“Aua Le Fefe; Ou Te Ia Te Oe”

E itiiti ni nai lagona e faatusatusa i lagona agaalofa o le avea ai ma ni matua. E leai se mea e suamalie atu nai lo le mauaina o se pepe faapelepele, e tuusa’o mai le lagi. Sa o’o se tasi o o’u tuagane i lenei faalogona i se auala sili ona ootia. O lona atalii muamua laitiiti sa fanau e lei o’o i le taimi e tatau ai ma o lona mamafa sa na o le 2 pauna 14 aunese (1.3 kg). Sa faaaluina e Hunter ona uluai masina e lua i le potu tigaina mo pepe faatoa fananau mai i le falemai. O nā masina sa avea ma taimi faamomoiloto mo le aiga atoa a o matou faamoemoe ma faatoga atu i le Alii mo Lana fesoasoani.

Sa manaomia e Hunter le Itiiti le tele o le fesoasoani. Sa tauivi o ia e maua le malosi e mafai ai ona ola. E masani ona aapa atu le lima malosi o lona tama agaalofa i le lima itiiti o lona atalii e faamalosiau i lona atalii vaivai.

Ma e faapena foi mo fanau uma a le Atua. E aapa mai lo tatou Tama i le Lagi ia i tatou taitoatasi i Lona alofa lemafuatiaina. E ia te Ia le mana i mea uma ma e finagalo e fesoasoani ia i tatou ia aoao, tuputupuae, ma toe foi atu ia te Ia. E faamatalaina e lenei mea le faamoemoega o lo tatou Tama: “ia aumaia le tino ola pea ma le ola faavavau o le tagata.”¹

Pe a tatou atiina ae le faatuatua sili ma le faalagolago i le Alii, e mafai ona tatou mauaina Lona mana e faamanuia ma laveai ai i tatou.

O loo lalagaina e le Tusi a Mamona lenei autu matagofie o le laveaiina o Lana fanau e le mana o le Alii i ona itulau uma. Na folasia mai e Nifae i le mataupu muamua lava o le tusi. I le fuaiupu e 20, tatou te faitau ai, “Faauta, o a’u, o Nifae, o le a ou faaali atu ia te outou le i ai o le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou e oo lava i le mana e laveaiina ai.”²

I le tele o tausaga ua mavae, na ou iloa i se tulaga patino tele ia upumoni na faamatalaina i lenei fuaiupu. Na ou iloa ai le moni o le latalata mai o lo tatou Tama i le Lagi ma le tele o Lona finagalo e fesoasoani ia i tatou.

I se tasi o afiafi a o fotu mai le pogisa, sa matou tietie atu ai ma lau fanau ae ou matauina ai se tamaitiiti o loo savali na o ia i le auala. Ina ua matou pasia o ia, sa ou maua se uunaiga uiga ese e tatau ona ou toe foi i tua ma fesoasoani ia te ia. Ae o le popole ina ne’i fefe o ia po o ai sea tagata ese e tu atu ia te ia i le po, o lea sa faaauau ai ona ou aveina le taavale. Sa toe o’o mai le uunaiga malosi faatasi ma upu i lou mafaufau: “Alu e fesoasoani i lena tamaitiiti!”

Sa ou toe liliu atu i tua ia te ia ma fesili i ai, “E te manaomia se fesoasoani? Sa ou maua se lagona e tatau ona ou fesoasoani ia te oe.”

Sa ia savali mai ia i matou ma loimata o loo tafe ifo i ona alafau ma faapea mai, “Ioe! Sa ou tatalo ia i ai se tasi o le a fesoasoani mai ia te au.”

O lana tatalo mo se fesoasoani sa taliina i le musumusuga na o’o mai ia te au. O lenei aafiaga o le mauaina o lea ituaiga o taitaiga manino mai le Agaga na tuua ai se lagona e le mafaagaloina o loo i ai pea i lou loto.

Ma o le taimi lenei i le mavae ai o le 25 tausaga ma e auala atu i le alofa mutimutivale agamalu, sa ma toe fesootai ai ma lenei tamaitiiti mo le taimi muamua i nai masina talu ai. Sa ou iloaina o lena aafiaga sa le na o sa’u tala—o lana tala foi. Ua avea nei Deric Nance o se tamā ma ua fai foi lona lava aiga. E le galo foi ia te ia lenei aafiaga. Na fesoasoani ia i maua e faataatia se faavae o le faatuatua e faafofogaina ma tali mai le Atua i a tatou tatalo. Ua ma faaaogaina uma [lenei aafiaga] e aoao ai la maua fanau o loo leoleoina i tatou e le Atua. E le o tuulafoaiina i tatou.

I lena po, sa nofo ai Deric ina ua tuua le aoga mo se gaoioiga ma sa misia ai le pasi mulimuli. I le avea ai ma se talavou, sa ia lagona ma le mautinoa e mafai lava ona ia oo i le fale, o lea sa amata ai ona ia savali.

Sa te’a le itula ma le afa ae o loo ia savali pea i le auala na o ia. O le mamao mai le aiga, ma le leai o ni fale e iloa atu, sa fefe ai o ia. I le faanoanoa, sa ia savali ai i tua o se faaputuga iliili, sa ia tootuli ai, ma ole atu i le Tama Faalelagi mo se fesoasoani. I nai minute talu ona toefoi ane Deric i luga o le auala, sa ou tu ai e tuuina atu le fesoasoani mo lana tatalo.

Ma i nei tausaga e tele mulimuli ane, ua manatua nei e Deric: “Sa mafaufau le Alii ia te au, o se alii pa’e’e ma lē saunia. Ma e tusa lava po o a isi mea o loo tutupu i le lalolagi, sa Ia silafia lo’u tulaga ma lava lona alofa mo au e auina mai ai le fesoasoani. O loo taliina lava e le Alii au tatalo i le tele o taimi talu mai lena auala tele tuulafoaiina. O Ana tali e le vave ma manino i taimi uma, ae o Lona mafaufau ia te au ua tutusa lava le manino i le taimi nei e pei ona sa i ai i lena po tuuatoatasi. Pe a ou lagona le mamafatu i mea o le lalolagi, ou te iloa o loo ia te Ia i taimi uma se fuafuaga e silafia ai ua ou toe taunuu ma le saogalemu i le aiga.”

E pei lava ona faaalia e Deric, e le o tatalo uma e vave ona taliina. Ae e moni e silafia i tatou e lo tatou Tama ma e faafofoga i aioiga o o tatou loto. Na te faataunuuina Ana vavega i le tatalo e tasi i le taimi, i le tagata e toatasi i le taimi.

E mafai ona tatou faatuatuaina o le a Ia fesoasoani mai ia i tatou, e le o le auala moni tatou te mananao ai ae i le auala o le a sili ai ona fesoasoani ia i tatou ia tuputupu ae ai. O le tuuina atu o tatou loto i Lona finagalo e ono faigata, ae e taua i le avea ai e faapei o Ia ma le mauaina o le filemu ua Ia ofoina mai ia i tatou.

E mafai ona tatou lagonaina, e pei ona faamatalaina e C. S. Lewis: “Ou te tatalo ona e le mafai ona ou faamalieina o’u lava manaoga. … Ou te tatalo ona ou te lagona le manaomia i taimi uma e ala ai ma moe ai. E le suia ai le Atua. E suia ai au.”³

E tele tala i tusitusiga paia e uiga ia i latou o e tuu atu lo latou faalagolago i le Alii ma e na Ia fesoasoani i ai ma laveaiina. Mafaufau i le taulealea o Tavita, o le na faasaoina mai le oti moni i lima o Koliata malosi e ala i le faalagolago i le Alii. Mafaufau ia Nifae, ma ana aioiga faatuatua i le Atua na aumaia ai le laveaiga mai i ona uso sa saili e faaumatia lona ola. Manatua le taulealea o Iosefa Samita, o le na saili ma le agaga tatalo mo le fesoasoani a le Alii. Sa lavaeaiina o ia mai le mana o le pogisa ma maua ai se tali faavavega. Sa fetaiai i latou uma nei ma ni luitau moni ma faigata. Sa taitasi ma galulue i le faatuatua ma tuu atu lona faatuatuaga i le Alii. Sa latou maua uma Lana fesoasoani. Ma e oo lava i o tatou aso, o loo faaali mai le mana ma le alofa o le Atua i olaga o Ana fanau.

Ua ou vaaia talu ai nei i olaga o Au Paia e faatumulia i le faatuatua i Zimbabwe ma Botswana. I se sauniga anapogi ma molimau i se paranesi laitiiti, sa faalotomaualaloina ma musuia ai au i molimau na faasoaina e le toatele—o tamaiti, o le autalavou, ma tagata matutua foi. Sa taitasi ma faasoaina mai se faailoaga mamana o le faatuatua i le Alii o Iesu Keriso. Faatasi ai ma luitau ma tulaga faigata o loo siomia ai i latou, o loo latou soifua i aso taitasi e ala i le tuuina atu o lo latou faatuatuaga i le Atua. Latou te faamamaluina Lona aao i o latou olaga ma e tele lava ina faailoa atu i se fuaitau “Ou te matuai faafetai tele i le Atua.”

I nai tausaga ua mavae sa faataitaia ai e se aiga faamaoni lena faalagolago e tasi i le Alii mo tagata o la matou uarota. Sa soifua Arn ma Venita Gatrell i se olaga fiafia ae maua loa Arn i se kanesa faigata. Sa faate’ia le lipoti a fomai—sa toe o ni nai vaiaso e soifua ai. Sa mananao le aiga e toe faatasia mo le taimi mulimuli. O lea na potopoto uma ai le fanau, o nisi mai i nofoaga mamao. Sa na o le 48 itula faapelepele e faatasitasi ai. Sa filifili ma le faaeteete e le au Gatrells se mea na sili ona taua ia i latou—o se ata o le aiga, o se taumafataga faaleaiga i le afiafi, ma se sauniga i le Malumalu o Sate Leki. Sa faapea mai Venita, “Ina ua matou savavali ese mai faitotoa o le malumalu, o le taimi mulimuli lea na matou toe faatasitasi ai i lenei olaga.”

Ae sa latou o ese ma se faamautinoaga o loo i ai se mea e sili atu mo i latou nai lo lenei olaga. Ona o feagaiga paia o le malumalu, ua mafai ai ona latou maua le faamoemoe i folafolaga a le Atua. Ua mafai ona latou faatasia e faavavau.

O le isi lua masina na sosoo ai sa faatumulia i faamanuiaga le mafaitaulia. O le faatuatua o Arn ma Venita ma le faalagolago i le Alii sa faatupulaia e pei ona faamaonia i upu a Venita: “Sa ou tumau. Sa ou aoao e mafai ona e lagonaina le filemu i totonu o taimi faigata. Sa ou iloa o loo silasila mai le Alii ia i tatou. Afai e te faalagolago i le Alii, e moni lava e mafai ona e faatoilaloina soo se luitau o le olaga.”

Sa faaopoopo mai se tasi o o la afafine: “Sa matou matā’ia o matou matua ma vaaia a laua faataitaiga. Sa matou vaaia lo la faatuatua ma le ala na la taulimaina ai. Ou te le fia talosagaina lava lenei tofotofoga, ae ou te le tuuesea. Sa siomia i matou i le alofa o le Atua.”

E moni, o le toesea ai o Arn sa le o se taunuuga sa faamoemoe i ai le au Gatrells. Ae o o latou faigata sa latou le i fesiligia ai lo latou faatuatua. O le talalelei a Iesu Keriso e le o se lisi o mea e fai; ae, e ola pea i o tatou loto. O le talalelei “e le o se avega mamafa, ae e faamama ai avega.”⁴ Tatou te onosaia ai o tatou tofotofoga. Sa tumau le au Gatrells. Sa o latou lagona le filemu i le lotolotoi o o latou tofotofoga. Sa latou pipii mau i le tasi ma le isi ma i feagaiga o le malumalu sa o latou osia ma tausia. Sa o latou tuputupu ae i lo latou gafatia e faalagolago ai i le Alii ma sa faamalosia i latou e lo latou faatuatua ia Iesu Keriso ma i Lona mana togiola.

Po o fea lava tatou te maua ai i tatou lava i luga o le ala o le avea ma soo, po o a lava o tatou popolega ma luitau e ono i ai, e le o tuua na o i tatou. E le o faagaloina oe. E pei o Deric, o le Au Paia i Aferika, ma le aiga o Gatrell, e mafai ona tatou filifili e aapa atu mo le aao o le Atua i o tatou manaoga. E mafai ona tatou faafetaiaia o tatou luitau i le tatalo ma le faalagolago i le Alii. Ma i le faagasologa o le a tatou avea atili ai e pei o Ia.

A o fetalai mai ia i tatou taitoatasi, na fetalai mai le Alii, “Aua e te fefe … ou te ia te oe: aua le fetepatepai; aua o au lou Atua: ou te faamalosia oe; … Ou te fesoasoani ia te oe; e moni, ou te taofi oe i lo’u lima taumatau e i ai le amiotonu.”⁵

Ou te faasoa atu lau molimau faamaualalo ma le mautinoa e silafia i tatou taitoatasi e le Atua lo tatou Tama ma e aapa mai e fesoasoani ia i tatou. E auala mai i Lona Alo Pele, o Iesu Keriso, e mafai ai ona tatou faatoilaloina luitau o lenei lalolagi ma toe foi atu ai ma le saogalemu i le aiga. Ia tatou maua le faatuatua e faalagolago ai ia te Ia, ou te tatalo ai i le suafa o Iesu Keriso, amene.