Muaj Kev Ris Txiaj Txawm Raug Dab Tsi Los

Txhua tus lub neej nyias txawv nyias. Txawm li ntawd los, kuv tau kawm hais tias muaj ib yam uas tshem tau tej kev iab uas los rau hauv peb lub neej. Muaj ib yam uas peb ua tau kom peb lub neej qab zib dua, xyiv fab dua, thiab muaj yeeb koob dua li qub.

Peb yuav ris txiaj!

Tej zaum neeg ntiaj teb yuav xav tias qhov uas yus qhia tus uas nyuaj siab heev kom nws ua Vajtswv tsaug yog ib qho txawv heev. Tiam sis cov uas tso kev chim siab tseg thiab ris Vajtswv txiaj yuav nrhiav tau kev kho mob, kev kaj siab lug, thiab kev nkag siab.

Vim peb yog Khetos cov thwj tim, tus Tswv txib peb kom ua tus Tswv peb tus Vajtswv tsaug rau txhua yam,¹ “hu nkauj rau tus Tswv ua nws tsaug,”² thiab “cia [peb] lub siab puv npo kev ua tsaug rau Vajtswv.”³

Ua li cas Vajtswv txib peb ris Nws txiaj ntsim?

Nws muab tag nrho Nws cov lus txib rau peb kom peb txais tau cov koob hmoov. Cov lus txib yog tej lub cib fim siv peb txoj kev ywj siab thiab txais tau cov koob hmoov. Peb Leej Txiv Saum Ntuj Ceeb Tsheej uas hlub peb paub tias yog peb xaiv kom muaj kev ris txiaj ces peb yuav muaj kev xyiv fab thiab kev zoo siab loj kawg.

Tej zaum ib txhia yuav hais tias, “Kuv yuav ris Vajtswv txiaj rau dab tsi thaum kuv raug kev txom nyem loj ua luaj li?”

Tej zaum peb ua yuam kev yog peb xav tias peb yuav ris Vajtswv txiaj rau tej yam uas peb txais tau xwb. Yeej nyuaj kom muaj kev ris txiaj yog tias peb ua Vajtswv tsaug rau tej koob hmoov uas peb suav tau xwb. Muaj tseeb tiag, yog ib qho tseem ceeb uas peb “suav peb cov koob hmoov”—thiab leej twg uas sim ua li ntawd yeej paub tias muaj cov koob hmoov ntau heev—tiam sis kuv tsis ntseeg tias tus Tswv xav tias peb tsis tas ua nws tsaug thaum peb raug txom nyem npaum li thaum peb muaj ntau nplua mias. Ntau nqe vaj lug kub tsis hais txog kev ris txiaj rautej yam peb txais tau xwb tiam sis hais txog kev coj cwj pwm ntawm kev ris Vajtswv txiaj.

Yog ib qho yooj yim ris Vajtswv txiaj rau tej yam peb txais tau thaum peb lub neej tsis muaj teeb meem. Tiam sis yuav ua li cas thaum peb tsis txais tej yam uas peb xav tau?

Xav kom nej saib kev ris txiaj yog ib txoj kev coj cwj pwm; yog ib txoj kev ua neej uas tsis nyob ntawm tej yam uas peb raug tam sim no? Lwm yam lus hais, kuv hais tias tsis yog peb yuav tsum ua Vajtswv tsaug rau tej yam peb txais tau xwb tiam sis peb yuav tsum ua Vajtswv tsaug txawm peb raug dab tsi los yog.

Muaj ib zaj dab neeg hais txog ib tug uas nqa zaub mov uas nug ib tug txiv neej seb nws puas nyiam nws cov zaub mov. Tus txiv neej teb hais tias txhua yam qab, tiam sis yuav zoo dua yog tias lawv muab mov mog ntxiv rau nws. Hnub tom qab ntawd, thaum tus txiv neej rov qab los, tus uas nqa zaub mov muab mov mog ob npaug rau nws, muab plaub daim rau nws tiam sis tus txiv neej tseem tsis zoo siab. Hnub tom qab ntawd, tus uas nqa zaub mov muab mov mog ob npaug ntxiv, tiam sis tus txiv neej tseem tsis zoo siab.

Thaum hnub plaub tus uas nqa zaub mov xav xav ua rau tus txiv neej no zoo siab. Yog li ntawd nws muab ib pob mov mog uas ntev li cuaj feet (2.7-m), muab txiav ua ob daig, thiab luag nyav muab rau tus txiv neej uas tuaj noj. Tus uas nqa zaub mov tos ntsoov seb tus txiv neej xav li cas.

Tom qab nws noj mov, tus txiv neej ntsia tus uas nqa zaub mov thiab hais tias, “Qab heev. Tiam sis kuv pom tias koj rov qab muab ob daig mov mog rau kuv xwb.”

Kuv cov kwv tij thiab cov muam, peb xaiv tau. Peb xaiv tau kom tsis muaj kev ris txiaj ntau, nyob ntawm seb peb xav tias peb muaj koob hmoov npaum li cas. Los yog peb xaiv tau ua neeg zoo li Nifais, uas muaj siab ua Vajtswv tsaug tsis tu tsis tseg. Thaum nws cov tij laug muab nws khi rau lub nkoj—yog lub nkoj uas nws tau ua kom thauj lawv mus rau thaj av cog lus tseg—nws dab taw thiab dab teg mob mob heev vim “tau o heev kawg li” thiab cua daj cua dub loj heev ntshe dej hiav txwv yuav nqos lawv mus. Nifais hais tias, “Txawm li ntawd los, kuv tseem tau vam khom rau kuv tus Vajtswv, thiab kuv tau qhuas nws tag nrho ib hnub li; thiab kuv tsis tau yws tawm tsam tus Tswv vim kuv tej kev kub ntxhov.”⁴

Peb xaiv tau ua neeg zoo li Yauj, uas muaj txhua yam ces tom qab ntawd txhua yam twb ploj tag. Tiam sis Yauj hais tias, “Kuv niam yug kuv los liab qab li cas, ces kuv yuav rov mus liab qab ib yam li ntawd. Tus Tswv muab txhua yam rau kuv, nim no tus Tswv coj rov qab. Thov kom sawv daws qhuas nws lub npe.”⁵

Peb xaiv tau ua neeg zoo li cov pioneer Maumoos, cov uas muaj kev ris txiaj thaum lawv maj mam tuaj rau lub Great Salt Lake, lawv tau seev cev thiab hu nkauj thiab qhuas txog Vajtswv txoj kev zoo.⁶ Ntshe peb feem coob yuav xav thim, cem, thiab yws yws txog qhov uas txoj kev nyuaj heev.6

Peb xaiv tau ua neeg zoo li tus Yaj Saub Yauxej Xamiv, thaum nws raug kaw nyob hauv lub nkuaj Liberty Jail, nws sau rau nws cov kwv tij hais kom lawv zoo siab ua txhua yam uas lawv muaj cuab kav ua tau; thiab kom lawv nyob twj ywm, paub tseeb hais tias, lawv thiaj yuav pom Vajtswv txoj kev cawm seej, thiab pom nws txhais tes uas muaj hwj him.⁷

Peb xaiv tau kom muaj kev ris txiaj, txawm peb raug dab tsi los yog.

Yuav muaj kev ris txiaj zoo li no txawm muaj dab tsi tshwm sim nyob ib puag ncig peb. Kev ris txiaj zoo li no kov yeej tau kev poob siab thiab kev ntshai. Kev ris txiaj zoo li no yuav loj tuaj thaum lub caij no no ib yam li nws loj tuaj thaum lub caij sov.

Thaum peb ris Vajtswv txiaj txawm peb raug dab tsi los yog, peb yuav nyob kaj siab lug thaum muaj kev kub ntxhov. Thaum peb nyuaj siab, peb tseem yuav muaj siab xav qhuas Vajtswv. Thaum peb raug mob, peb yuav qhuas txog Khetos txoj Kev Theej Txhoj. Thaum peb tu siab, peb lub siab tseem yuav sov so vim ntuj ceeb tsheej nyob ze.

Tej lub sij hawm peb xav tias peb yuav ris Vajtswv txiaj tom qab peb twb kho tag nrho peb tej teeb meem lawm, tiam sis kev xav li ntawd ua rau peb pom tsis deb. Ntshe peb yuav tas sim neej yog peb tos ntsoov saib tus zaj sawv ua ntej peb ua Vajtswv tsaug vim ntuj los nag.

Qhov uas peb ris Vajtswv txiaj thaum peb raug kev nyuaj tsis txhais hais tias peb zoo siab vim peb raug xwm txheej. Tiam sis qhov no txhais hais tias peb muaj kev ntseeg ntsia kom dhau tej kev cov nyom uas peb muaj tam sim no.

Tsis yog kev ris txiaj ntawm peb lub qhov ncauj tiam sis yog kev ris txiaj ntawm peb lub siab lub ntsws. Yog kev ris txiaj uas kho peb lub siab kom zoo thiab ua rau peb muaj tswv yim.

Kev ris txiaj txawm peb raug dab tsi yog kev ntseeg Vajtswv. Ua rau peb yuav tsum tso siab rau Vajtswv thiab cia siab rau tej yam uas peb tsis pom tiam sis muaj tseeb.⁸ Thaum peb ris Vajtswv txiaj, peb ua raws li peb tus Cawm Seej tus yam ntxwv uas hais tias, “Tsis ua raws li kuv lub siab nyiam, ua raws li koj lub siab nyiam xwb.”⁹

Kev ris txiaj yog kev qhia tias peb muaj kev cia siab thiab muaj ib zaj lus tim khawv. Kev ris txiaj los ntawm qhov uas peb lees hais tias peb tsis to taub tej kev sim siab ntawm lub neej no tiam sis peb tso siab hais tias muaj ib hnub peb yuav to taub.

Txawm peb raug dab tsi los, peb txoj kev ris txiaj yuav loj tuaj los ntawm tej yam tseeb uas peb paub tiag: hais tias peb Leej Txiv tau npaj ib txoj hau kev zoo siab rau Nws cov me nyuam, hais tias dhau los ntawm Nws Leej Tub, Yexus Khetos, txoj Kev Theej Txhoj, peb yuav nyob nrog cov uas peb hlub mus ib txhis, hais tias thaum kawg, peb yuav muaj lub cev uas muaj yeeb koob, zoo tag nrho thiab tsis txawj tuag, uas tsis muaj mob tsis muaj nkees; thiab hais tias yuav muab peb tej kua muag los ntawm kev tu siab thiab kev poob siab pauv nrog kev zoo siab thiab kev xyiv fab, “Vajtswv yuav foom koob hmoov nplua mias rau nej, kom nej muaj nplua mias siv tsis tas.”¹⁰

Tej zaum yog zaj lus tim khawv zoo li no uas ua rau tus Cawm Seej cov Thwj Tim uas yog txiv neej ntshai thiab ua xyem xyav hloov los ua tus Xib Hwb cov tub txib uas tsis ntshai thiab xyiv fab. Ob peb teev tom qab Nws raug ntsia saum ntoo khaub lig, lawv poob siab thiab nyuaj siab heev, lawv tsis to taub tau muaj li cas. Tiam sis muaj ib qho uas tau hloov txhua yam. Lawv tus Tswv tshwm sim rau lawv thiab tshaj hais tias, “Nej cia li saib kuv ob txhais tes thiab kuv ob txhais ko taw, nej thiaj yuav paub hais tias yog kuv tiag.”¹¹

Thaum cov Thwj Tim pom tias yog tus Khetos uas sawv rov los—thaum lawv paub tias lawv tus Cawm Seej tau Sawv Rov Los—lawv hloov siab ua txiv neej txawv qhov qub. Tsis muaj dab tsi uas cheem tau lawv kom txhob ua lawv lub luag hauj lwm. Lawv ua siab loj thiab txiav txim siab nyiaj tej kev tsim txom, tej lus cem, thiab raug tuag vim lawv cov lus tim khawv.¹² Tsis muaj dab tsi thaiv tau lawv kom lawv txhob qhuas thiab ua hauj lwm rau tus Tswv. Lawv hloov tib neeg lub siab nyob qhov txhia chaw. Lawv tau hloov lub ntiaj teb.

Nej tsis tas pom nej tus Cawm Seej, ib yam li cov Thwj Tim pom, kom hloov siab li ntawd. Nej zaj lus tim khawv txog Yexus Khetos, uas los ntawm tus Vaj Ntsuj Plig Dawb Huv, yuav pab nej ntsia kom dhau kev poob siab ntawm qhov kawg ntawm lub neej no thiab pom yav tom ntej uas tus Txhiv Dim ntawm lub ntiaj teb tau npaj rau nej.

Vim peb paub txog peb txoj hmoov nyob mus ib txhis, peb thiaj tsis txaus siab thaum twg peb tas sim neej no. Muaj ib yam dab tsi nyob hauv peb lub siab uas tsis nyiam qhov kawg.

Vim li cas? Yog vim peb los ntawm tej uas nyob mus ib txhis. Peb yog neeg nyob mus ib txhis, cov me nyuam ntawm Vajtswv tus uas Muaj Hwj Chim Tag Nrho, uas hu ua Tsis Muaj Qhov Kawg¹³ thiab tus uas cog lus tias yuav muaj koob hmoov nyob mus ib txhis uas suav tsis txheeb. Qhov kawg tsis yog peb txoj hmoov.

Thaum peb kawm ntxiv txog Yexus Khetos txoj moo zoo, ces ua rau peb paub tias tej qhov kawg nyob hauv lub neej no tsis yog qhov kawg tiag tiag. Yog tej yam uas cuam tshuam peb xwb—yog ib lub caij uas ua rau peb nres es muaj ib hnub peb yuav saib tej ntawd tsis tseem ceeb thaum peb muab tej ntawd piv rau kev xyiv fab nyob mus ib txhis uas yuav foom pub rau cov uas rau siab ntseeg.

Kuv ris kuv Leej Txiv Saum Ntuj Ceeb Tsheej txiaj vim nyob hauv Nws txoj hau kev tsis muaj qhov kawg tiag, tiam sis muaj tej chiv keeb uas kav ib txhis.

Cov kwv tij thiab cov muam, tsim nyog uas peb muaj kev ris txiaj, txawm peb raug dab tsi los yog.

Tshuav yam dab tsi uas yuav ua rau peb lub siab “puv npo ua tsaug rau Vajtswv”?¹⁴

“Tsis yog peb muaj qhov uas [ua rau peb] zoo siab heev los?”¹⁵

Peb tau koob hmoov yog peb pom tau Vajtswv tej hauj lwm nyob hauv peb lub neej zoo kawg nkaus no. Kev ris peb Leej Txiv Saum Ntuj Ceeb Tsheej txiaj pab peb pom meej thiab muaj lub zeem muag loj dua ntais. Kev ris txiaj ua rau peb txo hwj chim thiab pab peb muaj siab to taub peb cov kwv tij cov muam thiab tag nrho tej uas Vajtswv tau tsim. Kev ris txiaj yog qhov uas qhib tag nrho Khetos tej cwm pwm rau peb! Ib lub siab uas ua Vajtswv tsaug yog lub hauv paus ntawm txhua yam zoo.¹⁶

Tus Tswv cog lus tias, “Tus uas txais txhua yam nrog txoj kev ua tsaug puv npo ces yuav raug ua kom muaj yeeb koob heev; thiab tej uas nyob hauv lub ntiaj teb no yuav muab ntxiv rau nws, ib puas npaug kiag, muaj tseeb tiag, tshaj qhov ntawd.”¹⁷

Thov kom peb yuav ua Vajtswv tsaug txhua hnub¹⁸—qhov tseem ceeb yog thaum peb raug tej yam uas peb tsis nkag siab hauv lub neej no. Thov kom peb yuav cia peb tej ntsuj plig ua peb Leej Txiv Saum Ntuj Ceeb Tsheej tsaug tsis tu tsis tseg. Thov kom peb yuav tsa suab thiab ua tej yam qhia tias peb muaj kev ris txiaj rau peb Leej Txiv Saum Ntuj Ceeb Tsheej thiab Nws Leej Tub, Yexus Khetos. Kuv thov kom yuav muaj li no thiab kuv ua tim khawv li no thiab kuv foom koob hmoov rau nej, los ntawm Yexus Khetos, peb tus Xib Hwb, lub npe, amees.