2010–2019
Ae Afai Ua Leai Se Poto i So Outou
Aperila 2014


Ae Afai Ua Leai Se Poto i So Outou

Ata
Elder Marcos A. Aidukaitis

O le a faaali mai e le Atua le upumoni ia i latou e saili atu ai e pei ona faamatalaina mai i totonu o tusitusiga paia.

I le tasi aso, sa suesue ai lo’u atalii e 10 tausaga e uiga i le faiai o le tagata i le Initoneti. E fia manao o ia e avea ma fomai tipitipi i se aso. E le faigata le matauina e poto atu o ia i lo au.

Matou te fiafia i le Initoneti. I le fale matou te fesootai ai ma aiga ma uo e auala i ala o faasalalauga faaleagafesootai, i i-meli, ma i isi auala. O le tele o meaaoga a la’u fanau e fai i le Initoneti.

Po o le a lava se fesili, afai tatou te manaomia nisi faamatalaga, tatou te sailia le initoneti. I ni nai sekone e anoanoai anomea tatou te mauaina. E ofoofogia lenei mea.

Ua saunia e le Initoneti le tele o avanoa mo le aoaoina. Peitai, e manao foi Satani ia tatou malaia, ma na te mimiloa ai le faamoemoega moni o mea. Na te faaaogaina lenei meafaigaluega sili e faalauiloa ai le masalosalo ma le fefe ma ia faatamaia ai le faatuatua ma le faamoemoe.

I le anoanoai o mea o loo maua i le Initoneti, e tatau ona tatou iloilo ma le faaeteete po o fea e faatatau i ai a tatou taumafaiga. E mafai e Satani ona faapisiina, faalavelave mai, ma faaleagaina i tatou e ala i le faavasegaina o faamatalaga, ma o le tele lava o ia mea, o lapisi.

E le tatau ona fealualuai se tasi i lapisi.

Faafofoga i le taiala lenei, ua tuuina mai i tusitusiga paia: “Ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa … ua mai le Atua.”1

I se lagona moni, o loo tatou feagai ma le faafitauli lava e tasi na fetaiai ma Iosefa Samita i lona talavou. E tele foi taimi tatou te iloa ai ua leai so tatou lava poto.

I le malo o le Atua, o loo talisapaia ai ma uunaia le sailiga mo le upumoni, ma e leai ma se mea na te taofia pe fefe i ai. Ua fautuaina malosi tagata o le Ekalesia e le Alii Lava Ia ia saili mo le malamalama.2 Sa Ia fetalai, “Ia outou saili ma le filiga … ; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi.”3 Peitai, e mafai faapefea ona tatou iloaina le upumoni i se lalolagi ua faateleina ana osofaiga tuusao i luga o mea e faatatau i le Atua?

Ua aoaoina i tatou e tusitusiga paia i le auala e faia ai:

Muamua, e mafai ona tatou iloaina le upumoni e ala i le matauina o ona fua.

I Lana lauga maoae i le Mauga, na fetalai ai le Alii:

“E faapea foi laau lelei taitasi ma fua mai i fua lelei; a o le laau leaga e fua mai i fua leaga. …

“O lea foi tou te iloa ai i latou i o latou fua.”4

Sa aoao mai e le perofeta o Mamona lenei lava mataupu faavae e tasi ina ua ia faapea mai, “O a latou galuega tou te iloa ai i latou; aua afai ua lelei a latou galuega, ua lelei foi i latou.”5

Matou te valaaulia tagata uma ia suesue i fua ma galuega a lenei Ekalesia.

Mo i latou e naunau e fia iloa le upumoni o le a mafai ona iloaina le eseesega o loo faia e le Ekalesia ma ona tagata i nuu o loo latou atiae ai. O le a latou matauina foi le siitiaina o olaga o i latou e mulimuli i ona aoaoga. O i latou e suesueina nei fua o le a mauaina ai o fua o Le Ekalesia a Iesu Keriso o le Au Paia o Aso e Gata Ai e suamalie ma e manaomia.

Lua, e mafai ona tatou mauaina le upumoni e ala i le faataitaiina o le afioga [a le Atua] ia i tatou lava.

Sa aoao mai le perofeta o Alema:

“O le a tatou faatusaina le afioga i se fatu. … Afai e te tuu ane se avanoa, e mafai ona toto ai o se fatu i lou loto, faauta, afai o se fatu moni, [ma] … afai e te le tiaia i fafo i lou le talitonu, … faauta, o le a amata ona malena ae i totonu o lou fatafata; ma … o le a amata ona e fai ifo ia te oe lava—Ua tatau ona lelei lenei fatu, … ona ua amata ona faalauteleina ai lo’u agaga; ioe, ua amata ona faamalamalama ai lo’u malamalamaaga, ioe, ua amata ona suamalie ia te au. …

“… Ma o lenei, … pe le faamalosia ea [e] lenei mea lou faatuatua? Ioe, o le a faamalosia ai lou faatuatua. …

“… Ona e fua mai fatu taitasi i ona lava foliga.”6

Oka se valaaulia ina maoae mai se perofeta a le Alii! E mafai ona faatusatusa lenei mea i se faataitaiga faasaienitisi. Ua valaaulia i tatou ia faataitai le afioga, ua tuu mai ia i tatou ni tapulaa, ma ua tau mai ia i tatou le taunuuga o le suesuega, pe afai tatou te mulimuli i faatonuga.

O lea, ua aoaoina i tatou e tusitusiga paia e mafai ona tatou iloaina le upumoni e ala i le matauina o ona fua, po o le, faataitaiina i le tagata lava ia, faaavanoaina o se nofoaga mo le afioga i o tatou loto, ma tausi i ai, e pei o se fatu.

Peitai, o loo i ai foi se auala lona tolu e iloa ai le upumoni, ma e ala lena i faaaliga faaletagata lava ia.

Ua aoao mai e le Mataupu Faavae ma Feagaiga vaega e 8 e faapea o faaaliga, o le malamalama lea—“o se malamalama e uiga i soo se mea [tatou] te ole [atu] ai i le faatuatua, ma le loto faamaoni, ma le talitonu o le a [tatou] maua.”7

Ma ua tau mai e le Alii ia i tatou le auala o le a tatou maua ai lenei faaaliga, “O le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto.”8

O lea, ua aoaoina i tatou e mafai ona maua faaaliga e ala i le ole atu i le faatuatua, faatasi ma se loto faamaoni, ma le talitonu o le a tatou mauaina.

Peitai ia matau mai sa matua faamanino mai e le Alii ina ua Ia lapatai mai, “Ia manatua a aunoa ma le faatuatua e le mafai ona e faia se mea; o lea ia ole mai ai i le faatuatua.”9 E manaomia e le faatuatua ia galuega—e pei o le suesueina i lou mafaufau, ona ole atu ai lea i le tatalo pe le moni.

Na fetalai le Alii:

“Afai ua sao, o le a Ou faia ia mu lou loto i totonu ia te oe; o lea, o le a e lagona ai ua sao.

“Ae afai ua le sao, o le a e le maua ni lagona faapena, ae o le a e maua se mafaufauga papa o le a fai ai ia galo ia te oe le mea ua sese.”10

E mate le faatuatua pe a aunoa ma galuega.11 O lea, “ia ole atu ma le faatuatua, aua lava ne’i masalosalo.”12

E i ai sa’u uo, e le auai i le ekalesia, lea sa faailoa maia ia te au e le o ia o se tagata faaleagaga. O le a ia le suesueina lava tusitusiga paia pe tatalo ona e fai mai o ia e le mafai ona malamalama i afioga a le Atua, pe mautinoa foi o loo i ai se Atua. O lea uiga faaalia ua manino ai le leai o se faaleagaga ma o le a taitai atu ai i le itu faafeagai o faaaliga, e pei ona faamatala mai e Alema. Fai mai a ia, “Ma o lea o ia o le e faamaaa lona loto, o ia lava lea na te maua le vaega itiiti o le afioga.”

Ae sa toe faaopoopo mai Alema, “ae o ia o le e le faamaaaina lona loto, o ia lea e tuuina mai i ai le vaega tele o le afioga, seia oo ina tuuina mai ia te ia, ia ona iloa mealilo a le Atua, seia oo ina ia iloaina atoatoa.”13

O Alema ma atalii o Mosaea o ni faataitaiga o le mataupu faavae o le manaomiaina e le faatuatua o galuega. I le Tusi a Mamona, tatou te faitau ai:

“Sa latou suesue i tusitusiga paia ma le filiga, ina ia latou iloa le afioga a le Atua.

“Ae sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga.”14

O le ole atu ma se loto faamaoni e tutusa le taua ma lenei faagasologa. Afai tatou te saili atu ma le faamaoni i le upumoni, o le a tatou faia mea uma i lo tatou malosi ia maua ai, lea e mafai ona aofia ai le faitauina o tusitusiga paia, ō i le lotu, ma le faia o le mea sili tatou te mafaia e tausi i poloaiga a le Atua. O lona uiga foi o loo tatou loto e faia le finagalo o le Atua pe a tatou mauaina.

O le faatinoga a Iosefa Samita ina ua ia saili mo le poto o se faataitaiga atoatoa lea o le uiga o le i ai o se loto faamaoni. Sa ia fai mai na ia manao ia iloa po o fea o lotu sa moni, ina ia “[ona] iloa le lotu [e] auai.”15 E oo foi lava ae lei tatalo o ia, sa saunia o ia e faatino le tali o le a ia mauaina.

E tatau ona tatou ole atu i le faatuatua ma i se loto faamaoni. Ae e le na o le pau ai lena. E tatau foi ona tatou talitonu o le a tatou mauaina se faaaliga. E tatau ona tatou faatuatuaina le Alii ma ia i ai le faamoemoe i Ana folafolaga. Manatua mea ua tusiaina: “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.”16 Oka se folafolaga ina a matagofie!

Ou te valaaulia tagata uma ia sailia le upumoni mai soo se metotia o nei metotia ae maise lava mai le Atua e ala i faaaliga faaletagata lava ia. O le a faaali mai e le Atua le upumoni ia i latou e saili atu i ai e pei ona faamatalaina mai i totonu o tusitusiga paia. E manaomia ai nisi taumafaiga sili atu nai lo le tau na ona saili i le Initoneti, ae e tauia.

Ou te molimau atu o le Ekalesia moni lenei a Iesu Keriso. Ua ou vaaia ona fua i nuu ma i olaga o le faitau afe o tagata, e aofia ai tagata o aiga; o lea ua ou iloa ai e moni. Ua ou faataitaia foi le afioga i lo’u olaga mo le tele o tausaga ma ua lagonaina ona aafiaga i lo’u agaga; o lea ua ou iloa ai e moni. Ae o le mea e sili ona taua, ua ou iloaina lona lava moni mo au lava ia e ala i faaaliga e auala mai i le mana o le Agaga Paia; o lea ua ou iloa ai e moni. Ou te valaaulia outou uma ia faia lea lava mea e tasi. I le suafa o Iesu Keriso, amene.