Stap Folemap

Sikstifo yia i pas long Septemba ia, mi kambak hom long misin blong mi long Inglan. Tri dei afta mi kambak, mi go long wan Helo Dei danis long Yunivesiti blong Yuta wetem wan fren blong mi. Hem i tokbaot wan naesfala studen we nem blong hem Babra Bowen we, long tingting blong hem, mi mas mitim. Hem i tekem gel ia i kam mo i presentem mitufala, mo mitufala i stat danis.

Be sore tumas, hemia i wanem mifala i singaotem “taj danis,” we i minim se yu save danis wetem gel ia nomo kasem taem wan narawan i kam tajem solda blong yu. Babra i wan smat woman mo i popula, mo mi danis wetem hem i no kasem minit mo wan nara yang man i kam tajem mi.

Hemia, mi no akseptem. Mi bin lanem se i impoten blong folemap man long misin blong mi. Mi karem telefon namba blong hem mo ringim hem long nekis dei blong askem blong mitufala i go aot, be hem i bisi wetem skul mo sosol aktiviti. Tangkyu tumas, misin blong mi i tijim mi blong gohed mo no givap, mo long en, mi bin kasem wan deit wetem hem. Mo afta deit ia, i bin gat ol narawan. Long wan wei, long wan long dei ia, mi bin save winim tingting blong hem se, mi nomo, mi wan tru riten misinari we i laef i stap—we hem i save lukluk long hem. Naoia, 64 yia i pas, i gat seven pikinini, mo plante apupikinini, mo smol apupikinini we oli stanap olsem pruf blong bigfala trutok ia se nomata mesej blong yu i gud, bae yu no save talemaot sapos yu no strong blong stap ripitim mo stap folemap oltaem.

Ating hemia nao mi gat strong filing blong folemap tedei, long toktok blong mi blong tufala las jeneral konfrens.

Long Oktoba 2011 konfrens, mi askem strong yufala blong yumi tingbaot ol impoten toktok ia blong Lod we i talem se, bae olsem ia nao oli mas singaotem jos blong Hem long ol las dei, we i Jos blong Jisas Kraes blong Ol Lata-dei Sent.¹

Wetem ol toktok ia, Lod i mekem i klia se hemia i no wan ofisol taetol nomo, be tu, i nem we bae oli singaotem nem blong Jos blong Hem. Wetem klia toktok ia, yumi no mas singaotem Jos long wan narafala nem bakegen, olsem “Momon Jos,” o “LDS Jos.”

Toktok ia, Momon, oli save yusum long samfala spesel taem we i tokbaot ol memba blong Jos, olsem ol Momon paeonia, o ol grup olsem Momon Tabenakol Kwaea. Ol memba blong Jos, oli save gud olgeta olsem, Ol Momon, mo taem yumi stap storian wetem olgeta blong narafala Jos, i stret blong yumi tokbaot yumiwan olsem, Ol Momon, be yumi no mas joenem i go wetem ful nem blong Jos.

Sapos ol memba oli lanem blong yusum stret nem blong Jos i go wetem toktok ia, Momon, bae i haelaetem se yumi ol Kristin man, ol memba blong Jos blong Sevya.

Ol brata mo sista. Bae yumi folemap mo developem fasin blong, oltaem, mekem i klia se yumi blong Jos blong Jisas Kraes blong Ol Lata-dei Sent.

Seken mesej we mi filim blong folemap, mi jes givim long las jeneral konfrens taem mi leftemap tingting blong ol memba blong prea blong Lod i lidim yufala long wan man o woman we bae yufala i invaetem blong lanem abaot gospel we i kambak, hemia bifo Krismes. Plante memba blong Jos oli serem wetem mi ol spesel eksperiens from oli bin askem Lod blong gat ol misinari janis.

Wan riten misinari, eksampol, i prea stret blong go long “wan ia” we bae hem i save go aot long hem. Nem blong wan foma fren blong skul i kam long tingting blong hem. Hem i go aot long hem long Facebook (Fesbuk), mo i lanem se fren blong hem i stap prea blong wan stamba tingting mo mining long laef. Hem i folemap stret long taem we hem i stap lukaotem trutok, mo long Disemba, hem i kasem baptaes.

Oli ripotem plante defren invitesen long mi, be samfala nomo oli folemap olsem brata ia i mekem.

Mi mi biliv strong long prinsipol blong folemap samting. Olsem misinari gaed, Prijim Gospel blong Mi i talem, blong stap sendem wan invitesen mo no stap folemap i olsem wan rod we i no gat en blong hem, o yu pem tikit long wan konset mo no go luk konset ia. Sapos aksen i no komplit, komitmen i emti.”²

Prijim Gospel blong Mi i tijim evriwan olsem wanem blong invaetem, mo tu, olsem wanem blong folemap ol invitesen ia. Stamba tingting blong misinari wok i minim blong invaetem “ol narawan blong kam long Kraes taem yumi helpem olgeta blong kasem gospel we i kambak tru long fet long Jisas Kraes mo Atonmen blong Hem, fasin blong sakem sin, baptaes, kasem presen we i Tabu Spirit mo stap strong kasem en.” ³

Blong invaetem man, i pat blong rod ia. Be luk tu se i gat moa samting long misinari wok blong memba i mekem bitim blong givim wan invitesen nomo blong pipol i lisin long ol misinari. Mo tu, i minim blong folemap wetem ol misinari blong fidim fet, wok blong kam blong sakem sin, rere blong mekem ol kavenan, mo stap strong kasem en.

Prinsipol ia blong folemap i kamaot klia long buk blong Ol Wok:

“Nao Pita mo Jon, tufala i wokbaot i go long haos blong God …

“Mo i gat wan man i stap long ples ia we i no save wokbaot, [stat long taem we hem i bon finis i kam], oli putum hem i stap long doa blong haos blong God, we nem blong hem i Doa we I Flas Gud, i stap askem mane long ol man we oli go insaed long haos blong God.

“Taem hem i luk Pita mo Jon i go insaed long haos ya, hem i askem tufala i givim samting.

“Nao Pita i lukluk stret long man ia, i talem long hem se: ‘Yu lukluk stret long mitufala.’

“Nao hem i lukluk i go long tufala, i ting se bae tufala i givim samting.

“Nao Pita i talem long hem se: ‘Mi mi no gat mane nating, be wan samting we mi mi gat, bae mi givim long yu. Long nem blong Jisas Kraes, man Nasaret, mi talem long yu Yu girap, yu wokbaot.’”

?Hemia wan invitesen we i gat paoa we i kam long wokman blong Lod, o nogat? Be Pita i no stop wetem invitesen ia. Skripja toktok i talem se “i tekem raet han blong hem, i leftemap hem. Mo wantaem nomo leg blong man ia i kam gud.

“Mo wantaem nomo i girap, i stanap, i stat wokbaot. Mo hem i biaen long tufala, trifala i go insaed long haos ia blong God, i stap wokbaot, i stap jamjam, i stap presem God.⁴

Long nara toktok, Pita i no yusum nomo prishud atoriti blong hem mo invaetem man ia blong girap mo wokbaot. Be tu, hem i folemap invitesen blong hem taem i go long man ia, i tekem raet han blong hem, i leftemap hem, mo afta, i wokbaot wetem hem i go insaed long tempol.

Long spirit blong eksampol blong Pita, bae mi givim tingting long yufala se yumi evriwan i save kam wok moa insaed long misinari wok, mo riplesem fraet wetem ril fet, invaetem wan, wan taem long wan kwota—o fo taem long evri yia—blong ol fultaem misinari oli tijim hem. Oli rere blong tij wetem Spirit mo wetem tru insperesen we i kam long Lod. Tugeta, yumi save folemap ol invitesen, tekem han blong narawan, leftemap olgeta mo wokbaot wetem olgeta long rod blong spirit ia we i go long tempol.

Blong helpem yu long rod ia, mi invaetem evri memba blong Jos, nomata wanem koling o level blong aktiviti long Jos, blong kasem wan kopi blong Prijim Gospel blong Mi. Hem i stap long ol distribusen senta, mo yu no pem spos yu tekem long websaet. Hem i wan gaedbuk blong mekem misinari wok—we i minim se i wan gaedbuk blong yumi evriwan. Ridim, stadi long hem, mo afta yu mekem wanem yu lanem blong helpem yu andastanem olsem wanem blong tekem ol sol oli kam long Kraes tru long invitesen mo fasin blong folemap. Olsem we Presiden Thomas S. Monson i talem: “Naoia i taem blong ol memba mo ol misinari oli kam tugeta, oli wok tugeta, oli wok long plantesen blong Lod blong tekem ol sol oli kam long Hem.”⁵

Jisas Kraes i tijim ol disaepol blong Hem:

“I gat plante kakae i stap long garen we i rere finis, be ol man blong wok oli smol nomo.

“Yufala i prea long Masta blong garen, blong hem i save sanem sam moa man oli kam blong karem ol kakae ia go long haos blong hem.”⁶

Lod i ansarem prea ia long taem blong yumi wetem namba blong ol fultaem misinari we i bigwan moa long histri blong wol. Long niufala wef ia blong ol fetful man blong wok, Lod i givim yumi wan nara janis blong helpem Hem long taem ia blong pikimap ol sol.

I gat ol gudfala wei i stap blong ol memba oli helpem mo sapotem ol gudfala misinari blong yumi. Eksampol, yu save talem ol misinari se yu stap stadi long Prijim Gospel blong Mi mo askem olgeta blong soem yu wanem olgeta tu oli stap lanem. Taem yufala i serem ol tingting, bae tras i kam strong bitwin ol memba mo ol fultaem misinari, semmak olsem we Lod i givim komanmen from.

Hem i talem se evri man mo woman i save toktok long nem blong God Lod, we i Sevya blong wol.⁷

Mo Hem i bin sendem yufala i go aot blong testifae mo wonem ol pipol, mo hem i nid blong evri man we i bin kasem woning blong hem i wonem neiba blong hem.⁸

Ol brata mo sista. ?Yufala i save luksave samting we bae i hapen sapos famle mo ol fren oli serem ol samting we oli stap lanem long stadi blong olgetawan long Prijim Gospel blong Mi insaed long ol leta mo imel i go long ol fultaem misinari blong olgeta? ?Bae yu save luk pikja blong ol blesing we bae i kam long ol famle taem oli save mo andastanem gud moa wanem nao boe mo gel blong olgeta bae oli stadi long hem mo tijim long misin blong olgeta? ?Yu save stat blong skelem bigfala gladhat blong pemaot man we Lod i putum long yumi wanwan mo yumi evriwan, folem promes blong Sevya we i go long evriwan we i serem testemoni blong hem taem hem i stap invaetem ol sol blong kam long Hem–mo afta folemap ol invitesen ia?

“Yufala i gat blesing” Lod i talem tru long Profet Josef Smit, “from testemoni we yufala i talem, oli rekodem long heven blong ol enjel oli lukluk long hem; mo oli glad long yufala, mo mi fogivim ol sin blong yufala.”⁹

“From we bae mi fogivim ol sin blong yufala wetem komanmen ia—se bae yufala i mas gohed blong stanap strong … blong stap talemaot testemoni long ful wol long saed blong olgeta samting we mi talemaot long yufala.”¹⁰

Sapos yumi stap folemap samting, bae Lod i no save letem yumi stap yumiwan. Mi bin luk glad, we toktok i no save tokbaot, we i go wetem testemoni we i invaetem man mo fetful fasin blong folemap we i stap long medel blong ol memba blong Jos raon long wol. Taem mi stap long Ajentina i no longtaem, mi leftemap tingting blong ol memba blong invaetem wan i kam long Jos bifo jeneral konfrens ia. Wan we i gat eit yia, we nem blong hem Josua i lisin mo i invaetem bes fren blong hem mo famle blong hem long wan open haos long wod blong olgeta long Buenos Aeres. Taem mi ridim wan leta we mi jes kasem we i eksplenem invitesen blong Josua mo wei we hem i folemap olgeta:

“Evri minit olsem Josua bae i ron i go long get blong luk se oli kam o no. Hem i talem se hem i save se bae oli kam.

“Naet i pas mo fren blong Josua i no kam. Be Josua i no givap. Hem i fetful mo i jekem get long fored evri minit. I taem blong stat putum ol samting i go nao taem Josua i stat blong jiamjiam i talem: ‘Hemia oli kam! !Hemia oli kam!’ mi lukluk i go mo luk ful famle i kam long Jos. Josua i ron i gritim olgeta mo hang long fren blong hem. Evriwan oli kam insaed mo luk se oli laekem open haos. Oli tekem sam smol buklet mo spendem taem blong save samfala niu fren. I gud blong luk fet blong wan smol boe mo save se ol pikinini blong Praemeri tu oli save kam misinari.”¹¹

Hem i testemoni blong mi se, taem yumi wok tugeta, yumi lukaotem wan ia, yumi invaetem, folemap wetem tras mo fet, Lod bae i smael long yumi, mo handred mo taosen blong ol pikinini blong God bae oli faenem wan stamba tingting mo pis insaed long Jos blong Jisas Kraes blong Ol Lata-dei Sent. Bae Lod i blesem yumi evriwan long ol hadwok blong yumi blong muvum wok blong sevem man i go hariap, mi prea wetem tingting i stap daon long nem blong Jisas Kraes, amen.