Tulai ia!” (Luka 8:54).

I se tasi taimi, a o Ia malaga i le aai o Naina, sa Ia tau atu i se savaliga mo se maliu, o se fafine ua oti lana tane o loo tutulu ona o le maliu a lona atalii e toatasi. Ma le faatumulia i le alofa mutimutivale, sa Ia pa’i atu ai i le fata ma fetalai atu, “Le taulealea e, ou te fai atu ia te oe, Ina tulai ia” (Luka 7:14). Ina ua latou vaaia le vavega, sa latou vivii, “Ua tu mai ia te i tatou le perofeta sili; ma … ua asiasi mai le Atua i lona nuu” (Luka 7:16). Sa sili atu ona ofoofogia lenei vavega ona sa tau atu ia i latou ua oti moni lava le taulealea ma sa o atu e tanu o ia. Faatasi ai ma ni talavou se toalua na toe faaolaina, o le faamaoniga o Lana pule ma le mana i le oti na maofa ai e talitonu ma matata’u ai ē na le fiafia ia te Ia.

O le taimi lona tolu na sili atu ona faagaeetia. O Mareta, Maria, ma Lasalo o ni uso ma se tuagane e masani ona asiasi i ai Keriso. Ina ua logoina o Ia e tagata i le gasegase o Lasalo, sa Ia nofo mo aso e lua ao le i oo atu ai i le aiga. A o faamafanafana atu ia Mareta i le maea ai o le maliu a lona tuagane, sa Ia molimau atu ia te Ia ma le manino, “O A’u nei o le toetu, ma le ola: o lē faatuatua mai ia te au, e ui lava ina oti, a e ola lava ia” (Ioane 11:25).

Ina ua fetalai atu le Faaola mo e na faanoanoa e aveese le maa mai le tuugamau, sa musumusu atu Mareta ma le matamuli ia te Ia, “Le Alii e, ua oo ina manogi: aua o lona po fa lenei” (Ioane 11:39).

Ona faamanatu atu lea o ia ma le alofa e Iesu, “Pe na ou le fai atu ea ia te oe, Afai e te talitonu, ona e iloa lea o le mamalu o le Atua?” (Ioane 11:40). Ma ina ua maea ona ia fetalai atu i lenei mea, sa Ia alaga atu ma le leotele:

“Lasalo e, ina sau ia i fafo.

“Ona alu ai lea i fafo o le na oti” (Ioane 11:43–44).

Ina ua mavae aso e fa o Lasalo i le tuugamau, sa fetaiai ai fili o le Alo o le Atua ma faamaoniga maumaututu sa o latou lē mafai ona lē amanaiaina, ta’ufaatauvaaina, pe faaseseina, ma lo latou faavalevalea ma le lotoleaga “talu foi i lea aso … ua latou taupulepule ai e fasioti ia te ia” (Ioane 11:53).

O Le Poloaiga Fou

Mulimuli ane, sa faamanatuina e le Keriso soifua i Ierusalema, faatasi ai ma Ana Aposetolo, o Lana Tausamaaga mulimuli o le Paseka, faavaeina o le sauniga o le faamanatuga, ma tuuina atu le poloaiga ia i latou ia fealofani e ala i le auauna atu ma le faamaoni.

O Ona Mafatiaga i Ketesemane

Ina ua mavae lena, i le faaaliga silisili o Lona alofa mo tagata soifua, ma le faatinoga atoa i Lona finagalo, sa Ia savalia ma le lototoa ma le naunautai ia fetaiai ma Lona tofotofoga sili ona faigata. I le Faatoaga o Ketesemane, ma le tuuatoatasi atoa, sa Ia pagatia i mafatiaga sili ona ogaoga, ma le toto na tafe mai i ona pu afu uma. I le usiusitai atoa i Lona Tama, sa Ia togiola ai mo a tatou agasala ma ave i Ona luga o tatou ma’i ma mafatiaga ina ia mafai ona iloa fesoasoani ia i tatou (tagai Alema 7:11–13).

O loo tatou nofo aitalafu ia te Ia ma lo tatou Tama Faalelagi, aua o Lana taulaga na faamanuiaina ai tagata uma, mai ia Atamu, o le tagata muamua e oo i le tagata mulimuli o tagata soifua uma.

O Le Faasalaga ma le Faasatauroga o le Faaola

O le taimi lava na faaiu ai Lona mafatiaga i Ketesemane, sa Ia tuuina atu o Ia lava ma le loto malie i Ona fili. I le faalataina ai e se tasi o Ona lava [soo], sa vave ona faasalaina o Ia, i se auala o le amioletonu ma le solitulafono, i se faamasinoga na faaseseina ma lē atoatoa. O lena lava po sa tuuaia ai o Ia i le solitulafono o le upuleaga ma faasalaina ai i le oti. I lo latou ita ma le ma’ema’ea mo le tauimasui—ona sa Ia molimau atu ia i latou o Ia o le Alo o le Atua—sa taupulepule Ona fili mo Pilato e faasala ia te Ia. Mo lena mafuaaga, sa o latou suia ai le tuuaiga o le upuleaga i le fouvale ina ia maliu o Ia e ala i le faasatauroina.

O Lona faasalaga sa sili atu ona mataga i tagata Roma: o a latou tauemuga ma faitioga e tusa ai ma Lona malo faaleagaga, o le maasiasi o le faapaleina i se pale tuitui, o le sasaina o Ia ma le tiga, ma le mafatia faaumiumi o Lona Faasatauroga i luma o tagata sa avea uma ma se lapataiga manino mo tagata uma o e sa ono tofotofo e tautino atu o ia lava o Sona soo.

I taimi uma o Ona mafatiaga, sa faaalia ai e le Togiola o le lalolagi se loto pulea tulaga ese. Sa ia manatu i taimi uma i le faamanuiaina o isi; faatasi ai ma le agalelei ma le agaalofa, sa ia augani atu ia Ioane e tausi Lona tina, o Maria. Sa Ia talosaga atu i Lona Tama i le Lagi e faamagalo i tagata faaoosala na faasatauroina o Ia. Faatasi ai ma Lana galuega ua faataunuuina i le lalolagi, sa Ia tuuina atu ai Lona agaga i le Atua ma to ai Lana manava mulimuli. Sa avatu i le tuugamau le tino faaletino o Keriso ma tuu ai iina mo aso e tolu.

O Le Galuega a le Faaola i Ē ua Oti

A o mafatia Ona soo mai le faanoanoa, lotovaivai, ma le le mautonu, sa faalautele atu ai e lo tatou Faaola, i se isi vaega o le fuafuaga matagofie a Lona Tama, Lana galuega i se auala fou. I se vaitau puupuu o aso e tolu, sa Ia galue ai ma le le faavaivai e faatulaga le galuega tele o le faaolataga i e ua oti. O na aso na avea ma nisi o aso sa sili ona faatumulia i le faamoemoe mo le aiga o le Atua. I le taimi o lena asiasiga, sa Ia faatulagaina ai Ona soo faamaoni ina ia o latou tau atu le tala lelei o le faaolataga ia i latou o e lei mauaina se malamalama o le fuafuaga matagofie i lenei olaga po o e na latou teenaina. O le a o latou maua nei le avanoa e saoloto ai mai lo latou nofopologa ma ia togiolaina e le Atua i latou uma o e ola ma e oti (tagai MF&F 138:19, 30–31).

O Uluai Fua o le Toetu

Faatasi ai ma Lana galuega na faamaeaina i le lalolagi o agaga, sa Ia toe foi mai ai i le lalolagi—e tuufaatasia lona Agaga ma Lona tino faaletino e faavavau. E ui lava sa Ia faaalia atoa Lona mana i le oti, ae o tala faatusitusiga paia o i latou sa Ia toe faafoisia mai i le ola a o lei oo i Lona Toetu ua faailoa mai ai ua na ona latou toe o mai i se olaga sa faaauau pea ma le ofoofogia; ae o le a latou maliliu lava.

O Keriso o le tagata muamua na toetu ma o le a le toe maliu lava, ina ia maua se tino atoatoa e faavavau. I Lona tulaga toetu, sa ia faaali atu ai ia Maria, o lē sa vave ona ia iloaina o Ia, ma amata ai ona tapuai ia te Ia. Na lapatai atu lo tatou Togiola ma le agalelei tele ia te ia e tusa ai ma Lona tulaga fou ma le mamalu: “Aua e te tago mai ia te au; aua ou te lei alu ae lava i lo’u Tama” (Ioane 20:17)—na tuuina atu ai se faamaoniga faaopoopo o Lana galuega i le lalolagi o agaga e moni ma atoatoa. Ona sosoo lea, o le faaaogaina o upu e faamautu ai le moni o Lona Toetu, sa Ia fetalai ai, “Ou te alu ae i lo’u Tama, ma lo outou Tama; o lo’u Atua, ma lo outou Atua” (Ioane 20:17). Ina ua maea ona alu ae i Lona Tama, sa Ia toe foi mai ma faaali mai i Ana Aposetolo; “Ona faaali atu lea ia te i latou o ona lima ma lona itu. Ona olioli ai lea o le au soo ina ua latou vaai atu i le Alii” (Ioane 20:20).

O Le A Toe Afio Mai le Togiola

Ou te molimau atu o le a toe afio mai Keriso i se auala e matuai ese lava mai Lona uluai afio mai muamua. O le a Ia afio mai i le mana ma le mamalu, faatasi ai ma Au Paia amiotonu ma faamaoni. O le a Ia afio mai o se Tupu o Tupu ma le Alii o alii, o le Aloalii o le Filemu, o le Mesia na folafolaina, o le Faaola ma le Togiola, e faamasino i e ola ma e ua maliliu. Ou te alofa ma auauna ia te Ia ma lou loto atoa, ma ou te aioi atu ina ia mafai ona tatou auauna atu ma le olioli ma le tuuto, ma ia mafai ona tatou tumau faamaoni ia te Ia seia oo i le iuga. I Lona suafa, o Iesu Keriso, amene.