Rov Qab Xyuas

Rau caum plaub xyoos tas los thaum lub Cuaj Hlis Ntuj, kuv twb ua tub txib rov qab los tsev los ntawm Akiv Teb Chaws. Peb hnub tom qab kuv rov qab los, kuv koom ib txoj kev seev cev Hello Day Dance nyob ntawm tsev kawm ntawv qib siab University of Utah nrog kuv ib tug phooj ywg. Nws qhia kuv txog ib tus hluas nkauj zoo nkauj hu ua Barbara Bowen, uas nws xav tias kuv yuav tsum ntsib. Nws coj nws tuaj ntsib kuv, thiab wb pib seev cev.

Tiam sis, nov yog ib qho kev seev cev uas peb hu ua “tag dance” uas txhais hais tias yus muaj sij hawm seev cev nrog ib tug hluas nkauj mus txog thaum lwm tus tub hluas tuaj kov yus kom nws thiaj tau nrog tus hluas nkauj seev cev. Barbara lom zem heev thiab muaj npe heev, yog li ntawd kuv seev cev nrog nws tau ib feeb xwb ua ntej ib tug tub hluas los kov kuv kom kuv tawm mus.

Qhov no ua rau kuv tsis txaus siab hlo li. Vim kuv twb kawm hais tias kev rov qab xyuas yog ib qho tseem ceeb thaum kuv ua tub txib, kuv tau txais nws tus naj npawb xov tooj thiab kuv hu nws hnub tom qab ntawd thov nws nrog kuv mus ua si, tiam sis nws muaj tej yam nws yuav tsum ua nrog phooj ywg thiab yuav tsum kawm ntawv. Kuv zoo siab uas kuv txoj kev ua tub txib tau qhia kom kuv tsis zeem txawm kuv poob siab los yog, thiab thaum kawg kuv twb teem sij hawm tham nws. Thiab twb muaj tej kev sib tham tom qab ntawd. Xyov ua cas thaum kuv tham nws kuv ntxias kom nws xav tias kuv yog tib tug tub txib tseeb thiab muaj sia uas tau rov qab los tsev—raws li nws xav xwb. Nim no, 64 xyoos tom qab ntawd, wb muaj xya tus me nyuam thiab ntau tus xeeb ntxwv uas yog puav pheej qhia txog qhov tseeb hais tias txawm nej tej lus zoo npaum li cas los, nej yuav tsis muaj sij hawm hais tej lus ntawd yog tias nej tsis rau siab pheej rov qab xyuas.

Tej zaum yog vim li no kuv thiaj txais kev tshoov siab rov qab xyuas ob zaj uas kuv tau hais nyob hauv lub tuam rooj sab laj tas los.

Thaum lub Kaum Hli Ntuj xyoo 2011 lub rooj sab laj, kuv yaum kom peb yuav nco ntsoov tus Tswv tej lus tseem ceeb uas hais tias Nws lub koom txoos yuav hu li cas nyob hauv lub caij nyoog kawg no, uas twb hu ua Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.¹

Los ntawm cov lus no, tus Tswv piav meej hais tias nov tsis yog ib lub npe raws kev cai xwb, tiam sis yog lub npe uas yuav tsum hu Nws lub Koom Txoos. Vim Nws hais meej txog qhov no, peb yuav tsum tsis txhob siv lwm lub npe hais txog lub Koom Txoos, xws li “lub Koom Txoos Maumoos” los sis “lub Koom Txoos LDS.”

Tej lub sij hawm tsim nyog siv lo lus Maumoos thaum hais txog cov mej zeej ntawm lub Koom Txoos, xws li cov pioneer Maumoos, los yog tej lub koom haum xws li Maumoos lub Tsev Kheej Pawg Hu Nkauj. Tib neeg nyob thoob plaws ntiaj teb hu cov mej zeej ntawm lub Koom Txoos ua Maumoos, thiab thaum peb sib tham nrog cov uas tsis ntseeg li peb, ces tsim nyog uas peb hu peb tus kheej ua Neeg Maumoos, yog tias peb kuj hais lub npe ntawm lub Koom Txoos tag nrho.

Yog tias cov mej zeej kawm siv lub npe raug ntawm lub Koom Txoos thaum lawv hais lo lus Maumoos, ces yuav pab lwm tus paub tias peb yog neeg ntseeg Khetos, cov mej zeej ntawm tus Cawm Seej lub Koom Txoos.

Cov kwv tij thiab cov muam, cia peb rov qab xyuas thiab pheej qhia meej hais tias peb zwm rau Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Zaj ob uas kuv txais kev tshoov siab hais tias kuv yuav tsum rov qab xyuas yog qhov uas kuv tau hais thaum lub tuam rooj sab laj tas thaum kuv yaum cov mej zeej thov Vajtswv kom coj lawv mus rau ib tug neeg uas lawv yuav caw tau kom kawm txog txoj moo zoo ua ntej hnub Christmas. Ntau tus mej zeej ntawm lub Koom Txoos tau qhia kuv txog tej yam tshwj xeeb uas muaj los vim lawv thov tus Tswv kom muaj cib fim qhia txoj moo zoo.

Piv txwv hais tias, ib tug tub txib uas tau rov qab los tsev, nws thov Vajtswv coj nws mus rau “ib tug neeg” uas nws pab tau. Ua rau nws xav txog ib tug uas nrog nws kawm ntawv. Nws sib tham nrog nws nyob hauv Facebook, thiab nws kawm hais tias tus hluas nkauj no tab tom thov Vajtswv kom nrhiav tau lub ntsiab ntawm nws lub neej. Nws twb rov qab xyuas thaum tib lub sij hawm uas tus hluas nkauj no nrhiav qhov tseeb, thiab thaum lub Kaum Ob Hlis Ntuj nws ua kev cai raus dej.

Muaj ntau yam kev caw uas neeg qhia rau kuv, tiam sis tsuas muaj ob peb tug uas tau rov qab xyuas zoo li tus kwv tij no.

Kuv ntseeg lub ntsiab cai ntawm kev rov qab xyuas heev. Ib yam li nyob hauv phau ntawv Qhia Kuv txoj Moo Zoo, “txoj kev caw uas tsis rov qab sib tham txog ces zoo nkaus thaum yus pib taug ib txoj kev es taug tsis kawg los sis thaum yus yuav tau ib daim pib mus xyuas ib qho kev ua si es ho tsis mus. Yog hais tias tsis ua raws li hais ces, txoj kev cog lus tseg tsis muaj nqi li.”²

Phau ntawv Qhia Kuv txoj Moo Zoo qhia txhua tus kom lawv paub caw lwm tus thiab rov qab xyuas tom qab peb caw lawv. Lub hom phiaj ntawm cov tub txib txoj hauj lwm yog kev caw “lwm tus neeg los cuag Khetos thaum pab lawv lees txais txoj moo zoo uas txum tim rov qab los los ntawm txoj kev ntseeg Yexus Khetos thiab Nws txoj Kev Theej Txhoj, kev hloov siab lees txim, kev cai raus dej, txais lub txiaj ntsim Vaj Ntsuj Plig Dawb Huv, thiab nyiaj kom mus txog thaum kawg.”³

Kev caw lawv yeej yog ib feem ntawm tus txheej txheem no. Tiam sis cov mej zeej yuav tsum ua ntau yam ntxiv ua cov tub txib txoj hauj lwm uas tsis yog kev caw tib neeg mloog cov tub txib xwb. Kuj yuav tsum rov qab xyuas nrog cov tub txib pab cov neeg uas tau caw kom lawv muaj kev ntseeg, kom lawv xav hloov siab lees txim, kom lawv npaj khi lus thiab nyiaj kom mus txog thaum kawg.

Muaj piv txwv hais txog ntsiab cai ntawm kev rov qab xyuas no nyob hauv phau Tes Hauj Lwm:

“Petus thiab Yauhas mus rau hauv lub tuam tsev. …

“Muaj ib tug txiv neej tuag ceg thaum nruab thiab los zaum ntawm lub rooj vag uas hu ua lub Rooj Vag Zoo Nkauj. Niaj hnub muaj neeg kwv nws tuaj nyob ntawm rooj vag thiab thov nyiaj ntawm cov neeg uas tuaj thov Vajtswv hauv lub tuam tsev;

“Thaum nws pom Petus thiab Yauhas tab tom yuav mus hauv lub tuam tsev, nws txawm thov kom nkawd pub ib yam dab tsi rau nws.

“Nkawd tsa qhov muag saib tus txiv neej uas tuag ceg ntawd, ces Petus txawm hais tias, Koj cia li saib wb.

“Tus txiv neej ntawd xav hais tias nyaj nkawd yuav pub ib yam dab tsi rau nws ntag.

“Tiam sis Petus hais rau nws hais tias, Kuv tsis muaj nyiaj tiam sis kuv yuav muab yam uas kuv muaj rau koj: Kuv tuav Yexus Khetos tus uas yog neeg Naxales lub npe hais rau koj hais tias koj cia li sawv thiab mus kev.”

Nov yog ib txoj kev caw uas muaj hwj chim los ntawm tus Tswv tus tub qhe, puas yog? Tiam sis Petus tsis tau hais li ntawd xwb. Phau vaj lug kub qhia peb tias “Petus tuav nkaus tus txiv neej ntawd sab tes xis rub nws sawv. Tam sim ntawd nws ob txhais ceg thiab ob lub pob taws txawm muaj zog lawm.

“[Thiab] nws sawv tsees nrog Petus thiab Yauhas mus rau hauv lub tuam tsev thiab nws dhia paj paws ua Vajtswv tsaug.”⁴

Qhov no txhais hais tias, Petus tsis tau siv nws txoj cai pov thawj hwj thiab caw tus txiv neej sawv thiab mus kev xwb. Nws kuj rov qab xyuas tej yam uas nws caw thaum nws ncav tes, tuav tus txiv neej sab tes xis, rub nws sawv, thiab nrog nws mus rau hauv lub tuam tsev.

Raws li Petus tus yam ntxwv, thov cia kuv hais kom peb ua cov tub txib txoj hauj lwm ntxiv thaum peb muab tej yam uas peb ntshai pauv rau kev ntseeg, caw ib tug neeg ib zaug txhua peb hlis—plaub zaug ib xyoos—caw kom cov tub txib qhia nws. Lawv npaj siab qhia raws li tus Ntsuj Plig, nrog kev tshoov siab uas los ntawm tus Tswv. Ua ke peb thiaj muaj peev xwm rov qab xyuas cov uas peb tau caw thiab tuav lawv tes, muab lawv txhawb nqa thiab nrog lawv taug txoj kev ntawm sab ntsuj plig.

Kom pab nej ua li no, txawm nej ua hauj lwm dab tsi nyob hauv lub Koom Txoos los yog nej muab siab rau ntseeg npaum li cas, kuv caw txhua tus mej zeej kom nej yuav ib phau Qhia Kuv txoj Moo Zoo. Nej yuav tau nyob hauv peb tej qhov chaw faib khoom thiab online. Nej tsis tas them nqi kom nyeem los yog txais tau phau uas nyob online. Yog ib phau ntawv qhia txog cov tub txib txoj hauj lwm—uas txhais hais tias yog ib phau rau peb txhua tus. Cia li nyeem, kawm, thiab ua raws li tej yam uas nej tau kawm kom pab nej to taub nej yuav ua dab tsi kom coj neeg rau Khetos los ntawm kev caw thiab kev rov qab xyuas. Raws li Thawj Tswj Hwm Thomas S. Monson hais tias, “Nov yog lub sij hawm kom cov mej zeej thiab cov tub txib ua hauj lwm ua ke, ua hauj lwm nyob hauv tus Tswv lub vaj txiv hmab kom coj tib neeg los cuag Nws.”⁵

Yexus Khetos qhia Nws cov thwj tim:

“Cov nplej uas zoo hlais lawm muaj ntau, tiam sis cov neeg uas hlais muaj tsawg;

“Nej cia li thov tus Tswv teb kom nws txib dua ib co neeg mus pab hlais nws cov nplej.”⁶

Tus Tswv tau teb tej lus thov ntawd nyob hauv peb lub caij nyoog thaum nws txib cov tub txib coob tshaj tau muaj dhau los hauv lub ntiaj teb. Vim muaj cov uas rau siab ua hauj lwm, tus Tswv tau muab cib fim ntxiv rau peb kom pab Nws sau cov ntsuj plig ua ke.

Muaj tej yam zoo uas cov mej zeej ua tau kom pab thiab txhawb nqa cov tub txib. Xws li, nej qhia tau cov tub txib hais tias nej kawm phau Qhia Kuv txoj Moo Zoo thiab hais kom lawv qhia nej tias lawv kawm dab tsi. Thaum nej sib qhia li no, cov mej zeej thiab cov tub txib ib leeg yuav tso siab rau ib leeg zuj zus mus, ib yam li tus Tswv txib hais tias

Txhua tus txiv neej thiab poj niam yuav hais lus los ntawm Vajtswv tus Tswv lub npe, tus uas yog neeg ntiaj teb tus Cawm Seej.⁷

Thiab Nws tau txib kom cov mej zeej mus ua tim khawv thiab ceeb toom cov neeg, thiab tsim nyog txhua tus neeg uas twb tau txais lus ceeb toom lawm mus ceeb toom nws tus neeg zej zog thiab.⁸

Cov kwv tij thiab cov muam, nej puas txawj xav hais tias yuav zoo li cas yog tias tsev neeg thiab phooj ywg sau ntawv txog tej yam uas lawv kawm los ntawm phau Qhia Kuv txoj Moo Zoo nyob hauv lawv tej tsab ntawv thiab email rau cov tub txib? Nej puas pom tau cov koob hmoov uas yuav los rau tej tsev neeg thaum lawv paub thiab to taub zoo dua txog tej yam uas lawv cov tub thiab ntxhais yuav kawm thiab qhia thaum lawv ua tub txib? Thiab nej puas txawj xav txog kev tshav ntuj uas theej txhoj loj kawg nkaus uas yuav los rau peb txhua tus, raws li tus Cawm Seej cog lus yuav los rau tag nrho cov uas ua tim khawv thaum lawv caw lwm tus los cuag Nws—ces rov qab xyuas tej yam uas lawv tau caw?

Dhau los ntawm tus Yaj Saub Yauxej Xamiv tus Tswv hais tias peb tau koob hmoov vim zaj lus tim khawv uas peb tau hais twb muab ceev cia nyob saum ntuj rau cov tim tswv saib; thiab lawv xyiv fab rau peb, thiab tus Tswv zam txim rau peb tej kev txhaum.⁹

Vim tus Tswv yuav zam txim rau peb ntawm peb tej kev txhaum nrog lo lus txib no—kom peb ua peb tej siab khov kho … ua tim khawv rau tag nrho neeg ntiaj teb txog tej uas tau hais rau peb.¹⁰

Yog peb rov qab xyuas, tus Tswv yeej yuav tsis tso peb tseg. Kuv twb pom kev xyiv fab loj heev uas los thaum cov mej zeej nyob thoob plaws lub ntiaj teb ua tim khawv caw lwm tus thiab rau siab rov qab xyuas. Tsis ntev tas los thaum kuv nyob hauv Argentina, kuv tau yaum cov mej zeej kom lawv caw ib tug tuaj rau lub koom txoos uas ntej lub tuam rooj sab laj no. Ib tug uas muaj yim xyoo hu ua Joshua mloog thiab caw nws tus phooj ywg thiab nws tus phooj ywg tsev neeg tuaj rau kev qhib tsev koom txoos nyob hauv nws pawg ntseeg hauv Buenos Aires. Cia kuv nyeem ib tsab ntawv uas kuv tau txais uas piav txog Joshua tej lus caw thiab nws txoj kev rau siab rov qab xyuas:

“Txhua ob peb feeb [Joshua] tau khiav mus rau lub qhov rooj seb lawv puas tuaj. Nws hais tias nws paub lawv yuav [tuaj].

“Sij hawm dhau mus ces Joshua tus phooj ywg tseem tsis tau tuaj, tiam sis Joshua tsis tau poob siab. Nws rau siab saib qhov rooj laj kab txhua ob peb feeb. Twb txog lub sij hawm muab khoom tso tseg es Joshua pib dhia tshaj tawm hais tias, ‘Lawv tuaj!’ Lawv tuaj!’ Kuv saib thiab pom ib tsev neeg tuaj txog lub tsev koom txoos. Joshua khiav mus cuag lawv thiab khawm nws tus phooj ywg. Lawv txhua tus tuaj thiab zoo li lawv nyiam saib tsev koom txoos heev. Lawv nqa ib co ntawv thiab siv sij hawm ntau ntsib cov phooj ywg tshiab. Yog ib qho zoo uas peb pom tus me nyuam tub txoj kev ntseeg thiab paub tias cov me nyuam ntawm lub Koom Haum Me Nyuam Yaus yog cov tub txib thiab.”¹¹

Kuv ua tim khawv tias thaum peb ua hauj lwm ua ke, nrhiav tus neeg uas xav paub, caw nws, thiab rov qab xyuas nrog kev tso siab thiab kev ntseeg, peb yuav nrhiav tau ntau txhiab tus ntawm Vajtswv cov me nyuam yuav nrhiav kev kaj siab lug nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thov kom tus Tswv foom koob hmoov rau peb thaum peb siv zog khiav txoj hauj lwm cawm seej, kuv txo hwj chim thov los ntawm Yexus Khetos lub npe, amees.