Cov Ntxhais ntawm Kev Khi Lus

Tus Ntsuj Plig tau qhia peb zoo kawg hmo no. Kuv thov Vajtswv kom cov lus uas cov muam thawj coj no tau hais yuav nkag nej tej siab tej ntsws ib yam li cov lus tau nkag kuv lub siab lub ntsws.

Txoj kev sib ntsib no yuav muaj feem hauv peb zaj keeb kwm. Peb tau caw tag nrho cov poj niam hauv lub Koom Txoos uas muaj hnub nyoog yim xyoo rov saud tuaj koom peb hmo no. Peb feem coob tau thov Vajtswv kom tus Vaj Ntsuj Plig Dawb Huv roos peb. Peb tau txoj koob hmoov ntawd thaum peb hnov cov muam no hais lus thiab tau mloog cov nkauj hu zoo nkauj kawg no. Kuv thov Vajtswv kom tus Ntsuj Plig yuav yeej meem roos peb thaum kuv hais ob peb los lus yaum peb thiab hais lus tim khawv ntxiv cov lus uas peb twb hnov lawm—thiab ua tim khawv hais tias tej lus uas peb twb hnov lawm yog tej lus uas Tswv xav kom peb hnov.

Hmo no kuv yuav hais lus txog txoj kev—uas kuv cov muam tau hais txog hnub no yam zoo heev li—uas peb yuav tsum taug kom thiaj rov qab mus cuag tau peb Leej Txiv Saum Ntuj Ceeb Tsheej. Txoj kev ntawd yog muaj tej kev sib khi lus nrog Vajtswv taw kev rau peb. Kuv yuav hais lus rau nej txog txoj kev xyiv fab uas peb txais tau thaum peb khi thiab ceev tej kev khi lus no.

Nej ib txhia tau ua kev cai raus dej tsis ntev tas los no thiab tau txais lub txiaj ntsim Vaj Ntsuj Plig Dawb Huv los ntawm kev tso tes saum taub hau. Nej nco qab txog lub sij hawm ua kev cai raus dej ntawd yooj yim heev. Hos nej ib txhia tau ua kev cai raus dej yav thaud, ces nej tsis tshua nco qab saib nej tau xav li cas thaum nej tau khi lus zaum ntawd, tiam sis txhua zaus uas nej hnov cov nkauj noj lub cim nco txog nej muaj tau tej kev xav hauv nruab siab ntawd.

Yeej tsis muaj peb ob tug neeg twg uas yuav nco qab txog hnub uas peb tau ua kev cai raus dej thiab khi lus nrog Vajtswv thiab txais lub txiaj ntsim Vaj Ntsuj Plig Dawb Huv. Tiam sis peb txhua tus tau paub hais tias Vajtswv pom zoo rau peb. Thiab peb tau muaj lub siab xav zam txim rau lwm tus neeg thiab txais kev zam txim thiab rau rau siab ua ncaj ncees.

Saib tej kev xav hauv nruab siab no nkag nej lub siab lub ntsws hov tob nyob ntawm saib cov neeg uas hlub nej tiag tau npaj nej zoo npaum li cas. Kuv cia siab tias nej cov uas tau nkag los rau hauv lub nceeg vaj tsis ntev tas los no muaj lub cib fim nrog nej niam zaum ua ke tam sim no. Yog tias nej nrog nej niam zaum no, ces cia li hais ua tsaug rau nws tam sim no. Kuv yeej nco tau saib kuv xyiv fab thiab ris Vajtswv txiaj npaum li cas thaum kuv zaum npuab kuv niam hauv tsheb thaum peb tsav tsheb rov mus tsev tom qab uas kuv tau ua kev cai raus dej hauv Philadelphia, Pennsylvania.

Kuv niam yog tus uas tau ua tib zoo npaj kuv khi lus nrog Vajtswv thaum ntawd thiab tau npaj kuv rau txhua txoj kev khi lus tom qab no thiab. Nws tau coj ruaj nrees raws li tus Tswv txoj kev txib no uas hais tias:

Vim cov niam tsev txiv tsev muaj me nyuam nyob hauv Xi-oos, los sis nyob hauv Xi-oos tej ceg txheem ntseeg, uas tsis qhia lawv kom lawv to taub txog kev hloov siab lees txim, kev ntseeg Yexus Khetos Vajtswv Leej Tub, thiab kev cai raus dej thiab lub txiaj ntsim Vaj Ntsuj Plig Dawb Huv los ntawm kev tso tes rau saum taub hau, thaum muaj yim xyoo, ces kev txhaum ntawd nyob ntawm niam txiv lub taub hau xwb.

Vim nov yog ib txoj kev cai rau cov neeg nyob hauv Xi-oos, los sis nyob hauv Xi-oos tej ceg txheem ntseeg uas tau muab txhim tsa.

Thiab lawv cov me nyuam yuav ua kev cai raus dej kom zam tau lawv tej kev txhaum thaum muaj yim xyoo, thiab txais tus Vaj Ntsuj Plig Dawb Huv.¹

Kuv niam tau ua nws lub luag hauj lwm. Nws tau npaj nws cov me nyuam es siv cov lus xws li Amas cov lus, uas sau tseg hauv Phau Ntawv Maumoos:

“Thiab tau muaj tias nws tau hais rau lawv tias: Saib seb, ntawm no yog cov dej Maumoos ... thiab nim no, li uas nej xav los rau hauv Vajtswv pab, thiab hu ua nws cov neeg, thiab ib leeg txaus siab ris ib leeg tej nra, xwv kom lawv thiaj li yuav sib;

“Muaj tseeb tiag, thiab txaus siab nyuaj siab nrog cov uas nyuaj siab; muaj tseeb tiag, thiab nplij cov uas xav tau txoj kev nplij siab, thiab sawv ua Vajtswv tej tim khawv rau txhua lub caij nyoog thiab rau tag nrho txhua txhia yam, thiab nyob tag nrho txhua qhov chaw uas nej yuav nyob, kom mus txog thaum tuag, xwv kom nej yuav raug txhiv dim los ntawm Vajtswv, thiab raug suav nrog cov uas nyob hauv thawj txoj kev sawv hauv qhov tuag rov qab los, xwv kom nej yuav tau txoj sia nyob mus ib txhis—

“Nim no kuv hais rau nej tias, yog tias qhov no yog yam uas nej tej siab xav tau, ces nej tseem yuav muaj dab tsi thaiv qhov uas ua kev cai raus dej nyob hauv tus Tswv lub npe, kom ua ib qhov tim khawv rau nws tias nej tau khi ib lo lus sib khi nrog nws, tias nej yuav ua hauj lwm rau nws thiab coj nws tej lus txib, xwv kom nws yuav nchuav nws tus Ntsuj Plig nplua mias rau ntxiv saum nej?

“Thiab nim no thaum cov neeg tau hnov tej lus no, lawv tau npuaj lawv tej tes rau kev xyiv fab, thiab qw hais tias: Qhov no yog qhov uas peb tej siab xav tau.”²

Tej zaum nej tsis tau npuaj teg thaum nej xub hnov cov lus caw los khi lus thiab ua kev cai raus dej, tiam sis nej yeej tau hnov tus Cawm Seej txoj kev hlub thiab nej tau cog lus tias nej yuav sawv tam Nws thiab pab lwm tus neeg. Kuv hais tau “yeej” tau hnov vim rau qhov tej kev xav hauv nruab siab ntawd yog cog tob tob hauv tej siab tej ntsws ntawm Peb Leej Txiv Saum Ntuj Ceeb Tsheej tej nxhais txhua tus. Nov yog ib feem ntawm qhov uas los saum ntuj los rau nej.

Vajtswv tau qhia nej ua ntej nej los yug hauv ntiaj teb no. Nws tau pab nej to taub thiab lees txais qhov uas hais tias nej yuav muaj kev sim siab, kev xeem, thiab tej cib fim uas phim nej hauv lub neej no. Nej kawm tau hais tias peb Leej Txiv Saum Ntuj Ceeb Tsheej muaj ib txoj hau kev zoo siab kom pab nej ntxeem tau kom mus dhau tej kev sim siab thiab hais tias nej yuav pab lwm tus neeg ntxeem kom dhau lawv tej kev sim siab thiab. Txoj hau kev no yog muaj tej kev sib khi lus nrog Vajtswv.

Peb muaj kev ywj siab xaiv los mus khi lus thiab ceev tej kev khi lus ntawd. Tsuas yog ib feem ntawm Nws cov ntxhais thiaj muaj lub cib fim hauv lub neej no kawm txog tej kev khi lus no. Nej yog cov uas twb tau txoj koob hmoov no lawm. Nej uas yog kuv cov muam, nej txhua tus yog ib tug ntxhais hauv txoj kev khi lus.

Leej Txiv Saum Ntuj Ceeb Tsheej tau qhia nej ua ntej nej yug los hais txog tej yam uas yuav muaj los rau nej thaum nej ncaim tawm ntawm Nws los mus nyob hauv lub ntiaj teb no. Nej tau kawm hais tias txoj kev rov qab mus cuag Nws yuav tsis yooj yim hlo li. Nws paub hais tias yuav nyuaj heev rau nej ib leeg xwb rov qab mus yog tias tsis muaj leej twg pab nej.

Nej tau koob hmoov tsis yog vim nej nrhiav tau txoj kev khi tej kev khi lus ntawd xwb hauv lub neej no, tiam sis kuj kom muaj cov neeg uas yuav pab nej nyob ib ncig ntawm nej—uas, ib yam li nej, yog ib co ntxhais hluas uas tau nrog Leej Txiv Saum Ntuj Ceeb Tsheej sib khi lus.

Nej puav leej tau pom tau hais tias yog ib txoj koob hmoov zoo npaum li cas kom koom Vajtswv ib pab ntxhais uas tau nrog Vajtswv sib khi lus kom pab nej thiab coj nej kev. Kuv tau pom tej yam uas nej tau pom thaum nej cov viv ncaus tau ceev txoj kev khi lus kom nplij lwm tus neeg lub siab thiab pab lawv—thiab zoo siab ua li ntawd.

Kuv nco qab txog qhov uas tus Muam Ruby Haight zoo siab pab ntau. Nws yog tus poj niam ntawm Txwj Laug David B. Haight, uas yav nram ntej yog ib tug koom Pawg Kaum Ob tug Thwj Tim. Ua ib tug tub hluas Txwj Laug Haight tau ua tus thawj tswj hwm ntawm Palo Alto ceg txheem ntseeg hauv California. Nws thov Vajtswv pab, thiab txhawj xeeb txog, cov ntxhais hluas hauv hoob Mia Maid hauv nws pawg ntseeg.

Ces Thawj Tswj Hwm Haight raug tshoov siab hais kom tus npis sov hu Ruby Haight los mus qhia pab ntxhais hluas ntawd. Thawj Tswj Hwm Haight paub hais tias nws tus poj niam yuav ua tau tim khawv txog Vajtswv thiab pab txhawb nqa, nplij, thiab hlub pab ntxhais hluas ntawd.

Thaum ntawd tus Muam Haight hlob cov ntxhais hluas uas nws qhia ntawd 30 xyoo. Txawm yog li ntawd los 40 xyoo tom qab Muam Haight tau qhia pab ntxhais hluas ntawd, txhua lub sij hawm uas nws yuav ntsib kuv tug poj niam, uas tau koom pab ntxhais hluas uas nws qhia yav thaud, Muam Haight yuav luag nyav thiab ncav tes mus khawm Kathy thiab hais tias, “Auj! kuv tus Mia Maid.” Kuv pom ntau tshaj qhov uas nws luag nyav xwb. Kuv pom tias nws hlub kuv poj niam ib yam li kuv poj niam yog nws ib tug ntxhais yug tiag. Nws luag nyav vim nws pom tau hais tias nws ib tug viv ncaus thiab Vajtswv ib tug ntxhais tseem tab tom taug txoj kev khi lus rov qab mus tsev saum ntuj ceeb tsheej.

Leej Txiv Saum Ntuj Ceeb Tsheej luag nyav pom zoo rau nej txhua tus thiab thaum twg Nws pom nej pab Nws ib tug ntxhais taug txoj kev khi lus mus rau lub neej nyob mus ib txhis. Thiab Nws zoo siab txhua lub sij hawm uas nej sim ua qhov yog. Nws pom nej, tsis yog pom nej yog leej twg tam sim no xwb, tiam sis pom nej ua tus neeg uas nej rais los mus ua tau tiag.

Tej zaum nej tau muaj niam muaj txwv uas xav hais tias nej ua tau zoo dua qhov uas nej xav tias nej ua tau. Kuv niam zoo li ntawd.

Qhov uas kuv tsis paub thaum kuv tseem hluas yog qhov uas hais tias peb Leej Txiv Saum Ntuj Ceeb Tsheej pom tau hais tias Nws cov me nyuam yuav rais los mus ua leej twg zoo dua peb los yog peb niam pom tau. Thiab thaum twg peb txav mus ua tau raws li tus neeg uas peb rais los mus tau tiag, ces Nws zoo siab kawg. Thiab nej paub tau hais tias Nws pom zoo rau nej.

Nws pom tau lub yeeb koob ntawm tag nrho Nws cov ntxhais, txawm hais tias lawv nyob qhov twg los xij. Ua li no, ces nej thiaj muaj kev lav ris ntau. Nej xav kom nej txhua tus saib txhua tus neeg ua nej ntsib zoo ib yam li Nws ib tug Me Nyuam uas Nws hlub. Yog vim li ntawd Nws thiaj txib kom peb hlub peb tus neeg zej zog ib yam li peb hlub peb tus kheej thiab zam txim rau peb tus neeg zej zog. Qhov uas nej txawj ua siab zoo thiab zam txim rau lwm tus neeg los ntawm qhov uas nej yog Vajtswv ib tug ntxhais. Txhua tus neeg nej ntsib yog Vajtswv ib tug me nyuam uas Nws hlub.

Thaum nej to taub hais tias nej koom ua ib pawg viv ncaus ua ke, tej yam uas nej xav hais tias ua rau nej ib leeg txawv ib leeg tsis tseem ceeb thaum kawg. Piv txwv hais tias, nej txhua tus txawm laus los hluas puav leej xav kom lwm tus neeg to taub nej thiab txais nej. Nej puav leej zoo sib xws ntau tshaj nej sib txawv.

Yog xav li ntawd, ces tsim nyog cov ntxhais hluas saib qhov uas lawv yuav loj hlob mus koom lub Koom Haum Niam Tsev ua ib lub cib fim paub cov viv ncaus uas lawv paub, saib rau nqi, thiab hlub ntau dua thiab coob dua.

Qhov kev txawj pom tias peb rais los mus ua tau neeg zoo dua loj hlob tuaj hauv tsev neeg thiab hauv lub Koom Haum Me Nyuam Yaus. Yeej muaj los hauv tsev neeg hmo ua ke thiab hauv lub Koom Haum Me Nyuam Yaus tej kev ua yeeb yam. Cov me nyuam yaus yog raug tshoov siab kom hais tej yam zoo thiab xav tsis thoob li, ib yam lawv hais thaum tus Cawm Seej tso lawv cov nplaig thaum Nws qhia lawv tom qab Nws sawv rov los.³

Txawm hais tias Ntxwg Nyoog tawm tsam cov ntxhais hluas yau, los tus Tswv tseem haj yam tsa cov ntxhais hluas thiab cov poj niam los mus muaj zog ntawm sab ntsuj plig ntau zuj zus tuaj. Piv txwv hais tias, cov ntxhais hluas yog qhia lawv cov niam saib yuav tsum ua li cas siv FamilySearch kom nrhiav tau thiab cawm lawv cov poj koob yawm ntxwv. Kuv paub txog ib co ntxhais hluas uas sawv ntxov mus ua kev cai raus dej tom lub tuam tsev tam cov uas tas sim neej lawm es tsis muaj leej twg txhib lawv mus ua li ntawd tsuas yog Eliyas tus Ntsuj Plig xwb.

Hauv tej qhov chaw tshaj tawm txoj moo zoo thoob plaws lub ntiaj teb, cov tub txib uas yog ntxhais hluas yog raug hu los mus ua thawj coj. Tus Tswv tau tshoov coob tug ntxhais hluas los mus ua tub txib kom Nws thiaj tsa tau lawv los mus pab ua thawj coj thiab. Coob tug thawj tswj hwm ntawm tej qhov chaw tshaj tawm txoj moo zoo tau pom cov tub txib uas yog ntxhais hluas haj yam muaj hwj chim qhia txoj moo zoo thiab coj lwm tus neeg.

Txawm hais tias nej ua hauj lwm ua tub txib puv sij hawm los tsis ua, los nej tseem muaj peev xwm ua rau nej txoj kev sib yuav thiab txoj kev cob qhia nej cov me nyuam zoo dua tuaj thiab.

Cia li xav txog Evas, tus niam ntawm txhua tus neej muaj txoj sia nyob. Txwj Laug Russell M. Nelson hais txog Evas hais tias: “Peb thiab txhua tus noob neej yeej tau koob hmoov vim yog Evas lub siab loj thiab lub tswv yim zoo. Thaum nws xub noj lub txiv hmab, nws tau ua qhov uas tsim nyog ua tiag. Adas muaj tswv yim txaus ua ib yam nkaus li ntawd thiab.”⁴

Txhua tus ntxhais ntawm Evas muaj peev xwm foom koob hmoov rau nws tsev neeg ib yam li Evas foom koob hmoov rau nws li. Evas tseem ceeb heev rau txoj kev txhim tsa tsev neeg npaum li tias cov vaj lug kub hais li no txog txoj kev tsim. Thiab cov Vajtswv hais tias cia Lawv tsim ib tug pab tus txiv neej, vim rau qhov tsis tsim nyog tus txiv neej yuav nyob nws ib leeg, ces Lawv mam li tsim ib tug pab nws.⁵

Peb tsis paub tseeb saib Evas tau pab Adas thiab nkawd tsev neeg ntau npaum li cas. Tiam sis peb paub txog ib qho txiaj ntsim tseem ceeb heev uas nws tau muab pub rau nws cov me nyuam, thiab uas nej txhua tus muab pub tau rau nej cov me nyuam thiab lwm tus neeg: Evas tau pab nws tsev neeg pom tau txoj kev yuav taug kom thiaj rov qab mus tsev saum ntuj txawm tias zoo li txoj kev ntawd com kawb heev. Evas tau hnov tag nrho tej yam no thiab zoo siab heev, hais tias yog tias nkawd tsis poob yuam kev nkawd yuav tsis tau muaj me nyuam, thiab yeej yuav tsis paub qhov zoo ntawm qhov phem, thiab qhov xyiv fab ntawm nkawd txoj kev txhiv dim, thiab lub neej nyob mus ib txhis uas Vajtswv muab pub rau tag nrho cov uas mloog lus. ⁶

Nej ua tau raws li nws tus yam ntxwv.

Dhau los ntawm kev tshwm sim, Evas pom tau tias yuav tsum taug txoj kev twg kom thiaj rov qab mus cuag Vajtswv. Nws paub hais tias Yexus Khetos txoj Kev Theej Txhoj tau pab kom peb tej tsev neeg thiaj ncav tau lub neej nyob mus ib txhis li. Nws paub tseeb, ib yam li nej paub tseeb tau, hais tias thaum nws ceev nws tej kev khi lus nrog nws Leej Txiv Saum Ntuj Ceeb Tsheej, tus Txhiv Dim thiab tus Vaj Ntsuj Plig Dawb Huv yuav coj nws thiab nws tsev neeg ntxeem mus kom dhau tej kev tu siab thiab poob siab twg uas yuav muaj los. Nws paub tseeb hais tias nws tso siab tau rau Nkawd.

“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.

“Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb.”⁷

Kuv paub hais tais Evas tau ntsib kev tu siab thiab kev poob siab, tiam sis kuv kuj paub hais tias nws tau txais kev xyiv fab vim yog qhov uas nws paub tseeb tias nws thiab nws tsev neeg rov qab mus nrog Vajtswv ntuj nyob tau ua ke. Kuv paub hais tias nej feem coob muaj kev tu siab thiab kev poob siab. Kuv foom koob hmoov rau nej hais tias, ib yam li Evas, nej yuav txais tau kev xyiv fab thaum nej taug kev rov qab mus cuag Vajtswv.

Kuv paub tseeb hais tias Vajtswv Leej Txiv saib xyuas thiab hlub nej. Nws hlub nej txhua tus. Nej yog Nws cov ntxhais hauv txoj kev khi lus. Vim Nws hlub nej, Nws yuav muab pub tej kev pab uas nej xav tau kom thiab pab nej txav mus taug txoj kev rov qab mus cuag Nws.

Kuv paub hais tias tus Cawm Seej them tus nqi txhiv peb dim ntawm peb tej kev txhaum thiab tias tus Vaj Ntsuj Plig Dawb Huv ua tim khawv txog qhov tseeb. Nej tau hnov qhov kev nplij siab no hmo no. Kuv ua tim khawv hais tias tag nrho tej yawm sij uas ceev tau tej kev khi lus dawb ceev tau raug txum tim rov qab los lawm. Tej yawm sij no yog peb tus yaj saub Thomas S. Monson tuav thiab siv niaj hnub nim no. Kuv hais tej lus nplij siab thiab cia siab no rau nej, Vajtswv ib tsoom ntxhais hauv kev khi lus, los ntawm Yexus Khetos lub npe zoo, amees.