បុត្រីនៅក្នុងសេចក្តីសញ្ញា
ប្រធាន ហិនរី ប៊ី អាវរិង
ទីប្រឹក្សាទីមួយនៅក្នុងគណៈប្រធានទីមួយ
ផ្លូវដែលយើងត្រូវដើរត្រឡប់ទៅរកព្រះវរបិតាសួគ៌យើង... ត្រូវបានគូសដានដោយសេចក្ដីសញ្ញាពិសិដ្ឋជាមួយនឹងព្រះ។
យើងត្រូវបានបង្រៀនដោយព្រះវិញ្ញាណនារាត្រីនេះ ។ ខ្ញុំសូមអធិស្ឋានថា សម្ដីដែលបានថ្លែងដោយថ្នាក់ដឹកនាំទាំងនេះ ដែលជាបងប្អូនស្រីដ៏ឆ្នើមនឹងដក់ជាប់ក្នុងចិត្តអ្នក ដូចខ្ញុំដែរ ។
នេះជាការប្រជុំមួយដ៏អស្ចារ្យ ។ ស្ត្រីគ្រប់រូបក្នុងសាសនាចក្រ ចាប់តាំងពីអាយុប្រាបីឆ្នាំឡើងទៅ ត្រូវបានអញ្ជើញឲ្យចូលរួមនឹងយើងនារាត្រីនេះ ។ មានពួកយើងជាច្រើន បានអធិស្ឋានសុំឲ្យព្រះវិញ្ញាណគង់នៅជាមួយនឹងយើង ។ ពរជ័យនោះនឹងកើតមាន ពេលយើងស្ដាប់បងប្អូនស្រីទាំងនេះថ្លែង ហើយស្ដាប់តន្ត្រីដែលលើកតម្កើង ។ ខ្ញុំសូមអធិស្ឋានថា ព្រះវិញ្ញាណនឹងបន្តគង់ជាមួយយើង ពេលខ្ញុំផ្ដល់នូវពាក្យនៃការលើកទឹកចិត្ត និងទីបន្ទាល់ខ្លះៗ ដោយបន្ថែមលើអ្វីដែលយើងបាននិយាយរួចហើយ-- ជាពិសេសថ្លែងទីបន្ទាល់នូវអ្វីដែលយើងត្រូវបានប្រាប់ គឺជាអ្វីដែលព្រះអម្ចាស់ចង់ឲ្យយើងស្ដាប់ឮ ។
នារាត្រីនេះ ខ្ញុំនឹងនិយាយពីផ្លូវ--ដែលបានពិពណ៌នាយ៉ាងល្អនៅថ្ងៃនេះ--ដែលយើងត្រូវដើរត្រឡប់ទៅរកព្រះវរបិតាសួគ៌យើងវិញ ។ ផ្លូវនោះត្រូវបានគូសដានដោយសេចក្ដីសញ្ញាដ៏ពិសិដ្ឋជាមួយនឹងព្រះ ។ ខ្ញុំនឹងនិយាយប្រាប់អ្នកពីក្ដីអំណរនៃការធ្វើ និង ការរក្សាសេចក្ដីសញ្ញាទាំងនោះ ហើយជួយអ្នកដទៃឲ្យរក្សាវា ។
អ្នករាល់គ្នាជាច្រើនទើបជ្រមុជទឹកថ្មីៗ ហើយបានទទួលអំណោយទានព្រះវិញ្ញាណបរិសុទ្ធដោយការដាក់ដៃលើ ។ ចំពោះអ្នក ការចងចាំនោះមានភាពច្បាស់លាស់ ។ អ្នកផ្សេងទៀតបានជ្រមុជទឹកយូរហើយ ដូច្នេះការចងចាំពីអារម្មណ៍នៃបទពិសោធន៍ធ្វើសេចក្តីសញ្ញានោះ អាចនឹងមិនសូវច្បាស់ តែអារម្មណ៍ទាំងនោះមួយចំនួនកើតមានឡើងវិញ ពេលណាអ្នកស្ដាប់ការអធិស្ឋានសាក្រាម៉ង់ ។
គ្មាននរណាម្នាក់នឹងមានការចងចាំដូចគ្នាពីថ្ងៃ ដែលយើងធ្វើសេចក្ដីសញ្ញាបុណ្យជ្រមុជទឹកដ៏ពិសិដ្ឋនោះ និងការទទួលអំណោយទានព្រះវិញ្ញាណបរិសុទ្ធឡើយ ។ តែយើងម្នាក់ៗមានអារម្មណ៍នូវការអនុញ្ញាតពីព្រះ ។ ហើយយើងមានក្ដីប្រាថ្នាមួយដើម្បីអត់ទោស ហើយទទួលការអត់ទោស ព្រមទាំងមាននូវការតាំងចិត្តដើម្បីធ្វើរឿងត្រឹមត្រូវកើនឡើង ។
អារម្មណ៍ដែលដក់ជាប់យ៉ាងជ្រៅក្នុងចិត្តអ្នក គឺសំខាន់ណាស់ វាត្រូវបានកំណត់យ៉ាងច្បាស់តាមរបៀបដែលអ្នកត្រូវបានរៀបចំដោយមនុស្សជាទីស្រឡាញ់ ។ ខ្ញុំសង្ឃឹមថា អ្នកដែលទើបចូលមកក្នុងនគរនេះថ្មីៗនឹងមានពរដោយបានអង្គុយនៅក្បែរម្ដាយខ្លួន ។ បើអ្នកគិតថាដូច្នោះ អ្នកអាចញញឹមដើម្បីថ្លែងអំណរគុណឥឡូវនេះបាន ។ ខ្ញុំនៅចាំពីអារម្មណ៍នៃក្ដីអំណរ និង ការដឹងគុណ ពេលខ្ញុំអង្គុយក្រោយម្ដាយខ្ញុំតាមផ្លូវត្រឡប់ទៅផ្ទះវិញ ក្រោយពីខ្ញុំបានជ្រមុជទឹកនៅក្រុង ភីឡាដិលភា រដ្ឋផែនសិលវេញ៉ា ។
ម្ដាយខ្ញុំជាមនុស្សម្នាក់ដែលបានរៀបចំខ្ញុំយ៉ាងយកចិត្តទុកដាក់សម្រាប់ការធ្វើសេចក្ដីសញ្ញានោះ និង សម្រាប់អ្វីផ្សេងទៀត ដែលនឹងមកតាមក្រោយ ។ គាត់ស្មោះត្រង់ចំពោះតួនាទីនេះមកពីព្រះអម្ចាស់ ៖
« ហើយជាថ្មីទៀត ដរាបណាឪពុកម្ដាយមានកូនចៅនៅក្នុងក្រុងស៊ីយ៉ូន ឬនៅក្នុងស្តេកណាមួយដែលបានរៀបចំឡើងក្ដី ដែលពុំបានបង្រៀនកូនចៅឲ្យយល់នូវគោលលទ្ធិអំពីការប្រែចិត្ត សេចក្ដីជំនឿជឿដល់ព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់នៅ និង អំពីបុណ្យជ្រមុជទឹក ហើយនិងអំពីអំណោយទានជាព្រះវិញ្ញាណបរិសុទ្ធ ដោយសារការដាក់ដៃលើ កាលមានអាយុប្រាំបីឆ្នាំ នោះអំពើបាបនឹងធ្លាក់មកលើក្បាលរបស់ឪពុកម្ដាយវិញ ។
« ហើយនេះត្រូវទៅជាក្រិត្យវិន័យដល់បណ្ដាជននៃក្រុងស៊ីយ៉ូន ឬនៅក្នុងស្តេកណាមួយដែលបានរៀបចំឡើង ។
« ហើយកូនចៅរបស់ពួកគេត្រូវទទួលបុណ្យជ្រមុជទឹកសម្រាប់ការផ្ដាច់បាបទាំងឡាយរបស់ខ្លួន កាលមានអាយុប្រាំបីឆ្នាំ ហើយទទួល [ ព្រះវិញ្ញាណបរិសុទ្ធ ] » ។1
ម្ដាយខ្ញុំបានធ្វើផ្នែករបស់គាត់ ។ គាត់បានរៀបចំកូនចៅគាត់ជាមួយនឹងពាក្យសម្ដីដូចជាសម្ដីរបស់អាលម៉ាដែលបានកត់ត្រាក្នុងព្រះគម្ពីរមរមនដែរ ៖
« ហើយហេតុការណ៍បានកើតឡើងថា លោកបាននិយាយទៅកាន់ពួកគេថា ៖ មើលចុះ នេះជាទឹកមរមន ( ព្រោះនេះជាឈ្មោះដែលគេហៅ ) ហើយឥឡូវនេះ ដោយអ្នករាល់គ្នាមានបំណងចង់ចូលរួមក្នុងក្រោលនៃព្រះ ហើយដើម្បីឲ្យបានហៅថាជារាស្ត្ររបស់ទ្រង់ ហើយយល់ព្រមទទួលបន្ទុកគ្នាទៅវិញទៅមក ដើម្បីឲ្យបន្ទុកនោះបានស្រាល
« មែនហើយ ហើយយល់ព្រមទួញយំជាមួយនឹងអ្នកណាដែលទួញយំ មែនហើយ ហើយកំសាន្តទុក្ខដល់អស់អ្នកណាដែលកំពុងត្រូវការកំសាន្តទុក ហើយឈរជាសាក្សីដល់ព្រះនៅគ្រប់ពេល និង គ្រប់សេចក្ដី និង គ្រប់ទីកន្លែងដែលអ្នករាល់គ្នាបាននៅ រហូតដល់ពេលស្លាប់ ដើម្បីឲ្យអ្នករាល់គ្នាអាចបានប្រោសសោះដោយព្រះ ហើយបានរាប់ជាមួយនឹងពួកអ្នកនៃដំណើររស់ឡើងវិញទីមួយ ដើម្បីឲ្យអ្នករាល់គ្នាអាចមានជីវិតដ៏នៅអស់កល្បជានិច្ច---
« ឥឡូវនេះ ខ្ញុំសូមប្រាប់អ្នក បើសិននេះជាបំណងនៅក្នុងចិត្តអ្នក តើមានអ្វីទៅដែលរារាំងអ្នកមិនឲ្យទទួលបុណ្យជ្រមុជទឹកដោយនូវព្រះនាមនៃព្រះអម្ចាស់ ដើម្បីធ្វើជាសាក្សីដល់ទ្រង់ថា អ្នករាល់គ្នាបានចូលក្នុងសេចក្ដីសញ្ញាជាមួយនឹងទ្រង់ថា អ្នករាល់គ្នានឹងបម្រើព្រះអង្គ ហើយកាន់តាមព្រះបញ្ញត្តិទាំងឡាយរបស់ទ្រង់ ដើម្បីឲ្យទ្រង់ស្រោចព្រះវិញ្ញាណទ្រង់មកលើអ្នករាល់គ្នាយ៉ាងបរិបូរណ៍ ?
« ហើយឥឡូវនេះ កាលប្រជាជនបានឮពាក្យទាំងនេះ គេក៏បានទះដៃដោយសេចក្ដីអំណរ ហើយស្រែកថា ៖ នេះហើយជាបំណងនៃចិត្តរបស់យើងខ្ញុំ » ។2
អ្នកប្រហែលជាមិនទះដៃ ពេលអ្នកឮការអញ្ជើញឲ្យធ្វើសេចក្ដីសញ្ញា ដោយពិធីបុណ្យជ្រមុជទឹកជាលើកដំបូងនោះទេ តែអ្នកប្រាកដជាមានអារម្មណ៍នូវក្ដីស្រឡាញ់របស់ព្រះអម្ចាស់ និងការតាំងចិត្តខ្ពស់ដើម្បីបីបាច់អ្នកដទៃជំនួសទ្រង់ ។ ខ្ញុំនិយាយពាក្យ « ប្រាកដ » ដោយសារអារម្មណ៍ទាំងនោះចាក់ជ្រៅចូលទៅក្នុងចិត្តនៃបុត្រីរបស់ព្រះវរបិតាគ្រប់រូប ។ នោះជាមរតកដ៏ទេវភាពរបស់អ្នកពីទ្រង់ ។
អ្នកបានទទួលការបង្រៀនពីទ្រង់ ពីមុនអ្នកមកកើតក្នុងជីវិតនេះ ។ ទ្រង់បានជួយអ្នកឲ្យយល់ ហើយទទួលថា អ្នកនឹងមានទុក្ខលំបាក ការសាកល្បង និង ឱកាសដែលបានសម្រាំងសម្រាប់អ្នកតែម្នាក់គត់ ។ អ្នកបានរៀនថា ព្រះវរបិតាយើង មានផែនការសុភមង្គលមួយដើម្បីនាំអ្នកឆ្លងកាត់ឧបសគ្គដោយសុវត្ថិភាព ហើយថាអ្នកនឹងជួយនាំអ្នកដទៃឆ្លងកាត់ឧបសគ្គពួកគេដោយសុវត្ថិភាពដែរ ។ ផែនការនេះ ត្រូវបានគូសដានដោយសេចក្ដីសញ្ញាជាមួយនឹងព្រះ ។
វាជាសិទ្ធិជ្រើសរើសយើង មិនថាយើងធ្វើ ហើយរក្សាសេចក្ដីសញ្ញាទាំងនោះដែរឬអត់នោះទេ ។ មានបុត្រីទ្រង់តែតិចតួចប៉ុណ្ណោះ មានឱកាសក្នុងជីវិតនេះដើម្បីរៀនពីសេចក្ដីសញ្ញាទាំងនោះ ។ អ្នកជាម្នាក់ក្នុងចំណោមអ្នកទាំងនោះហើយ ។ បងប្អូនស្រីជាទីស្រឡាញ់ អ្នករាល់គ្នាម្នាក់ៗជាបុត្រីនៅក្នុងសេចក្ដីសញ្ញានោះ ។
ព្រះវរបិតាសួគ៌បានបង្រៀនអ្នកពីមុនអ្នកចាប់កំណើតមកម៉្លេះ ស្ដីពីបទពិសោធន៍ដែលអ្នកនឹងជួប ពេលអ្នកចេញពីទ្រង់មកកាន់ផែនដីនេះ ។ អ្នកត្រូវបានបង្រៀនថា ផ្លូវត្រឡប់ទៅរកទ្រង់វិញ គឺមិនងាយស្រួលឡើយ ។ ទ្រង់បានជ្រាបថា បើគ្មានជំនួយ អ្នកនឹងមានការលំបាកនៅក្នុងដំណើរនេះ ។
អ្នកមានពរណាស់ ដែលបានរកឃើញផ្លូវដើម្បីធ្វើសេចក្ដីសញ្ញាទាំងនោះក្នុងជីវិតនេះ ហើយមានអ្នកដែលចាំជួយនៅជុំវិញអ្នក -- ដែលពួកគេជាបុត្រីក្នុងសេចក្ដីសញ្ញារបស់ព្រះវរបិតាសួគ៌ ដូចជាអ្នកផងដែរ ។
នារាត្រីនេះ អ្នកនឹងដឹងពីពរជ័យ ដោយបានចូលរួមនឹងបុត្រីនៃព្រះ ដែលស្ថិតនៅក្នុងសេចក្ដីសញ្ញាដើម្បីជួយ ហើយដឹកនាំអ្នក ដូចដែលពួកគេបានសន្យានឹងធ្វើផងដែរ ។ ខ្ញុំធ្លាប់ឃើញអ្វីដែលអ្នកធ្លាប់ឃើញ ពេលបងប្អូនស្រីនៃសេចក្ដីសញ្ញា រក្សាការតាំងចិត្តនោះ ដើម្បីលួងលោម ហើយជួយ---ហើយធ្វើវាដោយស្នាមញញឹម ។
ខ្ញុំចាំពីស្នាមញញឹមរបស់បងស្រី រ៉ាប់ប៊ី ហេត ។ គាត់ជាភរិយារបស់អែលឌើរ ដាវីឌ ប៊ី ហេត ជាសមាជិកក្នុងកូរ៉ុមនៃពួកសាវកដប់ពីរនាក់ ។ កាលពីក្មេង លោកបានបម្រើជាប្រធានស្តេក ប៉ាឡូ អាល់តូ ក្នុងរដ្ឋ កាលីហ្វូញ៉ា ។ គាត់បានអធិស្ឋានដោយខ្វល់ខ្វាយពីពួកក្មេងស្រីនៅថ្នាក់ម៉ៃម៉េតក្នុងវួដគាត់ ។
ដូច្នេះប្រធាន ហេត បានបំផុសគំនិតសុំឲ្យប៊ីស្សពហៅ រ៉ាប់ប៊ី ហេត ដើម្បីបង្រៀនក្មេងស្រីទាំងនោះ ។ គាត់បានដឹងថា ភរិយាគាត់នឹងក្លាយជាសាក្សីម្នាក់ពីព្រះ ដែលនឹងលើកស្ទួយ លួងលោម ហើយស្រឡាញ់ក្មេងស្រីក្នុងថ្នាក់នោះ ។
បងស្រី ហេត ចាស់ជាងក្មេងស្រីដែលគាត់បង្រៀនយ៉ាងហោចណាស់ 30 ឆ្នាំ ។ លុះ 40 ឆ្នាំក្រោយពីគាត់បានបង្រៀនពួកគេ រាល់ពេលគាត់ជួបនឹងភរិយាខ្ញុំ ដែលជាក្មេងស្រីម្នាក់ក្នុងថ្នាក់គាត់ នោះគាត់បានឱបទាំងញញឹម ហើយនិយាយទៅកាន់ ខាធី ថា « អូ៎ ! កូនសិស្សអ្នកគ្រូ» ។ ខ្ញុំបានឃើញលើសពីស្នាមញញឹមគាត់ទៅទៀត ។ ខ្ញុំដឹងពីក្ដីស្រឡាញ់ដ៏ជ្រាលជ្រៅចំពោះបងស្រីម្នាក់ ដែលគាត់នៅតែមើលថែ ទុកដូចជាកូនស្រីគាត់ផ្ទាល់ ។ ស្នាមញញឹម និង ការួសរាយរាក់ទាក់របស់គាត់ កើតចេញពីការមើលឃើញថា ប្អូនស្រី និងបុត្រីម្នាក់ នៃព្រះកំពុងស្ថិតលើផ្លូវនៃសេចក្ដីសញ្ញា ។
ព្រះវរបិតាសួគ៌ញញឹមមកលើអ្នកផងដែរ ពេលទ្រង់ទតឃើញអ្នកជួយបុត្រីទ្រង់ម្នាក់ឲ្យដើរលើផ្លូវនៃសេចក្ដីសញ្ញាឆ្ពោះទៅរកជីវិតអស់កល្ប ។ ហើយទ្រង់មានព្រះទ័យរីករាយ រាល់ពេលអ្នកខំរើសផ្លូវត្រូវ ។ ទ្រង់ទតមើលអ្នកទាំងពេលនេះ និង ពេលអនាគតផងដែរ ។
អ្នកប្រហែលជាមានឪពុកម្តាយនៅលើផែនដីនេះ ដែលបានគិតថា អ្នកអាចធ្វើបានប្រសើរជាងអ្វីដែលអ្នកបានគិត ។ ខ្ញុំមានម្ដាយបែបនេះ ។
កាលពីក្មេង អ្វីដែលខ្ញុំមិនដឹងគឺថា ព្រះវរបិតាសួគ៌ខ្ញុំ ដែលជាព្រះវរបិតាអ្នកដែរ ទតឃើញសក្ដានុពលក្នុងកូនចៅទ្រង់ធំជាងយើង ឬម្ដាយយើងនៅលើផែនដី មើលឃើញយើងទៅទៀត ។ ហើយពេលណាអ្នករំកិលឡើងលើផ្លូវនោះឆ្ពោះទៅសក្ដានុពលរបស់អ្នក វាធ្វើឲ្យទ្រង់មានសុភមង្គល ។ ហើយអ្នកអាចមានអារម្មណ៍ពីការអនុញ្ញាតទ្រង់ ។
ទ្រង់ទតឃើញសក្ដានុពលដ៏រុងរឿងនោះនៅក្នុងខ្លួនបុត្រីទ្រង់គ្រប់ទីកន្លែង ។ ឥឡូវ ការណ៍នោះបានផ្ដល់ទំនួលខុសត្រូវធំមួយដល់អ្នករាល់គ្នា ។ ទ្រង់រំពឹងឲ្យអ្នកប្រព្រឹត្តចំពោះមនុស្សគ្រប់គ្នាដែលអ្នកជួបថាជាកូនចៅនៃព្រះ ។ នោះជាហេតុផលដែលទ្រង់បញ្ជាយើងឲ្យស្រឡាញ់អ្នកជិតខាងយើងដូចជាយើងស្រឡាញ់ខ្លួនឯង ហើយអត់ទោសដល់ពួកគេ ។ អារម្មណ៍នៃក្ដីសប្បុរស និង ការអត់ទោសរបស់អ្នកចំពោះអ្នកដទៃកើតមាន ដោយសារមរតកដ៏ទេវភាពដែលអ្នកបានទទួលពីទ្រង់ក្នុងនាមជាបុត្រីទ្រង់ ។ មនុស្សគ្រប់គ្នាដែលអ្នកជួប គឺជាកូនចៅខាងវិញ្ញាណដែលទ្រង់ស្រឡាញ់ ។
ពេលអ្នកទទួលអារម្មណ៍ពីភាពជាបងប្អូនស្រីដ៏ធំនោះ អ្វីដែលយើងគិតថាបំបែកបំបាក់យើង នឹងរសាយបាត់ ។ ឧទាហរណ៍ បងប្អូនស្រីទាំងចាស់ទាំងក្មេង បានចែកចាយពីអារម្មណ៍ខ្លួន ដោយរំពឹងទុកនូវការយល់ចិត្ត ហើយទទួលយក ។ អ្នកជាបុត្រីនៃព្រះដូចគ្នា ទោះអ្នកជាមនុស្សខុសគ្នាក៏ដោយ ។
ជាមួយទស្សនៈនោះ យុវនារី គួរទន្ទឹងរង់ចាំការចូលទៅកាន់ថ្នាក់សមាគមសង្គ្រោះរបស់ខ្លួនថាជាឱកាសមួយដើម្បីបង្កើនចំនួនបងប្អូនស្រី ដែលពួកគេនឹងបានស្គាល់ កោតសរសើរ ហើយស្រឡាញ់ ។
សមត្ថភាពដូចគ្នានោះ ដើម្បីមើលឃើញពីអ្វីដែលយើង អាចប្រែក្លាយកំពុងកើនឡើងក្នុងក្រុមគ្រួសារ និង ថ្នាក់កុមារ ។ វាកំពុងកើតឡើងក្នុងរាត្រីជួបជុំក្រុមគ្រួសារ និង ក្នុងកម្មវិធីកុមារ ។ ក្មេងតូចៗកំពុងបំផុសគំនិតឲ្យនិយាយរឿងធំ ហើយអស្ចារ្យ ដូចពួកគេបានធ្វើ ពេលព្រះអម្ចាស់បានស្រាយអណ្ដាតពួកគេ កាលទ្រង់បានបង្រៀនពួកគេ ក្រោយពីទ្រង់បានរស់ឡើងវិញ ។3
កាលសាតាំងកំពុងវាយប្រហារដល់បងប្អូនស្រីតាំងពីក្មេង នោះព្រះអម្ចាស់កំពុងលើកបងប្អូនស្រីទៅកាន់កម្រិតនៃជីវភាពខាងផ្លូវវិញ្ញាណកាន់តែខ្ពស់ជាងមុន ។ ឧទាហរណ៍ យុវនារីកំពុងបង្រៀនម្ដាយខ្លួនពីរបៀបប្រើកម្មវិធី FamilySearch ដើម្បីស្វែងរក ហើយសង្គ្រោះដល់ដូនតា ។ បងប្អូនស្រីវ័យក្មេងខ្លះដែលខ្ញុំស្គាល់កំពុងជ្រើសរើសចេញទៅតាំងពីព្រឹកព្រលឹម ដើម្បីធ្វើបុណ្យជ្រមុជទឹកជំនួសក្នុងព្រះវិហារបរិសុទ្ធដោយគ្មានការបង្ខំ តែពោរពេញដោយវិញ្ញាណរបស់អេលីយ៉ា ។
នៅបេសកកម្មជុំវិញពិភពលោក បងប្អូនស្រីកំពុងត្រូវបានហៅឲ្យបម្រើជាថ្នាក់ដឹកនាំ ។ ព្រះអម្ចាស់បានបង្កើតតម្រូវការសម្រាប់ការបម្រើរបស់ពួកគេ ដោយធ្វើឲ្យបងប្អូនស្រីក្នុងចំនួនដ៏ច្រើនមានអារម្មណ៍ចង់បម្រើ ។ មានប្រធានបេសកកម្មជាច្រើន បានមើលឃើញថា អ្នកផ្សាយសាសនាស្រីកាន់តែមានឥទ្ធិពលក្នុងនាមជាអ្នកផ្សាយសាសនា និងជាពិសេស ជាថ្នាក់ដឹកនាំខាងការបីបាច់ថែទាំ។
មិនថាអ្នកបម្រើជាអ្នកផ្សាយសាសនាពេញម៉ោងដែរ ឬអត់នោះទេ អ្នកអាចទទួលបានសមត្ថភាពដូចគ្នា ដើម្បីពង្រឹងការរៀបការអ្នក និងសមត្ថភាពចិញ្ចឹមកូនចៅដ៏ថ្លៃថ្នូរបាន ដោយធ្វើតាមគំរូនៃស្ត្រីដ៏ឆ្នើម ។
សូមគិតពីនាងអេវ៉ា ជាម្ដាយនៃមនុស្សទាំងអស់ ។ អែលឌើរ រ័សុល អិម ណិលសុន បានថ្លែងពីនាងអេវ៉ាថា ៖ «យើង និងមនុស្សទាំងអស់ មានពរជារៀងរហូត ដោយសារភាពក្លាហាន និង ប្រាជ្ញាដ៏អស្ចារ្យរបស់នាងអេវ៉ា ។ ដោយការទទួលទានផ្លែទីមួយ នាងបានធ្វើអ្វីដែលនាងគួរធ្វើ ។ អ័ដាមក៏ឈ្លាសវៃធ្វើរឿងដូចគ្នានេះដែរ » ។4
រាល់កូនស្រីរបស់នាងអេវ៉ា អាចនាំយកពរជ័យដូចគ្នាដែលនាងអេវ៉ាបានផ្ដល់ដល់គ្រួសារនាងឲ្យគ្រួសារខ្លួនបានដែរ ។ នាងជាមនុស្សដ៏សំខាន់នៅក្នុងការបង្កើតក្រុមគ្រួសាររហូតដល់យើងមានរបាយការណ៍នេះ ស្ដីពីការបង្កបង្កើតរបស់នាង ៖ « ហើយក្រុមព្រះបានមានព្រះបន្ទូលថា ៖ តោះ ចូរយើងធ្វើឲ្យមានជំនួយម្នាក់សមសម្រាប់ជួយគាត់ ត្បិតមិនល្អទេដែលបុរសគួរនៅម្នាក់ឯង ហេតុដូច្នេះហើយ យើងនឹងសូនជាជំនួយមួយដ៏សមចំពោះគាត់» ។5
យើងមិនបានដឹងនូវរាល់ជំនួយដែលនាងអេវ៉ាមានចំពោះអ័ដាម និង គ្រួសារពួកគេឡើយ ។ តែយើងដឹងពីអំណោយដ៏អស្ចារ្យមួយដែលនាងបានផ្ដល់ ហើយដែលអ្នករាល់គ្នាអាចផ្ដល់ឲ្យផងដែរ ៖ នាងបានជួយគ្រួសារឲ្យឃើញផ្លូវត្រឡប់ទៅផ្ទះវិញ ពេលផ្លូវនៅខាងមុខហាក់ដូចជាមានការលំបាក។ « ហើយនាងអេវ៉ាជាប្រពន្ធគាត់ បានឮគ្រប់ការណ៍ទាំងនេះ ហើយមានចិត្តរីករាយដោយពោលថា ៖ បើសិនជាពុំមែនដោយសារ ការរំលងរបស់យើងទេ នោះយើងក៏នឹងមិនមានពូជសោះ ហើយនឹងមិនដឹងខុសត្រូវ និង សេចក្ដីអំណរអំពីសេចក្ដីប្រោសលោះរបស់យើង និង ជីវិតដ៏នៅអស់កល្បជានិច្ច ដែលព្រះទ្រង់បានប្រទានដល់មនុស្សទាំងអស់ដែលគោរពតាមដែរ » ។6
អ្នកមានគំរូរបស់នាងដើម្បីធ្វើតាម ។
តាមរយៈវិវរណៈ នាងអេវ៉ាបានស្គាល់ពីផ្លូវទៅរកព្រះ ។ នាងបានដឹងថា ដង្វាយធួននៃព្រះយេស៊ូវគ្រីស្ទអាចធ្វើឲ្យក្រុមគ្រួសារមានជីវិតអស់កល្ប ។ នាងច្បាស់ក្នុងចិត្ត ដូចជាអ្នកអាចមានដែរ ថាពេលនាងរក្សាសេចក្ដីសញ្ញានាងជាមួយនឹងព្រះវរបិតានាង ព្រះដ៏ប្រោសលោះ និង ព្រះវិញ្ញាណបរិសុទ្ធនឹងទតឃើញនាង និង គ្រួសារ ឆ្លងកាត់រាល់ទុក្ខលំបាក និង ការបាក់ទឹកចិត្ត ដែលនឹងកើតមាន ។ នាងដឹងថា នាងអាចទុកចិត្តលើទ្រង់បាន ។
« ចូរទីពឹងដល់ព្រះយេហូវ៉ាឲ្យអស់អំពីចិត្ត កុំឲ្យពឹងផ្អែកលើយោបល់របស់ខ្លួនឡើយ
« ត្រូវឲ្យទទួលស្គាល់ទ្រង់នៅគ្រប់ទាំងផ្លូវអ្នកចុះ នោះទ្រង់នឹងតម្រង់អស់ទាំងផ្លូវច្រករបស់អ្នក » ។7
ខ្ញុំដឹងថា នាងអេវ៉ាបានជួបនឹងទុក្ខលំបាក និង ការខកបំណង តែខ្ញុំក៏ដឹងផងដែរថា នាងបានរកឃើញក្ដីអំណរដោយដឹងថា នាង និង គ្រួសារនាង អាចត្រឡប់ទៅរស់នៅជាមួយនឹងព្រះវិញ ។ ខ្ញុំដឹងថា អ្នករាល់គ្នាជាច្រើនដែលនៅទីនេះ បានជួបទុក្ខសោក និង ការខកចិត្ត ។ ខ្ញុំសូមបន្សល់ទុកពរជ័យរបស់ខ្ញុំនឹងអ្នករាល់គ្នាថា អ្នកអាចមានអារម្មណ៍នូវក្ដីអំណរដូចគ្នានឹងនាងអេវ៉ាដែរ ពេលអ្នកធ្វើដំណើរត្រឡប់ទៅផ្ទះវិញ ។
ខ្ញុំមានសាក្សីដ៏ពិតប្រាកដមួយថា ព្រះជាព្រះវរបិតាទតមើលអ្នកដោយក្ដីស្រឡាញ់ ។ ទ្រង់ស្រឡាញ់អ្នករាល់គ្នា ។ អ្នកជាបុត្រីនៅក្នុងសេចក្ដីសញ្ញារបស់ទ្រង់ ។ ដោយសារទ្រង់ស្រឡាញ់អ្នក ទ្រង់នឹងប្រទានជំនួយដែលអ្នកត្រូវការ ដើម្បីនាំខ្លួនអ្នក និង អ្នកដទៃទៀតឲ្យឡើងទៅលើផ្លូវត្រឡប់ទៅវត្តមានទ្រង់វិញ ។
ខ្ញុំដឹងថា ព្រះអង្គសង្គ្រោះ បានបង់ថ្លៃសម្រាប់អំពើបាបយើងរាល់គ្នា ហើយថាព្រះវិញ្ញាណបរិសុទ្ធបានថ្លែងទីបន្ទាល់ពីសេចក្ដីពិត ។ អ្នកមានការលួងលោមនោះ នៅក្នុងការប្រជុំនេះ ។ ខ្ញុំមានទីបន្ទាល់មួយថា កូនសោទាំងអស់ដែលចងសេចក្ដីសញ្ញាពិសិដ្ឋ ត្រូវបានស្ដារឡើងវិញ ។ វាត្រូវបានកាន់ ហើយអនុវត្តនៅសព្វថ្ងៃ ដោយព្យាការីដែលនៅរស់យើង គឺប្រធាន ថូម៉ាស អេស ម៉នសុន ។ ខ្ញុំសូមបន្សល់ទុកពាក្យលួងលោម និង ក្ដីសង្ឃឹមទាំងនេះនឹងអ្នក ដែលជាបុត្រីនៃសេចក្ដីសញ្ញារបស់ទ្រង់ ក្នុងនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន។