2010–2019
“Yog Nej Hlub Kuv, Ua Raws Li Kuv tej Lus Txib”
April 2014


“Yog Nej Hlub Kuv, Ua Raws Li Kuv tej Lus Txib”

Txoj kev siv peb kev ywj siab xaiv kom mloog lus txhais hais tias peb “ua qhov uas yog txawm hais tias yuav muaj li cas tom qab ntawd.”

Cov kwv tij thiab cov muam, ntawm txhua zaj lus qhia uas peb kawm los ntawm tus Cawm Seej lub neej, tsis muaj ib zaj uas meej tshaj los sis uas muaj hwj chim tshaj txoj kev mloog lus.

Tus Cawm Seej tus Yam Ntxwv

Thaum muaj kev Sab Laj Saum Ntuj ua ntej lub neej no, Luxifaws ntxeev siab tawm tsam Leej Txiv Saum Ntuj lub txoj hau kev. Cov uas lawv Luxifaws qab tau ua rau lawv txoj kev loj hlob mus ib txhis tsum lawm—ceev faj cov neeg uas nej lawv qab!

Ces Yexus qhia hais tias Nws tau txiav txim siab yuav mloog lus, thaum nws hais rau Leej Txiv tias Nws yuav ua raws li Leej Txiv lub siab nyiam, kom Leej Txiv tau lub yeeb koob mus ib txhis.1 Tas nws lub sij hawm ua hauj lwm qhuab qhia, Nws raug ntau yam kev ntxias tiam sis Nws tsis ua raws li tej yam ntawd.2 Muaj tseeb tiag, “nws [kawm] mloog lus los ntawm txoj kev uas tiv kev txom nyem.”3

Vim peb tus Cawm Seej mloog lus, Nws tuag theej peb lub txhoj, uas ua rau peb sawv rov los thiab npaj txoj hau kev rau peb tau rov qab nyob nrog peb Leej Txiv Saum Ntuj Ceeb Tsheej, tus uas paub tias peb yuav ua tej yam yuam kev thaum peb tab tom kawm mloog lus nyob hauv ntiaj teb. Thaum peb mloog lus, peb lees txais Nws kev txi, vim peb ntseeg tias dhau los ntawm Yexus Khetos txoj Kev Theej Txhoj, tib neeg sawv daws yuav tau kev cawm dim, thaum lawv ua raws li txoj moo zoo tej kev cai, tej kab ke, thiab tej lus txib.4

Yexus siv lus yooj yim to taub qhia kom peb ntseeg: “Yog nej hlub kuv, ua raws li kuv tej lus txib,”5 thiab “Nej cia li tuaj nrog kuv mus.”6

Thaum peb ua kev cai raus dej, peb “txaus siab txais yuav Khetos lub npe” thiab kam “sib khi lus nrog Vajtswv tias [peb yuav] mloog lus kom mus txog thaum kawg [peb] txoj sia.”7 Txhua hnub Sunday thaum peb noj lub cim nco txog thiab ua tim khawv tias peb kam ua raws li tej lus txib, peb rov qab khi cov lus uas peb cog thaum peb ua kev cai raus dej. Peb thov zam txim rau txhua yam kev xav thiab tej yam peb ua uas tsis raws li peb Leej Txiv Saum Ntuj Ceeb Tsheej lub siab nyiam. Thaum peb hloov siab lees txim thaum peb tig ntawm txoj kev tsis mloog lus thiab peb rov qab mloog lus dua, nws qhia tias peb hlub Nws.

Tej Kev Mloog Lus

Thaum peb ua peb lub neej raws li txoj moo zoo, peb to taub txoj kev mloog lus zoo dua. Tej thaum peb xav mloog lus ib yam li qhov uas kuv muab hu ua “neeg ntiaj teb txoj kev mloog lus,” uas txhais hais tias peb tsis kam mloog thiab yeem coj Vajtswv kev cai tiam sis xav ua raws li peb lub tswv yim los sis peb siab xav los sis raws li tib neeg nyiam. Vim tib neeg ua li no coob heev lawm, txoj kev mloog lus dag no ua kom peb lub teb chaws tej kev coj ua thiab kab li kev cai tsis raws li Vajtswv kev cai lawm.

Tej thaum cov mej zeej tsuas “mloog tej lus uas lawv xav,” thiab lawv hais tias lawv hlub Vajtswv thiab hwm Vajtswv tiam sis lawv tseem xaiv Nws tej lus txib thiab kev qhia—thiab Nws cov yaj saub tej kev qhia thiab kev qhuab ntuas—uas lawv xav mloog thiab tej uas lawv tsis xav mloog tiag tiag.

Tej tug tsuas mloog tej lus uas lawv xav mloog li no rau qhov lawv tsis to taub vim li cas muaj ib co lus txib, ib yam li tej thaum me nyuam tsis to taub vim li cas lawv niam thiab txiv muaj ib co lus ntuas thiab kev cai. Tiam sis peb yeej paub vim li cas peb mloog cov yaj saub lus, vim nov yog Yexus Khetos lub Koom Txoos, thiab tus Cawm Seej coj Nws cov yaj saub hauv txhua lub caij nyoog.

Thaum peb to taub txoj kev mloog lus tiag tiag, peb paub vim li cas peb muaj kev ywj siab xaiv. Thaum Yexus nyob hauv lub Vaj Khexemanes, Nws thov peb zaug rau Nws Leej Txiv Saum Ntuj Ceeb Tsheej, hais tias, “Kuv txiv, yog koj pom zoo, thov koj tshem lub khob no ntawm kuv mus; txawm yog li cas los thov koj tsis txhob ua raws li kuv lub siab nyiam, tiam sis cia ua raws li koj lub siab nyiam xwb.”8 Vajtswv yeej tsis kam ua hla tus Cawm Seej txoj kev ywj siab, tiam sis Nws muaj kev hlub tshua xa ib tug tim tswv txhawb nqa Nws Leej Tub uas Nws Hlub.

Tus Cawm Seej rov qab raug sim siab saum Khaulakhauthas, vim Nws muaj peev xwm hu tau ib co tim tswv los muab Nws nqis ntawm tus ntoo khaub lig los, tiam sis Nws siv Nws txoj kev ywj siab xaiv mloog lus thiab nyiaj mus kom txog thaum kawg thiab ua Nws kev theej txhoj tiav, txawm yog hais tias Nws yuav tsum raug mob heev, thiab tuag.

Txoj kev mloog lus ib yam li yus paub qab hau txog tej yam sab ntsuj plig yog “txoj kev uas tus Cawm Seej tau mloog lus.” Peb yuav mloog lus li no thaum peb hlub Leej Txiv Saum Ntuj Ceeb Tsheej thiab Nws Leej Tub. Thaum peb kam mloog lus, ib yam li tus Cawm Seej mloog, peb zoo siab yuav hnov Leej Txiv Saum Ntuj Ceeb Tsheej cov lus hais tias: “Tus no yog kuv tus Tub uas kuv hlub, kuv txaus siab rau nws.”9 Thiab peb tos tsis tau yuav hnov, thaum nyuam qhuav mus sawv ntawm Leej Txiv Saum Ntuj xub ntiag hais tias, “Zoo heev, koj yog kuv tus tub txib uas zoo thiab ncaj ncees: … cia li … nrog koj tus tswv nyob kaj siab lug.”10

Txoj kev siv peb kev ywj siab xaiv kom mloog lus txhais hais tias peb “ua qhov uas yog txawm hais tias yuav muaj li cas tom qab ntawd.”11 Yuav kom ua tau li no peb yuav tsum txawj tswj peb thiab ua rau peb ntseeg peb tus kheej, muaj kev zoo siab mus ib txhis, thiab xav tias peb ua tau zoo, thiab los ntawm peb tus yam ntxwv, luag yuav xav li ntawd thiab; thiab peb kuj yuav tsum muaj siab ua tiag tiag thaum peb txhawb nqa lub pov thawj hwj cov thawj coj thiab ua raws li lawv qhia thiab qhuab ntuas.

Tej Yam uas Muaj Los

Thaum peb xaiv seb peb puas yuav mloog lus los tsis mloog, qhov uas pab peb yog qhov uas peb nco ntsoov tej yam uas yuav muaj los ntawm tej yam peb xaiv. Luxifaws thiab cov uas lawv nws qab puas to taub yuav muaj li cas vim lawv txiav txim siab tsis lees txais Leej Txiv Saum Ntuj Ceeb Tsheej txoj hau kev? Yog to taub, vim li cas lawv txiav txim siab ua yam tsis zoo no? Peb nug tau peb tus kheej ib lo lus zoo li lo no hais tias: vim li cas peb yuav tsis mloog lus thaum peb paub tej yam uas yuav tshwm sim mus ib txhis thaum peb ua txhaum no? Cov vaj lug kub teb qhov no: Kayees thiab ib co ntawm Adas thiab Evas cov me nyuam xaiv tsis mloog lus vim “lawv hlub Dab Ntxwg Nyoog tshaj li lawv hlub Vajtswv.”12

Peb txoj kev hlub tus Cawm Seej yuav pab peb mloog lus ib yam li tus Cawm Seej. Niaj hnub no thaum peb sim mloog lus, zoo li peb tshaj tawm hais tias peb hlub thiab hwm tag nrho Leej Txiv Saum Ntuj cov me nyuam. Tiam sis txoj kev hlub no pauv tsis tau Vajtswv tej lus txib, uas nws muab kom pab peb! Piv xam li, lo lus txib hais tias “koj yuav tsum tsis txhob tua neeg, los sis ua dab tsi zoo li ntawd”13 yog los ntawm tej kev cai sab ntsuj plig uas pov hwm tag nrho Vajtswv cov me nyuam, tsis hais tus me nyuam tseem nyob hauv lub plab los yog. Peb yeej pom ntev los hais tias yog peb ua tsis raws li lo lus txib no, peb muaj kev tu siab kawg nkaus. Tiam sis coob tug tseem ntseeg hais tias nws tsis ua li cas yog yus txo ib tug me nyuam uas tsis tau yug lawm txoj sia vim yus xav ua los sis kom yuav tsis tab kaum yus.

Qhov uas peb xav tias peb muaj cai tsis mloog lus, yeej yuav tsis pauv kev cai sab ntsuj plig los sis tej yam uas yuav muaj vim peb tau ua li ntawd, tiam sis yuav ua rau peb tsis to taub, nyob tsis khov, taug tej kev txawv mus loj leeb, mus poob kev, thiab muaj kev nyuaj siab. Vim peb yog Khetos cov pab coj, peb muaj kev lav ris dawb ceev yuav ua raws li Nws tej kev cai thiab tej lus txib thiab tej kev khi lus uas peb tau cog lus tseg rau peb tus kheej lawm.

Thaum lub Kaum Ob Hlis Ntuj xyoo 1831 cov kwv tij ib txhia raug hu mus pab ib co neeg uas tsis nyiam lub Koom Txoos kom siab tu me ntsis. Dhau los ntawm tus Yaj Saub Yauxej Xamiv, tus Tswv qhia kom lawv mus ua ib yam uas txawv, uas lawv tsis tau xav txog:

Tus Tswv txib kom cov Neeg Ntseeg ua rau lawv tej yeeb ncuab ua tom ntej tom qab; thiab hais kom lawv tej yeeb ncuab los ntsib cov Neeg Ntseeg nyob rau qhov chaw uas sawv daws pom thiab hauv lawv tej tsev. …

Nws hais kom cia lawv tej yeeb ncuab tuaj hais lawv tej lus vim li cas lawv tsis ntseeg tus Tswv.

Nws hais tias tsis muaj ib qho cuab yeej uas lawv siv yuav yeej li;

Thiab yog tias muaj ib tug neeg uas sim hais lus tsis zoo tawm tsam cov Neeg Ntseeg nws yeej yuav tsis paub ua tom ntej tom qab thaum lub sij hawm uas tus Tswv pom zoo.

Vim li ntawd, lawv yuav tsum ua raws li Nws tej lus txib; vim lawv muaj tseeb thiab kev ntseeg.14

Tej Zaj Lus Kawm nyob hauv cov Vaj Lug Kub

Cov vaj lug kub muaj ntau zaj uas qhia txog txoj kev cov yaj saub kawm mloog lus vim los ntawm tej yam uas tau tshwm sim hauv lawv lub neej.

Yauxej Xamiv kawm txog tej yam uas muaj vim nws xaiv ua raws li nws tus pab cuam, phooj ywg, thiab tus neeg sau cov lus uas nws hais, Martin Harris, yuam nws ua. Thaum Martin sij thov nws, Yauxej thov tus Tswv tso cai rau nws muab 116 daim nplooj qiv rau Martin, cov uas nws xuas tes sau thaum txhais Phau Ntawv Maumoos, kom nws tau muab rau nws tsev neeg tau saib, tiam sis tus Tswv hais rau Yauxej kom tsis txhob muab. Martin thov Yauxej rov qab thov tus Tswv dua. Thaum Yauxej thov peb zaug lawm tus Tswv tso cai rau tsib tug neeg saib cov nplooj uas xuas tes sau no. Martin sib khi lus dawb ceev tias nws yuav ua li ntawd xwb. Thaum nws mus tsev, thiab luag tej yuam nws, nws hnov qab cov lus uas nws tau khi lawm thiab nws cia lwm tus saib cov nplooj ntawv uas xuas tes sau, ces vim nws ua li ntawd cov nplooj ntawv poob ntawm nws txhais tes mus,15 thiab ploj lawm. Vim nws ua li ntawd, tus tswv cem ntuas Yauxej thiab tsis pub nws txhais Phau Ntawv Maumoos ntxiv. Yauxej txom nyem siab thiab hloov siab lees txim txog kev txhaum uas nws ua raws li luag yuam nws. Tom qab ib ntus, tus Tswv cia nws rov qab txhais lus ntxiv. Yauxej kawm txog kev mloog lus uas pab nws hauv tag nrho nws lub neej tom qab ntawd!

Tus yaj saub Mauxes kuj ua yam ntxwv rau peb thiab. Thaum Mauxes mloog lus thiab yuav ib tug poj niam Sudas, Aloos thiab Milias cem nws. Tiam sis tus Tswv cem ntuas nkawd, hais tias, “Kuv nrog [Mauxes] tham tim ntsej tim muag.”16 Tus Tswv siv zaj tseem ceeb no qhia lub Koom Txoos cov mej zeej hauv peb lub caij nyoog. Thaum xyoo 1830 Hiram Page khav hais tias nws tau txais kev tshwm sim rau lub Koom Txoos. Tus Tswv qhuab ntuas Hiram thiab qhia cov Neeg Ntseeg kom lawv mloog tej lus uas nws muab tshwm sim rau Yauxej, ib yam li Aloos ua,17 vim Yauxej txais kev tshwm sim ib yam li Mauxes.18

Peb txais koob hmoov thaum peb mloog lus, thiab thaum peb txais koob hmoov los ntawm Vajtswv, yog vim peb ua raws li txoj kev cai uas peb yuav tsum coj xwv kom peb yuav tau.19

Peb qhia txog txoj kev mloog lus los ntawm peb tus yam ntxwv. Vim los ntawm txoj kev uas peb ua peb lub neej, peb qhia peb cov me nyuam, “Kawm txoj kev txawj ntse thaum [nej] tseem hluas; muaj tseeb tiag, kawm coj Vajtswv tej lus txib thaum [nej] tseem hluas.”20

Peb muaj zog tuaj thaum peb mloog lus, kom peb muaj kev ntseeg tiv kev sim siab thiab kev nyuaj siab yav tom ntej. Tus Cawm Seej npaj mloog lus thiab tiv txog thaum kawg nyob saum Khaulakhauthas vim nws mloog lus hauv Khexemanes.

Cov kwv tij thiab cov muam uas kuv hlub, kuv lub siab xav li Amas cov lus no:

“Thiab nim no kuv cov kwv tij uas kuv hlub es, kuv tau hais tej yam no rau nej kom kuv yuav tsa tau nej los nco txog nej txoj hauj lwm rau Vajtswv, xwv kom nej yuav mus tsis muaj qhov thuam tau rau nws. …

“Thiab nim no kuv xav kom nej yuav txo hwj chim, thiab zam rau lwm tus thiab muaj siab mos siab muag; … rau siab coj Vajtswv tej lus txib txhua lub caij nyoog.”21

Kuv ua tim khawv hais tias peb tus Cawm Seej muaj txoj sia nyob. Vim Nws mloog lus, “txhua lub hauv caug yuav tsum tau txhos, txhua tus nplaig yuav tau lees … tias nws yog [peb tus Cawm Seej].”22 Kuv thov kom peb yuav hlub Nws heev thiab ntseeg Nws tag nrho xwv kom peb thiaj li yuav mloog lus, ua raws li Nws tej lus txib, thiab rov qab mus nyob nrog Nws hauv peb tus Vajtswv lub nceeg vaj mus tas ib txhis, los ntawm Yexus Khetos lub npe, amees.