Kam̧m̧oolol ilo Jabdewōt Jekjek ko


Ej ke wōr unin ad maron̄ obrak kōn kam̧oolol, mekarta jekjek ko ilo wāween eo jej loe kōj make ie?

Ilo mour e aō, eaar wōr aō iien em̧m̧an n̄an ioon elōn̄ armej ro būrom̧ōj ko raar lukkuun jelōt er. Ilo iien kein, iaar ron̄jake būratōr ro aō rejitōn bōro im sister ro im kar limō ippāer kōn edodo kein aer. Iaar kejōkļo̧kjeņ ta n̄an jiron̄ er, im iaar kakkōt in jeļā wāween kainōm̧m̧an im rie er ilo aer ioon mālijjon̄ ko.

Jet iien aer liājļaļ ej kōm̧m̧an juon men eo āinwōt jem̧ļo̧kin juon men. Jet rej jelm̧ae jem̧ļo̧kin juon jem̧jerā eaorōk, āinwōt ilo mej an juon jitōn bōro ak jepel jān juon uwaan baam̧le. Ro jet rej jelm̧ae jem̧ļo̧kin kōjatdikdik—kōjatdikdik jen m̧are ak kiotak ajri ak anjo jen juon nan̄inmej. Ro jet remaron̄ jelm̧ae jem̧ļo̧kin tōmak eo aer, āinwōt ainikien pok im tarpok ilo laļ in ej kōjerbal n̄an kajjitōk, bōlen kowaan, ta eo raar jeļā ekar m̧ool.

Ejjab etto ak tokālik, ij tōmak bwe kōj aolep rej jelm̧ae iien ko n̄e en̄jake bwe laļ in ad ej jeepepļo̧k, kōm̧m̧an ad en̄jake ajimakeke, illu, im jaje kōmmaanwa.

Emaron̄ waļo̧k n̄an jabdewōt. Ejjeļo̧k juon ej dāpij an waļo̧k.

Jemaron̄ Kam̧m̧oolol

Jekjek an juon ej oktak, im meļeļe ko an mour an juon rej jenolo̧k. Mekarta, iaar katak bwe ewōr juon men enaaj bōkļo̧k meeo in emaron̄ itok n̄an mour ko ad. Ewōr juon men jemaron̄ kōm̧m̧ane n̄an kōtōn̄alļo̧k mour in, kōlan̄lōn̄ļo̧k, aaet kaiboojoj ļo̧k.

Jemaron̄ kam̧m̧oolol!

Emaron̄ āinwōt eoktak n̄an māletlet eo jen laļ in n̄an kile bwe juon eo ej edodo kōn būrom̧ōj ej aikuj leļo̧k kam̧m̧oolol n̄an Anij. Ak ro rej door iturājet bato emeeo im kotake ijjelo̧kin en̄jake kam̧m̧oolol emaron̄ en̄jake ājmour, āenōm̧m̧an, im meļeļe.

Erom rikaļoor an Kraist, jej kean̄ n̄an kam̧m̧oolol Irooj Anij ilo men otemjej1 n̄an “nōbar Anij kōn kam̧m̧oolol,”2 im n̄an “buruōm̧ en obrak kōn kam̧m̧oolol ko n̄an Anij.”3

Etke Anij ej kean̄ kōj n̄an kam̧m̧oolol?

Aolep kien ko An rej letok n̄an kōm̧m̧an bwe kōjeram̧m̧an ko ren pojak n̄an kōj. Kien ko rej iien ko rem̧m̧an n̄an kamminene anemkwoj eo ad im n̄an bōk kōjeram̧m̧an ko. Jemedwōj Ilan̄ ejeļā bwe kālet n̄an ejaake juon jitibōn kam̧m̧oolol enaaj bōktok n̄an kōj lan̄lōn̄ em̧ool im m̧ōņōņō eļap.

Kwon Kam̧m̧oolol kōn Men ko

Ak jet remaron̄ ba, “Ta eo ewōr ippā n̄an maron̄ kam̧oolol ke laļ in aō ej jeepepļo̧k?”

Bōlen kalimjōk wōt ta ko jej kam̧m̧oolol kake ej kepaak eo ebōd. Epen n̄an ejaake juon jitibōn kam̧m̧oolol n̄e kam̧m̧oolol ko ad ej pedped wōt ioon ewi jon̄an oran kōjeram̧m̧an ko ippād. Em̧ool, eaorōk bwen emakijkij “bwini kōjeram̧m̧an ko ad”—im jabdewōt eo ej kajjieon̄e menin ejeļā bwe elōn̄—ak ij jab tōmak bwe Irooj ej kōtmāneik kōj bwe en dik ad kam̧m̧oolol ilo iien n̄e jeobrak kōn men ko im mour epidodo. Ilo m̧ool, enan̄in aolepān eoon ko rej jab kōnono kōn kam̧m̧oolol kōn men ko ak ijjeļo̧kin rej kōmeļeļeik dipio in jitibōn ak m̧wil in kam̧m̧oolol.

Ej pidodo n̄an kam̧m̧oolol kōn men ko n̄e mour ej em̧m̧an. Ak n̄e iien ko n̄e jej jab maron̄ bōk men ko jekōņaan?

Ij kwaļo̧k juon ļōmņak bwe jen kile kam̧m̧oolol āinwōt ad kōņaan, juon wāween mour ej jab jelet jen jekjek eo ad kiiō? Ilo bar ba, ij kwaļo̧k juon ļōmņak bwe ijjeļo̧kin ad kam̧m̧oolol kōn men ko, jen kalimjek wōt ad kam̧m̧oolol ilo jekjek ko ad—jekdo̧o̧n kain jekjek rot.

Ewōr juon bwebwenato etto kōn juon waiter eo eaar kajjitōk ippān juon rimōn̄ā ekar ke m̧ōņōņō kōn m̧ōn̄ā eo. Rim̧ōn̄ā eo eaar uwaak bwe men otemjej ar em̧m̧an, ak enaaj kar em̧m̧anļo̧k n̄e renaaj kar leļo̧k elōn̄ ļo̧k pilawe. Raan eo juon, em̧m̧aan in eaar ro̧o̧ltok, waiter eo eaar kalōn̄ļo̧k oran pilawe eo, leļo̧k n̄an emān bukwōn ijjelo̧kin ruo, ak em̧m̧aan eo eaar pād wōt jab m̧ōņōņō. Raan eo juon, waiter eo eaar kalōn̄ļo̧k pilawe ko, ijjelo̧kin an ba jidik.

Ilo raan eo kein kāmen, waiter eo eaar kōņaan kam̧ōņōņōik em̧m̧aan eo. Im eaar bōk juon pilawe 9 nee (3-m) aetok ļo̧uv in pilawe eo, kajimettane, im ettōn̄ dikdik, leļo̧k n̄an rim̧ōn̄ā eo. Waiter eo ekar kijerjer in lale paaktokin em̧m̧aan eo.

Ālkin m̧ōn̄ā eo, em̧m̧aan eo eaar reilōn̄ļo̧k im ba, “Em̧m̧an āinwōt aolep iien. Ak ij loe kobar ro̧o̧ļ likļo̧k im letok ruo bukwōn in pilawe.”

Kwon Kam̧m̧oolol ilo Jekjek ko Ad

Ro jeiū im jatū, kālet eo ej am̧. Jemaron̄ kālet n̄an jon̄e kam̧m̧oolol ko ad, pedped wōt ioon kōjeram̧m̧an ko jej en̄jake ejjeļo̧k ippād. Ak jemaron̄ kālet n̄an āinwōt Nipai, eo būruwōn ekam̧m̧oolol eaar jab jako. Ke ļaddik ro jein raar likwōj e ioon wa eo—eo eaar kalōke n̄an bōk er n̄an ānen kalim̧m̧ur—makwij in neen im pein raar lukkuun metak “bwe raar kanooj ebbōj” im juon kōto ekaam̧jak eaar kaam̧jak n̄an orōn̄ļo̧k er ilo m̧wilaļ ko ilometo. “Mekarta,” Nipai eaar ba, “Iaar reilo̧k n̄an aō Anij, im iaar wūjtak E aolepān raan eo; im iaar jab ellotaane Irooj kōn en̄taan ko aō.”4

Jemaron̄ kālet n̄an āinwōt Job, eo eaar lōn̄ men otemjej ippān ak eaar luuji aolepāer. Job eaar uwaak , “Iar keelwaantok jān lo̧jien jinō, im keelwaan inaaj jepļaakļo̧k … : Irooj ear letok, im Irooj ear bōkļo̧k, en utiej etan Irooj.”5

Jemaron̄ kālet n̄an āinwōt Mormon paineer ro, ro raar dāpij juon jitibōn kam̧m̧oolol ilo tōre eo erum̧ij im iaļ ekōmetak ļo̧k n̄an Great Salt Lake, aaet al im eb im kaiboojoj ilo em̧m̧an an Anij. 6Elōn̄ iaadwōj renaaj kar kōņaan in bōjrak, aetwerōk, en̄taan kōn pen an iaļ eo.

Jemaron̄ kālet n̄an āinwōt Rikanaan Joseph Smith, eo ke eaar juon rikalbuuj pād ilo jekjek ko renana ilo Liberty Jail, kar jeje naan ko reim̧we n̄an em̧m̧aan ro rejitōn bōro, jiron̄ er bwe rej aikuj m̧ōņōņō in kōm̧m̧ani men otemjej repād ilo aer kajoor n̄an kōm̧m̧ani. Im rej aikuj kōttar, kōn kam̧ool elikio, n̄an loe lo̧mo̧o̧r an Anij, im [kōttar] An kwaļo̧k kajoor eo An.7

Jemaron̄ kālet n̄an kam̧m̧oolol, jekdo̧o̧n ta.

Kain kam̧m̧oolol in emaron̄ waļo̧k mekarta ta eo ej waļo̧k ipeļaakid. Eļapļo̧k jān inepata, ebbweer, im jako kōjatdikdik. Ej ejaak barāinwōt ilo jekjek ko reppen āinwōt jekjek ko rem̧m̧an. Ej ellā āinwōt aiboojoj in wōt ilo jikin ko rekwōj ilo winter ej barāinwōt ilo summer emānen im em̧m̧an.

N̄e jej kam̧m̧oolol n̄an Anij ilo jekjek ko ad, jemaron̄ en̄jake aenōm̧m̧an ilo ilubwilijin kapo ko. Ilo liājļaļ, jemaron̄ kotak wōt būrwōd ilo nōbar. Ilo metak, jemaron̄ wōt kaiboojoj ilo Pinmuur an Kraist. N̄e jej en̄jake būrom̧ōj, jemaron̄ en̄jake kainōm̧m̧an im aenōm̧m̧an an kareel eo ekwojarjar.

Jet iien jej ļōmņak bwe ad kam̧m̧oolol ej ta eo jej kōm̧m̧ane ālkin an tōprak inepata ko ad, ak ewi jon̄an an likjab menin. Ewi jon̄an ad ajļo̧ke mour jen ad kōttar n̄an loe rainbow m̧okta jan Kam̧m̧ool bwe Anij ej mour?

Ad kam̧m̧oolol ilo iien eppen ejjab meļeļein bwe jej m̧ōņōņō ilo jekjek ko ad. Ej meļeļein bwe jen māj ko retōmak rej reilo̧k ilōn̄ in apan̄ ko kajjojo raan.

Ej jab juon kam̧m̧oolol jen tiee ak ej jen jetōb. Ej juon kam̧m̧oolol bwe kōmour bōro im kōļapļo̧k kōļmenļo̧kjeņ.

Kam̧m̧oolol āinwōt juon Makūtkūt in Tōmak

Ad kam̧m̧oolol ilo jekjek ko ad ej juon m̧akūtkūt in tōmak ilo Anij. Ej aikuji bwe jen leke Anij im kōjatdikdik kōn men otemjej jemaron̄ jab loi ak rej m̧ool.8 Jen ad kam̧m̧oolol, jej ļoor waanjon̄ak eo an Rilo̧mo̧o̧r, eo eaar ba, “En jab ankil Aō a Am̧ wōt.”9

M̧ool in kam̧m̧oolol ej juon ennaan in kōjatdikdik im naan in kam̧ool. Ej itok jān kile bwe jej jab aolep iien meļeļe mālijjon̄ ko an mour ak leke bwe juon raan jenaaj.

Ilo jabdewōt jekjek, ad en̄jake kōn kam̧m̧oolol ej eddōkļo̧k jen elōn̄ im m̧ool ko rekwojarjar jejjeļā: bwe Jemād ej letok n̄an ajri ro Nejin karōk in m̧ōņōņō eļap; bwe jen Pinmuur eo an Nejin, Jisōs Kraist, jemaron̄ mour indeeo ippān ro jej iakwe; bwe ilo jem̧ļo̧kin, jenaaj bōk aiboojoj, wāppen, im ānbwin ej jab wabanban, jab eddodo jen nan̄inmej ak utam̧we ilo ānbwin; im bwe jan̄ in būrom̧ōj im jako naaj bōk jikin kōn juon lem̧ōņōņō eobrak im lan̄lōn̄, “em̧m̧an, jooni, kōm̧akūti, liaakļo̧k kom̧; kom̧in kōtļo̧k im naaj kōtļo̧k kom̧.”10

Ej aikuj in kain naan in kam̧oool rot in ej ukōt Rijilōk ro an Rilo̧mo̧o̧r eo jān mijak, em̧m̧aan ro repere n̄an jab mijak, rijerbal ro relan̄lōn̄ an Maajta eo. Ilo awa ko ālkin Dōbwāāl eo An, raar obrak kōn ebbeer im mijak, jab maron̄ meļeļe ta eo ej kab waļo̧k. Ak juon m̧akūtkūt eaar ukōt aolep men. Irooj eo aer eaar waļo̧ktok n̄an er im kwaļo̧k, “Kom̧win lale peiū im neō, bwe N̄a make.”11

Ke Rijilōk ro raar kile Kraist eaar jerkakpeje—ke raar en̄jake aiboojoj an Jerkakpeje an Rilo̧mo̧o̧r eo ejitōn bōro—raar erom em̧m̧aan ro roktak. Ejjeļo̧k men emaron̄ dāpij er jān kakūrm̧ool mijen eo aer. Raar errā kōn peran im leke kakkure eo, kajjokook, im aaet mej eo enaaj kar itok n̄an er kōnke naan in kam̧ool eo aer. 12 Raar jab bōbrae jān nōbar im jerbal n̄an aer Irooj. Raar ukōt mour ko an armej ro jikin otemjej. Raar ukōt laļ eo.

Kwoj jab aikuj in loe Rilo̧mo̧o̧r eo, āinwōt Rijilōk ro raar, n̄an en̄jake ejja oktak in. Naan in kam̧ool eo am kōn Kraist, ļotak jen Jetōb Kwojarjar, emaron̄ jipan̄ eok kōmetalļo̧k jem̧ļo̧k ko rekabbwerer ilo mour in im loe ilju eo emeram bwe Rilo̧mo̧o̧r eo an laļ in eaar kōpooje.

Jaar Jab Kōm̧anm̧an n̄an Jem̧ļo̧k ko

Ilo meram in ta eo jejeļā kōn mejān kajjik eo ad indeeo, ej jabdewōt kabwilōn̄lōn̄ ko jej jelm̧ae rej kōmweoik jem̧ļo̧k ko an mour, rej āinwōt jekkar n̄an kōj? Rej āinwōt jet men ko ilowaad rej mijak jem̧ļo̧k ko.

Etke? Kōnke jaar kōm̧anm̧an jen mōnakjen ko rej indeeo. Jej armej ro rej indeeo, ajri ro nejin Anij Ekajoor Pōtata, eo etan Ejjeļo̧k Jem̧ļo̧kin13 im eo kalim̧m̧ur ko an kōjeram̧m̧an ko indeeo ejjeļo̧k oraer. Jem̧ļo̧k ko rej jab mejān kajjik eo ad.

Ilo ad katak eļapļo̧k kōn ko̧jpeļ eo an Jisōs Kraist, jej kile eļapļo̧k bwe jem̧ļo̧k ko ijin ilo mour in rej jab jem̧ļo̧k ko. Rej bōbrae ko—bōjrak ko ilo jidik iien bwe juon raan renaaj dik ilo keidi n̄an lan̄lōn̄ eo indeeo ej kōttar ro retiljek.

Eļap aō kam̧oolol Jemedwōj Ilan̄ bwe ilo karōk in An ejjeļo̧k jem̧ļo̧k ko rem̧ool, ewōr wōt ijjino ko n̄an indeeo.

Ro Rej Kam̧m̧oolol Renaaj Aiboojoj

Ro jeiū im jatū, ewōr ke unin ad obrak kōn kam̧m̧oolol, mekarta jekjek ko jej loi ippād make?

Jej ke aikuj eļapļo̧k unin n̄an kōtļo̧k bwe būrwōd “en obrak kōn kam̧m̧oolol n̄an Anij”?14

“Ewōr ke un eļap n̄an ad m̧ōņōņō?”15

Jejeram̧m̧an bwe n̄e jej kile jerbal em̧m̧an an Anij ilo mour ko ad. Kam̧m̧oolol n̄an Jemād ilo Lan̄ ekadbakbakļo̧k tōmak eo ad im kalikkarļo̧k visiōn eo ad. Ej im̧we ettā bōro im kōjparok maron̄ n̄an ro rūttir im aolep kōm̧anm̧an an Anij. Kam̧m̧oolol ej kapen n̄an aolep m̧wil an Kraist! Juon būruwōn kam̧m̧oolol ej jinen im jemān aolep wānōk,16

Irooj eaar letok n̄an kōj kalim̧m̧ur eo An bwe ro rej bōk men otemjej kōn kam̧m̧oolol naaj maron̄ erom aiboojoj; im men ko an laļ in naaj kobaļo̧k n̄an er.17

Jen “mour ilo kam̧m̧oolol raan otemjej”18 —eļaptata ilo iien jem̧ļo̧k ko epen kōmeļeļeiki ko rej m̧ōttan wōt mour in. Jen kōtļo̧k an jetōb ko ad eddōkļo̧k ilo kam̧m̧oolol ņae Jemedwōj Ilan̄ eo etiriam̧o. Jen kotak ainikied aolep iien im kwaļo̧k jen naan im kōm̧m̧an ad kam̧m̧oolol n̄an Jemād ilo Lan̄ im n̄an Nejin Jitōn Bōro. Kōn menin ij jar, im likūt ippāmi naan in kam̧ool eo aō kōn kōjeram̧m̧an, ilo etan Jisōs Kraist, amen.

Kwaļo̧k Kein Jipan̄ ko

  1.  

    1. Doctrine and Covenants 59:7; lale barāinwōt Epesōs 5:20; 1 Thessalonika 5:18; Mosaia 26:39; Alma 7:23; Doctrine and Covenants 98:1.

  2.  

    2. Sam Ko 147:7.

  3.  

    3. Alma 37:37.

  4.  

    4. Lale 1 Nipai 18:10–16.

  5.  

    5. Job 1:21.

  6.  

    6. N̄an waanjon̄ak kōn paineer ro raar dāpij wōt juon m̧wil elan̄lōn̄ kam̧oolol men̄e eppen ej waļo̧k, lale Andrew D. Olsen, The Price We Paid: The Extraordinary Story of the Willie and Martin Handcart Pioneers (2006), 10, 366–67.

  7.  

    7. Doctrine and Covenants 123:17.

  8.  

    8. Lale Alma 32:21.

  9.  

    9. Luk 22:42.

  10.  

    10. Luk 6:38.

  11.  

    11. Luk 24:39.

  12.  

    12. Lale Rom 5:3; 2 Korint 4:17; 12:10.

  13.  

    13. Lale Moses 1:3.

  14.  

    14. Alma 37:37.

  15.  

    15. Alma 26:13.

  16.  

    16. Lale Marcus Tullius Cicero, Oratio Pro Cnæo Plancio, XXXIII, section 80; quoted in Joseph B. Wirthlin, “Live in Thanksgiving Daily,” Ensign, Sept. 2001, 8.

  17.  

    17. Doctrine and Covenants 78:19; aorōk eo kobaiki.

  18.  

    18. Alma 34:38.