“Ua Ou Avatu le Faaa’oa’o ia te Outou”

A o ou mafaufau loloto i lou tiute e faasoa atu le talalelei, ua ou toe mafaufau ai i ē pele o e na i ai ni uunaiga agalelei sa fesoasoani ia te au e saili le taitaiga faalelagi lea na fesoasoani i lou alualu i luma faaleagaga. I nisi taimi taua i lou olaga, na faamanuiaina ai au e le Tama i le Lagi i se tasi o lē sa lava le popole mo au e fesoasoani ai e taiala au filifiliga i se itu talafeagai. Sa latou mulimuli i le fetalaiga lenei a le Faaola: “Auā ua ou avatu le faaa’oa’o ia te outou, e pei na ou faia ia te outou, ia faapea lava e outou ona fai.”¹

A o avea ma se tamaitiiti laitiiti, sa le i avea lou tama ma se tagata o le Ekalesia ma sa oo ai ina le toaga lo’u tina. Sa matou nonofo i Uosigitone, D.C., ma o matua o lou tina sa nonofo mamao ese i le 2,500 maila (4,000 km) i le setete o Uosigitone. I nai masina ina ua mavae le atoaga o lou valu tausaga, sa sau ai Tinamatua Whittle mai le isi itu o le atunuu e asi i matou. Sa popole Tinamatua i le le papatisoina o au faapea foi ma lou uso matua. Ou te le iloa le mea na ia tau atu i ou matua e uiga i lenei mea, ae ou te iloa i se tasi taeao sa ia ave ai ma’ua ma lo’u uso i le paka ma faasoa mai ona lagona e uiga i le taua o le papatisoina ma le auai soo i sauniga a le Ekalesia. Ou te lē manatua auiliiliga o mea sa ia tau mai, ae o ana upu sa gaepuina ai se mea i lou loto, ma e le i umi ae papatisoina ma’ua ma lo’u uso.

Sa faaauau pea ona lagolagoina i maua e Tinamatua. Ou te manatua soo se taimi na tofia ai lou uso po o au e tuuina atu se lauga i le lotu, ma te valaau atu ia te ia i le telefoni mo ni fautuaga. I totonu o ni nai aso ae taunuu mai se lauga tusilima i le meli. A mavae sina taimi e suia ana fautuaga i se otootoga lea e manaomia ai se taumafaiga sili i la maua vaega.

Sa faaaoga e Tinamatua le aofaiga talafeagai o le lototele ma le faaaloalo e fesoasoani ai i lo ma tama ina ia iloa le taua o lona aveina o i maua i le lotu mo a ma sauniga. I soo se auala talafeagai, sa ia fesoasoani ai ia i maua ia lagona se manaomia mo le talalelei i o maua olaga.

O le mea e aupito sili ona taua, sa ma iloa e alofa Tinamatua ia i maua ma sa ia alofa i le talalelei. O ia o se faataitaiga ofoofogia! Ou te matuā faafetai mo le molimau sa ia faasoa mai ia te au a o ou talavou lava. O lana faatosinaga sa suia ai le itu e agai i ai lo’u olaga mo le lelei e faavavau.

Mulimuli ane, a o latalata ina ou faauu mai le iunivesite, sa ou alofa faamama’i ai i se tamaitai talavou lalelei e igoa ia Jeanene Watkins. Sa ou manatu ua amata ona i ai foi ni ona lagona loloto mo au. I se tasi po ao ma talatalanoa ai e uiga i le lumanai, sa ia faia ai ma le faaeteete se faamatalaga na suia ai lou olaga e faavavau. Sa ia faapea mai, “A ou faaipoipo, o le a ou faaipoipo atu i se faifeautalai faamaoni, ua maea le misiona, i totonu o le malumalu.”

A o lei faia le ma talanoaga, sa ou le i manatu tele i se misiona. Ae o lena po sa faafuasei ai ona suia vave lou naunautaiga e mafaufau i le galuega faafaifeautalai. Sa ou alu i le fale, ma sa le mafai ona ou mafaufau i se isi mea. Sa ou ala i le po atoa. Sa matuai le lelei ni a’u meā a’oga i le aso na sosoo ai. I le maea ai o le tele o tatalo, sa ou faia ai loa se faaiuga ia feiloai atu i lau epikopo ma amata faatumu au pepa talosaga o le misiona.

E le i fai mai lava Jeanene ia te au e auauna atu i se misiona mo ia. Sa lava lona alofa ia te au e faasoa mai ai lona talitonuga maumaututu ma tuuina mai ia te au le avanoa e filifili ai le itu e agai ai lo’u lava olaga. Sa ma tau fai auauna atu uma i ni misiona ma mulimuli ane ai faamauina i le malumalu. O le lototele o Jeanene ma le tuuto i lona faatuatua na faia uma ai se eseesega i o maua olaga faatasi. Ou te mautinoa semanu ma te lē maua lava le fiafia lea ua ma olioli ai nei pe ana le seanoa ma lona faatuatua malosi i le mataupu faavae o le auauna atu muamua i le Alii. O ia o se faataitaiga matagofie, ma le amiotonu!

Sa lava uma le alolofa o Tinamatua Whittle ma Jeanene ia te au e faasoa mai ai o laua talitonuga maumaututu o sauniga o le talalelei ma le auauna atu i le Tama o i le Lagi o le a manuia ai lo’u olaga. E leai se tasi o i laua sa faamalosia au pe na ou lagona ai le leaga o le tagata sa ou avea ai. Sa laua alolofa ia te au ma alolofa i le Tama i le Lagi. Sa laua iloa uma e Na te mafaia ona faia ni mea silisili i lou olaga nai lo mea ou te mafaia na o au. Sa fesoasoani ma le lototoa i laua uma ia te au i auala alofa e saili ai le ala o le fiafia silisili.

E mafai faapefea ona avea i tatou taitoatasi ma se uunaiga taua? E tatau ona tatou mautinoa ia alolofa ma le faamaoni ia i latou e tatou te mananao e fesoasoani i ai ma le amiotonu ina ia mafai ona amata ona latou atiina ae le mautinoa o le alofa o le Atua. Mo le toatele naua i le lalolagi, o le luitau muamua i le taliaina o le talalelei o le atiina ae lea o le faatuatua i se Tama i le Lagi, o Lē e alofa atoatoa ia i latou. E faigofie ona atiina ae lena faatuatua pe a i ai ni a latou uo po o ni aiga o e alolofa ia i latou i se alofa faapena.

O le tuuina atu ia i latou o le faamautinoaga i lou alofa e mafai ai ona fesoasoani e atiae lo latou faatuatua i le alofa o le Atua. Ma e ala i lau fesootaiga alofa, ma agalelei, o le a faamanuiaina o latou olaga e ala i le faasoa atu o lesona na e aoaoina, o aafiaga na e maua, ma mataupu faavae ua e mulimuli i ai ia maua ai ni vaifofo i au lava tauiviga. Faaali atu lou naunautaiga faamaoni i lo latou soifua manuia; ona faasoa atu lea o lou molimau o le talalelei a Iesu Keriso.

E mafai ona e fesoasoani i auala ua mauaa i mataupu faavae ma aoaoga faavae. Ia uunaia i latou e te alofa i ai e saili ia malamalama i mea e finagalo le Alii ia latou faia. O se tasi o auala e faia ai lenei mea o le fai atu ia i latou o ni fesili e mafai ona latou mafaufau i ai ona tuu atu lea o se taimi ia lava ia i latou—pe o ni itula, aso, masina, pe sili atu—ia mafaufau loloto ma saili ai ia maua tali mo i latou lava. Atonu e manaomia ona e fesoasoani ia i latou ia iloa le auala e tatalo ai ma pe faapefea ona iloa tali i a latou tatalo. Fesoasoani ia i latou ia iloa o tusitusiga paia o se punavai taua i le mauaina ma le iloaina o na tali. I lena auala o le a e fesoasoani ai ia i latou ia saunia ai mo avanoa ma luitau o le lumanai.

O le faamoemoega o le Atua o le “aumaia [o] le tino ola pea ma le ola faavavau o le tagata.”² O le faavae lena o mea uma tatou te faia. O nisi taimi ua tatou pupū ai i mea tatou te iloa e matagofie pe ua pupū tele o tatou loto i tiutetauave faalelalolagi masani ua galo ai ia i tatou ia faamoemoega o le Atua. A o e faaauau pea ona taulai atu lou olaga i mataupu faavae sili ona taua, o le a e maua se malamalamaaga o mea e tatau ona e faia, ma o le a e fua mai ni fua se tele mo le Alii ma le tele o le fiafia mo oe lava.

Pe a taulai atu lou olaga i mataupu faavae autu o le ata o le faaolataga, o le a sili atu ona e punouai i le faasoa atu o mea e te iloa aua ua e malamalama i le taua e faavavau o sauniga o le talalelei. O le a e faasoa atu mea e te iloa i se auala e uunaia ai au uo ia mananao e faamalolosia i latou faaleagaga. O le a e fesoasoani atu i e pele ia te oe ia mananao ia tuuto e usiusitai uma i Ana poloaiga ma tauave i o latou lava luga le suafa o Iesu Keriso.

Ia manatua o le liuaina o tagata taitoatasi ua na o se vaega o le galuega. Ia saili e le aunoa e faamalolosia aiga. Aoao atu ma se vaaiga mamao o le taua o le faamauina o aiga i le malumalu. Mo nisi o aiga atonu e manaomia ai ni tausaga. O le tulaga lena sa oo ai ou matua. E tele tausaga ina ua mavae lo’u papatisoga, sa papatiso ai lo’u tama, ma mulimuli ane faamauina lo matou aiga i le malumalu. Sa auauna atu lo’u tama o se fai faamauga i le malumalu, ma sa auauna atu ai ma lo’u tina iina faatasi ma ia. A e mauaina le vaaiga mamao o sauniga faamau o le malumalu, o le a e fesoasoani e fausia le malo o le Atua i le lalolagi.

Ia manatua, o le alolofa ia i latou o le faavae aupito sili lea ona mamana mo le uunaia o i latou e te manao e fesoasoani i ai. O le faatosinaga a lou Tinamatua o Whittle ma lou toalua, o Jeanene, semanu e itiiti sona taua pe ana ou le iloaina muamua la te alolofa ia te au ma mananao ia ou maua le mea silisili i le olaga.

I le avea ai ma se soa i lena alofa, ia faatuatuaina i latou. I nisi o tulaga, atonu e foliga mai e faigata ona faatuatuaina, ae ia saili ni auala e faatuatuaina ai i latou. E mafai e fanau a le Tama i le Lagi ona faia ni mea ofoofogia pe a latou lagona le faatuatuaina. O fanau uma a le Atua i lenei olaga faaletino sa filifilia le fuafuaga a le Faaola. Ia faatuatuaina o le avanoa ua latou maua o le a latou toe faia ai lena mea.

Ia faasoa atu mataupu faavae lena e fesoasoani ia i latou e te alofa i ai ia fetaomi i luma i le ala i le ola e faavavau. Ia manatua, o loo tatou tuputupu ae i lea fuaitau i luga o lea fuaitau. Ua e mulimuli i lena mamanu e tasi i lou malamalamaaga o le talalelei. Ia faafaigofie lou faasoaina atu o le talalelei.

O lau molimau patino i le Togiola a Iesu Keriso o se meafaigaluega mamana lea. O punaoa o loo i ai faatasi o le tatalo, o le Tusi a Mamona ma isi tusitusiga paia, ma lou tuuto atu i sauniga o le perisitua. O mea uma nei o le a faafaigofieina le taitaiga a le Agaga, lea e matuā taua tele mo oe e faalagolago i ai.

Ina ia mataalia e pei ona faia e Keriso,³ ia punouai i lenei mataupu faavae autu o le talalelei: o le Togiola a Iesu Keriso ua mafai ai ona tatou avea atili e faapei o lo tatou Tama i le Lagi, ina ia mafai ona tatou nonofo faatasi e faavavau i o tatou iunite faaleaiga.

E leai se aoaoga faavae e sili atu ona taua i la tatou galuega nai lo le Togiola a Iesu Keriso. I soo se avanoa talafeagai, ia molimau atu i le Faaola ma i le mana o Lana taulaga Togiola. Faaaoga tusitusiga paia o loo aoao atu ai e uiga ia te Ia ma le mafuaaga ua avea ai o Ia ma mamanu atoatoa mo tagata uma i le olaga.⁴ O le a manaomia ona e suesue ma le filiga. Aua le gauai atu i mea e leai se aoga e te misia ai le aoaoina o le aoaoga faavae ma aoaoga a le Alii. Faatasi ai ma se faavae maumaututu patino o aoaoga faavae, o le a avea oe ma se punavai mamana mo le faasoaina atu o le upumoni taua i isi o e ua matua manaomia i latou.

E sili atu ona tatou auauna atu i lo tatou Tama i le Lagi e ala i le uunaiga amiotonu o isi ma le auauna atu ia i latou.⁵ O le faataitaiga aupito sili na savalia le fogaeleele o lo tatou Faaola, o Iesu Keriso. Sa faatumulia Lana galuega faaletino i aoaoga, auaunaga, ma le alofa i isi. Sa ia nofo i lalo ma tagata taitoatasi o e sa faamasinoina ua lē agavaa i Lana mafutaga. Sa Ia alofa ia i latou taitoatasi. Sa Ia iloatino o latou manaoga ma aoao atu Lana talalelei ia i latou. Ua ia valaaulia i tatou ia mulimuli i Lana faataitaiga atoatoa.

Ou te iloa o Lana talalelei o le ala i le filemu ma le fiafia i lenei olaga. Tau ina ia tatou manatua ia faia e pei ona Ia faia e ala i le faasoa atu o lo tatou alofa, faatuatuaina, ma le malamalama o le upumoni i isi o e e le i taliaina le malamalama susulu o le talalelei. I le suafa o Iesu Keriso, amene.