2010–2019
“Kuv Tau Ua Yam Ntxwv rau Nej”
April 2014


“Kuv Tau Ua Yam Ntxwv rau Nej”

Tus uas coj yam ntxwv zoo tshaj plaws nyob thoob plaws lub ntiaj teb no yog peb tus Cawm Seej, Yexus Khetos. … Nws caw peb ua raws li tus yam ntxwv zoo tag nrho no.

Thaum kuv tau xav txog kuv lub luag hauj lwm kom qhia txoj moo zoo, kuv tau xav txog cov uas kuv hlub uas tshoov kuv siab pab kuv nrhiav txoj kev uas Vajtswv tau npaj rau kuv kom kuv loj hlob tuaj ntawm sab ntsuj plig. Tej lub sij hawm tseem ceeb hauv kuv lub neej, Leej Txiv Saum Ntuj Ceeb Tsheej tau foom koob hmoov rau kuv xa ib tug uas hlub kuv txaus kom pab kuv xaiv tej yam tsim nyog. Lawv tau coj raws li tus Cawm Seej tej lus no hais tias: “Vim kuv tau ua yam ntxwv rau nej, kom nej xyaum ua raws li kuv ua rau nej lawm.”1

Thaum kuv yog ib tug me nyuam tub, kuv txiv tsis yog ib tug mej zeej ntawm lub Koom Txoos thiab kuv niam tsis tshua muaj siab ntseeg. Peb nyob hauv Washington, D.C., thiab kuv niam tais thiab yawm txiv nyob deb li 2,500 (4,000 km) mais nyob hauv lub xeev Washington. Ob peb hlis tom qab kuv muaj yim xyoo, Niam Tais Whittle tau hla teb chaws tuaj xyuas peb. Niam tais ntshai hais tias kuv thiab kuv tus tij laug wb tseem tsis tau ua kev cai raus dej. Kuv tsis paub nws hais li cas rau kuv niam kuv txiv txog qhov no, tiam sis kuv paub tias muaj ib hnub nws coj kuv thiab kuv tus tij laug rau ib lub tshav ua si thiab qhia nws tej kev xav rau wb txog qhov uas kev cai raus dej thiab kev mus rau kev sib ntsib hauv lub Koom Txoos tseem ceeb npaum li cas. Kuv tsis nco qab txhua yam nws hais, tiam sis nws tej lus tau tshoov kuv lub siab thiab tsis ntev kuv tus tij laug thiab kuv wb tau ua kev cai raus dej.

Kuv niam tais tseem txhawb pab wb. Kuv nco qab hais tias txhua zaus lawv thov kom kuv tus tij laug los sis kuv hais lus hauv lub koom txoos, wb tau hu xov tooj rau nws kom nws pab qhia ob peb yam rau wb. Dhau ob peb hnub xwb ces ib zaj lus uas nws sau cia ntawm nws tes tau tuaj. Ces sij hawm dhau mus ces nws tsuas sau lub ntsiab xwb ua rau wb yuav tsum siv zog me ntsis ntxiv.

Niam tais muaj siab tuab thiab nws saib taus wb txiv kom pab wb txiv paub tias qhov uas nws tsav tsheb thauj wb mus rau lub koom txoos tseem ceeb npaum li cas. Niam tais tau ua txhua yam tsim nyog kom pab wb paub tias yuav tsum muaj txoj moo zoo hauv wb lub neej.

Qhov tseem ceeb, wb paub tias niam tais hlub wb thiab nws muab siab npuab txoj moo zoo. Nws coj yam ntxwv zoo kawg rau wb! Kuv zoo siab uas nws tau hais lus tim khawv rau kuv thaum kuv tseem hluas. Nws tus yam ntxwv twb hloov kuv lub neej lawm.

Tom qab ntawd, thaum kuv yuav luag kawm ntawv tiav, kuv tau los hlub ib tug ntxhais hluas zoo nkauj hu ua Jeanene Watkins. Kuv xav tias nws pib hlub kuv ib yam thiab. Muaj ib hmo thaum wb tham txog yav tom ntej, nws ua tib zoo hais txog ib qho uas tau hloov kuv lub neej mus ib txhis. Nws hais tias, “Thaum kuv yuav txiv, kuv mam li yuav hauv lub tuam tsev rau ib tug uas tau ua tub txib uas rau siab ntseeg.”

Kuv tsis tau xav tias kuv yuav ua ib tug tub txib ua ntej nws hais li ntawd. Hmo ntawd kuv txoj kev xav ua ib tug tub txib twb hloov kiag lawm. Kuv mus tsev thiab xav tsis tau txog ib yam dab tsi ntxiv. Ib tag hmo kuv pw tsis tau. Ua rau kuv tsis xav txog kuv txoj kev kawm ntawv hnub tom qab ntawd. Tom qab kuv tau thov Vajtswv ntau, kuv txiav txim siab ntsib kuv tus npisov thiab pib ua ntaub ntawv mus ua ib tug tub txib.

Jeanene yeej tsis tau thov kom kuv mus ua tub txib rau nws. Nws hlub kuv txaus nws thiaj li qhia nws tej kev xav ces muab cib fim rau kuv xav seb kuv yuav ua neej li cas. Wb ob leeg tau mus ua tub txib thiab tom qab ntawd wb tau sib yuav hauv lub tuam tsev. Jeanene kev muaj siab tuab thiab kev cog lus ua raws li nws txoj kev ntseeg tau pab wb lub neej. Kuv paub tseeb tias wb yuav tsis muaj kev zoo siab yog tias nws tsis rau siab ntseeg ua raws li txoj kev cai uas qhia tias yuav tsum ua hauj lwm rau tus Tswv ua ntej. Nws yog ib tug yam ntxwv zoo kawg thiab ncaj ncees!

Niam Tais Whittle thiab Jeanene nkawd ob leeg hlub kuv txaus nkawd thiaj qhia kuv txog nkawd tej kev xav tias cov kab ke ntawm txoj moo zoo thiab kev pab ua hauj lwm rau Leej Txiv Saum Ntuj Ceeb Tsheej yuav foom koob hmoov rau kuv lub neej. Nkawd ob leeg tsis tau yuam kuv los yog ua rau kuv xav tias kuv yog neeg tsis zoo. Nkawd hlub kuv thiab hlub Leej Txiv Saum Ntuj Ceeb Tsheej xwb. Nkawd paub tias Nws yuav ua rau kuv lub neej zoo dua yog tias kuv ua ib leeg kuv tus kheej xwb. Nkawd ob leeg hlub kuv pab kuv nrhiav txoj kev zoo siab loj tshaj plaws.

Peb txhua tus yuav ua dab tsi kom pab lwm tus zoo li no? Peb yuav tsum hlub cov uas peb xav pab raws li kev ncaj ncees tiag tiag lawv thiaj yuav tso siab rau Vajtswv txoj kev hlub. Zoo ib yam li neeg feem coob hauv lub ntiaj teb no, qhov thib ib uas ua nyuaj rau lawv txais yuav txoj moo zoo yog kev ntseeg ib Leej Txiv Saum Ntuj Ceeb Tsheej uas hlub lawv zoo tag nrho. Yuav yooj yim muaj kev ntseeg li ntawd thaum lawv muaj phooj ywg los yog tsev neeg uas hlub lawv zoo li Vajtswv.

Qhov uas nej ua rau lawv tso siab rau nej txoj kev hlub yuav pab lawv ntseeg Vajtswv txoj kev hlub. Ces dhau los ntawm nej txoj kev sib tham, lawv lub neej yuav tau koob hmoov los ntawm qhov uas nej qhia tej yam uas nej tau kawm, tej yam uas muaj los rau nej, thiab tej ntsiab cai uas nej tau siv kom nrhiav tau tej kev kho nej tej teeb meem. Cia li qhia lawv tias nej xav kom lawv nyob zoo; ces mam li qhia nej zaj lus tim khawv txog Yexus Khetos txoj moo zoo rau lawv.

Nej pab tau lawv thaum ua tej yam raws li tej ntsiab cai thiab tej lus qhuab qhia. Yaum cov uas nej hlub kom lawv nrhiav kev to taub tias tus Tswv xav kom lawv ua dab tsi. Ib qho uas nej ua tau yog nug lawv tej yam ua rau lawv ua tib zoo xav ces muab sij hawm txaus rau lawv—txawm yog yuav tsum siv ob peb teev, hnub, hli, los yog sij hawm ntxiv los yog—cia lawv xav thiab nrhiav lus teb rau lawv tus kheej. Tej zaum nej yuav tsum pab lawv paub thov Vajtswv thiab paub txais lus teb rau lawv tej lus thov. Cia li pab lawv paub tias cov vaj lug kub yog ib lub hauv paus tseem ceeb kom txais tau cov lus teb. Yog li ntawd nej yuav pab lawv npaj rau tej lub cib fim thiab tej kev nyuaj thaum yav tom ntej.

Vajtswv lub hom phiaj yog kom tib neeg txais tau txoj kev tsis txawj tuag thiab txoj sia nyob mus ib txhis.2 Qhov no yog lub hauv paus ntawm txhua yam peb ua. Qee zaus peb siv sij hawm ntau dhau ua tej yam uas peb nyiam los yog peb tsom ntsoov rau peb tej luag hauj lwm xwb peb thiaj tsis nco qab txog Vajtswv lub hom phiaj. Thaum nej tsom ntsoov rau tej lub ntsiab cai tseem ceeb nyob hauv nej lub neej, nej thiaj yuav to taub hais tias nej yuav tsum ua dab tsi, thiab nej yuav pab txi txiv pub rau tus Tswv thiab muaj kev zoo siab ntxiv.

Thaum nej muab nej lub neej tsom ntsoov rau tej lub ntsiab tseem ceeb ntawm txoj kev cawm seej, nej haj yam yuav txawj qhia tej yam uas nej paub vim nej to taub tias txoj moo zoo cov kab ke tseem ceeb npaum li cas mus ib txhis li. Nej yuav qhia tej yam uas nej paub kom nej cov phooj ywg yuav xav txais kev txhawb nqa rau lawv sab ntsuj plig. Nej yuav pab tau cov uas nej hlub kom lawv xav ua raws li tag nrho Nws cov lus txib thiab ris Yexus Khetos lub npe.

Cia li nco ntsoov tias kev hloov siab los ntseeg yog ib feem ntawm txoj hauj lwm no xwb. Cia li nrhiav kev txhawb nqa tej tsev neeg txhua lub sij hawm. Cia li qhia nrog lub zeem muag txog qhov uas tsev neeg yuav tsum ua kev sib khi hauv lub tuam tsev tseem ceeb npaum li cas. Tej tsev neeg ntshe yuav siv ntau xyoo. Kuv niam kuv txiv twb zoo li ntawd. Ntau xyoo tom qab kuv tau ua kev cai raus dej, kuv txiv ua kev cai raus dej, thiab tom qab ntawd kuv tsev neeg tau sib khi hauv lub tuam tsev. Kuv txiv tau ua hauj lwm muab tsev neeg khi ua ke hauv lub tuam tsev, thiab kuv niam tau ua hauj lwm nrog nws. Thaum nej muaj lub zeem muagtxog tej kab ke sib khi ntawm lub tuam tsev, nej yuav pab txhim tsa Vajtswv lub nceeg vaj hauv lub ntiaj teb.

Cia li nco ntsoov tias, kev hlub lawv yog ib lub hauv paus uas muaj hwj chim pab cov uas nej xav pab. Niam Tais Whittle thiab kuv tus poj niam, Jeanene yuav tsis muaj peev xwm tshoov kuv lub siab ntau yog tias kuv tsis tau paub tias nkawd hlub kuv thiab nkawd xav kom kuv muaj lub neej zoo tshaj plaws.

Nrog kev hlub ntawd, cia li tso siab rau lawv. Tej lub sij hawm yuav nyuaj tso siab rau lawv, tiam sis nrhiav kev kom pab tso siab rau lawv. Leej Txiv Saum Ntuj Ceeb Tsheej cov me nyuam ua tau ntau yam zoo thaum lawv xav tias nej tso siab rau lawv. Txhua tus ntawm Vajtswv cov me nyuam uas nyob hauv lub ntiaj teb no tau xaiv ua raws li tus Cawm Seej txoj hau kev. Tso siab hais tias thaum lawv muaj cib fim, lawv mam li rov qab xaiv dua li ntawd.

Qhia tej ntsiab cai uas pab cov uas nej hlub kom lawv thawb mus tom ntej taug txoj kev mus rau txoj sia nyob mus ib txhis. Cia li nco ntsoov tias, peb txhua tus loj hlob ib kab rau ib kab. Nej txoj kev to taub txog txoj moo zoo los twb siv tus txheej txheem no thiab. Hais lus yooj yim thaum qhia txoj moo zoo.

Nej zaj lus tim khawv txog Yexus Khetos txoj Kev Theej Txhoj yog ib qho uas muaj hwj chim heev. Tej yam uas pab tau thiab yog kev thov Vajtswv, Phau Ntawv Maumoos thiab cov vaj lug kub, thiab nej txoj kev ua raws li cov kab ke pov thawj hwj. Tag nrho txhua yam no yuav pab nej mloog tus Ntsuj Plig lus, uas yog ib qho tseem ceeb rau nej cia siab rau.

Yog nej xav ua zoo thiab ua raws li Yexus Khetos tau ua,3 cia li tsom ntsoov rau lub ntsiab cai ntawm txoj moo zoo no: Yexus Khetos txoj Kev Theej Txhoj qhib kev rau peb rais los ua neeg zoo li peb Leej Txiv Saum Ntuj Ceeb Tsheej, ces peb thiaj yuav nyob ua ke nrog peb tsev neeg mus ib txhis.

Tsis muaj tej lus qhuab qhia tseem ceeb rau peb txoj hauj lwm no uas tseem ceeb dua li Yexus Khetos txoj Kev Theej Txhoj. Txhua lub sij hawm thaum tsim nyog ua, cia li ua tim khawv txog tus Cawm Seej thiab Nws txoj Kev Theej Txhoj lub hwj chim. Cia li siv cov vaj lug kub uas qhia txog Nws thiab qhia yog vim li cas Nws yog tus yam ntxwv zoo tag nrho rau txhua tus hauv lub neej no.4 Nej yuav tsum ua tib zoo kawm txog qhov ntawd. Tsis txhob siv sij hawm rau tej yam tsis tseem ceeb kom nej tsis kawm tej lus qhuab qhia thiab tus Tswv tej lus qhia. Yog tias muaj lub hauv paus ntawm cov lus qhuab qhia, nej yuav muaj hwj chim qhia qhov tseeb rau lwm tus uas xav tau heev.

Peb ua hauj lwm rau peb Leej Txiv Saum Ntuj Ceeb Tsheej zoo tshaj thaum peb ua ncaj ncees pab lwm tus.5 Tus uas coj yam ntxwv zoo tshaj plaws nyob thoob plaws lub ntiaj teb no yog peb tus Cawm Seej, Yexus Khetos. Thaum Nws ua Nws txoj hauj lwm qhuab qhia Nws qhia, pab, thiab hlub lwm tus. Nws zaum nrog cov neeg uas lwm tus xav tias lawv tsis tsim nyog nyob nrog Nws. Nws tau hlub lawv txhua tus. Nws paub tej yam lawv xav tau thiab qhia Nws txoj moo zoo rau lawv. Nws caw peb ua raws li tus yam ntxwv zoo tag nrho.

Kuv paub tias Nws txoj moo zoo yog txoj kev uas yuav tsum taug kom nyob kaj siab lug thiab muaj kev zoo siab hauv lub neej no. Thov kom peb yuav nco ntsoov ua zoo li Nws tau ua thaum peb hlub, tso siab rau, thiab qhia qhov tseeb rau cov uas tseem tsis tau muab siab rau ntseeg txoj moo zoo uas ci ntsa iab. Los ntawm Yexus Khetos lub npe, amees.