Leddik ro ilo Bujen eo

Jaar katak kōn kajoor an jetōb joten in. Ij jar bwe naan ko kar kōnono jen sister rein reļļap rej ritōl naaj deļo̧n̄ewaj ibūrōmi āinwōt raar deļo̧n̄ ibūruwō.

En̄in ej juon kweilo̧k ilo bwebwenato. Aolep kōrā in Kabun̄ in ralitōk iiō im rūttoļo̧k kar kūrtok n̄an koba ippād joten in. Elōn̄ iaad raar jar bwe Jetōb Kwojarjar eo en pād ippād. Kōjeram̧m̧an in kar letok ke jaar ron̄ an sister rein kōnono im kar ron̄jake al ko rekōbakkak. Ij jar bwe Jetōb eo enaaj wōnm̧aanļo̧k im pād ippād ilo aō lewaj jet naan in rōjan̄ ko im naan in kam̧ool ilo kakkobaba n̄an ta ko kar ba—im eļaptata n̄an kam̧ool bwe kar jiron̄ kōj bwe Irooj enaaj ron̄jake kōj.

Inaaj kōnono joten in kōn iaļ—eo kain wāween kein raiboojoj kar kōmeļeļeik rainin—eo jej aikuj bōke ilo iaļ in ito itak in ad ļo̧k n̄an Jemedwōj Ilan̄. Iaļ in ej kōkkaļļeik jen bujen ko rekwojarjar ippān Anij. Inaaj kōnono ippāmi kōn lan̄lōn̄ in kōm̧m̧an im kōjparok bujen kein.

Jejjo iami rej kab peptaij im kar bōk menin letok eo an Jetōb Kwojarjar jen likūt pā ko ioon. N̄an kom̧, ememļo̧kjeņ in ekāāl. Ro jet raar peptaij jem̧aan, kōn menin ememļo̧kjeņ an en̄jake ko ami kōn imminene in bujen in jab lukkuun kememeji, ak jet iaan en̄jake kein rej rooltok jabdewōt iien kom̧ij ron̄jake jar in kwojkwoj ko.

Eban ruo iaad enaaj wōr an ejja ememļo̧kjeņ ko kōn raan eo ke jaar kōm̧m̧an bujen peptaij in ekwojarjar im bōk menin letok eo an Jetōb Kwojarjar. Ak kōj kajjojo raar en̄jake kōmālim an Anij. Im jaar en̄jake juon ikdeleel n̄an meļo̧kļo̧k im maron̄ jeorļo̧k bōd im bōk juon kōņaan eļap n̄an kōm̧m̧ane men eo ejim̧we.

Wāween an m̧wilaļ en̄jake kein ibūruwōm̧i kar lukkuun kili jen wāween eo kwaar m̧aanjebpopo jen armej ro reakwe. Ij kōjatdikdik bwe elōn̄ iami ro raar deļo̧n̄e tok aelōn̄ in kiin̄ in rej jeram̧m̧an n̄an maron̄ jijet iturin jinem. Eļan̄n̄e kwoj, komaron̄ leļo̧k juon ettōn̄ dikdik im kam̧oolol kiiō. Imaron̄ keememej en̄jake lan̄lōn̄ im kam̧oolol ke iaar jijet iturin jinō iaļ eo am n̄an m̧weo ālkin peptaij eo aō ilo Philadelphia, Pennsylvania.

Jinō eaar juon eo eaar lukkuun kōpooj eō n̄an kōm̧m̧an bujen in im n̄an aolep ko jet aikuj ļoori. Eaar tiljek n̄an eddo in jān Irooj:

Eļan̄n̄e ro jinen im jemān ewōr nejier ajri ilo Zaion, ak ilo jabdewōt stake ko raar ejaak, jerawiwi enaaj pād ioon bōran ro jinen im jemān eļan̄n̄e rej jab katakin ajri ro nejier n̄an meļeļe katak ko an ukweļo̧k, tōmak ilo Kraist Nejin Anij emour, peptaij, im menin letok eo an Jetōb Kwojarjar jen likūt pā ko ioon bōran n̄e ej ralitōk iiō rūtto.

Bwe menin enaaj juon kien n̄an ro inen Zaion ak jabdewōt stake ko an raar ejaak.

Im ajri ro nejier rej aikuj peptaij n̄an jeorļo̧k jerawiwi ko aer n̄e rej ralitōk iiō rūtto, im bōk [Jetōb Kwojarjar eo].¹

Jinō eaar kōm̧m̧ane ijo koņaan. Eaar kōpooj ajri ro nejin kōn naan ko eļap aer āinwōt ko an Alma, āinwōt raar jeje ilo Bok in Mormon eo:

“Im ālkin men kein, eaar ba n̄an er: Lo, er kein rej dān ko iMormon (bwe āindein kar kūr er) im kiiō, āinwōt kom̧ij kōņaan itok ilo wōrwōr an Anij, im n̄an kūr kom̧ armej ro An, im kom̧ij m̧ōņōņō n̄an ineek eddo ko an ro jet, bwe ren maron̄ mera;

“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko kom̧ maron̄ pād ie, em̧ool m̧ae mej, bwe kom̧in maron̄ bōk lo̧mo̧r an Anij, im bōnbōn ippān ro ilo jerkakpeje eo m̧oktata, bwe kom̧in maron̄ bōk mour indeeo—

“Kiiō ij ba n̄an kom̧, eļan̄n̄e en̄in ej ikdelel eo an buruōmi, ta ippāmi ņae baptaise ilo etan Irooj, āinwōt juon ri kam̧ool im̧aan mejān ke em̧ōj ami kar delon̄e juon bujen Ippān, bwe kom̧ naaj jerbal n̄an E im kōjparok kien ko An, bwe E en maron̄ lutōkleplep eļapļo̧k Jetōb eo An ioomi?

“Im kiiō ke armej ro raar ron̄ naan kein, raar kabbokbok peier ilo m̧ōņōņō, im lam̧ōj: En̄ in ej ikdelel eo an buruōm.”²

Kom̧ maron̄ jab kabbokbok peimi ke kom̧ ar kein kajuon ron̄ karuwainene in n̄an bujen jen peptaij, ak em̧ool kom̧ ar en̄jake iakwe eo an Rilo̧mo̧o̧r eo im juon kalim̧m̧ur eļap n̄an naajdik ro jet n̄an E. Imaron̄ ba “em̧ool” kōnke en̄jake kein raar pād m̧wilaļ iburuōm̧i aolep leddik ro nejin Jemedwōj Ilan̄. En̄in ej m̧ōttan eo kom̧ij jolet e ekwojarjar jān E.

Kom̧ ar kamminene jen E m̧okta jen ami kar itok ilo mour in. Eaar jipan̄ kom̧ meļeļe im errā bwe kom̧ naaj mālijjon̄, idajon̄jon̄, im jejjet iien ko rem̧m̧an kar kāleti n̄an kom̧. Kom̧ ar katak bwe Jemād ewōr juon an karōk in m̧ōņōņō n̄an kōjparoki kom̧ jen kapo ko im bwe kom̧ naaj jipan̄ bōktok ro jet n̄an kōjparok jen er. Karōk in ej kōkkaļļe jen bujen ko ippān Anij.

Ej ad anemkwoj in kālet men̄e jej kōm̧m̧an im kōjparok bujen kein. Jet wōt iaan leddik ro Nejin ewōr aer iien em̧m̧an ilo mour in n̄an katak bujen kein. Kom̧ij juon iaan ro jejjo rem̧ōņōņō. Kom̧, jejtōr ro jitōn bōro, kom̧ kajjojo, ej juon leddik in bujen.

Jemedwōj Ilan̄ eaar katakin kom̧ m̧okta jen ami kar ļotak kōn en̄jake ko kom̧ naaj būki ilo ami kar etal jen E im itok n̄an laļ in. Kom̧ ar ekkatak bwe iaļen ro̧o̧l n̄an E ej jamin naaj pidodo. Eaar jeļā bwe enaaj pen n̄an kom̧ n̄an kōm̧m̧ani iaļ in ito itak in n̄e ejjeļo̧k jipan̄.

Kom̧ ar jeram̧m̧an jab wōt n̄an loe iaļ in n̄an kōm̧m̧ani bujen kein ilo mour in ak n̄an jebooļ kōn ro jet renaaj jipan̄, ro, āinwōt kom̧—rej leddik in bujen ro nejin Jemedwōj Ilan̄.

Kom̧ ar aolep en̄jake kōjeram̧m̧an jen ami pād ippān doon joten in ippān leddik ro nejin Anij ro rej barāinwōt pād ium̧win bujen n̄an jipan̄ im tōl kom̧ āinwōt raar kalim̧m̧ur n̄an kōm̧m̧ane. Iaar loe ta eo kom̧ ar loe āinwōt jejtōr ro rebujen rej kōjparok kalim̧m̧ur in n̄an kaenōm̧m̧an im jipan̄—im kōm̧m̧ane kōn ettōn̄ dikdik.

Ij keememej ettōn̄ dikdik eo an Sister Ruby Haight. Eaar kōrā eo pāleen Elder David B. Haight, eo eaar juon membōr in Doulul eo an Jon̄oulruo Rijilōk ro. Ke ej juon likao eaar jerbal āinwōt būreejtōn eo an Palo Alto stake ilo California. Eaar jar im bar jar, im inepata kōn, leddik ro ilo Mia Maid kūlaaj eo ilo ward eo an.

Kōn menin Būreejtōn Haight eaar im̧we n̄an kajjitōk ippān Bisop eo n̄an kūr Ruby Haight n̄an katakin jiron̄ ro. Eaar jeļā enaaj juon rikam̧ool an Anij eo enaaj ļōn̄aj, kaenōm̧m̧an, im iakwe leddik ro ilo kūlaaj eo.

Sister Haight eaar 30 iiō rūttoļo̧k jen leddik ro eaar katakin er. 40 iiō ko ālkin eaar katakin er, kajjojo iien enaaj ioon kōrā eo pāleeō, eo eaar juon iaan leddik ro ilo kūlaaj eo an, ej kijon̄ letok pein, ettōn̄ dikdik, im ba Kathy, “O!Mia Maid eo aō.” Iaar loe eļap ļo̧k jen ettōn̄ dikdik eo an. Iaar ron̄ iakwe eo an em̧wilaļ n̄an juon jejtōr eaar kōjparok e wōt eļan̄n̄e eaar lukkuun nejin. Ettōn̄ dikdik eo an im iakiakwe eo an eaar itok jān loe bwe juon sister im leddik nejin Anij ej pād wōt ilo iaļen bujen eo n̄an m̧weo.

Jemedwōj Ilan̄ ej ettōn̄ dikdik n̄an kom̧ barāinwōt jabdewōt iien Ej loe ami jipan̄ juon leddik Nejin em̧m̧akūt ļo̧k ilo iaļ in bujen in ļo̧k n̄an mour indeeo. Im E ej m̧ōņōņō aolep iien kom̧ij kajjieon̄ kālet jim̧we eo. Ej jab loe wōt ta eo kom̧ij ak Ej loe ta eo kom̧ij iten erom.

Kom̧ maron̄ wōr juon jinemi im jememi ro rej ļōmņak bwe kom̧ maron̄ em̧m̧an ļo̧k jen ami ļōmņak kom̧ maron̄ erom. Ewōr juon kar jinō.

Ta eo iaar jab jeļā ke iaar dik bwe Jemedwōj Ilan̄, Jememiwōj Ilan̄, ej loe jeram̧m̧an ko reļļap ilo ajri ro Nejin jen kōj ak aaet an ro jined ioon laļ in loe ilo kōj. Im jabdewōt iien kom̧ij em̧m̧akūt m̧aanļo̧k ilo iaļ in ļo̧k n̄an jeram̧m̧an in ami, ej bōktok n̄an E lem̧ōņōņō. Im kom̧ maron̄ en̄jake kōmālim eo An.

Ej loe bwe jeram̧m̧an eo eaiboojoj ilo aolep leddik ro Nejin jabdewōt jikin rej pād ie. Kiiō, menin ej likūt juon eddo eļap ioon kom̧ kajjojo. Ej kōtmāne bwe kom̧in kōm̧m̧an n̄an aolep armej kom̧ij ioon āinwōt juon ajri nejin Anij. En̄in ej un eo Ej kakien kōj n̄an iakwe ro riturir āinwōt jej iakwe kōj make im n̄an jeorļo̧k aer bōd. Ami en̄jake ilo jouj im jeorļo̧k bōd ņae ro jet ej itok āinwōt ami rijolet ekwojarjar jān E Āinwōt leddik ro Nejin. Kajjojo armej kom̧ij ioon ej ajri in jetōb ejitōn bōro Nejin.

Ilo ami en̄jake doulul in jejtōr in eļap, ta jej ļōmņak ej kōjepel kōj wōtlo̧k. Ilo jidik iien, jejtōr ro reddik im rūtto rej kwaļo̧k en̄jake ko aer kōn kōtmāne eo jen meļeļe im errā. Kom̧ij lukkuun āinļo̧k wōt āinwōt leddik ro nejin Anij jen ami oktak jen doon.

Jen lale in, jiron̄ ro rej aikuj reim̧aanļo̧k n̄an deļo̧n̄e Doulul eo an Kōrā āinwōt juon iien em̧m̧an n̄an kōļapļo̧k doulul in jejtōr ro aer ko renaaj itok im jeļā, kautiej, im iakwe.

Ejja jon̄ak in ej n̄an lo ta eo jemaron̄ erom ej lōn̄ļo̧k ilo baam̧le ko im ilo Būraimere. Ej waļo̧k ilo nokon in jota ko an baam̧le im ilo būrookraam̧ ko an Būraimere. Ajri ro reddik rej im̧we n̄an ba eļap im men ko rekabwilōn̄lōn̄, āinwōt raar kōm̧m̧ane ke Rilo̧mo̧o̧r eo eaar kapidodoik loer ke Eaar katakin er ālkin Eaar jerkakpeje.³

Tōre in Satan emaron̄ tariņaeik jejtōr ro ilo iiō ko reddik, Irooj ej kotak jejtōr ro n̄an utiej ļo̧k im n̄an lābōļ ko routiej ilo jetōb. N̄an waanjon̄ak, jiron̄ ro rej katakin ro jineer wāween kōjerbal FamilySearch n̄an pukōt im lo̧mo̧o̧ren ro nukier remej. Jet jejtōr ro reddik ijeļā kajjieer rej kālet n̄an etal jibbon̄ tata n̄an kōm̧m̧ani kōkpeptaij ko ilo tampeļ ko ilo an ejjeļo̧k jabdwōt rōjan̄ ijjelo̧kin Jetōb an Ilaija.

Ilo mijen ko peļaakin laļ in, jejtōr ro rej kūr n̄an jerbal āinwōt ritōl ro. Irooj eaar kōm̧anm̧an aikuj eo n̄an jipan̄ ko aer jen un̄ūr būruwōn jejtōr ro ilo oran ko reļļap n̄an jerbal. Elōn̄ ļo̧k jen jejjo mijen būreejtōn ro raar loe jejtōr mijenede ro rej erom kajoorļo̧k āinwōt rikwaļo̧k ro im āinwōt ritōl ro rej katakin.

Men̄e kwaar ak jab jerbal āinwōt juon mijenede, komaron̄ bōk ejja maron̄ in n̄an kōkajoorļo̧k m̧are eo am im jon̄ak eo n̄an karūttoļo̧k ajri ro routiej jen ļoor waanjon̄ak ko an kōrā ro reļļap.

Ļōmņak kōn Eve, jinen armej otemjej. Elder Russell M. Nelson eaar ba kōn Eve in: “Kōj im aolep armej rej jeram̧m̧an n̄an indeeo kōn peran eo eļap im māletlet an Eve. Jen bōk m̧ōttan leen wōjke eo m̧oktata, eaar kōm̧m̧ane ta eo emenin aikuj bwen dedeļo̧k. Adam eaar māletlet n̄an kōm̧m̧an barāinwōt.”⁴

Aolep leddik nejin Eve ewōr aer jeram̧man n̄an bōktok ejja kōjeram̧m̧an in n̄an baam̧le eo aer eo Eve eaar bōktok n̄an er. Eaar lukkuun aorōk ilo ejaak an baam̧le ko bwe ewōr ad rebo̧o̧t in kōm̧anm̧an eo an: Anij eaar ba Er rej aikuj kōm̧m̧an juon jipan̄ n̄an m̧aan eo, bwe ej jab em̧m̧an bwe m̧aan eo ej aikuj make iaan, kōn menin Er renaaj ejaake juon jipan̄ n̄an e.⁵

Jej jab jeļā aolepān jipan̄ eo Eve ekar n̄an Adam im n̄an baam̧le eo aer. Ak jejeļā juon iaan menin letok eo eļap eaar letok, eo kom̧ kajjojo maron̄ barāinwōt letok: eaar jipan̄ baam̧le eo an loe iaļ eo n̄an m̧weo, ke iaļ eo im̧aan eaar pen. Eve, kōrā eo pāleen, eaar ron̄ bwe men kein otemjej im kar m̧ōņōņō, im ba bwe n̄e en kar jab bōd eo aer, er rej jamin kar wōr ineer im jamin kar jeļā em̧m̧an im nana im lan̄lōn̄ kōn pinmuur eo aer im mour indeeo Anij ej letok n̄an aolep ro rej pokake.⁶

Ewōr am waanjon̄ak n̄an ļoore.

Jen revelesōn, Eve eaar kile iaļ eo n̄an m̧weo n̄an Anij. Eaar jeļā bwe Pinmuur eo an Jisōs Kraist eaar kōm̧m̧an bwe mour indeeo en pidodo ilo baam̧le ko. Eaar jeļā, āinwōt ami maron̄, bwe āinwōt eaar dāpij bujen ko an ippān Jemedwōj Ilan̄, Ripinmuur eo im Jetōb Kwojarjar eo naaj loe e im baam̧le eo an jen jabdewōt būrom̧ōj im inepata ko renaaj itok. Eaar jeļā emaron̄ leke Er.

“Kwōn lōke Irooj kōn aolepen būruom̧, im kwōn jab atartar ioon jeļāļo̧kjeņ eo am̧.

“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”⁷

Ijeļā bwe Eve eaar jeļm̧ae būrom̧ōj im inepata ko, ak ij barāinwōt jeļā bwe eaar loe lan̄lōn̄ ilo jeļāļo̧kjeņ bwe e im baam̧le eo an remaron̄ jepļaakļo̧k n̄an mour ippān Anij. Ijeļā bwe elōn̄ iaami ro rej pād ijin rej jelm̧ae būrom̧ōj im inepata. Ij likūt aō kōjeram̧m̧an bwe, āinwōt Eve, kom̧ maron̄ en̄jake ejja lan̄lōn̄ in eaar en̄jake ilo ami jepļaakļo̧k.

Ewōr juon aō kam̧ool em̧ool bwe Anij Jemād ej mije kōj ilo iakwe. Ej iakwe kom̧ kajjojo. Kom̧ij leddik ro Nejin ilo bujen eo. Kōnke Ej iakwe kom̧, Enaaj letok jipan̄ eo kom̧ij aikuji n̄an kōm̧akūt kom̧ make im ro jet m̧aanļo̧k ilo iaļ in ļo̧k n̄an m̧aan Mejān.

Ijeļā bwe Rilo̧mo̧o̧r eaar kōļļāik wōnāān aolep jerawiwi ko ad im bwe Jetōb Kwojarjar ej kam̧ool kōn m̧ool eo. Kom̧ ar en̄jake kainōm̧m̧an eo ilo kweilo̧k in. Ewōr juon aō naan in kam̧ool bwe aolep kii ko rej likwōj bujen ko rekwojarjar raar jepļaaktok. Rej kōm̧m̧an im jerbal rainin jen rikanaan eo ad emour, Thomas S. Monson. Ij likūt naan in kaenōm̧m̧an kein aō im kōjatdikdik, leddik in bujen ro jitōn bōro Nejin, ilo etan Jisōs Kraist, amen.